Koob tsheej Tswv Yexus yug yog lub caij uas tib neeg pheej hais txog ntawm ob lo lus kaj siab. Qhov uas lo lus foom kaj siab dhau los swm los vim nyob hauv txhua tus lub siab yeej ntshaw kom tau kev kaj siab. Kaj siab tsis yog tsuas yog thaum lub ntiajteb tsis muaj kev tsov rog, tiamsis yog kev zoo siab hauv lub siab nyob ntawm tej nthwv cua daj cua dub hauv lub neej. Nyob hauv lub ntiajteb puv npo kev tsis tso siab, tib neeg yuav nrhiav kev kaj siab tiag nyob qhov twg?

Hnub no, yog hnub 19/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Katy Kauffman dhau ntawm Zaj kawm KAJ SIAB HAUV KOOBTSHEEJ TSWV YEXUS YUG.

“Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai” (Yauhas 14:27).

Kwv yees li ib xyoo dhau, kuv tsev neeg raug pw hauv tsev tshuaj li 10 hnub, thiab muaj tej hnub kuv yoo dabntub tsheej hmo tu kuv tsev neeg. Thawj hmo nyob hauv tsev tshuaj, kuv tsuas tau pw li 30 feeb ntawm cov rooj tas yuav tau zam chaw rau lwm tus so. Kuv zaum ntawm lub rooj nyob ntawm lub txaj tus muaj mob pw, ua tib zoo saib tus mob pw tsaug zog. Lub sijhawm ntawd, kuv ke saib, ke thov Vajtswv.

Hnub tomqab kuv paub tias kuv yuav tau los tsev so thiaj muaj zog tu tsev neeg, tiamsis kuv ho tsis xav tawm hauv tsev kho mob mus. Tsuas yog xav txog tsam muaj dabtsi tshwmsim thaum uas kuv tsis nyob ntawd xwb kuj txaus ua rau kuv tsis kaj siab. Yog li, kuv thiaj thov Vajtswv thiab nug Vajtswv tias kuv puas zoo mus tsev. Xwbtim, kuv lub siab tau ntuas kuv tus txheeb ze yeej tseem tso siab. Kuv paub tsev kho mob lawv tu zoo, tiamsis kuv kuj nkag siab tias Vajtswv tab tom tuav kuv tus txheeb ze ntawm Vajtswv txhais tes.

Koob tsheej Tswv Yexus yug xyoo no, peb thov rau tsev neeg, rau peb tej txheeb ze kom tau kaj siab thiab muaj zog. Peb ntshaw kom muaj kev ywj pheej hauv ntiajteb thiab kaj siab hauv lub siab. Tiamsis tseeb tiag peb tab tom ua neej nyob rau lub ntiajteb puv npo kev txomnyem, kev tsov kev rog thiab kev tsis sib haum. Txawm li los, Tswv Yexus cog lus rau peb yuav pub kev kaj siab rau peb. Tswv Yexus hais tias: “Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai” (Yauhas 14:27).

Thaum Tswv Yexus los yug, cov timtswv ceeb tsheej hais tias: “Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug” (Lukas 2:14). Thaum Tswv Yexus los yug, lub ntiajteb cheem tsum kev kaj siab heev, thiab tau ob txhiab xyoo tom qab, txoj kev cheem tsum no yeej tsis hloov pauv. Txawm yog yuav nyob rau tiam twg los, tib neeg yeej ntshaw kom muaj kev kaj siab tiag. Epictetus, ib tug tub txawg neeg Kilis tau hais tias: “vajntxwv muaj cuab kav ua rau kom hauv ntiajteb no thiab hiav txwv muaj kev ywj pheej, tiamsis yawg tso tsis tau tib neeg dim ntawm txoj kev ntshaw, nyuaj siab thiab sib ntxub. Yawg pub tsis tau kev kaj siab rau tib neeg nyob hauv lawv lub siab, yam uas lawv ntshaw tshaj yog kev kaj siab sab nraud.” Epictectus taw ib qhov tseeb tias: tib neeg yeej ua tsis tau li cas nyob hauv txoj kev nrhiav kom tau kev kaj siab tiag.

Qhov nruab nrab ntawm txhua tus tib neeg lub siab tsuas tau txhawm kom puv nkaus los ntawm vajntxwv Yexus, yog tus uas hais tias Nws pub txoj kev kaj siab rau peb “tsis zoo li ntiajteb pub”. Thaum cov timtswv qhia txoj kev kaj siab rau ntiajteb, qhov ntawd muaj lub ntsiab tias tib neeg yuav txais tau kev kaj siab tiag thaum lawv tau rov qab nrog Vajtswv sib raug zoo ua ke dhau ntawm Tswv Yexus. Thaum ib tug neeg txais yuav Tswv Yexus rau hauv lawv lub siab, lawv tsis raug khi ua ke nrog kev txhaum thiab kev txhawj ntshai, tiamsis muaj kev cia siab thiab txojsia tshiab. Lawv lub siab yeej kaj siab nyob hauv tej kev txomnyem, muaj tsis txaus, nyob ib leeg, lossis tag kev cia siab. Kev kaj siab tiag nthuav tawm meej meej nyob hauv cov neeg lub siab muaj tus metub hauv Npelehees ua tus Tswv.

Thaum peb muab kev ntseeg tso rau ntawm Tswv Yexus, Nws txoj kev kaj siab yuav tiv thaiv peb. Txoj kev kaj siab ntawd yuav tseg rau peb txhua tus, tiamsis peb yuav tau qhib siab los txais yuav. Thiab thaum txais yuav lawm, peb thiaj paub tias yus tab tom muaj Vajtswv nrog yus nyob thiab pab peb txhua lub caijnyoog. Tswv Yexus tsis pub kev kaj siab ib vuag rau peb, tiamsis pub kev kaj siab ruaj khov, sov so, puv npo hwjchim.

Nyob ntawm tej kev sim siab thiab tsis tso siab hauv lub neej cia siab tias koj yuav nrhiav tau Tswv Yexus “Kev kaj siab siab tshaj txhua txoj kev nkag siab” (Filipis 4:7). Peb muaj cuab kav ua neej nyob hauv txoj kev kaj siab vim Vajtswv twb cog lus yuav pub qhov ntawd rau peb. Peb muaj cuab kav so hauv Vajtswv, vim paub tias Vajtswv yuav pab, yuav foom hmoov thiab tiv thaiv peb hauv Nws txhais tes.

Thov caw nrog kuv peb thov Vajtswv ua ke: Tus Tswv uas muaj kev hlub, kuv ua Koj tsaug vim nyob hauv ntau yam kev tsis kaj siab hauv lub neej, kuv yeej nrhiav tau Koj nyob hauv tej lus txhawb zog tias “nej txhob txhawj thiab txhob ntshai”. Thov pab kom kuv ua neej vam khom rau koj, txawm yog thaum kuv nyob rau hauv tej kev sim siab uas loj tshaj, kuv yeej txais tau txoj kev kaj siab thiab Vajtswv ua tus coj. Kuv thov hauv Tswv Yexus Khetos lub npe, Amees.

Cov kwv tij txhua tus, koob tsheej Tswv Yexus yug twb ib qhib tiam kev kaj siab rau tag nrho tib neeg ntiajteb. Thaum paub tias yus twb txais tau txoj kev kaj siab los ntawm Vajtswv los, peb kuj tau caw los qhia rau lwm tus paub txog txoj kev kaj siab ntawd.

Koj puas paub leej twg tab tom ua neej nyob ib leeg thiab tsis muaj kev kaj siab? Koj puas pom leej twg tab tom mus nrhiav lub ntsiab tiag hauv lub neej tiamsis tsis tau muaj ib zaum twg nrhiav tau? Txhob tig nruab qaum rau lawv lub neej, tiamsis yuav tsum xub nrhiav thiab qhia Tswv Yexus rau lawv, kom lawv txais tau kev zoo siab thiab kev kaj siab tiag nyob rau hauv koob tsheej Tswv Yexus yug xyoo no.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.