Txoj kev tuag yog yam uas txhua tus nrhiav kev zam thaum xav txog, txawm paub tias yeej tsis muaj leej twg zam dhau. Tiamsis, nyob ntawm cov neeg ntseeg Vajtswv, yam uas tsimnyog xav tshaj tsis yog kev tuag ntawm sab nqaij tawv rau lub neej tom ntej, tiamsis yog txoj kev tuag rau kev txhaum, rau tus neeg qub tamsim no. qhov uas ua rau tus cwjpwm qub tuag yeej tsis tau muaj ib zaum twg yog yooj yim, tiamsis tsuas yog thaum peb tus neeg qub raug muab ntsia saum ntoo khaub lig xwb, peb thiaj yuav saj tau lub neej tshiab nyob hauv txoj kev nrog Vajtswv sib raug zoo.

Hnub no, yog hnub 26/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marty Bullis dhau ntawm Zaj kawm SAIB YUS TWB TUAG NROG KEV TXHAUM

“Ib yam li ntawd, nej yuav tsum nco ntsoov hais tias nej twb tuag rau txojkev txhaum thiab nrog Yexus Khetos koom ib txojsia nyob rau ntawm Vajtswv lawm” (Loos 6:11).

Tswv Yexus raug kev txomnyem yog lub sijhawm uas cov neeg ntseeg Vajtswv tau caw los npaj lub siab xav txog ntoo khaub lig thiab Tswv Yexus txoj kev tuag. Ntawm no kuj yog lub sijhawm peb txhua tus yuav tau ua twjywm tshuaj peb lub neej, pom txog tej uas yus muaj ua tsis tau tau, lees txim thiab rov qab muaj dua txoj kev sib cog lus ua ke nrog Vajtswv. Raws li ntau lub Pawg Ntseeg ib txwm coj, ntu sijhawm no hu ua lub caij lawv ua kevcai yoo mov.

Lub caij ua kevcai nyob ntawm no ntev li 40 hnub, pib thaum hnub plaub ua kevcai xyaw tshauv thiab xaus ua ntej hnub Tswv Yexus sawv. Ncaj rau hnub plaub ua kevcai da tshauv, cov ntseeg lawv muab tshauv coj los pleev ntawm hauv pliaj ua ib tus ntoo khaublig. Qhov no ntuas kom peb nco tias peb tau muab av tsim los thiab yuav rov qab mus ua av. Kevcai da tshauv kuj tig peb lub siab mus txog rau ntawm Tswv Yexus txoj kev tuag, thiab peb txoj kev tuag. Yog li, nyob rau lub caij raug txomnyem no, peb xav txog ob txoj kev tuag.

Ib yog txoj kev tuag txhua hnub ntawm tus cwjpwm. Tuag tus cwjpwm yog thaum peb kawm muab tus kheej txoj kev xav tso tseg, tej kev ntshaw thiab ua lub neej tawm tsam Vajtswv lub siab nyiam, kom muab peb lub neej fij rau Vajtswv. Ntawm no yog ib ntsus kev tsov rog ntawm txhua tus ntseeg Vajtswv yuav tau ua tib zoo ceev faj ntsib.

Ob yog txoj kev tuag ntawm sab nqaij tawv tom ntej. Tshuav hais rau peb tias muaj ib hnub, peb lub cev no yuav tsis muaj zog thiab yuav puas mus, thiab lub ntiajteb no kuj tsis yog peb qhov chaw yuav nyob mus ib txhis. Tiamsis, tus ntseeg Vajtswv txoj kev cia siab yog: txawm yog tus neeg sab nrauv yuav laus zuj zus, los tus neeg sab hauv yeej yuav hloov dua tshiab loj hlob txhua hnub nyob hauv Yexus Khetos. Lub cev yuav qaug zog zuj zus, tiamsis lub siab hlub Vajtswv yuav tau ntxiv tuaj.

Nyob hauv Mathais 26:6-13, Vajluskub tham txog zaj xwm muaj ib tug pojniam nws nqa nws hwj roj uas kim nyiaj heev ntawd tuaj hliv rau saum Tswv Yexus taub hau. Cov thwjtim lawv npau taws thiab suav tias ua li no nws tsis txuag, vim cov nyiaj ntawd muaj cuab kav muab muag mus pab cov neeg pluag. Tiamsis Tswv Yexus hais tias tus pojniam ntawd ua li no yog npaj rau Tswv Yexus txoj kev tuag. Tswv Yexus hais: “Yexus twb paub tej uas lawv hais ntawd lawm, nws hais rau lawv hais tias, “Ua li cas nej ua rau tus pojniam no nyuaj siab? Qhov uas nws ua rau kuv ntawd yog qhov zoo. Yeej yuav muaj cov neeg pluag nrog nej nyob mus li, tiamsis kuv yuav tsis nrog nej nyob mus ib simneej”.

Tus pojniam no tej zaum tsis nkag siab txog tus ntoo khaub lig uas Tswv Yexus yuav tiv, tiamsis pog zoo siab muab yam uas muaj nqis fij pub rau Vajtswv. Pog tsis suav tias hwj roj ntawd muaj nqis rau yus lawm, tiamsis vim hlub Tswv Yexus, pog zoo siab hlob fij rau Nws, kav liam tib neeg txoj kev thuam.

Thiab yog raws li tej uas Tswv Yexus hais, tsuas tau ob peb hnub xwb, Tswv Yexus tuag saum ntoo khaub lig, raws li Vajtswv lub siab nyiam thiab Vajtswv txoj kev cawm tib neeg ntiajteb.

Raws li lub ntsiab ntawd, peb txhua tus txhua hnub yeej tab tom npaj rau yus txoj kev tuag. Txoj kev tuag txog sab nqaij tawv yog yam uas yuav zam tsis dhau, tiamsis qhov tseem ceeb dua yog peb puas kam cia kom peb tus cwjpwm tuag mus. tuag tus cwjpwm qub yog lub cim loj hlob sab ntsujplig, pib ib lub neej tshiab nrog Yexus Khetos.

Thaum ua neej rau Yexus, peb xaiv Ib lub neej uas ntiajteb suav tias xav tsis thoob. Ntiajteb niaj hnub nrhiav kev ua rau kom peb ua lub neej raws li tus kheej txoj kev ntshaw, hnov qab txoj kev hlub thiab ua haujlwm pab lwm tus. Txoj kev tuag ntawm lub neej nrog Vajtswv mus txhua hnub pheej raug nkag siab yuam kev, zoo li tus pojniam thaum ub raug cov thwjtim nkag siab yuam kev lub sijhawm ntawd. Tiamsis Tswv Yexus hu tias qhov no yog ib txoj haujlwm zoo.

Yog li, nyob rau lub caij Tswv Yexus raug txomnyem no peb yuav xav saib yus npaj rau yus txoj kev tuag li cas? Tsuas yog txoj kev tuag rau tomntej, lossis txoj kev tuag txhua hnub cia tus cwjpwm qub tuag mus? yog paub tias lub neej ib txhis muaj tiag, thiab muaj ib hnub peb yuav sawv ntawm Vajtswv xub ntiag, nyob rau tamsim no, peb yuav tau muab peb tus cwjpwm qub ntsia rau saum ntoo khaublig thiab vam khom Vajtswv ua lub neej zoo kawg nkaus pub rau Nws. Peb mloog Paulus tej lus ntuas: “Ib yam li ntawd, nej yuav tsum nco ntsoov hais tias nej twb tuag rau txojkev txhaum thiab nrog Yexus Khetos koom ib txojsia nyob rau ntawm Vajtswv lawm. Yog li ntawd, nej tsis txho b cia txojkev txhaum kav nej lub cev uas txawj tuag, rau qhov txojkev txhaum ua rau nej ua raws li nej lub siab nyiam. Nej tsis txhob cia txojkev txhaum siv nej lub cev ib qho mus ua phem ua qias. Tiamsis muab nej lub cev pub rau Vajtswv ib yam li cov neeg uas Vajtswv twb tsa sawv hauv qhov tuag rov qab los lawm, thiab muab nej lub cev pub rau Vajtswv siv ua qhov ncaj ncees” (Loos 6:11-13).

Thov caw nrog kuv peb thov Vajtswv ua ke: Tus Tswv, kuv ua koj tsaug vim koj txaus siab hlo tuag saum ntoo khaublig cawm kuv. Tus Tswv, yog koj twb tuag hloov kuv chaw, ces thov Koj kuj pab kuv kom kuv paub suav tias kuv twb tuag rau txoj kev txhaum lawm, kom kuv ua ib lub neej tshiab nyob hauv Koj. Nyob rau tej hnub zoo li no, thov cia kom kuv lub siab ntsiag to ntawm Vajtswv xub ntiag, xav txog yus tus kheej thiab txog koj, txog tej kev txomnyem uas koj tau ris vim kuv. Kuv thov hauv Tswv Yexus Khetos lub npe, Amees.

Cov kwv tij, ua ntej yuav txog hnub ua kevcai nco txog hnub Tswv Yexus raug txomnyem, tseg sijhawm nyob ntsiag to los nyob ze Vajtswv, xav txog Vajtswv txoj kev hlub loj tau nthuav tawm nyob saum ntoo khaublig. Yog tau, thov tseg tej kev zoo siab ua si uas tsis cheem tsum thiab cia peb lub siab tig mus rau ntawm Tswv Yexus txoj kev txomnyem.

Kom txais yuav Vajtswv tej lus, hnub no, peb yuav thov Vajtswv taw rau peb pom ib qhov kev txhaum, ib tug cwjpwm qub, lossis ib tug cwjpwm twg uas tsis tau haum Vajtswv siab, txiav txim muab tso tseg zoo li ib txoj kev cog lus “cia tus cwjpwm qub ntawm tus kheej” tuag mus. tib txhij ntawd peb kuj tau caw fij txhua yam uas yus muaj fij rau Vajtswv, ib yam li tus pojniam thaum ub tau muab nws hwj roj uas kim nyiaj rau Tswv Yexus.

Thov kom lub caij txomnyem no, peb yuav tsis nres ntawm qhov uas xav txog Tswv Yexus txoj kev tuag xwb, tiamsis yuav tau ua haujlwm kom tuag peb tus cwjpwm qub mus, kom ua ib lub neej tshiab nyob hauv koj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.