Peb lub neej ntseeg muaj tej txua sijhawm cuag li txhua yam nyob tso siab plhuav. Peb thov Vajtswv, nyeem Vajluskub, mus pehawm tom tuam tsev, thiab pom tias Vajtswv nyob ze heev. Tiamsis kuj muaj tej lub sijhawm, thaum peb txoj kev ntseeg tsis yog cov lus txhawb zog lawm, dhau los ua ib txua kev nyuaj, qhov chaw peb ntsib yog lub nra nyhav, tej kev tawm tsam thiab tej kev txiav txim siab mob siab tuaj.

Tshwj xeeb yog nyob hauv tsev neeg, qhov chaw uas nyob ze peb tshaj, yog thaj chaw uas muaj cov lus nug nyuaj tshwm los. Muaj tej lub sijhawm peb cim civ nug: yuav tiv qees lossis yuav tau nres tiv thaiv yam yog? Ntawd yog tswj tus kheej lossis tab tom raug txim? Ntawd yog tej lus muaj zog lossis txhob txwm tswj txhua yam? Thaum twg peb yuav tau tawm tsam thiab thaum twg peb yuav tau muab fij rau Vajtswv?

Tej lo lus nug nyuaj no nws yeej nyob tsis deb rau cov neeg ntseeg Vajtswv. Tseeb tiag, nyob rau tej lub sijhawm uas nyob ze Vajtswv, ib txwm swm txhua hnub, peb pib nkag siab txog ntoo khaublig tsis yog tsuas yog ib lub cim ntawm txoj kev cawmdim xwb, tiamsis tseem yog txoj kev ntawm ib tug thwjtim. Kwv ntoo khaublig tsis yog nrhiav kev txomnyem, tiamsis lees nrog tus Tswv mus nyob hauv tej kev txiav txim siab nyuaj tshaj hauv lub neej.

Hnub no, yog hnub 03/04/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm ZOO SIAB HLO KWV NTOO KHAUBLIG

“ Peb yuav tsum ntsia ntsoov Yexus tus uas yog peb lub hauvpaus kev ntseeg thiab ua kom peb kev ntseeg tiav. Thaum luag muab nws ntsia rau saum ntoo khaublig, nws ua siab ntev nyiaj tej kev txomnyem ntawd, nws tsis suav hais tias qhov uas nws tuag saum ntoo khaublig ua rau nws poob ntsejmuag, rau qhov nws paub hais tias thaum dhau txojkev txomnyem lawm, nws yuav zoo siab kawg li; nimno nws twb mus zaum ntawm Vajtswv lub zwmtxwv sab xis lawm” (Henplais 12:2).

“Kuv paub koj tsis yog ib tug neeg zoo li ntawd!”

Thaum nyuam qhuav mloog cuag li yog ib lo lus ntseeg siab tau. Ib lo lus tab pov tias tus mloog nws nkag siab yus, ntaus nqi siab rau yus, thiab ntseeg yus tus cwjpwm. Tiamsis nyob rau qee lub sijhawm, lo lus ntawd nws ho muaj nws lwm lub ntsiab, ib lub nra nyhav dua.

Xam tias qhov no tshwmsim nyob rau hauv ib txoj kev sib raug zoo hauv tsev neeg ntau xyoo. Qhov chaw uas koj raug quab yuam kom yuav tau tswj tus kheej, ua rau koj qaug zog zis tsis muaj zog rau lub zog thiab nyiaj txiag.

Txhua zaug uas koj pib nug lo lus nug, pib xav txog qhov uas yuav nres cia, tus tod ho hais tias:

“Kuv paub tias koj tsis yog tus neeg zoo li ntawd!”

Hnov ib lo lus qhuas, tiamsis nyob hauv ho yog lwm lub ntsiab lus txawv:

“Kuv paub tias txawm kuv yuav ua yuam kev pes tsawg zaus… txawm kuv yuav muab koj tso rau lub caijnyoog phomsij … txawm kuv yuav dag koj zaum no tas txog lwm zaus… los koj yuav tsis tso kuv tseg.”

Txog ib lub sijhawm twg ntawd, peb kuj yuav cim civ nug tias: Yus puas yog ib tug neeg zoo li ntawd tiag?

“Yog, kuv tsis yog ib tug neeg zoo li ntawd.”

Tiamsis tsis yog raws li qhov uas koj xav.

Kuv tsis yog tus neeg tso kuv tsev neeg tseg tiamsis kuv kuj tsis yog tus neeg cia tej qhov yuam kev ntawd pheej tshwmsim los. Kuv tsis rhuav txoj kev sib raug zoo. Tiamsis kuv kuj tsis ceev cia cim civ nrhuav kuv tus kheej.

Kuv ntseeg rau txoj kev yuav rov qab zoo. Kuv ntseeg Vajtswv lub hwjchim. Tiamsis vim yog ntseeg li ntawd, txawm yuav mob los yuav tau ua kom txawv mus. Ua txawv mus tsis cia txoj hlua ntawd nyias zuj zus txog thaum kawg cia li tu nrho. Ua txawv kom kuv yeej tseem nyob ntawd thov Vajtswv thiab tos. Ua txawv mus kom thaum koj txaus siab hlo hloov pauv, koj yeej tseem tshuav ib qhov chaw tig rov qab los.

Thiab nyob ntawm tej kev txiav txim siab li no, peb pib nkag siab txog ib yam tias: yus tab tom kwv tus ntoo khaublig nyob hauv yus lub neej.

Tswv Yexus hais tias: “Yog leejtwg xav nrog kuv mus, tus ntawd yuav tsum tswj nws lub siab thiab kwv nws tus ntoo khaublig nrog kuv mus” (Malakaus 8:34).
Ntoo khaublig tsis yog ib qhov xwm txheej hauv keeb kwm tau tshwmsim saum roob Kaulakauthas. Ntoo khaublig yog txoj kev ntawm cov neeg nrog tus Tswv mus. Peb pheej xav tias ntoo khaublig yog tej uas tau muab mus. Tiamsis ntau zaug ntoo khaublig tshwmsim nyob ntawm tej yam uas pheej tshwm los hauv lub neej: thaum peb xaiv zam txim pauv qhov uas iab siab, thaum peb xaiv tso ntawm tus ciam no pauv qhov uas rov qab tiv, thaum peb xaiv thov Vajtswv pauv qhov uas tswj nrees.

Tej kev xaiv ntawd tej zaug tsis muaj leej twg pom. Tiamsis Vajtswv pom. Thiab nyob hauv tej yam me me ntawd, peb tab tom mus rau hauv txua kev kom dhau los zoo li Vajtswv dua.

Kom nkag siab ntoo khaublig, peb yuav tau saib ntsoov Tswv Yexus:

Nyob rau hmo Tswv Yexus raug txomnyem, hauv lub vaj Khexemanes, Tswv Yexus thov Vajtswv:

“Kuv Txiv, yog koj porn zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb! ” (Mathais 26:39).

Ntawm no peb ntsia pom ib qhov uas muaj tiag: Tswv Yexus kuj ntsib tej kev mob ntawm ntoo khaublig.

Tiamsis yam uas ua rau Tswv Yexus kam mus ntxiv tsis yog tib neeg lub zog, tiamsis yog txoj kev mloog lus raws li Leej Txiv siab nyiam. Twb yog txoj kev mloog lus ntawd qhib ib txoj kev cawmdim rau peb. Yexus Khetos cov ntshav tau ntws los kom peb muaj txojsia tshiab.

Dhau ntawm ntoo khaublig, peb muaj peev xwm xaiv txawv mus. Peb muaj cuab kav hlub lwm tus. Peb kuj muaj dua lwm qhov kev txiav txim zoo dua.

Kwv ntoo khaublig tsis yog tias tiv yam tsis muaj qab hau. Nyob hauv lub neej ntseeg, ntawm no yog ib txua kev yuav tau yug dua tshiab, txua kev uas Vajtswv hloov pauv peb kom yim hnub yim dhau los zoo li Vajtswv dua.

Paulus hais tias: “ Yam uas kuv xav yuav heev dua lwm yam huv tibsi, yog qhov uas kuv xav paub Yexus Khetos heev dua yav tas los. Thiab xav tau lub hwjchim uas ua rau Yexus sawv hauv qhov tuag rov qab los. Kuv zoo siab nrog nws raug kev txomnyem thiab kuv xav muaj lub siab zoo li nws lub thaum nws raug kev tuag ” (Filipis 3:10).

Qhia Tswv Yexus txoj kev tuag yog tus dabtsi? yog thaum peb pib nkag siab Vajtswv tus dejsiab dhau ntawm tej kev sim siab uas peb ntsib.

Thaum peb zam txim, peb pib nkag siab txog Vajtswv txoj kev zam txim. Thaum peb tso tseg, peb pib nkag siab txog Tswv Yexus txoj kev muab pub. Thaum peb muab txoj cai rau Vajtswv kav peb pib nkag siab txog Tswv Yexus txoj kev mloog lus.

Dhau ntawd peb yuav maj mam dhau los zoo li Vajtswv dua. Mloog cuag li tsis tshua yog, tiamsis Vajluskub hais tias ntoo khaublig yuav coj peb mus rau qhov kev zoo siab:

“…Thaum luag muab nws ntsia rau saum ntoo khaublig, nws ua siab ntev nyiaj tej kev txomnyem ntawd…” (Henplais 12:2).

Tswv Yexus ntsia pom qhov khoom plig loj dua tej kev mob tamsim. Nws ntsia pom txoj kev cawmdim. Nws ntsia pom neeg ntiajteb hloov dua tshiab. Thiab thaum peb kwv ntoo khaublig hauv yus lub neej, peb kuj pib ntsia pom yam uas loj dua. Ntoo khaublig dhau los ua: ib lub meej mom, ib txoj kev hloov pauv, ib lub qhov rooj rau peb nkag siab txog tus uas tau vim peb thiaj tuag. Kwv ntoo khaublig tsis ua rau peb poob kev zoo siab, tiamsis nkag los rau hauv txoj kev zoo siab loj dua: txoj kev zoo siab thaum mloog lus.

Thov caw nrog kuv peb thov Vajtswv ua ke: Kuv tus Vajtswv. Nyob hauv lub neej, kuv yuav tau ris tej nra nyhav dhau. Kuv xav hlub, tiamsis ntau zaug ho raug muaj kev tu siab. Kuv xav ua yam yog, tiamsis tsis paub tias qhov twg thiaj yog tus nrim ntawm kev ua siab ntev thiab yuav tau tawm mus. kuj muaj tej kev txiav txim siab ua rau lub siab mob thiab xav tsis thoob.

Thov Vajtswv pab kom kuv saib ntsoov Tswv Yexus tus ntoo khaublig. Thov ntuas kuv tias Vajtswv tau mus dhau txoj kev mob ua kuv ntej, thiab Nws nkag siab kuv tej kua muag poob los.

Thov pub kom kuv muaj kev txawm ntse los hlub kom yog kev, muaj lub siab tawv nres thaum cheem tsum, thiab txo hwjchim muab tso rau Vajtswv tej yam uas kuv hloov pauv tsis tau.

Thov tuav kom kuv lub siab tsis raug tej kev iab siab, tsis raug txoj kev tag kev cia siab, tsis muaj kev ntshai. Thov qhia kuv paub kwv tus ntoo khaublig nrog kev zoo siab; vim paub tias nyob hauv txhua yam, Vajtswv hloov pauv kuv dhau los zoo li Vajtswv dua. Kuv thov hauv Tswv Yexus Khetos lub npe, Amees.

Cov kwv tij txhua tus, thaum peb xaus lub sijhawm thov Vajtswv no, tej teeb meem hauv lub neej yeej tseem nyob ntawd. Tej kev sib tham txog kev txomnyem hauv tsev neeg yeej tseem tshuav. Tej kev txiav txim tsis tau muaj lo lus teb meej meej tab tom tos tom ntej. Tiamsis peb tsis mus ib leeg. Tswv Yexus, tus tuag saum ntoo khaublig, tab tom nrog peb mus ua ke. Nws tsis yog tsuas nkag siab peb lub nra nyhav xwb, tiamsis tseem nrog peb ris ua ke thiab.

Yog li, txawm lub caijnyogo yauv zoo li cas los, peb kuj tsis tas kev cia siab.

Vajtswv tsis tso peb tseg. Thiab peb kuj tsis tso yam uas Vajtswv tau muab tso rau hauv peb lub neej tseg. Thaum peb tsis tso txoj kev hlub tseg. Thaum peb tsis tso qhov tseeb tseg. Thaum peb tsis tso Vajtswv tej lus cog tseg tseg. Peb kwv ntoo khaublig tsis yog qhov xaus ntawm zaj xwm. Nws yog txoj kev coj peb mus rau txoj kev sawv hauv qhov tuag rov qab los. Thov Vajtswv pub lub siab tawv kom mus rau hauv qhov kaj, nrog kev zoo siab, nrog kev ntseeg thiab nrog kev cia siab uas tsis muaj hnub tuag.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.