Peb txoj kev sib raug zoo nrog Vajtswv puas tseem ruaj khov, lossis hloov pauv raws lub sijhawm? Thaum txhua yam zoo, koob hmoov ntws lug, ces yooj yim rau peb mus nyob ze Vajtswv, pehawm Nws, thiab hais tias peb hlub Vajtswv tas siab. Tiamsis, thaum Vajtswv cuag li nyob deb peb, lossis thaum txhua yam tsis tshwmsim raws li lub siab ntshaw, tsis paub peb lub siab puas yoj yees? Tsis paub peb puas tsis nrhiav Vajtswv thiab khiav deb Yexus Khetos tau los raug rau peb?

Hnub no, yog hnub 29/03/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm Zaj kawm TXHAWB NQA TOM QAB HO NTXEEV SIAB

“Rau qhov nws lub siab ywjfab ywjfwj, nws yuav ua yam twg los nws ua tsis tsheej.” (Yakaunpaus 1:8)

“Hauxanas! Koj tau los lawm!” – lub suab qw zoo siab ntawd nrov txhua qhov, tej rev nplooj toov laj yeej yoj yees txhua qhov. “Ntawd yog Tswv Yexus! Saib mas, Tswv Yexus tab tom los!”

Tej zaug nyob rau hauv pab neeg coob coob ntawd, muaj tej tus lawv cim civ nug hauv siab: “Vim li cas Tswv Yexus ho caij ib tug nees luav, ho tsis yog ib tug nees dawb, lossis zaum saum lub tsheb?” tiamsis yeej tsis muaj leej twg quav ntsej. Tib neeg qw nrov nrov: “Hauxanas! Hauxanas tus Tswv uas nyob saum ntuj siab!” Lawv dhia zoo siab, qw nrov nrov, muab tsho thiab nplooj toov laj pua hauv kev, txhos caug ntawm Tswv Yexus xub ntiag. Ntawd yog lub caijnyoog zoo heev – yog ib hnub puv npo kev hlub, nrog tej koob tsheej nto npe. Tej pej xeem lawv hlub Tswv Yexus.

Ntawd yog hnub Tswv Yexus mus rau hauv lub nroog Yeluxalees. Ua ntej mus rau hauv nroog, Tswv Yexus nrog cov thwjtim nres ntawm roob txiv ntoo roj. Nyob ntawd, Tswv Yexus txib ob tug thwjtim mus cab ib tug nees luav, thiab hais rau tus tswv nees tias Tswv Yexus xav siv. Lawv muab tsho pua rau saum tus nees lub caj qaum rau Tswv Yexus caij. Tas Tswv Yexus mus rau hauv nroog, ntawm txoj kev muaj neeg coob coob, muaj kev zoo siab heev (Saib Lukas 19:28-38).

Thaum ntawd cuag li tus twg twb ntseeg tias lawv nkag siab tias Tswv Yexus yog tus muaj hwjchim npaum cas. Lawv tseem muab lawv tej tsho pua hauv pem teb. Lawv kub siab lug, vim lawv ntseeg tias Tswv Yexus yuav yog lawv tus vajntxwv, ib tug vajntxwv yuav sawv los tawm tsam rau lawv thiab ua rau kom lawv muaj yeej. Tsawg tshaj ces ntawm no yog yam uas lawv tos.

Tiamsis tau ob peb hnub tom qab xwb, txhua yam hloov pauv tas.

Tswv Yexus raug ntes, raug liam tias yog tus ntxeev siab, vim cov pov thawj hlob puav leej hais tias nws yog tus ntxeev siab tawm tsam nom tswv Loos (Yauhas 18). Kuj yog cov neeg coob coob qw nrho nrooj, npuaj tes, txhos caug qhuas Nws ntawd, thaum no tig nruab qaum rau Tswv Yexus. Puas yog lawv hnov qab tias Nws yog tus muaj siab mos muag, puv npo siab hlub tshua, siab ntev thiab tseeb? Puas yog lawv hnov qab Nws tej lus qhia thiab tej txujci uas lawv qhov muag tau pom?

Tseeb tiag, lawv hnov cuag li lawv raug ntxeev siab. Tswv Yexus tsis dhau los zoo li tus vajntxwv uas lawv xav. Nws tsis tawm tsam rau lawv, nws nqa txhua yam los rau lawv. Nws yog Vajntxwv – tiamsis lawv tsuas xav tau ib tug vajntxwv hauv ntiajteb nrog lawv nyob, ua tej uas lawv ntshaw ntawm lawv lub qhov muag xwb.
Yog li, thaum no Tswv Yexus muaj nqis li cas pub rau lawv?

Hauxanas muaj lub ntsiab tias “thov tso peb dim tamsim no”. tiamsis tau ob peb hnub, cov neeg uas qw nrov nrov txog lo lus ntawd lawv ho mus koom rau lub suab nthe: “Muab nws ntsia rau saum ntoo khaublig! Muab nws ntsia rau saum ntoo khaublig!” (Yauhas 19:6). Lawv tsis nkag siab tias ua ntej tus Vajntxwv ci ntsa iab, Nws ib txwm yog ib tug tub qhe – tus tub qhe tiv kev txomnyem. Tswv Yexus tsis tau muaj ib zaum twg thiab yuav tsis muaj ib zaum yog txoj kev daws rau tib neeg tej teeb meem tamsim. Nws yog tus Vajntxwv ntawm txhua tus vajntxwv, tus Tswv ntawm txhua tus tswv- tus teb tib neeg lub suab qw: lo lus thov kom tau txais kev cawmdim.

Thaum Nws cheem tsum kev pab, lawv tig nruab qaum rau Nws. Mob siab tshaj. Cov pej xeem coob coob yooj yim hloov pauv ntawd tau tsis lees lawv tus Vajntxwv ntawm txhua tus vajntxwv thiab tus Tswv ntawm txhua tus Tswv – tus pub txoj kev cawmdim rau lawv thiab txojsia ib txhis.

Yog tias tig rov qab mus ntsia, tej zaum peb kuj txawv lawv tsis deb.

Thaum lub neej tsis muaj dabtsi, koob hmoov puv npo, peb yooj yim tsa suab qhuas Vajtswv. Tiamsis thaum uas tsis hnov Vajtswv kev tshwm ntsej muag, thaum peb tej lus thov cuag li tsuas ntsiag to, peb pib ua xyem xyav, peb cem, ntau zaug tig nruab qaum rau Vajtswv.

Thov kom peb tsis txhob muaj ib zaum twg dhau los ua cov neeg hloov sai li ntawd nyob hauv txoj kev sib raug zoo nrog Tswv Yexus.

Tus neeg hloov pauv sai, yog neeg yooj yim yoj yees – tshwj xeeb nyob hauv txoj kev hlub thiab kev ua haujlwm. Thov kom peb lub siab ruaj khov, tsis yoj yees, tsis thaub qab, tiamsis ncaj ncees nrog Nws mus txog thaum kawg.

“Au qhov nws lub siab ywjfab ywjfwj, nws yuav ua yam twg los nws ua tsis tsheej.” (Yakaunpaus 1:8).

Thov caw nrog kuv peb thov Vajtswv ua ke: Ua Vajtswv tsaug vim koj yeej ib txwm ncaj ncees thiab hlub kuv. Thov pab kom kuv hlub koj kom kawg, nrog koj mus kom txog thaum kawg. Hnub no, kuv thov fij kuv lub siab rau koj, tsis yoj yees, txawm yog yuav muaj cua daj cua dub vij puas ncig vim paub tias koj nrog nraim kuv. Kuv thov xaiv hlub koj txawm yog thaum kuv tsis nkag siab txhua yam, thiab kuv xaiv ntseeg koj txawm thaum tsis tau pom lo lus teb. Kuv thov hauv Tswv Yexus Khetos lub npe, Amees.

Cov kwv tij txhua tus, thaum Vajtswv tsis ua huajlwm raws li tej uas peb xav tau, thaum Vajtswv txoj kev tsis zoo li peb txoj, tsis paub peb puas tseem yuav nyob? Cov pej xeem coob coob thaum ub qw nrho nroo qhuas Vajtswv thaum Tswv Yexus txhawm rau lawv tej kev cia siab, tiamsis kuj yog lawv ntxeev siab rau nws thaum uas nws tsis yog tus vajntxwv raws li lawv siab nyiam. Thiab hnub no, lo lus nug ntawd yeej tseem nrov, ntuas kom peb txhua tus; peb puas tab tom hlub Vajtswv tiag, lossis tsuas hlub tej uas Vajtswv muab pub rau peb xwb? cia siab tias peb yuav tsis muaj hnub tig nruab qaum rau tus uas tau tuag tau ua txhua yam rau peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj