Kơplah tơ’bơ̆p tơdrong chhŭr nuih ơh sơ’ngon lăm tơdrong arih, lu bơ̆n mơn thoi lĕ kơ minh pôm thŏng nan đông lĕng lŏng tŏk bŏk đak dơsĭ tih, oei răp gô đak poh yă klơ̆p tơmôch đĕch. Kơplah noh, lu bơ̆n hơpơi wă kơ đei minh anih gơ’nơp kơjăp, minh tơdrong kiơ noh đei kơjăp wă pơm kơ jơhngơ̆m bơ̆n hơđơ̆ng. Năr âu, lu bơ̆n hơdai tơchĕng pơwao hơdai gah minh tơdrong dang lĕ hmă đĕch, sơmă chĕp ba tơdrong mơsêh tih tơplih chăl arih: Chang hơmĕng. Tơdrong chang hơmĕng noh ưh kơ trŏ minh tơdrong tơchĕng ‘lơ̆ng mă jơhngơ̆m hiôk ưh kơ kơjăp ôh, mă jơ̆ tơdrong lui ngeh chô̆ kơjăp đơ̆ng Tơ’ngla ‘Lơ̆ng Tơpăt.

Năr ‘nâu, ‘năr 31/03/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jessica Teed kơ̆l ‘bai CHANG GÔ

Buăl tơchĕng kiơ kơplah kơtơ̆ng nơ̆r krao “Chang hơmĕng”?

“Nhŏng oh, nhôn roi tơpăt kơ iĕm wă kơ iĕm băt gah lu bơngai lui lôch boih sư gô iung arih dơ̆ng. Apinh iĕm ‘nĕ kơ sơ’ngon thoi lu bơngai ưh kơ lui sư khan lôch ưh kơ gơh iung arih dơ̆ng. Bơ̆n băt kơ Yêsu iung arih boih păng bơ̆n kư̆m băt dôm lu bơngai lui kơ Sư mă lôch boih ‘Bok Kei-Dei ăn kơ lu sư gô jur hơdai Yêsu ning-mônh.” (I Têsalônik 4:13-14)

Hăm inh, chang hơmĕng jơ̆ chĕp ba minh tơdrong pran ưh kơgơh pơtŏ pơting. Noh jơ̆ tơdrong kăl yua, huay kơ lŭch hloh kơ por sŏng đak nhă rim năr. Mă loi, tơdrong chang hơmĕng đơ̆ng Kră Yang păng tơdrong hlôh wao đơ̆ng Sư đei tơdrong gơh tơplih đĭ minh chăl arih. Sơ̆p hla bơar Nơ̆r ‘Bok Kei-Dei đei chih lăm Hêbrơ 6:19 thoi âu: Tơdrong bơ̆n chang gô noh, thoi lĕ kơ bơ̆n chĕp khêl pĕng akâu bơ̆n, yua kơ bơ̆n gơnang kơ ‘Bok Kei-Dei mă oei tơ plĕnh ti. Noh wă khan, tơdrong chang hơmĕng noh đei tih pran tôm mah wă pơkơ̆ng lu bơ̆n gơh dơ̆ng kơjăl, mă khan dôm lu poh yă tih lăm tơdrong jĭ jăn păng anat anot jum dăr. Ih hăm đei layơ mơn đei tơdrong chang hơmĕng noh lăm tơdrong arih ih ưh?Tơdrong ơh sơ’ngon noh jơ̆ tơdrong mă rim ‘nu lu bơ̆n đei mơn ngăl. Tơdrong mơn noh ưh kơ đei kơnê̆ ôh, tơdrong noh đei truh đơ̆ng Tơ’ngla pơjing lu bơ̆n. Tơpă, inh âu kư̆m ưh kơ hlĭch kiơ kơ tơdrong ơh sơ’ngon noh. Đơ̆ng rŏng kơ klo inh lôch, păng ưh kơ đunh đơ̆ng rŏng kơ noh, đei buăl juăt inh lôch, inh mơn tơdrong lôch truh tơ inh thoi lĕ kơ đak poh yă klơ̆p inh, răp gô wă iŏk klĕ tơdrong hơđơ̆ng lăm jơhngơ̆m inh. Mălei lăm kơplah đei tơdrong arih pơchah pơchek noh, inh oei đei chang hơmĕng.

Đei băt kơ Kră Yang Yêsu jơ̆ đei bơwei minh tơdrong chang hơmĕng ưh kơ đei kiơ gơh pơm ngil ngŭl- chô̆ kơjăp kơplah tơ’bơ̆p tơdrong anat anot. Thoi lĕ Nơ̆r đei chih lăm ITêsalônik 4: 13-14: “Ơ ‘nhŏng oh, nhôn roi tơbăt kơ iĕm wă kơ iĕm băt gah lu bơngai lui lôch bơih sư gô iung arih dơ̆ng. Apinh iĕm ‘nĕ kơ sơ’ngon thoi lu bơngai ưh kơ lui sư khan lôch ưh kơ gơh iung arih dơ̆ng. Bơ̆n băt kơ Yêsu iung arih bơih păng bơ̆n kư̆m băt dôm lu bơngai lui kơ Sư mă lôch bơih ‘Bok Kei-Dei ăn kơ lu sư gô jur hơdai Yêsu ning-mônh.”

Ơh sơ’ngon ưh kơsĭ mĭnh tơdrong kiơ kơnê̆ ôh. ‘Noh jơ̆ tơdrong tơ’bôh pơdah khan lu bơ̆n đêl đei tơdrong ‘mêm jrŭ tơpă. Mălei, tơdah lê̆ bơ̆n kơdih oei lăm tơdrong ơh sơ’ngon, ăn kơ tơdrong hiong răm pơklơ̆p jơhngơ̆m đon tơchĕng lu bơ̆n lei hli krê dêh tơpă. Tơdah ưh kơ pơjao đĭ tơdrong ơh sơ’ngon noh tơ Kră Yang, lu bơ̆n gô pŭ iŏk tơdrong kơnê̆. Thoi noh bơih Nơ̆r ‘Bok Kei-Dei khan kơ lu bơ̆n ‘nĕ kơ ơh sơ’ngon thoi lu bơngai ưh kơ đei chang hơmĕng.

Thoi noh, ơh sơ’ngon thoi “Bơngai đei chang hơmĕng” noh thoi yơ?

Noh ưh kơ sĭ weh wer đơ̆ng tơdrong ơh sơ’ngon ôh, ưh kơ sĭ ĕnh ưh kơ lĕch đak măt ôh, sơmă chơ̆n jơhngơ̆m gô tơ’bơ̆p tơdrong noh truh. Kơplah đak poh yă tơdrong sơ’ngon truh, bơngai đei chang hơmĕng gô ‘bôh mơn kơ Kră Yang oei jê̆ păng chă Sư wă kơ đei tơdrong pơlung.

Noh jơ̆ rôp kơjăp tơ’ngla ‘Bok Dŏng Pơklaih păng dôm nơ̆r Sư pơkă. Wă kơ bơ̆n đei chô̆ kơjăp lăm trong ‘lơ̆ng tơpăt, mă khan ơh sơ’ngon kơ bơngai bơ̆n ‘mêm lôch tih dang yơ, Kră Yang oei rôp kơjăp ti buăl. Sư ưh kơ đei layơ achăng ôh. Noh jơ̆ tơdrong lui ngeh, tơdrong lôch noh ưh kơ đei tôch hăm lu bơngai bu mă lui sơng iŏk Sư. Lu sư ưh kơ sĭ mĭnh pah lăm tơdrong hlôi hloh bơih, noh jơ̆ minh pah lăm tơdrong arih buăl đei ling lang tơ anăp.

Nơ̆r ‘Bok Kei-Dei đei pơkă khan: “Mă-lei bu chang gô Kră Yang sư gô đei jơhngơ̆m pran ‘nao, sư gô păr kơjung thoi sem klang; kơdâu mă ưh kơ băt kơ lap, nơnăm mă ưh kơ gleh.”(Êsai 40: 31)

Kơplah đei tơdrong ơh sơ’ngon, hơpơi kơ buăl gô ngơk lăng tơ Tơ’ngla mă oei kuăr krôp buăl lăm tơpang ti Sư, Tơ’ngla ‘mêm kơ buăl hloh kơ đĭ đăng dôm lu tơdrong mă buăl đei tơchĕng pơwao.

Hơpơi kơ buăl đei jơhngơ̆m pran wă pơgăn lê̆ tơdrong chhŭr nuih krôp gom buăl. Athei ăn kơ Kră Yang tuh ăn jơhngơ̆m pran kơ buăl. Hơpơi kơ buăl huay kơ ơh sơ’ngon thoi kơ bơngai tơ ala teh âu, sơmă rơih iŏk tơdrong tơ’bưh hăm tơdrong chhŭr nuih thoi lĕ minh ‘nu bơngai đei chang gô Yang Yêsu.

Hơpơi kơ tơdrong hơdah păng tơdrong chang hơmĕng Kră Yang gô pơchrang hơdah kơ buăl tŏk bŏk teh đak măng mu âu, chông anhăk đe bu mă oei rơhing chă trong wih brŏk tơ hnam, wih brŏk tơ tơdrong ‘mêm Kră Yang krôp kuăr.

Apĭnh đĭ đăng krao khan hơdai: Kơkuh kơ ‘Bă kơpal plĕnh ti, năr ‘nâu kon năm ‘bơ̆t anăp Ih hăm dôm lu tơdrong pơchah pơchek păng ơh sơ’ngon lăm jơhngơ̆m. Bơnê kơ Ih yua kơ Ih jơ̆ Tơ’ngla mă hlôh ‘bôh đak măt, dôm tơdrong chhŭr nuih kon oei đei chĕp ba. Apinh ‘nĕ ăn kơ tơdrong ơh sơ’ngon âu klơ̆p lê̆ kon, păng tuh ăn kơ kon đei tôm mah lăm đon lui ngeh wă gơh ‘bôh tơdrong hơdah hơmĕng đơ̆ng Ih- chô̆ kơjăp ăn kơ bơhngol kon. Apinh Ih pơlung păng pơthim ăn kơ kon đei jơhngơ̆m pran wă kơ kon dơ̆ng kơjăp lăm tŏk bŏk đak poh yă tih lăm chăl arih kon. Hơpơi tơdrong arih kon pơchrang tơdrong hơdah đơ̆ng Ih, wă kơ đơ̆ng tơdrong ơh sơ’ngon kon, kon gô mơn băt păng chông anhăk lơ bơngai mă oei wơ̆l jrok kơ trong năm truh tơ anih hiôk hian. Kon kŭp kơl krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘nĕ kơ jô̆ jŏk kơ kơdih akâu rim wơ̆t mơn jơhngơ̆m chhŭr nuih yua kơ ‘blŏk ‘mêm. Yua kơ đơ̆ng đak măt noh jơ̆ pơsĭt pơdah jơhngơ̆m ‘mêm tơpă. Mălei Kră Yang ưh kơ wă lu bơ̆n ling lang oei lăm măng mu ơh sơ’ngon Kơplah lu bơ̆n pơ̆n nuih chĕp ba lu tơdrong pơchah pơchek noh dan ‘bơ̆t ala jơ̆ng Sư, noh jơ̆ kơplah tơdrong chang hơmĕng Sư đei hơdah lăm jơhngơ̆m lu bơ̆n. Tơdrong lôch ưh kơ tôch ôh, păng jơhngơ̆m chhŭr nuih lu bơ̆n dang ei kư̆m ưh kơ chĕp nơ̆r pơma truh tơ tuch luch ôh. Athei ‘blŏk thoi âu, buăl oei đei bơwei lăm tơpang ti Tơ’ngla mă ‘mêm kơeng kơ buăl, păng Sư pơkă khan gô ăn kơ buăl đei jơhngơ̆m pran ‘nao wă kơ buăl păr kơjung thoi sem klang.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.