Nhà triết học Hy Lạp cổ đại Epictetus neh ai dô bơta sền sơwì: “Bol he gơ bàr nơm tôr mơya ming gơs dô nơm bơr, nàng iat oă rlau mơ đơs.” Mơya dilah joi wơng tòm pơnah jak chài rài do, pơnah rơndap bol he di kùng găm kơlôi kah rlau mơ hơ̆: Dô yô tồr bol he sùm ơm tòm pơnah gơ pờ nàng dòp rò kơno ală ntàs gùt dàr. Pơrlơ̆ wơl, bơr gèn geh sền gàr bơh sề kràñ cê mơ mƀùng bơr gơmềm. Jat pơnah sinh học, jơi kòn mơus geh crơng gơs nàng dòp rò lai mơ tŭ sơmpò bơr. Mơya, bota moat jrùng la tòm bơta tồi glài bol he dê sùm kờñ lơh bơta sơrlơ̆ wol: dô yô tôr gèn til kràñ cê tòm tŭ bơta sơrlung sơrlang gơlik tus, ai bơr gèn ƀuôn ngăn gơ pờ nàng lơh bah bơta gơjràñ. Bulah behơ̆, Jơnau YÀng cèng tus bol he in dô bơta sôr lăm kas màng tòm tŭ tòm tip mơ bơta gơjràñ.

Ngai do, ngai 16/10/2026, tơnggu Hoi Dan Kòp Ngai dan ja ông mò oh mi kơlôi sơnưng bal Jơnau Yàng kơnòm bơta dong kơl Tori Troncone bơh tơnggu me MHAR IAT, ÒBAT ĐƠS, ÒBAT GƠJRÀÑ.

“Ơ oh mi kờñ goboh añ jê, oh mi pal git bơta do: kòp nă cau pal mhăr iat, òbat đơs, mơ òbat gơjrañ.” (Jakơ 1:19)

Añ ò di la dô nă cau “niam tê” tòm broă tăm chi. Gơs tŭ añ geh dòp dô nơm chậu chi lò dềt(chậu xương rồng). Añ chòp hòp is bơh kơlôi lah chi do tiang pơnrơ la ƀuôn kis, nền cề la ò pal cang ròng lăng oă ir.

Bulah behơ̆, ming dô êt ngai tơnơ̆, dà tơlir hàng niam chi di nisơna gơlik gơs dà nâu. Ala bơh ngit ngơt joi bơta lơi gơlik gơs, añ sơrbac- sơrbang joi trọ̆ dà, tian gơs dô ngai añ trọ̆ bàr pe dơ̆. Sơlo trọ̆, chi sơlò ñhòp ro, mơya bơta hơ̆ ò lơh kơryăn añ pơnjat tuh bơntơl dà. Tŭ hơ̆, kơlôi sơnơng ming dul tòm bồ añ ming la: chi chề gen pal càng dà!

Moat jrùng la tơnơ̆ mơ nđò ngai, chi hơ̆ neh ôm ryas mơ chờt. Bơta kong alah dềt hơ̆ dong añ dal git lah gơs dơ̆ ală bơta nền nơn la he càng, hala ală bơta he kơlôi la di pal, bơta hơ̆ gơlik gơs la bơta lơh tơnroh ol he.

Bơta do tòm toh ndrơm mơ bơta bol he tòm tip gơwèt mơ bơta gơjràñ. Tòm tŭ jề sồt, gơwèt ò ring bal hala roh gơn kơnòm, bơta lơh lòt òs mòng la bol he kơloi he gơs gơnoăr nàng gơjràñ, geh tuh tơlik bơta gơjràñ nàng sền gàr he.

Mơya, Jơnau Yàng tòm Jakơ 1:19-20 tơngkah lah: “Ơ oh mi kờñ gơboh añ jê, oh mi pal git bơta do: Kòp nă cau pal mhăr iat, òbat đơs, mơ òbat gơjràñ; bơh bơta gơjràñ kon mơnus dê ò lơh gơlik bơta song ring Yàng Tom Trồ dê.”

Cau gơnoăr bơtô Jakơ neh lah pơrhơng bơh “bơta gơjràñ kòn mơnus dê”, la bơta gơjràñ duh nus nàng kờñ dong tò să tòm he, đơs nền he di hala kờn hòi lùp bơta song ringjat nus is. Bơta gơjràñ ò tŭ lơi gơlik gơs bơta song ring mơ Yàng niam nus. Bol he pal sền nề non tus bơta rơndap mơ Jơnau Yàng neh lơh nền: mhăr iat, òbat đơs, mơ òbat gơjràñ.

Behơ̆ ñchi bơh tai pal càng “mhăr iat”? Tòm dô bơta tòm pơndang, bol he ò mhăr lơh lòt tòm tŭ bol he ò hềt wờng lơh nùs cau gơp bơyô hala kùng ò hềt wờng ñchi bơh tai bol khai lơh behơ̆. Tŭ hơ̆, Yàng kờñ bol he ơlĕ ơdàr nàng iat mơ wờng ală tơnggu ngkơi tơnơ̆. Kơnòm “mhăr iat” mơ bol he geh pleh ală bơta tis bơrngơl gơla mơ ò lòi cà rak in joi tŭ lơmoah brồ lơh he.

Bơta sồr lăm dơ̆ bàr là “òbat đơs”. Sră pơyoa Jakơ oă dơ̆ đơs tus lơmpiat. Ông đơs “Lơmpiat be dô nơm dunnia tồi glài iơh bơsak ơm digùl ală ponah tòm să jăn he, lơh ƀơ̆ ƀơl jơh să jan, chu pơrgùc jơh rai kis cau” (Jakơ 3: 6). Bơh di lơmpiat, bol ƀuôn đơs ală jơnau sràt sơntơm digùl bơta gơhào gơjràñ. Tòm tŭ kong “mhăr iat” nàng wơng loh tòm ryas bơta sơrlung sơrlang dê, bol he gơi “òbat đơs” la gùng dà nàng bol ăt bồ lơmpiat he dê. Cau gơnoăr bơtô Jakơ neh cih: “Dilah gơs cau lơi kơlôi lah he dòn jat jơnau song, mơ ò ăt bồ lơmpiat he, mơya pơrlồm is nùs he, gèn bơta dòn jơnau song cau hơ̆ dê la ò kwơ.”.

Bơta di pal kơlôi kơlôi tus la Jakơ cih ală jơnau do ai ală cau neh geh Yàng Tom Trồ “ngui jơnau song” deh wơl pa(18), gơtha ngăn la “mhăr iat,òbat đơs, òbt gơjràñ”, bol he ò di ming kơnòm tòm bơta pơnđơl pràn nàng bơklơn is să tòm he. Bơta tòmgơl ngan ming tus tòm tŭ bol he lời Jơnau Yàng lơh pa wơl, tòmgơl pa rai kis he di. Tòm tŭ ntao di đap ală bơta ò ring bal mơ roh gơn kơnòm tòm rai kis, lời tĕ Jơnau Yàng tòm lơh ala bol he in: “Ơm tĕ ring lơngai di đap Yàng Jehôwa, mơ kơ̆ tĕ nus kòp gơn Kơnràñ; Bàñ gơs nus sơềt sơềl tai bơh cau geh bơtoah bơtoài tom gùng dà khai dê, la cau lơh gơlik gơs kai gờrmơ̆i iơh khai dê” (Đơs Crih 37:7)

“Sang tĕ bơh di oh mi jơh ală bơta sràt bơtang, gơjràñ mañ, gơhào nus, nggôr nggàc, bơrsèl tơnhial, bal mơ jơh ală bơta bih khih. Ai tĕ bơta kơ̆ dơn, nus nđàc sơngit, ơm gơrơm bal, toh glài bal, kùng be Yàng Tom Trồ neh toh glai oh mi tòm Bơtau Krist be hơ̆ sơl.” (Ephesô 4:31- 32)

Tòm tŭ gŏ bơta gơhào gơjràñ rơp sơntòm joi ơnih tiah tòm nus nhờm bol he, ala bơh pơnjat “tuh dà” ròng siam gơ mơ ală jơnau dong tò is să tòm he in, bol he pal càng tơnliah să he joi bơta gơs mat Yàng dê mơ dăn gơnăp gơnoăr Yàng Hwềng Goh dê dong bol he toh glài mơ kờn goboh, be Kơnràñ neh sùm toh glai mơ kong ơt gơwèt mơ bol he.

Dan jà bol he dô nùs bal tòm bơta hòi dan: Ơ Bèp kờn goboh, dan toh glai kòn in, bơh oă dơ̆ kòn neh lời bơta gơjràñ lơh gơs cau tòm rài kis kòn dê. Dan toh glài bơh ală tŭ kòn kis tòm bơta sràt bơtang, gơjràñ kơwìng ala bơh kờñ gơboh be Kơnràñ kờñ. Behơ̆ gèn, dăn Yàng Hwềg Kơnràñ lah pơrhin hwềng nus kòn, tùh bềng lều tom nus kòn bơta kờñ gơboh, hờn chò, ring lơngai mơ lơbơn niam. Dan dong kòn sùm kòp kờñ joi jat Kơnràñ nàng git lam bơta hòn chò wil tơl tòm tŭ ơm tòm bơta gơs mat Bèp dê. Kòn jơh nus hoi dăn, tòm sơnđăn Yàng Jesu Krist, Amen.

Ơ ală ông mò oh mi kờñ gơboh, digùl ală bơta jề sồt tòm rai kis kòp ngai, bơta lơh lòt di pal gơs Cau Dòn Yàng dê la git mhăr iat, òbat đơs, mơ òbat gơjràñ. Hơ̆ ò di la pơnđơl pràn bơklơn să tòm he mơ la cồng nhà òs tus bơh bơta gơtòm klĕ ngăn mơ Kơnràñ. Ngai do, ông mò oh mi rgơi lơh lòt jat Jơnau Yàng gan di broă đơs jơnau kờn gơboh, lơbơn niam tòm tŭ tip bơta sơrlung sơrlang mo. Kung pal toh glài mơ cau neh lơh he in jề sồt. Bulah git bơta do la kalkê, mơya dăn tĕ mơ Yàng ai ông mò oh mi in nus khin chà mơ gơnap gơnoăr nàng kis tòm toh mơ Jơnau Kơnràñ bơh di ală bơta lơh nìn dờng, dềt hơ̆.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.