Lăm bơyan ‘blŏk kơ Kră Yang jĭ jăn pơmat tat – Iung arih, rim ‘nu lu bơ̆n đei tơ’blŏk gah tơdrong lôch păng iung arih đơ̆ng Yang Yêsu. Sư đei ăn kơdih tơdrong arih Sư wă dŏng pơklaih lu bơ̆n. Mă lei mưh lăp, hăm trŏ lu bơ̆n lăp mơ̆ng dôm kơ tơdrong ‘nâu na ăn hlôi mă ưh kơ đei tơdrong tơplih ayơ lăm chăl arih bơ̆n? Rim wơ̆t lăng tơ ‘long pơglang, jơhngơ̆m lu bơ̆n hăm đei pơtrŭt wă lăng hơmet dơ̆ng chăl arih păng tŭk lê̆ tơdrong kơdih wă yak kiơ̆ Sư ưh?

Năr ‘nâu, ‘năr 28/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brooke Alsop Boland kơ̆l ‘bai TŬK LÊ̆ TƠDRONG KƠDIH WĂ KIƠ̆ KRĂ YANG

“Na Yêsu khan kơ bơngai tơpôl lơ mă năm mơ̆ng Sư: “Dah bơngai bu wă kiơ̆ Inh, sư athei tŭk đĭ dôm tơdrong sư kơdih na rim năr sư athei tôi kơdih ‘long pơglang chu lôch yua kơ wă kiơ̆ Inh.” (Luka 9:23)

Hơdai lăm bơyan ‘blŏk kơ Kră Yang Iung arih, lu bơ̆n ‘nă hal chơt hiôk yua kơ tơdrong arih ‘nao mă Yang Yêsu ‘măn ăn kơ lu bơ̆n đơ̆ng tơdrong iung arih đơ̆ng Sư. Mă lei, tơdrong hiôk chơt noh ưh kơ pơm kơ lu bơ̆n hiơt lê̆ kơ tơdrong mă Kră Yang Yêsu đei pŭ iŏk. Sư pŭ iŏk pơ̆ng tơ ‘long pơglang, yơ̆l môk jơla, jơ̆ng ti pơ̆ng kơ đĭnh. Đĭ đăng dôm kơ tơdrong jĭ jăn Sư pŭ iŏk wă dŏng pơklaih lu bơ̆n, pơm kơ lu bơ̆n gơh pơgơ̆p hăm ‘Bok Kei-Dei, păng ăn kơ lu bơ̆n tơdrong arih ling lang. Sư đei pơyơ̆r tơdrong arih Sư, pŭ iŏk tơdrong yoch đơ̆ng đĭ đăng kon bơngai, blah kĕ jei đơ̆ng tơdrong pơgơ̆r tơdrong yoch păng yang kơnê̆, tơiung tơdrong tơpăt; păng đơ̆ng rŏng kơ pơkeh tơdrong tơdă dŏng pơklaih, Sư tŏk tơplĕnh brŏk hơdai ‘Bok Kei-Dei ‘Bă.

Năr Yang Yêsu chu pŭ iŏk pơ̆ng kơđĭnh jơ̆ năr tơdrong ‘mêm mơnat tih đơ̆ng ‘Bok Kei-Dei gơh tơ’bôh ăn kơ kon bơngai. Wă pơklaih tơdrong pơgơ̆p pơchah lăm ‘Bok Kei-Dei hăm kon bơngai, ưh kơ đei trong nai ‘nguaih kơ tơdrong tuh pham đơ̆ng Kon ‘Bok Kei-Dei, yua kơ “Tơ̆ng ưh kơ huach pham, ưh kơ gơh klaih đơ̆ng tơdrong yoch ôh.” (Hêbrơ 9:22)

Tơdrong mă Yang Yêsu đei pŭ iŏk tih tơpă, mă lei ‘noh jơ̆ mĭnh trong đĕch ăn kơ kon bơngai gơh dŏng pơklaih păng mĭnh jơhngơ̆m đon dơ̆ng hăm ‘Bok Kei-Dei.
Đơ̆ng trong ‘long pơglang, Yang Yêsu pơih ăn trong dŏng pơklaih kơ dôm lu bơngai bu lui kơ Sư, ăn kơ lu sư gơh pơm kon ‘Bok Kei-Dei, păng đei krao wă jing bơngai pơhrăm păng Sư. Adrol kơ pơ̆ng tơ ‘long pơglang, Yang Yêsu băt kơ tơdrong tơtă ră roi dêh char ‘Bok Kei-Dei gô đei pơtrơp đơ̆ng lu bơngai pơhrăm. Lu sư gô pơtrơp tơdrong jang mă Sư pơjao, ‘noh jơ̆ bơtho ră roi Tơdrong ‘Nao ‘Lơ̆ng, bơtho gah Sư. Wă kơ gơh arih chăl arih rơgoh ‘lơ̆ng, chu yom păng pơchrang rup ‘Bok Krist, lu sư kăl kơ arih lăm tơdrong mơsêh mơyang đơ̆ng Yang Bơhngol ‘Lơ̆ng.

Dang ei, jơ̆ dôm kơ bơngai kiơ̆ Kră Yang Yêsu, lu bơ̆n kŭm kăl kơ jơhngơ̆m pran wă pơm đĭch đam Sư, mă khan đei tơ ‘bơ̆p hăm tơdrong hlôh ưh kơ trŏ, đe che bơle dah ưh kơ sơng iŏk. Lăm Luka 9:23, Na Yêsu khan kơ bơngai tơpôl lơ mă năm mơ̆ng Sư: “Dah bơngai bu wă kiơ̆ Inh, sư athei tŭk đĭ dôm tơdrong sư kơdih na rim năr sư athei tôi kơdih ‘long pơglang chu lôch yua kơ wă kiơ̆ Inh.”

“Tŭk đĭ dôm tơdrong sư kơdih” ưh kơ trŏ jơ̆ pơrăm akâu jăn kơdih, mă lei jơ̆ rơih dan tơdrong wă păng tơdrong tơdă đơ̆ng Kră Yang tơ adrol hloh. “Rim năr athei tôi ‘long pơglang” jơ̆ gô tŭk lê̆ hloi dôm kơ tơdrong hơpơi wă kơdih kâu, ưh kơ pơm kiơ̆ kơdih dah hưch ham wă chu yom Kră Yang. “Kiơ̆ Inh” jơ̆ năm jê̆ Yang Yêsu, mơ̆ng kơ tơ̆ng păng chu yom nơ̆r Sư, wă kơ gơh lei lăi thoi Sư rim năr.

Lơ bơngai đei khan tŭk lê̆ tơdrong kơdih wă kiơ̆ Kră Yang jơ̆ tơdrong kơ’bah hloh, mă lei Yang Yêsu đei pơma khan tơdrong tơplơ̆ dơ̆ng. Sư pơma khan bu yua kơ Sư păng Tơdrong ‘Nao ‘Lơ̆ng na chu pŭ iŏk gô đei lơ hloh dơ̆ng, mă lăm chăl arih ‘nâu păng chăl ning mônh:

“Yêsu khan: “Inh khan kơ iĕm tơpă, bơngai bu achăng lê̆ hnam sư, ‘nhŏng oh sư, mĕ ‘bă sư, kon sư, mir ‘ba sư, yua kơ sư wă jang tơdrong Inh păng ră roi tơdrong ‘nao ‘lơ̆ng kơ đe, bơngai ‘noh dang ei ‘Bok Kei-Dei tơgŭm sư hloh loi kơ sư tam mă lui sơ̆, mă hnam, mă ‘nhŏng oh, mă mĕ ‘bă, mă kon, mă mir ‘ba, sư gô đei lơ hloh kơ sơ̆ tơpă. Sư kư̆m đei tơdrong anat anot yua kơ jang tơdrong Inh kơplah dang ei mơ̆n. Mă-lei ning-mônh sư gô arih ling-lang ưh kơ đei layơ tôch.” (Markôs 10:29-30)

Tơdrong Yang Yêsu pơkă ưh kơ trŏ tơm khan jơ̆ bơngai kiơ̆ Sư gô ling lang mơdrŏng dah rơkah rơkai gah mŭk tơmam. Tơplơ̆ dơ̆ng, lơ bơngai kiơ̆ Kră Yang kŭm đei hiong đĭ hnam sư, dôm lu tơdrong pơgơ̆p, hơdai lơ tơdrong nai. “Gô đei lơ hloh kơ sơ̆ tơpă” adrol hloh jơ̆ đei sơng iŏk tơdrong arih ling lang păng hơdai lăm hnam dơnŏ ‘Bok Kei-Dei. Lăm hnam dơnŏ noh, lu bơ̆n đei tơdrong pơgơ̆p bơhngol hăm “ ‘nhŏng oh, mŏ ŏh, mĕ, kon” lăm ‘Bok Krist.

Tơmam apah tih hloh kơ bơngai kiơ̆ Kră yang ưh kơ trŏ jơ̆ tơdrong mơdrŏng dah hiôk hian lăm dang ei, mă tơ lăm tơdrong gĭt ling lang păng tơdrong ư-ang tơ plei ‘lơ̆ng. Dôm kơ tơdrong pơmat tat dah pơgŏ pơđep lăm chăl arih ‘nâu ưh kơ gơh pơtŏ hăm tơdrong ư-ang gô truh. Tơdrong arih kơpal teh gô jing đei tơm kăl dah lu bơ̆n bơtho tơdrong ‘Nao ‘Lơ̆ng kơ bơngai nai păng lăng ‘bôh tơdrong mơsêh mơyang đơ̆ng Sư bơ̆jang lăm bơ̆n.

Apĭnh đĭ đăng krao khan hơdai: Kơkuh kơ Yang Yêsu, bơnê kơ Ih yua kơ ‘long pơglang mă Ih đei pŭ iŏk yua kơ kon. Apinh bơtho kơ kon kŭm băt tŭk lê̆ tơdrong kơdih, rim năr tôi ‘long pơglang kơdih na kiơ̆ Ih. Apinh ăn kơ kon ưh kơ rơdu ‘bơ̆t anăp dôm tơdrong pơlong lăng dah đe pơmat kơplah dang ei, mă lei đĭ jơhngơ̆m arih tơ’bôh Ih kơ dôm lu bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘Bok Dŏng Pơklaih Yang Yêsu đei lôch păng iung arih wă ăn kơ lu bơ̆n mĭnh tơdrong arih ‘nao lăm Sư. Dang ei, rim ‘nu lu bơ̆n đei krao mơ̆t lăm tơdrong arih ‘noh kiơ̆ hăm pơ̆ng tơ ‘long pơglang tơdrong kơdih hăm dôm tơdrong yoch đơ̆ng kơdih tơ ‘long pơglang, wă kơ gơh kiơ̆ Kră Yang tôm mah. Đei tơdrong yoch ayơ buăl tim mă tơbral? Đei tơdrong ayơ pơgăn buăl yak kiơ̆ Sư? Năr ‘nâu, athei ‘măn jơ năr wă lăng tơ ‘long pơglang păng tơdrong iung arih ư-ang đơ̆ng Kră Yang lu bơ̆n, pơyơ̆r kơ Sư đĭ chăl arih bơ̆n, păng pơkă arih mĭnh chăl arih ‘nao lăm Sư lăm năr ‘nâu hloi.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.