Peb paub tias Vajtswv yog tus loj kawg nkaus, Nws pom thiab paub txhua yam hauv peb lub neej. Tiamsis muaj qee lub sijhawm, thaum peb ntsib tej kev nyuaj siab thiab tej kev sim siab, peb taij thov thiab tos ntsoov Vajtswv, los zoo li Vaj Tswv tseem ntsiag to rau peb tej xwm txheej. Hauv sijhawm ntawd, Vajtswv xav kom peb paub dab tsi? Puas yog qhov uas Tus Tswv ua twjywm ntawd yog qhov kev caw peb dlau mus ntseeg siab thiab mloog lus heev dua hauv peb txoj kev ntseeg?

Hnub no, yog hnub 30/03/2026, peb kev Thov Vaj Tswv Txhua Hnub caw koj los kawm Vaj Tswv Txoj Lus los ntawm Diane Markins muaj lub ntsia lus THAUM TUS TSWV UA TWJ YWM.

“Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb!” (Mathais 26:39)

Peb puas tau muaj tej lub sijhawm uas peb poob rau hauv qhov uas tsis muaj kev cia siab, taij thov thiab tos ntsoov Tus Tswv txoj kev pab, tabsis tsis hnov yam dab tsi tsuas ntsiag moo to xwb? Vim li cas Vajtswv ua twjywm rau peb txoj kev txom nyem? Puas yog Nws tsis quav ntsej peb, los sis Nws tsis muaj tseeb tiag?

Kuv twb tau hnov zoo li ntawd lawm, thaum kuv xav tias Vajtswv tsis mloog kuv tej lus thov. Thaum kuv niam pw tsis nco qab saum txaj mob, cov kws kho mob hais tias nws lub paj hlwb tuag thiab yuav tsis rov tsim los lawm. Lub sijhawm ntawd, kuv tsuas paub taij thov Vajtswv kom cov kws kho mob tej lus hais yeej tsis yog. Tabsis kuv niam yeej tsis tsim, tsis teb kuv lub suab hu, thiab yeej ntsia tsis pom kuv ib zaug li lawm. Tsis ntev tom qab ntawd xwb, nws tau tas sim neej.

Tom qab ntawd, thaum kuv tus ntxhais loj hlob tiav hluas thiab pib ntsib tej teeb meem mob nkeeg hnyav, kuv rov yoo mov thiab thov Vajtswv tsis tseg kom nws tau txais kev kho zoo. Tau ntau xyoo, kuv nyob tsis muaj kev thaj yeeb thiab nyuaj siab, zoo li tej xwm txheej ntawd yeej tsis muaj ib qhov hloov li. Puas yog Vajtswv muaj haujlwm ntau dhau lawm? Puas yog Nws tsis quav ntsej txog kuv txoj kev mob siab? Lossis yog tej yam kuv taij thov ntawd nyuaj dhau rau Nws?

Vajlugkub qhia peb paub tias tus Tswv Yexus kuj tau hla lub sijhawm uas mob siab kawg hauv vaj Khexemanes. Nws taij thov nrog Leej Txiv tias: ““Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb!” (Mathais 26:39).

Hauv Phau Qub, “lub khob” yog ib daim duab hais txog Vajtswv txoj kev chim siab thiab Nws txoj kev txiav txim ncaj ncees rau kev txhaum (Ntawv Nkauj 75:8, Yaxayas 51:17, Yelemis 25:15). Thiab “lub khob” uas tus Tswv Yexus yuav tsum haus ntawd tsis yog kev mob ntawm sab cev nqaij saum ntoo khaub lig xwb, tiam sis tseem yog qhov uas Nws ris tag nrho tib neeg lub txim, hloov tibneeg txais txoj kev chim siab, thiab raug Leej Txiv tso tseg. Yog peb xav txog, tej kev kev mob uas peb ntsib niaj hnub no yeej tsis muaj ib yam twg los piv tau nrog qhov kev txom nyem uas tus Tswv Yexus tau ris.

Tus Tswv Yexus yog Vajtswv, tabsis Nws kuj yog tibneeg tiag tiag thiab. Vim Nws muaj cwjpwm li tib neeg, Nws kuj paub tau kev tu siab, kev ntxhov siab, kev mob siab thiab tej kev tawm tsam tom hau ntej. Txawm li ntawd los, tus Tswv Yexus tau lees txais tej kev txom nyem ntawd thiab mloog Leej Txiv lus tag siab nrho thiab Nws thov tias: “Txawm li los, tsis yog raws li kuv lub siab xav, tiam sis raws li Koj lub siab”. Leej Txiv tsis tshem lub khob ntawd tawm ntawm tus Tswv Yexus mus, tabsis Leej Txiv yeej nyob nrog nraim thiab pub zog rau Tswv Yexus thaum uas raug txom nyem. Tus sau phau ntawv Lukas tau sau tias: “Muaj ib tug timtswv saum ntuj los tshwm thiab txhawb Nws lub zog.” (Luka 22:43)

Dlau qhov ntawd, peb kawm tau tias Vajtswv qhov kev ua twjywm tsis yog txhais hais tias Nws tsis quav ntsej. Muaj tej lub sijhawm Vaj Tswv cia qhov kev ntsiag to ntawd tshwm sim los kom peb muaj zog thiab muaj lub siab ntev dua hauv tej kev sim siab. Los yog Vaj Tswv xav qhia peb kom paub ntseeg siab rau Nws, txawm tias peb yuav tsum ntsib tej kev poob plam loj xws li cov tib neeg uas yus hlub tau tso yus tseg.

Vajtswv tseem qhia Nws txoj kev hlub, kev khuv leej thiab Nws lub hwj chim, txawm yog thaum peb tsis hnov Nws lub suab, lossis yog tsis hnov Nws nyob nrog nraim peb.

Kev ntseeg tiag yog peb niaj hnub ntseeg siab rau Vajtswv, txawm tias tej xwm txheej tseem tsis tau hloov thiab tej lus taij thov zoo li tseem tsis tau txais los lus teb raws li peb xav.

Peb yooj yim qhia txog tej yam uas Vajtswv teb peb tej lus thov xws li kev kho mob lossis tej txuj ci tseem ceeb, tabsis peb tsis tshua hais txog tej lub sijhawm uas muaj kev sim siab ntev heev txawm peb tau ua siab ncaj thov Vajtswv ntev heev. Txawm li cas los xij, txawm tias Vajtswv teb lossis tsis teb los peb yeej tau txhawb zog vim tias tus uas ruaj siab ncaj ncees rau Vaj Tswv ces tus ntawd twb yog tus uas kov yeej lawm. Yuav muaj ib hnub Vajtswv yuav pub peb pom meej Nws txoj kev nyob nrog nraim peb thiab Nws coj peb. Qhov peb paub tseeb yog Tus Tswv tseem tab tom nrog peb tiv kev txom nyem, thaum lub sijhawm uas peb hnov tsis muaj yam dab tshwm sim los.

Yog hnub no koj hnov tias koj tej lus taij thov zoo li tsis muaj leejtwg hnov, thov txhob poob kev ntseeg. Cia li ruaj siab, vim hauv qhov kev ntsiag to los, Vajtswv tseem sawv ntawm koj sab, tab tom qhia koj, ntxuav koj thiab pab kom koj paub saj Nws txoj kev hlub tshua ntau dua.

Ntawm kuv tus kheej, tom qab no kuv mam li paub tias hauv lub sijhawm ntawd, Vajtswv yeej tseem nplij kuv siab, tias kuv niam tseem noj qab nyob zoo thiab nws tab tom nkag mus rau hauv Vajtswv txoj kev so uas muaj koob hmoov. Tej kev sim siab ntawm kuv tus ntxhais kuj dlau zuj zus mus. Tej kev sim siab ntawd tau cob qhia kuv tus ntxhais muaj lub siab tawv thiab ruaj khov dua hauv txoj kev ntseeg thaum nws loj hlob.

Koj puas tau ntsib Vajtswv qhov kev ua twjywm lawm tau? Koj txoj kev ntseeg puas tseem ruaj khov? Koj pom tias Vajtswv teb li cas? Yog tias koj tseem tab tom tos Vaj Tswv lub suab, cia li mloog ntxiv mus, ces koj yuav hnov Vaj Tswv lub suab tsis ntev tom qab xwb.

Thov caw nrog kuv peb thov Vajtswv ua ke: Vaj Tswv! Nyuam yaus ua Koj tsaug vim hauv tej lub sijhawm uas nyuaj tshaj plaws, los Koj tseem hlub, nyob nrog nraim thiab plij nyuam yaus lub siab. Thov pab kom nyuam yaus paub ntseeg siab thiab fij txhua tsav yam rau Vaj Tswv Koj, thiab ntseeg tias VajTswv Koj tseem tab tom ua haujlwm rau hauv nyuam yaus lub neej. Nyuam yaus taij thov txhua yam hauv Tus Tswv Yexus lub npe, Amen.

Tus phooj ywg, Vaj Tswv tseem niaj hnub nrog nraim peb nyob, txawm tias thaum uas peb tsis hnov Vaj Tswv nrog nraim thiab txais tau Nws tej lus teb. Hauv lub sijhawm uas nyuaj tshaj plaws hauv peb lub neej, cia li saib ntsoov rau peb Tus Tswv Yexus, yog Tus Tswv uas tau ris tus ntoo khaub lig, raug kev txom nyem ntau heev thiab raug luag saib tsis tau ntau tshaj lwm tus. Tus Tswv yog tus nkag siab thiab hlub tshua txog peb tej kev mob siab. Yog li ntawd, cia li los ze Tus Tswv Yexus thiab so hauv Nws txoj kev hlub txij hnub no mus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected].