Zoo li daim av muaj nroj tsuag tuaj ntau, muaj tej hauv paus pos nyob hauv lub neej ua rau peb hlob tsis taus, qhuav nkig nkuav, thiab ua rau tawg tsis tau paj. Thaum peb nco txog Tswv Yexus txoj kev tuag nyob rau lub koob tsheej Tswv Yexus raug txomnyem – thiab sawv rov qab los no, Vajtswv kuj cawm kom peb nres, tshuaj peb lub neej, thiab txiav txim siab muab tej hauv paus nroj, hauv paus pos tab tom laum txojsia, ua rau peb loj hlob tsis taus hauv Vajtswv rho pov tseg mus.

Hnub no, yog hnub 23/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kim Anderson dhau ntawm Zaj kawm POS THIAB NROJ

“Av yuav tuaj nroj thiab tuaj pos, thiab koj yuav de nroj tsuag tom tej teb los ua zaub noj.” (Chivkeeb 3:18)

Nyob hauv cov lus foom thawj thawj vim txoj kev txhaum yog nroj tsuag thiab pos tsis yog tsuas hais txog ib daim av yuag xwb. Nws tseem yog hais txog tej uas tab tom ua twj ywm laum tej paj txiv nyob hauv peb lub neej – yeej tsis ua rau kom muaj txojsia, tsuas ua rau muaj kev txomnyem xwb.

“Vajtswv hais rau Adas hais tias, “Twb yog vim koj mloog koj tus pojniam lus thiab noj cov txiv ntoo uas kuv txwv tsis pub koj noj. Vim koj tau ua li ntawd av thiaj raug foom tsis zoo. Koj yuav tau siv zog khwv mus tas simneej, koj thiaj tau noj tau haus. Av yuav tuaj nroj thiab tuaj pos, thiab koj yuav de nroj tsuag tom tej teb los ua zaub noj. Koj yuav ua teb khwv lub hws nrog, koj thiaj tau noj mus txog thaum koj rov mus rau hauv cov av uas koj tawm los. Kuv muab av los puab koj , thiab koj yuav rov mus ua av dua.” (Chivkeeb 3:17-19).

Vajluskub kuj siv daim duab txog tej nroj tsuag, hauv paus pos los hais txog cov neeg phem, cov neeg uas “tej uas lawv tseg cia” tsuas yog kev tu siab thiab iab siab rau lwm tus xwb.

“Yog li ntawd, nimno kuv qhia rau nej hais tias, kuv yuav tsis ntiab cov neeg no tawm ua ntej uas nej mus. Lawv yuav ua yeeb ncuabf rau nej thiab lawv tej vajtswv yuav ua rooj ntxiab caws tos nej kev” (Cov Thawj Tswj 2:3).

Koob tsheej Tswv Yexus raug txomnyem thiab sawv rov qab los yog ncua sijhawm peb cia peb lub siab nyob kom tus, npaj kom txhij lub siab los ua kevcai nco txog Yexus Khetos txoj kev kov yeej kev txhaum thiab kev tuag. Ntawd kuj yog lub sijhawm peb ntsia ncaj nraim mus rau hauv qhov tseeb: twb yog vim peb tej kev txhaum thiaj chob ti nkaus Tswv Yexus sab tav. Peb yog tej pos ntse ntse nyob saum lub kauj taub hau uas muab rau Tswv Yexus ntoo.

Tiamsis Tswv Yexus txoj kev txomnyem thiab sawv rov qab los tsis yog lub sijhawm peb tsau tsawv rau hauv txoj kev khuv xim. Lub ntsiab lus ntawm koob tsheej Tswv Yexus yug ntuas kom peb nco ntsoov tias tej hmab pos foom tsis zoo ntawd yeej tsis muaj cai yuav laum peb lub neej mus li. Nyob hauv Yexus Khetos, peb tau yug dua tshiab, dhau los “zoo li tsob ntoo nyob ze ntawm ntus dej, tawg paj txi txiv raws lub caijnyoog…” (Ntawv Nkauj 1:3).

Yog li, Yexus Khetos raug txomnyem thiab sawv rov qab los kuj yog lub sijhawm cia rau peb rho tej hauv paus pos ntawd.

Txoj kev ua kevcai yoo mov rau lub caij Tswv Yexus raug txomnyem thiab sawv rov qab los tsis yog cia peb yws yus tus kheej, lossis siv zog “kom yus txomnyem ib me ntsis” kom tas kevcai. Qhov uas ua kevcai yoo mov tau muab pub zoo li ib txojcai, pab kom peb xeev thiab muaj zog rho tej yam uas tab tom laum peb lub neej sab ntsujplig. Ntawm no yog lub sijhawm peb yuav tau ntsib tej kev txhaum uas ib txwm swm, tej yam uas pheej ncig mus ncig los, ua rau loj hlob tsis taus.
Yam uas Vajtswv caw peb tsis yog tsuas tso tseg qee tus cwjpwm twg ntawd. Qhov tseem ceeb yog yuav tau kawm tso tseg tej uas yus tab tom vam khom pauv qhov uas pheeb rau ntawm Vajtswv. Tej zaug yog tus cwjpwm qub, ib qhov kev pheeb rau lwm tus, lossis ib txoj kev ua kom yus lub siab zoo thaum qaug zog. Koob tsheej no tsis nqua hu kom peb ua neej nrog txoj kev quaj ntsuag lossis “cim civ tsim txom tus kheej” kom zoo li neeg zoo. Ntawd yog lub sijhawm caw koj nkag los rau hauv ib txua kev txiav txim siab, muab tej yam uas tab tom ua kom peb kev sib raug zoo nrog Vajtswv tuag zuj zus tshem mus. Thaum kawg, lub homphiaj tsis yog cia kom peb muaj tsis txaus, tiamsis yog cia kom peb txais tau ntau dua – ib lub neej nplua mias nyob hauv Nws.

Nyob hauv peb tsev neeg, txhua hnub pib los ntawm lub sijhawm thov Vajtswv thiab qhia Vajluskub. Ua ntej yuav txog koob tsheej Tswv Yexus raug txomnyem, peb koom txiav tej paj muaj pos thiab muab khi ua tsheej teg nqa los rau hauv tsev. Tej tsob pos ntse ntse ntawd dhau los ua qhov kev mob ncus nco txog kev txhaum. Peb thov Vajtswv qhia rau kom peb paub txog yam dabtsi tab tom tav peb kev loj hlob sab ntsujplig, yam dabtsi ua rau kom peb tej paj txiv dhau los tsis txi. Peb thov Vajtswv qhia rau peb paub hauv xyoo no Vajtswv xav kom peb rho yam dabtsi tawm.

Tas peb sib vam khom koom tes sib pab, sib ntuas, tswj tus kheej ua kom tej ntawd tuag mus. Tsis yog tsuas ua pa loj loj rau txoj kev tsis paub ua cas rau tej ntawd xwb tiamsis txiav txim muab txiav pov tseg.

Txog rau koob tsheej Tswv Yexus raug txomnyem, peb ntsaub ib pawg taws cig loj loj. Thaum muab cov hmab pos ntawd pov rau hauv, peb nco txog Vajtswv txoj kev chim cig heev tab tom nchuav rau saum Yexus Khetos hlawv tib neeg tej kev txhaum mus. thiab peb muab peb txoj kev ntseeg tso rau ntawm Tswv Yexus tes haujlwm uas twb ua tiav lawm – ntseeg tias peb yuav tsis ua lub neej raug laum nkaus rau hauv tej kev txhaum ntawd, tiamsis loj hlob nyob hauv Nws mus li.

Thov caw nrog kuv peb thov Vajtswv ua ke: Tus Tswv, kuv paub tias kuv tsis muaj txaus lub peev xwm rho tau tej hauv paus pos tab tom laum kuv lub siab. Thov koj los pab kuv. Kuv thov muab tej kev ntshaw ntawd fij rau koj, tej kev vam khom, thiab tej uas nyob ib vuag uas kuv tab tom tuav ntawd. Thov Vajtswv ua kom kuv muaj lub siab tshiab sab hauv mus rau sab nraud, kom kuv muaj lub neej ywj pheej tawg paj txi txiv kom Vajtswv tau koob meej. Kuv thov hauv Tswv Yexus Khetos lub npe, Amees.

Cov kwv tij sawv daws, thov Vajtswv ci qhov pom kev rau peb kom peb pom tias yam dabtsi tab tom laum peb lub neej sab hauv. Cia siab tias peb yuav muaj lub siab mos muag, zoo siab hlo cia Vajtswv muab tav, thiab ua dua tshiab kom zoo tuaj. Muab tag nrho lub neej fij tso rau hauv Vajtswv txhais tes, kom txojsia Vajtswv pub yuav tsis laum nkoos, tiamsis loj hlob tuaj, rhau cag mus ntsia av tob tob thiab tawg paj txi txiv hauv txoj kev kaj siab zoo kawg nkaus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj