Tòm rài kis, gơs ală bơta jê sồt dờng ngan lơh sơ ềl nùs nhơm mơ cau lơh ală bơta hớ, hớ la ală cau đềt mềr mơ he, ơm rềp mơ he. Tú broă jê nùs gơlik gơs, bơta sràt bơtang, rơm să mơ bàsìl gơtơntus lơh he in rngòt rngơt ngan. Lơh mbè lơi nàng dờp git tềl sơnio ală bơta sơbơng roh, nàng sền gar să tòm he mơ jòi bàn bơta sơmbòi tus bơh Yàng taih?

Ngai do, 14/10/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume BƠTA JÊ SỒT MÒ TAMA

“Kơnràñ sơmbòi cau gơs nùs jê sồt moat jrùng, Mơ pùt tiah sồt bol khai dê.” (Đơs Crih 147:3)

Sèng Sră Goh tòm 2 Samuel 13:9-20 cih wơl jơnau hơ jê nùs mơ moat jrùng mò Tama dê:

“Amôn… đơs: Sồr tĕ jơh tơl nă cau lik bơh tềng do.” Behơ̆ jơh tơl nă cau lòi khai mơ lik. Gen Amnôn đơs mơ Tamar lah: “Cèng tĕ phan sa tềng do tus tòm ơdŭ bic añ jê nàng añ in sa bơh di tê oh.” Mơya tòm tŭ Tamar cèng piang lă Amnôn in sa, Amnôn sơmbat kup khai mơ đơs lah: “Tus tĕ bic mơ añ, ơ oh ùr añ jê.” Khai đơs lah: “Bañ lơh behơ̆, ơ bi añ jê! Bañ bơklơn añ. Bơta do òhềt tŭ lơi gơs tòm Israel! Bañ lơh bơta iơh rmơh behơ̆. Đah mơ añ, ntềng đah añ rgơi cèng bơta ƀàssìl añ jê taih? Mơ gơwèt mơ bi, bi rơp gơlik gơs kung be dô nă tòm mpồl ală cau ală alai iơh rmơh tòm Israel. Mơya Amnôn ò bài iat khai; mơ tài bơh Amnôn pràn rlau mơ khai, gen bic bơklơn khai. Lồc behơ̆, Amnôn gơjrañ kơuềng ngan di khai; mơ tai, khai gơjrañ di Tamar oă rlau mơ khai neh kòñ gơboh di Tamar… Tamar ơn bùh hơđang bồ khai, mơ crè ào jrùh khai soh. Khai koar di bồ mơ lòt ndang ñìm nggà ndang… Behơ̆ Tamar ơm is moat jrùng tòm hìu Apsalôm, bi klau khai dê.

Oă năm lòt bal mơ tompà bal mơ ală cau pơnu ơruh bơh bơta kờn gơboh mơ bơta tombau, an dờp git oă cau kơnòm git ờ tơl tòm bơta do. mơya ngkời bơta hớ, gơs ală cau kơn nòm gơkòl cau bơklơn moatjrùng ngan, mơ cau lơh ală bơta do ờ di la cau bơdìh, mơ la cau tờm, jơi bơtiàn tòm hìu nhă – la ală cau mơ ală bol oh ờ kơlôi tus mơ rcang. Broă gơlik gơs mơ mò Tamar hớ là dồ nơm krơh ràng tơlik loh làng ngan ală bơta jê sồt hớ.

Tamar mut tòm ơdú Amnon mơ nùs nhơm song, dờn bơr cau bàp nàng ròng siam cau bi bạp bal me is gam kòp jê. Bơh la cau tòm hìu nhă gen mò ờ pin wil wơl. Mơya tềl sơnio bơta iơh neh geh ràng tơlik bơh sơn rờp: Amnon sồr jơh cau lik bơdìh mơ mìng sồr mò mut tòm ơdú bic khai dê lơm! Tú dồ nă cau jòi pơnah ơm is mơ he tòm tiah dơp ndơr, cau ndai ờ rgơi gó, do la dồ bơta yal lài he in. bơta kờn gơboh song sùm jòi bơta ring lơngai mơ loh làng; mìng bơta ham kờn poac să sùm jòi bơta klam jơngo, taih ờ cau git nàng lơh broă tìs glài.

Tú Amnon ràng tơlik bơta iơh, Tamar neh tomdră mơ jơnau đơs jak chài ngan: “Bañ lơh behơ̆, ơ bi añ jê! Bañ bơklơn añ. Bơta do òhềt tŭ lơi gơs tòm Israel! Bañ lơh bơta iơh rmơh behơ̆. Đah mơ añ, ntềng đah añ rgơi cèng bơta ƀàssìl añ jê taih?” mò ràng tơlik broă iơh dê đap mat Yàng mơ ràng tơlik cồng nha iơh tus dê bar đah. Mơya bơta ham kờn poac să neh lơh ồng Amnon ngui bơta pràn khai dê nàng rồn bơklơn mò. Jê sồt rlau, tơnơ mơ neh sir, khai gơjran mơ sang lòi mò dồ bă iơh rmơh ngan. Bơta moat jrùng ờ git nđò tus hơđang mò Tamar mơ mò neh crè ào khai dê, ơn bùh hơđang bồ mơ ntoàt dô tòm bơta nhìm rac dờng ngan. Bơta jê sồt sơlơ bơtơl oă rlau tú cau tòm hìu nhă ờ sền dờng màng broă gơlik gơs: David bulah gơjran broă gơlik gơs mơya ồng ờ lơh bơta song ring lơi nàng sền gàr kon ùr ồng dê, cau bi mò dê la Apsalom tơngkah mò ơm mo mó mơya ồng pồn prap bơta gơjran mơ bơta do tề lăm ồng tơnchơt ồng Amnon tòm ngai rơp tus. Lồi dut, mò Tamar kis tòm bơta jê sồt moat jrùng mơ ơm is dồ nă mò dê tòm oă sơnam pơnjat.

Bơh rùp sơnio mò Tamar dê, Jơnau Yàng tơngkah bol he lài ngan pal mhar dờp git ală tềl sơnio nàng sền gar să tờm he dê. Ban lòi sơnđan cau tòm hìu he dê lơh he in roh bơta kơrmap gar; kòp tú lơi gơs cau hòi jà he mut tòm tiah ndơp mat hala gơs ală broă lơh ờ niam, he pal mhar nàng pleh ngài. Mơtai, dilah neh lòt gan bơta jê sồt, ban lời bơta jê sồt moat jrùng kup cap bol he kis tòm bơta cah is dồ nă he. He pal khin cha ràng tơlik jơnau đơs he dê, jòi bơta dong kòl tus bơh cau he gơn kơnòm, mơ hơđang rlau jơh hớ la tus mơ Yàng. Yàng git jơh ală bơta jê sồt ndơp dơr he dê, chò nùs nàng koar he tòm tơwor tê Yang dê mơ sơm bòi kung bè dong bol he tòm bơta kờn gơboh Kơnràn dê, bè Jơnau Yàng neh hơ:
“Kơnràñ sơmbòi cau gơs nùs jê sồt moat jrùng, Mơ pùt tiah sồt bol khai dê.” (Đơs Crih 147:3)

Dan jà bol he dô nùs bal tòm bơta hòi dan: Khoai Bèp kờn gơboh hơđang trồ, Bơtau git jơh bơta jê sồt mơ jùt rào dà mat bol kon dê. Dan pà ai cau kơnòm să in bơta jak chài, mhar dờp git ală tềl sơnio sơbơng roh nàng sền gar is să tờm he dê. Dan Yàng pơndờm pơniang, sơm bòi ală cau neh tìp ală bơta jê sồt, hala gơkòl cau rồn bơklơn; dong tă ală bơta moat jrùng, bàssìl, mơ bơt bơtào wơl ală bơta niam bol khai in tòm bơta kờn gơboh Yàng dê. Kon jơh nùs hòi dăn, ai sơnđan Yàng Jêsus Krist, Amen.

Ơ ală ồng mọ oh mi kờn gơboh, să jan mơ hwềng soàn he dê la hìu jum sàng goh, kas màng ngan tòm mat Yàng, ờ gơs cau lơi gơs gơnoar nàng rồn bơklơn hala jă trơm. Drơng kơp té mơ cah is ală nhàr tòm ală bơta tomklac mơ cau ndai mơ kớ nùs sang ală broă he ờ git loh làng. Dilah he hala cau loi gam kong ală bơta jê sồt is, khin cha té cơn đoà lòt tòm bơta àng nàng jòi bơta yò đơ mơ dờp rò bơta sơm bòi crih crài tus bơh Yàng Dong Klàs bơh ngai do!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.