Muaj tej lub sijhawm peb yeej hnov meej meej tias Vajtswv tab tom hu yus ua ib yam dabtsi twg, tiamsis lub siab pheej ua xyem xyav. Peb txaj muag tsis kam ntsia lwm tus, txaj muag tsam saib yus “txawv”. Lossis yooj yim yog tsis xav tawm ntawm qhov chaw tso siab mus. Peb yeej ib txwm hlub Vajtswv, yeej xav nrog Nws ua ke, tiamsis ho tsis kam txaus siab hlo tso tseg tej yam uas yus tab tom tuav cia. Tiamsis, thaum peb zoo siab hlo kwv ntoo khaub lig nrog Tswv Yexus mus, peb thiaj yuav loj hlob thiab saj tau tej koob hmoov Vajtswv pub.

Hnub no, yog hnub 27/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm TSO YUS TUG KHEEJ THIAB KWV NTOO KHAUBLIG

“Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus.” (Mathais 26:24)

Nrog tus Tswv mus thiab dhau los ua Tswv Yexus thwjtim yog ib txua kev tsis muaj hnub xaus. Ntawd yog ib txua kev ntev, thaum peb kawm tso ua lub neej zoo li ntiajteb zuj zus thiab dhau los zoo li Yexus Khetos. Yuav tsis muaj hnub peb ua pa thiab hais tias: “Ua li cas tas lawm, yus mus txog ciam lawm.” Tsis tas li ntawd xwb, peb nyob rau txua kev loj hlob, thiab tau Vajtswv coj mus deb tshaj peb tus nrim uas peb xav tias peb ua tsis tau.

Ntau zaug, peb hnov ua tsis tau dabtsi, xav tias yus tsis muaj txaus lub zog ua raws li tej uas Vajtswv qhia. Tiamsis nyob rau tej lub sijhawm li ntawd, Tswv Yexus nthuav tawm rau peb pom tias: Yam uas peb ua tsis tau los ntawm tus kheej lub zog, ces Vajtswv muaj cuab kav ua tau dhau ntawm peb, los ntawm Vajtswv lub hwjchim. Vajtswv kuj tsis zais tej no: nrog Vajtswv mus muaj lub ntsiab tias tso yus tus kheej tseg, txhua hnub kwv yus tus ntoo khaublig nrog Nws mus.

“Yexus hais rau cov thwjtim hais tias, “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus. Rau qhov tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia” (Mathais 16:24-25).

Kuv tau koob hmoov heev thaum uas tau yug los rau ntawm ib qhov chaw tau ywj pheej pehawm Vajtswv. Tiamsis nyob hauv ntiajteb no muaj ntau tus kwv tij lawv ntsib txoj kev tuag vim hais txog Yexus lub npe. Kuv cim civ nug: yog muaj ib hnub twg, thaum uas lees Yexus lub npe lossis nyeem Vajluskub ces yog yuav ntsib txoj kev tuag, ces tsis paub kuv puas tseem kam xaiv Vajtswv? Hais tiag mas, kuv xav tias ntshai kuv yeej yuav xaiv Nws.

Kuv nrog Vajtswv mus tau 22 xyoo, thiab Vajtswv yeej tseem qhia kuv yuav ua li cas kom thiaj tas siab nrog Vajtswv mus. Muaj ib zaug, thaum kuv mus koom ib Pawg Ntseeg pehawm Vajtswv, Vajtswv ntau zaug tshoov kuv yuav tau txhos caug pehawm Vajtswv. Tiamsis kuv tsis ua li ntawd. Kuv ntshai lwm tus hais kuv.

Txog thaum uas Vajtswv rov qab tshoov kuv ua tej no dua ib zaug, nyob rau ib lub Pawg Ntseeg loj dua, kuv paub tias kuv yuav tseg tsis tau li lawm. Hauv kuv lub taub hau xav txog qhov uas kuv yuav hais li cas rau sawv daws, ntshai tsam lawv txhawj lossis xav yuam kev. Tiamsis ua ntej uas kuv yuav ua dabtsi, hauv kuv lub siab muaj cov lus ceeb toom: Yam dabtsi tseem ceeb dua – ua raws li tej uas kuv hu kom koj ua, lossis ntshai tsam lwm tus xav li cas rau koj?

Kuv paub kuv yuav tau mloog lus, thiab ua raws li ntawd. Tomqab zaj lus qhuab qhia, kuv qi muag, txhos caug, thiab thov Vajtswv. Ntawd yog lub sijhawm uas peb pehawm Vajtswv. Kuv tej kua muag cia li ntws los, thiab kuv tsis xav txav tawm ntawm Vajtswv txoj kev tshwm ntsej muag kiag li. Kuv nres ib pliag, ib ncig kuv pib hnov sawv daws sau khoom tawm mus tsev.

Thaum kuv qhib qhov muag, kuv xav tsis thoob li: muaj ib pawg neeg tab tom sawv tos kuv. Lawv hais tias thaum lawv npaj yuav rov mus tsev, lawv pib hnov cuag li tau ntuas kom yuav tau nyob tos, tseg me ntsis sijhawm los pehawm Vajtswv. Thaum kuv txhos caug pehawm, lawv kuj tso lawv tej khoom tseg thiab nrog kuv nyob hauv txoj kev pehawm ntawd.

Yam uas Vajtswv yuam kom kuv ua thaum ntawd tseeb tiag nws me me xwb.

Ntawd tsis yog qhov uas ciaj thiab tuag. Tiamsis Vajtswv yeej ntuas kuv ntau zaug kom mloog lus. Qhov no ua rau kuv pom tias: Vajtswv ua siab ntev thiab puv npo kev hlub pub rau peb.

Nrog Vajtswv mus txhais tias txhua hnub peb kawm tso txoj kev ua raws li peb lub siab nyiam tseg, tsis ua raws li yus lub siab nyiam, thiab xaiv mus raws li Vajtswv txoj kev. Kuv tsis paub tias koj zoo li cas, tiamsis kuv ntshaw kom muaj zog dua, kom ua tau raws li Vajtswv lub suab hu thaum pib. Kuv xav nrog tus Tswv mus, txawm yog txhua yam yeej tsis yooj yim. Kuv xav pom Vajtswv hloov pauv tej neeg ib ncig kuv thiab dhau los ua qhov pom kev nyob rau hauv lub ntiajteb tsaus ntuj no.

Tshuav koj ces zoo li cas?

“Tus uas tsis kwv nws tus ntoo khaublig nrog kuv mus, tus ntawd tsis tsimnyog ua kuv tus thwjtim. Tus uas khuvxim nws txojsia, tus ntawd yuav tsis tau txojsia, tiamsis tus uas tsis khuvxim nws txojsia, vim nws ntseeg kuv, tus ntawd yuav tau txojsia.” (Mathais 10:38-39).

Thov caw nrog kuv peb thov Vajtswv ua ke: Tus Tswv muaj tej lub sijhawm kuv paub tias koj tab tom hu, tiamsis kuv pheej ua xyem xyav vim ntshai, txaj muag. Thov zam txim rau kuv vim txhua zaug uas kuv hnov koj lub suab vim tsis tau mloog koj lus. Thov pub kom kuv muaj lub siab mos muag, zoo siab hlo muab tej yam uas tav kuv kev ua rau tsis mloog koj lus tso tseg. Thaum Vajtswv hu, thov pab kom kuv muaj lub siab tawv teb koj. Thov siv kuv lub neej no ua rau kom koj tau koob meej. Kuv thov hauv Tswv Yexus Khetos lub npe, Amees.

Cov kwv tij txhua tus, yog tias hnub no Vajtswv hu koj, koj puas zoo siab hlo nrog Nws mus tamsim? Thaum koj xub ua raws li Vajtswv lub siab nyiam, koj yuav tsis txaj muag lossis tsis ntshai lawm. Hnub no, Vajtswv yeej tseem nyob ntawd thiab ua tib zoo hu koj nrog Nws mus, txawm yog muaj ntau zaug koj ua xyem xyav, tsis lees txais. Tej zaug nyob rau lub sijhawm uas koj kam hais rau Vajtswv tias, Vajtswv yuav siv koj lub siab mloog lus los chwv txog lwm tus- thiab kuj hloov pauv koj tus kheej thiab.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.