Yog tias muaj ib hnub Vajtswv hu peb “tso peb lub vas” thiab nrog Nws mus, Peb puas txaus siab? Cov thwjtim thaum ub lub vas yog ib tes haujlwm, yug tau lawv, yog ib qho haujlwm uas lawv yeej swm heev. Peb cov neeg tiam no “lub vas” tej zaug yog tej uas peb saib muaj nqis, puab rau ntawd kom ruaj. Ntawd yog tej yam uas ua twj ywm tuav peb ko taw, ua rau peb ua zuj zoj rau Vajtswv lub suab hu. Yog tias thaum Vajtswv tsa suab hu, koj puas yuav tso tseg txhua yam thiab mus lawv Nws qab?

Hnub no yog hnub 21/3/2026, kev thov Vajtswv txhua hnub thov caw sawv daws nrog kawm Vajtswv txoj lus ua ke nrog tug sau Martha Noebel txog lub ntsiab lus: TSO VAS MUS LAWV TUS TSWV QAB

“Neb cia li nrog kuv mus, kuv yuav qhia kom neb paub mus nrhiav neeg.” (Mathais 4:19)

Txhua phoo Moo Zoo tham rau peb paub txog lub neej ntseeg, dhau cov neeg thawj thawj uas tau ntsib Tswv Yexus. Ua ntej uas tus Tswv pib ua dej num tshwm rau sawv daws pom, Nws kuj ntsib ntau kev sim siab xws li: Yoo mov, ntsib kev sim siab ntawm dab ntxwg nyoog. Tiamsis tej lub sijhawm ntawd kuj yog lub sijhawm cob qhia Tswv Yexus, pab rau Nws npaj siab pib nqis tes rau tes haujlwm uas tau Vajtswv hu.

Tswv Yexus yeej paub tias yog xav kom Nws tes dej num nthuav dav ces yuav tsum muaj cov neeg uas txaus siab nrog Nws mus. Tom qab no, lawv yuav yog cov uas tshaj tawm thiab qhia txog Txojmoo Zoo. Yog li, Tswv Yexus thiaj hu: “Cia li nrog Kuv mus”. Ob tug kwvtij uas Nws ntsib ua ntej yog lawv tabtob ua lawv tes haujlwm uas swm txhua hnub: yog ntaus ntses nram haiv txwv. No yog lub suab hu kom yuav tsum tso tseg: tso vas tseg, tso kev ua noj ua haus tseg thiab mus rau tes haujlwm uas tus Tswv twb npaj rau lawv. Tom qab, Tus Tswv ntsib ob tug kwvtij ntxiv thiab tabtom xaws vas saum nkoj, thiab lawv kuj txais tau tib lo lu hu li ntawd. Lawv tau hu los rau ib lub neej tshiab, yog ua “mus nrhiav neeg.” Vajluskub sau luv tiamsis muaj zog heev: “Ob tug txawm ncaim lub nkoj thiab nkawd txiv thiab nrog Tus TSwv mus.”

Lo lus nqua hu ntawd tau qhia tawm hauv Mathais 4:17b ““Nej cia li tso nej tej kev txhaum tseg, rau qhov Ntuj Ceebtsheej twb los ze lawm!”

Thaum kawwg, cov uas tau hu thiaj dhau los ua kaum ob tug thwjtim. Lawv yog cov uas txaus siab tso tag txhua yam thiab coj Vajtswv Txojmoo Zoo mus rau cov neeg uas ua yuam kev. Txojmoo zoo tau coj mus rau txhua tus uas xav hnov. Lawv tsis khuv xim vim tau tso vas tseg, tso haujlwm tseg, lossis tso tsev neeg phoojywg tseg. Tiamsis lawv tseem nrhiav tau kev zoo siab ntawm lawv tug xibhwb thiab tau tawm suab tshaj tawm txojmoo zoo. Ntau lub neej tau hloov pauv thiab lub ntiajteb uas quaj ntsuag txomnyem tau qhov Kaj ci mus rau hauv.
Hais li ntawd tsis yog txhais tias peb yuav tsum tawm hauv tsev mus thiab mus rau txhua qhov tshaj tawm txojmoo zoo, tsis los tsev li lawm. Tiamsis Vajtswv tabtom hu peb xav txog nws lub suab hu peb. Thaum peb thov Vajtswv zam peb tej kev txhaum thiab caw Nws nkag los hauv peb lub siab, thaum ntawd peb lub neej yuav tsum nrog nws mus txhua hnub. Peb kawm ntawm Vajtswv txog kev ua neej, kev hlub, kev qhia tawm Nws tus yam ntxwv, kom dhau ntawd tib neeg yuav pom tej yam zoo uas Vajtswv tau muab pub rau peb.

Kalatias 5:22 qhia rau peb pom ib daim duab meej meej txog lub neej zoo ntawd: “lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj.”

Zoo li cov thwjtim thaum ub, peb kuj tau hu kom “tso yus lub vas tseg” yog: tej kev xav qub, kev swm qub, lub neej uas tsis haum Khetos siab. Peb hla mus rau ib lub neej tshiab: yog lub neej twb paub Vajtswv lawm. Thaum peb lub siab tau puv npo kev zoo siab thiab kaj siab, lwm tus yuav pom qhov txawv ntawm peb. Ntseeg siab rau Vajtswv thiab mus lawv Nws lub siab nyiam yog lub cim ntawm ib tug ntseeg tiag.

Thaum peb tig rov qab mus saib yus tug kheej, yuav muaj tej qhov cheemtsum kev loj hlob, tej kev sim siab yuav tau ntsib. Tiamsis tseemceeb tshaj txhua yam yog ib lub siab xav nrog tus Tswv mus tiag tiag txhua hnub. Thiab lo lus hu ntawd twb tseem nrov tuaj rau peb txhua tus: “Cia li nrog Kuv mus”

Thov caw nrog kuv peb thov Vajtswv ua ke: Tus Tswv, muaj ntau zaug kuv hais tias kuv nrog Koj mus, tiamsis kuv lub siab tseem tuav ruaj nrees tej yam khoom uas kuv cia siab rau hauv ntiajteb no. Thov Koj qhia rau kuv paub meej tej yam uas tabtom khuab kuv txhais ko taw. Thov pab kom kuv ua tau siab tawv tso tag txhua yam thaum Vajtswv Koj hu kuv, thiab muaj ib lub siab mog muag cia siab rau ntawm Koj txhua hnub. Thov Koj pab kho kuv tej kev xav, hloov pauv kuv lub neej kom kuv yim hnub yim zoo thooj li Tswv Yexus dua. Cia siab tias kuv lub neej yuav cim tawm Vajtswv txoj kev zoo siab thiab kaj siab, kom lwm tug paub Koj dhau kuv lub neej. Kuv taij thov txhua yam hauv Tswv Yexus Khetos lub npe, Amees.

Ib tsoom phoojywg, nrog tus Tswv mus tsis yog tsuas txiav txim siab ib zaug ces txaus lawm. Ntawd yog lub neej ib hnub kawm tso tseg “tej vas” qub thiab ntseeg siab rau Vajtswv ntau dua. Tej zaug peb tsis tau kam ua ib zaug tso tag txhua yam tamsim. Tiamsis Vajtswv pom lub siab uas ntshaw nrog Nws mus, txawm yuav muaj kev txhawj kev ntshai. Vajtswv yuav zoo siab thaum pom peb xaiv mus ib kauj ruam ntxiv hauv kev mloog lus, teb Vajtswv lub suab hu. Thov kom txhua zaug Vajtswv hu peb yuav muaj txaus zog thiab lub siab tawv teb Vajtswv lub suab los ntawm tagnrho peb lub siab, peb lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected].