Tơdah đei minh năr Kră Yang krao lu bơ̆n “achăng lê̆ jal” wă kiơ̆ Sư, lei lu bơ̆n hăm wă kiơ̆ hloi ưh? Dôm lu jal đơ̆ng jơ̆ng ‘bang noh sơ̆ jơ̆ tơdrong jang, jơ̆ tơdrong bơ̆jang sa, jơ̆ đei tơdrong jang kơjăp juăt kơ bơ̆jang. Na “jal” lu bơ̆n hrei âu rŏ lăng dôm tơdrong mă lu bơ̆n gĭt, chĕp ba hloi wă kơ hơđơ̆ng. Noh jơ̆ dôm lu tơdrong chô̆ lu bơ̆n, pơm kơ lu bơ̆n ưh kơ ‘maih wă kiơ̆ Kră Yang. Rŏ lăng kơplah Kră Yang krao, buăl gô achăng lê̆ tôm tơdrong na kiơ̆ hloi Sư ưh?

Năr ‘nâu, ‘năr 21/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai ACHĂNG LÊ̆ JAL WĂ KIƠ̆ KRĂ YANG

“Na Yêsu khan kơ bre sư: “Bĕ bơ̆n kiơ̆ Inh na Inh pơchĕp ăn kơ biĕm tơdrong jang traih bơngai.” (Mathiơ 4:19)

Sơ̆p hla bơar ‘Bok Kei-Dei đei chih roi ăn kơ lu bơ̆n mơ̆ng kơtơ̆ng gah tơdrong arih Bơngai Lui kơ ‘Bok Kei-Dei, đơ̆ng lu bơngai blŭng a tơ’bơ̆p Yang Yêsu. Hơdrol kơ wă bơ̆jang, đơ̆ng Yang Yêsu kư̆m đei hlôi mơn lơ tơdrong pơlong lăng lăm chăl arih Sư; dôm kơ lu năr ơ̆t kơ por, tơ’bơ̆p dôm lu tơdrong pơhlŭ đơ̆ng Satan. Na tơm kơ đơ̆ng tơdrong pơmat tat noh đei hơjơ̆m hơ met Sư yak năm lăm tơdrong bơ̆jang mă ‘Bok Kei-Dei krao.

Yang Yêsu băt kơ thoi âu, wă kơ tơdrong Sư rai lanh să, kăl kơ đei bơngai yak năm hơdai Sư. Ning mônh gô jing đei bơngai pơtrơp tơdrong ră roi, bơtho tơdrong ‘Nao ‘Lơ̆ng. Yua kơ thoi noh, Sư pơtơm krao iŏk: “Kiơ̆ Inh bĕ.” ‘Bar ‘nu bơngai blŭng a Sư tơ’bơ̆p noh ‘bar ‘nu ‘nhŏng oh oei bơ̆jang tơdrong jang juăt kơ jang rim năr: traih jal tơ cheng đak dơsĭ. ‘Nâu jơ̆ tơdrong krao iŏk achăng lê̆: achăng lê̆ jal, achăng lê̆ tơdrong bơ̆jang rim năr juăt kơ jang wă mơ̆t lăm tơdrong jang mă Kră Yang đei hơmet ăn kơ măr sư bơih. Đơ̆ng rŏng kơ noh, Yang Yêsu tơ’bơ̆p ‘bar ‘nu ‘nhŏng oh nai dơ̆ng kư̆m oei sĭt jal kơpal thŏng nan, na măr sư kư̆m đei sơng iŏk nơ̆r krao iŏk noh. Lu sư đei krao iŏk mơ̆t tơ lăm tơdrong arih ‘nao, jing bơngai “traih jal bơngai.” Nơ̆r ‘Bok Kei-Dei chih kơđeh đĕch mă lei pran kơtang dêh: “bre sư ‘blă achăng lê̆ jal bre sư na kiơ̆ hloi Yêsu.”

Đơ̆ng lăm jơhngơ̆m krao iŏk noh đei chih lăm Mathiơ 4:17b: “Iĕm athei tơbral kơdih tôm tơdrong yoch, yua kơ ‘Bok Kei-Dei wă pơgơ̆r iĕm boih.”

Na tuch luch, dôm lu bơngai đei krao iŏk jing jĭt ‘bar ‘nu jơ̆ng ‘bang Kră Yang. Lu sư jơ̆ bơngai achăng lê̆ tôm tơdrong wă ră roi Nơ̆r Kră Yang ăn kơ teh đak wơ̆l jrok. Tơdrong ‘Nao ‘Lơ̆ng đei ră roi ăn kơ đĭ đăng đe bu mă ‘maih mơ̆ng. Lu sư ưh kơ arih lăm tơdrong hmach dơ̆ng yua kơ achăng lê̆ jal bơih, achăng lê̆ tơdrong bơ̆jang, hnam dơnŏ dah bôl buăl. Tơplih kơ noh, lu sư chă ‘bôh tơdrong hiôk chơt tơpă đei pơhrăm iŏk đơ̆ng ‘Bok Thây na đei ră roi tơdrong ‘Nao ‘Lơ̆ng đơ̆ng Sư. Lơ tơdrong arih đei tơplih, teh đak đei chhŭr nuih, hiong răm đei pơchrang hăm tơdrong Hơdah tơpă.

Trŏ bơih, tơdrong ‘nâu ưh kơ sĭ lu bơ̆n weh lĕch đơ̆ng hnam năm jơ̆p kơ anih na ră roi, ưh kơ đei layơ wih brŏk dơ̆ng. Mă lei Kră Yang oei krao iŏk lu bơ̆n lăng minh tơdrong bơ̆n kiơ̆ Sư. Kơplah lu bơ̆n apinh Kră Yang huay kơ jô̆ yo kơ tơdrong yoch bơ̆n păng sơng iŏk Sư mơ̆t lăm jơhngơ̆m, na tơdrong arih lu bơ̆n kư̆m athei kiơ̆ Sư rim năr. Lu bơ̆n pơhrăm iŏk đơ̆ng Sư, pơhrăm iŏk tơdrong ‘mêm mơnat, pơhrăm iŏk tơdrong tơ’bôh tơdrong arih Yang Yêsu Krist, wă kơ đơ̆ng noh lơ bơngai nai ‘bôh dôm lu tơdrong mă ‘Bok Kei-Dei đei ‘măn bơih ăn kơ lu sư.
Galati 5:22 tơ’bôh kơ lu bơ̆n rơđah dêh tơdrong arih noh: “Mă-lei plei Yang Bơhngol ‘Lơ̆ng đei: ‘Mêm mơnat, chơt hiôk, hơđơ̆ng, kĕ chơ̆n, gơh tơgŭm, iơ̆m dim, tơnăp.”

Nhen thoi lu jơ̆ng ‘bang sơ̆, lu bơ̆n đei krao iŏk “achăng lê̆ jal” kơdih bơ̆n: dôm kơ tơdrong tơchĕng so, dôm kơ tơdrong juăt so, dôm tơdrong arih ưh pă trŏ lăp bơih lăm trong yak năm kiơ̆ Yang Yêsu Krist. Lu bơ̆n yak năm kiơ̆ tơdrong arih ‘nao: tơdrong arih băt kơ Kră Yang. Kơplah tơdrong arih lu bơ̆n đei hiôk chơt păng rơnŭk rơnoa, bơngai nai gô ‘bôh tơdrong pha ra noh. Lui gơnang kơ Kră Yang păng yak năm kiơ̆ trong Sư noh tơ’bôh Bơngai Lui tơpă.

Kơplah lu bơ̆n lăng ming kơdih akâu, gô ‘bôh kơ tơdrong kăl kơ wơ̆ ‘lŏ, dôm tơdrong pơlong lăng gô ‘bơ̆p. Mă hơdrol hloh jơ̆ jơhngơ̆m kiơ̆ Kră Yang rim năr. Păng nơ̆r krao iŏk noh oei ling lang ôr jơwa, ăn kơ rim ‘nu lu bơ̆n năr ‘nâu: “Kiơ̆ Inh bĕ.”

Apĭnh đĭ đăng krao khan hơdai: Kơkuh kơ Kră Yang, đei lơ wơ̆t kon pơma kon kiơ̆ Ih, mă lei lăm jơhngơ̆m kon oei chĕp kơjăp dôm lu tơdrong kon oei gơnang kơ lăm teh đak ‘nâu. Apinh Kră Yang pơchrang hơdah kơ kon ‘bôh dôm tơdrong oei chô̆ jơ̆ng kon. Apinh ăn kơ kon đei jơhngơ̆m pơ̆n nuih achăng lê̆ tôm tơdrong kơdih kơplah kiơ̆ Yang Yêsu krao, kư̆m đei minh jơhngơ̆m rơ muăn wă kơ lui gơnang kơ Ih rim năr. Hơpơi kơ Kră Yang ‘bơ̆ tơdrong tơchĕng kon, tơplih tơdrong arih kon, wă kơ kon đei tơdrong arih rai nhen Yang Yêsu hloh. Hơpơi kơ tơdrong arih kon pơchrang tơdrong hiôk chơt păng rơnŭk rơnoa đơ̆ng Ih, wă kơ bơngai ‘bôh Ih đơ̆ng lăm kon. Kon kŭp kơ̆l krao khan hăm anăn Yang Yêsu Krist, A-men.
Ơ lu bơngai mơ̆ng mă ‘mêm kơ eng, kiơ̆ Kră Yang ưh kơ sĭ drơ̆ng iŏk minh ‘măng na tôm hloi ôh. Noh jơ̆ trong yak năm rim năr pơhrăm iŏk achăng lê̆ “jal” so păng lui gơnang kơ Kră Yang lơ hloh dơ̆ng. Rŏ lăng lu bơ̆n tam mă achăng lê̆ tôm tơdrong dang ei hloi. Mă lei Kră Yang ‘bôh lăm jơhngơ̆m rơhing ‘maih wă kiơ̆ Sư, mă khan oei hli dah ngĭl ngŭl. Sư hiôk dah ‘bôh lu bơ̆n rơih iŏk minh yak năm lăm tơdrong chu yom, rơih iŏk tơl nơ̆r Sư krao. Hơpơi kơ kơplah Kră Yang krao, lu bơ̆n đei jơhngơ̆m pơ̆n tơl hăm đĭ chăl arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.