Tom tŭ kơno tus bơta “dơrcùl lơngơr”, digơlan ò gơs cau lơi chò-hòp. Kòn mơnùs òs gơboh ală bơta lơi rĭng drĭk, gơs rơndap tap sèng mơ buôn-soh rlau mơ ală bơta sơlồng-sơlang. Mơ ya, bơta loh lang la dunnia bol he gam kis gơs oă bơta ò ring-lơngai; mơ gơs tŭ rài kis să tòm he kung bîng bơta dơrcùl lơngơr. Mơ ya digơlan, tài bơh ală bơta hơ̆, bol he dòp geh dô tŭ lơmpah nàng rgơi sền wơl nùs nhơm he mơ đal git bơta gơs mat Yàng dê digùl ală bơta mơ he kơlôi lah sơlồng-sơlàng.

Ngai do, ngai 18/12/2025, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Dianne Neal Matthews bơh tơnggume JỌI BAN YÀNG DIGÙL ALĂ BƠTA DƠRCÙL LƠNGƠR.

“Ne, dô nă cau ơruh rơp bun mơ deh dô nă kòn klau, mơ cau rơp tơmoh sơnđan Kơnràñ la Emanuel; cih tơlik la “Yàng Tom Trồ ơm bal mơ bol he.” (Mathiơ 1:23)

Tom dô trồ mhọ kơnhai 12 dê, añ rgơi sền gọ̆ bơta hòn-chò Ngai Lik Ling dê dô bă loh làng ngan tom tŭ tùng kờp thùng phan bơka bơh di tap hơđang tus ơdŭ wă rò nàc. Bàr nă kòn dềt añ jê sơntòm pò ală thùng nàng sền tom dơlăm gơs ñchi lơi. Lai mơ tŭ lik bơh ơdŭ nàng lơh dô ềt broă, añ tơngkah ală kọn mìng sền lơm, bañ tă phan lơi jơl tus di tŭ jơh hiu nhă sơntòm bơka bal. Añ kòñ bơka chi ñhô mơ hiu he dê dô bă ƀa-liă, gơs rơndap niam, jat kờp cơnoà.

Mơ ya bàr nă kọn añ jê ò kơlôi behơ̆. Mìng dồ ềt phuk tơnơ̆, tom tŭ añ rê wơl ơdŭ wă rò nàc, jơh ală thung neh geh pò, mơ phan bơka bîng jơh hơđơm. Sền gùt dar ơdŭ tŭ hơ̆, añ g̣ọ̆ gơlơh bè cho noel neh gơpừ.

Añ driau dờng: “Kọn sền tĕ dê ală phan sơlồng-sơlàng do!” Mơ ya kọn ùr prăm sơnam añ jê gam ò git bơta lơi, lơbơn niam ho: “Ơi, mơ ya ơ mè, sền ală phan sơlồng-sơlàng do kung niam mat ngan sơl?!”

Sền tom mat bîng bơta kơp kòñ kọn ùr dê, nisơna añ kơlôi tus rùp sơnio ngai Lik Ling dơ̆ sơnròp. Ƀòn dờng Betlehem tŭ hơ̆ digơlan neh sơlồng-sơlàng ngan, tài bơh oă cau bơh ală tiah rê nàng cih sơnđăn mat tom sră. Digơlan ồng mò Jôsep mơ Mari kung neh dơrcùl ngan tài bơh jơh ală hiu ơpah bĭc ò gam tài, tian gơs Yàng Jesu tom tŭ geh deh pal bĭc tom ƀòng ñhơt. Rùp sơnio hơ̆ ò àng gơcrà hala hàng mơnĕ kung be cau òs kơlôi bơh ngai Yàng Lik Ling. Sră Goh cih lah:

“Tŭ hơ̆, bơtau Ôgustơ tơlik dô jơnau gơnoar sồr, sồr jơh ală lơgar dunnia pal cih sơnđan mat tòm sră. Bơta cih sơnđan mat do la dơ̆ sơnròp tòm rài Kirinius la cau kwang đơng lơgar Siri. Jơh tơl nă lik lòt, kòp nă rê hơ ƀòn tòm, nàng cih sơnđan mat tòm sră. Bơh Jôsep la bal mơ hìu nhă jơi bơtiàn Dabit dê, gen kung bơh Nasaret tòm Galile guh hơ Jude, tus hơ ƀòn dờng Dabit, sơnđan la Betlehem, nàng cih sơnđan khai mơ sơnđan Mari, la cau neh ho bau mơ khai, cau hơ̆ gam bun. Tòm tŭ bol khai ơm tềng hơ̆ gen ngai Mari deh neh tus. Khai deh kòn klau tơnhoa, ai ồi klơm, mơ tơmbic tòm bòng ñhơt, bơh hìu ơpah bic ò gơs tiah bol khai in ơm.” (Luka 2:1-7)

Mơ ya, digùl ală bơta kơlôi lah dơrcùl lơngơr hơ̆, bơta rơndap tap sèng sùm sùm Yàng Tom Trồ dê neh geh rang tơlik. Yàng Jesu la sèng ho jơh dunnia gơkòl tồi glài lơh bơ̆ bơl mơ bơcah lê-lăc. Bơtau Bar Bơh Trồ neh mùt tom dunnia, soh rùp să be kòn mơnùs, lik ling tom ƀòng ñhơt dô bă pơndềt să. Mơ hơ̆ la bơta crih-crài ngài Yàng Lik ling dê: tom tŭ Bơtau Gam Sùm Sùm neh gơlik gơs dô nă Kòn Dềt.
Rlau mơ bar rbô năm neh rlau, mơ ya dunnia ò gơs bơta tơmgơl oă. Kòn mơnùs kư pơnjat lơh sơlồng-sơlang jơh ală bơta, lơh bơta jê-sồt moat-jrùng mơ kong bơta jê-sồt moat-jrùng. Bol khai kư joi jat dô rài kis gơs gơtha mơ hòn-chò, mơ ya ò joi tom Yàng Jesu, mơ ya joi tom ală bơta gơrê hơ dunnia do.

Nùs nhơm añ git ưnngai Yàng Jesu tài bơh Kơnràñ neh têh dờng, neh kis dô rài kis wĭl tơl, mơ rcang sir nàng kong chơt hơđăng chi pơng nàng tom sir dồs bơta tồi glài dunnia dê. Tơnơ̆ mơ tŭ kis wơl, Kơnràñ guh rê hơ trồ tiah gơklŏ; mơ ting hơ̆, Kơnràñ rcang sir dô bă tiah ơm sùm sùm jơh ală cau in dòn dòp Kơnràñ.

Gơs tŭ, bơh bơta sàng goh mơ ò git bơta lơi dô nă kọn dềt dê neh dọ̆ng añ gơs dô bơta sền gŏ pa wơl bơh Ngai Lik Ling, mơ tơngkah añ bơta lơi la dờng mang rlau jơh. Lik ling ò di mìng la chi ñhô ryŭ ryơm hala hiu tŭm geh bơka dô bă àng gơcrà, kung ò di la ală bơta pơjum sa dờng hala ală phăn ai goì geh klơm dô bă hang mơnĕ, mơ ya bol he mìng rgơi git lam dô kơnhai Lik ling gơs gơtha tom tŭ bol he khin cha sền dê ală bơta dơrcùl lơngơr tom rài kìs he dê, mơ wèt mat he dê hơ Yàng Jesu, đal git Kơnràñ la Bơtau Dong Klàs rài kis he, la Kòn Sàng Goh neh geh ho ai bơh rbô năm lai or.

“Ne, dô nă cau ơruh rơp bun mơ deh dô nă kòn klau, mơ cau rơp tơmoh sơnđan Kơnràñ la Emanuel; cih tơlik la “Yàng Tom Trồ ơm bal mơ bol he.” (Mathiơ 1:23)

Dan jà bol he dô nùs bal tòm bơta hòi dan: Khoai Yàng Jesu, Bơtau Dọ̆ng-Klàs kọn dê. Digùl ò git nđò bơta dơrcùl lơngơr rài kis dê, kọn đal git nùs nhơm kọn dê gam oă bơta mơ roh ring-lơngai. Dan Yàng dọ̆ng kọn git joi jat Kơnràñ jơh nùs, nàng kọn rgơi geh tìp Kơnràñ, geh Kơnràñ lơh pa rài kis kọn, sơntòm bơh di kơnhai Lik Ling do. Kọn jơh nùs hòi dan tom sơnđan Yàng Jesu Krist, A-men.

Ơ jơh ală ồng mò, oh mi kòñ gơboh, digùl ală bơta dơrcùl lơngơr mơ roh ring-lơngai dunnia dê, dà lơgar mơ rài kis ìs, Yàng Jesu gam tơlik mat mơ ai bơta kis bîng liu jơh ală cau lơi joi jat Kơnràñ. Gen tang, tom kơnhai Lik Ling do, Yàng kòñ bol he pal prap gar tĕ dô nùs nhơm ƀă-liă nàng rgơi joi mơ geh tìp Kơnràñ; pleh ìng bơh ală bơta nggồr-nggàc gùt dar mơ ơn tŭ jơ nàng kơlôi sơnơng bơh bơta Lik Ling Kơnràñ dê. Kung behơ̆ sơl, sền wơl ală bơta dơrcùl lơngơr tom rài kis ìs cau dê bal mơ hwềng nùs oh mi, dan Kơnràñ tom pơrgơl pa mơ dong kơl oh mi rcang sir nùs nhơm nàng wă rò Yàng Lik Ling.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.