Nyob rau hauv lub neej muaj ntau qhov kev txhawj, muaj tej hnub peb nyhav siab heev rau tej kev npaj, lub nra thiab tag nrho tej uas tsis tau paub ua ntej. Peb yooj yim poob rau txoj kev uas tuav txhua yam kom ruaj ruaj rau ntawm tes, ib yam li yus daws tau tag nrho txhua yam. Tiamsis Vajtswv tej lus nqua hu kom peb nkag los rau lwm lub neej, lub neej ntseeg thiab mloog lus, muab lub nra nyav, tej kev npau suav, tej homphiaj nrog rau tej kev txhawj rau ntawm Vajtswv xub ntiag. Ntawm no tsis yog tso tes, tiamsis yog ib tes haujlwm nthuav tawm kev ntseeg, ntseeg tias Vajtswv yog tus tswj thiab ncaj ncees. Thaum peb txaus siab muab txhua yam fij rau Vajtswv, kev kaj siab saum ntuj yuav tiv thaiv peb lub siab thiab peb tej tswv yim nyob hauv Yexus Khetos.

Hnub no, yog hnub 25/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm CIA RAU VAJTSWV

“… tiamsis yog yuav tuag no cia kuv tuag” (Exethaws 4:16)

“Mus hais tagnrho cov Yudais uas nyob hauv lub nroog Susas tuaj sib sau ua ke, thiab ua kevcai yoo mos thov Vajtswv pab kuv. Tsis txhob noj tsis txhob haus ib yam dabtsi peb hnub peb hmos. Kuv thiab kuv cov nkauj qhe los yuav yoo mov ib yam nkaus li nej thiab. Ces tom qab ntawd, kuv yuav mus cuag vajntxwv. Yog hais tias, kuv ua txhaum kevcai, kuv tuag los xijpeem, kuv yeej yuav zoo siab tuag” (Exethaws 4:16).

Nyob rau tej hnub hauv xyoo tshiab, kuv pheej ua xyem xyav txog lub homphiaj rau xyoo tshiab. Vajtswv muab ib txoj haujlwm rau kuv ua nyob ntawm tsev kawm ntawv hauv zos tau nees nkaum xyoo dhau los, cov nyiaj hli nyuam qhuav txaus yug tus kheej thiab tsev neeg. Vim hlub Vajtswv, kuv tseg lub sijhawm Vajtswv pub rau kuv nrog txhua pab pawg hauv Pawg Ntseeg ua Vajtswv haujlwm ua ke. Tiamsis, qhov uas teeb homphiaj rau tag nrho ib xyoos, saib qhov haujlwm ntawm tsev kawm ntawv thiab tes haujlwm hauv Pawg Ntseeg, yeej tsis yooj yim li.

Hauv kuv lub siab yeej tseem tshuav tej kev txhawj, tej kev xam thiab npaj. Tsis paub kuv puas yuav zoo txais dua ib txoj haujlwm tshiab? Yog txais, kuv yuav muaj nyiaj ntxiv, yuav tau qhuas, tiamsis yog tias yuav ua rau hnub so no yuav ua cas? Kuv puas yuav mus koom lub rooj xaiv tsa txhua pab hauv Pawg Ntseeg? Yog tau xaiv, tsis paub kuv puas muaj txaus sijhawm los tu kuv tsev neeg me?

Thaum ntawd, Vajtswv tej lus ntuas kuv: “Thiab txhua tus uas tso vajtse, tso kwvtij, tso nkauj muam, tso niam txiv, tso menyuam thiab tso liaj teb tseg, vim nws ntseeg kuv, tus ntawd yuav tau tshaj ib puas npaug thiab nws yuav tau txojsia ntev dhawv mus ibtxhis.” (Mathais 19:29). Paub yog li ntawd, tiamsis tej kev txhawj yeej tseem tshwm sim hauv kuv nyob rau tej hnub thawj hauv xyoo. Ib zaug ntxiv, Vajtswv tej lus rov qab hais: “Nej tsis txhob nyuaj siab rau ib yam dabtsi hlo li, thaum nej thov Vajtswv nej cia li qhia txhua yam uas nej xav yuav rau Vajtswv, thiab thaum nej thov nej yuav tsum nco ntsoov ua Vajtswv tsaug” (Filipis 4:6). Kuv mus cuag Vajtswv thiab hais tias: “Tus Tswv, thov pab kuv tso kuv cov haujlwm…” Tas Vajtswv ntuas kom kuv nco txog zaj xwm nyob hauv niam Vajntxwv Exethaws.
Exethaws yog ib tug ntxhais ntsuag neeg Yudais, tsis muaj niam txiv, tau nws tus tij yog Maudekhais tu (Exethaws 2:7). Lub npe “Exethaws” yog npe neeg Pawxias, vim pog nyob hauv teb chaws Pawxias lub sijhawm vajntxwv xawxes ua vajntxwv – yog ib tug vajntxwv muaj hwjchim thiab nplua nuj heev “Vajntxwv nyiam Exethaws tshaj cov hluas nkauj uas twb tau mus cuag vajntxwv lawm…Vajntxwv thiaj muab lub kausmom kub los rau Exethaws ntoo thiab muab nws tsa ua niam vajntxwv hloov Vasetis chaw. (Exethaws 2:17).

Tab tom nyob siab rau saum lub koob npe, ua neej nyob hauv vajntxwv lub loog txais yuav txhua lub hwjchim ntawm ib tug niam vajntxwv, Exethaws ntsib ib qhov teeb meem loj – ntawd yog lub tswv yim muab nws haiv neeg tua pov tseg. Tus thawj tub rog Hamas, vim qhov yeebncuab nrog Maudekhais, tau nrhiav tswv yim muab tag nrho haiv neeg Yudais tua pov tseg. “Lub ib hlis ntuj hnub kaum peb, Hamas hu vajntxwv cov teev ntawv tuaj thiab kom lawv sau raws li nws cov lus samhwm,…Tsab ntawv no hais kom muab cov Yudais, tsis hais laus thiab hluas, pojniam thiab menyuam, tua povtseg huv tibsi rau lub kaum ob hlis hnub kaum peb uas yog lub hlis Adas (Exethaws 3:12-13). Tiamsis lub nroog Susas muaj kev tsis sib haumxeeb ntxhov hnyo (Exethaws 3:15).

Niam vajntxwv Exethaws, nws muaj cov neeg Yudais roj ntshav, sawv ntawm txoj kev xaiv ciaj tuag: ua twj ywm kom zais tau tus kheej lossis yuav mus thov vajntxwv cawm yus haiv neeg. Pog paub tias qhov uas pog mus ntsib vajntxwv tsis tau Vajtswv hu ces yuav raug tuag (Exethaws 4:11).

Maudekhais cov lus ceeb toom: “Tej zaum qhov uas koj tau los ua niam vajntxwv rau tej lub sijhawm zoo li no, twb yog los pab cawm peb haivneeg kom dim kev puastsuaj los kuj tsis paub!” (Exethaws 4:14). Qhov no tau pab pog rov qab pom txog pog qhov haujlwm. Exethaws txiav txim ua kevcai yoo mov, thov Vajtswv thiab mus nrog kev ntseeg, los ntawm lub siab: “Yog yuav tuag ces cia kuv tuag.” (Exethaws 4:16).

Sawv ntawm tej teeb meem, niam vajntxwv Exethaws paub tias Vajtswv tus muaj hwjchim loj kawg nkaus tab tom tswj. Pog tsis xav txog qhov uas yuav tuav nws lub meej mom ruaj ruaj, tej hwjchim uas nws tab tom muaj, lossis nws txojsia, tiamsis muab nws haiv neeg thiab Vajtswv lub homphiaj tso ua ntej.

Thaum Exethaws paub tias yus yog Vajtswv tug thiab mloog Vajtswv lus lawm. Vajtswv ua haujlwm dhau ntawm pog lub neej. Vajtswv ua rau pog tau koob hmoov ntawm vajntxwv Xawsxes xub ntiag (Exethaws 5:2), thiab pab pog muab Hamas lub tswv yim phem nthuav tawm, ua rau yawg yuav tau ris lub txim raug muab dai rau saum tus ncej uas yawg txhos (Exethaws 7:9-10).

Tsab ntawv muab cov neeg Yudais tua pov tseg thiaj tau hloov pauv, thiab cov neeg nyob hauv lub nroog Suxas zoo siab tsis txawj tas. Los txog niaj hnub nim no cov neeg Yudais lawv yeej tseem ua kevcai nco txog hnub no ncaj rau lub peb hlis ntuj txhua xyoo ua kevcai nco txog lawv tau cawm dim ntawm Hamas txhais tes thaum ub. Lawv “…Cov pejxeem Yudais txaus siab ua raws li tsab ntawv uas Maudekhais sau xa tuaj rau lawv. Cov Yudais thiaj li niaj xyoo ua kevcai nco txog qhov uas lawv twb pib ua muaj los ntawd lawm”. (Exethaws 9:23).

Exethaws tau hu nyob rau lub neej txhua hnub, nyob rau nws lub ntuj. Pog tsis siv lub meej mom los txais yuav, tiamsis pog ua haujlwm. Pog xaiv ua twjywm, ua kevcai yoo mov thiab thov Vajtswv, nrhiav Vajtswv ua tus coj. Pog txaus siab hlo tso meej mom, thiab nws txojsia tseg kom tau Vajtswv siv. Tiamsis Vajtswv tsis cia pog poob tej ntawd; Vajtswv tseem pub rau pog ntau tshaj tej uas pog xav txog, ib txoj kev cawmdim loj thiab tau koob hmoov tshaj.

Nyob ntawm yus feem, thaum mus cuag Vajtswv, tej kev txhawj hauv kuv pauv zuj zus los ua kev kaj siab. Kuv kawm tau txoj kev muab tso rau Vajtswv, nrog txoj kev cia siab tias yuav tau Vajtswv siv kuv lub neej nyob rau ntawm qhov chaw uas Vajtswv tso kuv rau hauv. Peb txhua tus puav leej tau nqua hu nyob rau lub caijnyoog txawv, thiab ntau zaug mus nrog kev ntseeg yuam kom peb yuav tau pauv. Vajtswv tsis yog tsuas nqua hu kom peb ua haujlwm pab Pawg Ntseeg xwb, tiamsis nyob rau hauv lub nra uas Vajtswv cob rau peb lub neej txhua hnub.

Thov caw nrog kuv peb thov Vajtswv ua ke: Leej Txiv, nyob hauv txhua yam tsis khoom hauv lub neej, ntau zaug kuv txhawj, kuv xam thiab xav tswj lub neej tom ntej. Thov qhia kuv paub mloog Vajtswv koj lub siab nyiam, ntseeg koj txoj kev tswj hwm thiab koj txoj kev ncaj ncees. Thov tshem qhov kev txhawj hauv kuv lub siab, thiab pub kom kuv muaj lub siab khov kho ntawm Vajtswv. Thov qhia kuv paub tos koj lub sijhawm, mloog koj lub siab nyiam, thiab muaj lub siab tawv txhais ruam mus thaum Vajtswv qhib kev. Thov kom kuv lub neej tau Vajtswv siv raws li Vajtswv lub homphiaj zoo. Kuv thov hauv Tswv Yexus Khetos lub npe, Amees.

Cov kwv tij txhua tus, nyob rau lub thiv uas sawv daws yuav tig mus ua kevcai nco txog Tswv Yexus raug txoj kev txomnyem cawm tag nrho tib neeg ntiajteb, peb pom tias Vajtswv lub homphiaj cawm dim pib thaum uas tib neeg poj koob yawm txwv Adas thiab Evas nkawd ua txhaum. Thiab lub homphiaj cawmdim ntawd pib raws li Vajtswv haiv neeg txoj keeb kwm, Vajtswv siv cov neeg uas zoo siab hlo mloog lus thiab muab lub neej fij rau Vajtswv. Vajtswv tau siv Exethaws los cawm Vajtswv haiv neeg dim txoj kev raug muab tua tu noob nrho, niaj hnub no Vajtswv kuj siv peb txhua tus lub neej los ua Vajtswv haujlwm, kom hais tau tias ua li ntawd rau tes haujlwm Vajtswv cob, thiab qhia Vajtswv txoj kev cawmdim mus txog hnub nws rov qab los. Thov kom peb txhua tus lub neej yuav muab fij txhua yam rau Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.