Tus tub rog yog ib daim duab uas peb pom ntau hauv lub neej txhua hnub. Tej zaum peb twb tau pom thiab qhuas tej tub rog uas muaj zog, sawv raws kab ke zoo, hnav tsoos tsho huv si, thiab tseem ceeb tshaj yog lawv lub siab muaj kev cai nruj. Tej zaum koj tsis tau pom, tiamsis txij thaum koj ntseeg Tswv Yexus lawm, koj twb los ua ib tug tub rog nyob hauv Nws pab tub rog lawm thiab. Tiamsis nyob hauv lub neej uas muaj ntau yam haujlwm thiab kev nyuaj no, muaj ntau zaus peb tsis tau ua neej zoo li ib tug tub rog zoo rau tus Tswv. Yog li peb yuav tsum nco ntsoov dabtsi?

Hnub no, hnub tim 22/03/2026, Kev Thov Vajtswv Txhua Hnub thov caw nej sawvdaws los kawm Vajtswv txojlus nrog lub ntsiab lus: KHETOS TUG TUB ROG ZOO.

“Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees.” (2 Timaute 2:3)

Txhua xyoo, muaj ntau txhiab tus hluas nyob hauv ntau lub tebchaws raug hu kom mus ua tub rog pab lub tebchaws. Qhov no yog ib feem haujlwm ntawm pej xeem, thiab kuj yog ib lub sijhawm uas pab kom cov tub rog hluas no tau xyaum, loj hlob thiab pab tiv thaiv lub teb lub chaws.

Nyob rau sab ntsujplig, txij thaum peb ntseeg Tswv Yexus, txhua tus ntseeg Vajtswv kuj raug hu kom los koom nrog Tswv Yexus pab tub rog dawbhuv. Daim duab ntawm tus tub rog pab kom peb nco txog tej lus uas timthawj Paulus tau qhia rau Timautes tias: “Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees. 4Rau qhov tus tubrog uas tabtom mus ntaus rog, nws yeej ua raws li nws tus thawj tubrog lub siab nyiam xwb, nws yuav tsis mus ua liaj ua teb thiab ua lag ua luam ib zaug li.” (2 Timaute 2:3-4)

Paulus qhia tias tus tub rog ntawm tus Tswv tsis yog thaum twg twb tau nyob kaj siab xwb, tiamsis yuav tsum npaj siab “raug kev txomnyem”. Yog peb saib lub neej tiag tiag ntawm tus tub rog hauv ntiajteb: lawv lub chaw nyob yuav tsum huv thiab raws cai; sawv ntxov raws sijhawm; noj raws sijhawm; xyaum hnyav; ua haujlwm khwv heev; txawm yog so los kuj muaj sijhawm teem. Yog ib tug tub rog hauv ntiajteb tseem yuav tsum ua neej muaj kev cai li ntawd, ces tus tub rog ntawm Khetos puas yuav ua neej ywj siab tsis muaj kev cai tau?

Thaum Paulus sau tej lus no, nws tabtom raug kaw thiab raug khi vim nws tshaj tawm txoj moo zoo. Hauv qhov xwm txheej ntawd, nws tsis qhia kom Timautes ua ib tug tub rog yooj yim, tiamsis kom ua ib tug tub rog zoo thiab siab tawv ntawm Khetos. Vim nws paub tias tsuas yog tus tub rog zoo xwb thiaj sawv taus thaum ntsib kev nyuaj ntawm Vajtswv tej haujlwm, tshwj xeeb tshaj yog nyob rau tiam kawg.

Kom ua tau ib tug tub rog zoo, Paulus qhia ib txoj kev, yog yuav tsum tsom ntsoov, tsis pub “tej haujlwm hauv ntiajteb” los cuam tshuam. Nyob rau lub sijhawm ntawd, cov tub rog Loos tsis raug pub koom tes nrog tej haujlwm pej xeem, txawm yog kev yuav poj niam los kuj tsis pub thaum tseem ua tub rog, kom lawv tsom ntsoov rau lawv txoj haujlwm. Ib yam li ntawd, tus tub rog ntawm Khetos yuav tsum ceev faj kom tsis txhob cia “tej haujlwm hauv ntiajteb” los txwv nws. “Tej haujlwm hauv ntiajteb” yog txhua yam uas ua rau peb muab saib tseem ceeb dua li Vajtswv lub suab hu, ua rau peb tsis teb Nws lub suab hu.

Tiamsis vim li cas peb thiaj kam tso peb txoj kev xis nyob tseg thiab nkag los rau hauv tej kev cai nruj li ntawd? Lub homphiaj kawg uas peb ua txhua yam no yog dabtsi? Paulus hais tias: “Yog kom ua tau raws li tus uas hu peb los lub siab nyiam.” Tej zaum thaum Paulus nyob hauv tsev lojcuj thiab sau tej lus no, nws to taub tias lub hom phiaj ntawm tus neeg ntseeg yog kev mloog lus thiab ua kom Vajtswv txaus siab.

Tswv Yexus yog Tus Hu loj tshaj. Nws tau muab Nws txoj sia los txhiv peb rau saum ntoo khaublig kom peb los ua Nws pab tub rog. Qhov khoom plig loj tshaj rau tus tub rog ncaj ncees tsis yog tau yam dabtsi hauv ntiajteb no, tiamsis yog cov lus qhuas ntawm Nws: “‘Zoo heev, koj yog tus tubtxib uas zoo thiab ncaj ncees!!’” (Mathais 25:21)

Txhua hnub, peb tseem nyob hauv Tswv Yexus pab tub rog thiab tseem xyaum peb lub neej sab ntsujplig. Muaj tej kev xyaum nyuaj heev, muaj tej kev cob qhia nruj heev, yog thaum peb txojkev ntseeg raug sim, thaum raug kev ntxias, raug kev txhaum rub, lossis thaum lub neej hnyav dhau. Tiamsis nco ntsoov tias txhua yam kev xyaum ntawd muaj ib lub hom phiaj xwb, yog ua kom tus uas hu peb los txaus siab. Nyob hauv pab tub rog ntawd, peb tsis nyob ib leeg, tiamsis peb paub tias Tus Tswj tseem hlub peb thiab coj peb hauv Nws txoj kev hlub. Hauv txhua yam kev nyuaj, peb cia li ntsia rau Nws, vim peb paub tias Nws twb mus ua ntej thiab twb raug kev txomnyem rau peb lawm.

“Vajtswv tus uas muaj hwjchim yog tus uas saib xyuas nej kom nej tsis txhob yuam kev, thiab thaum ntawd nej yuav tsis muaj ib qhov txhaum thiab nej yuav zoo siab kawg nkaus li.” (Yudas 1:24)

Thov caw nrog kuv peb thov Vajtswv ua ke: Tus Tswv, kuv ua Koj tsaug vim Koj tau hu thiab xaiv kuv los ua Koj tus tub rog. Thov pab kom kuv tsis txhob txaus siab rau kuv lub neej, tiamsis thov pab kom kuv kam mus rau hauv Koj txoj kevcai nruj thiab kam raug kev txomnyem vim Koj. Thov pab kom kuv tsom ntsoov rau ib lub hom phiaj xwb hauv kuv lub neej, yog ua kom Koj txaus siab, txawm nyob hauv qhov xwm txheej twg los. Kuv taij thov txhua yam los ntawm Khetos lub npe, Amees.

Ib tsoom phoojywg sawvdaws, peb txhua tus raug hu kom los ua ib tug tub rog zoo ntawm Khetos. Yog li ntawd, cia peb teeb tsa kev cai rau peb lub neej sab ntsujplig, pib ntawm kev nyeem Vajtswv txojlus thiab thov Vajtswv txhua hnub. Qhov thib ob, cia li tso tseg yam twg uas ua rau koj txoj kev sib raug zoo nrog Vajtswv raug thaiv, tej zaum yog ib yam cwj pwm, ib yam kev nyiam, lossis lwm yam. Thaum kawg, cia li tawm tsam rau Vajtswv hauv koj tsev neeg, hauv koj chaw ua haujlwm, thiab hauv koj qhov kev kawm nrog tag siab. Ua siab tawv qhia txog Tus Tswv dhau koj lub neej ib yam li ib tug tub rog uas ua siab tawv rau txoj moo zoo.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected].