Tom tŭ dô nơm rơndeh-par gơdùh hala dô nơm ơhò gơkrăm, gen bơta kis gam wơl 100% ală cau nac dê la dô bơta kalkê ò rgơi gơs. Mơ ya, digùl Địa Trung Hải pràn rlau bar rbô nam lài, dô nơm ơhò cèng 276 nă cau neh tơrlah jơh kờp pơnah, mơ ya bơta crih-crài la ò gơs dô nă cau lơi roh bơta kis. Bơta lơi neh lơh gơs bơta kis crih-crài hơ̆? Hơ̆ la ò di bơh bơtoah-bơtoài, mơ ya tus bơh bơta nđàc mơ jơnau ho Yàng Tom Trồ. Bơta kalkê bòl glar digơlan tơnlề jơh ală bơta pal cang, jền prĭa hala bơta pràn kơldang bol he, mơ ya ò gơs dô nơm cal-rƀùt dunnia lơi rgơi phà tơrlah bơta lơh nền Yàng Tom Trồ dê neh lơh nền lài cau gơrê mơ Kơnràñ.

Ngài do, ngai 17/10/2026, Bơta Hòi-dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Nia Taylor dê bơh tơnggume BƠTAU MƠ AÑ GƠRÊ BAL MƠ DUH BROĂ.

“Bơh tòm mang do Yàng Tom Trồ la Bơtau mơ añ gơrê bal mơ duh broă, neh ai cau gơnrơh Kơnràñ dê ntào di gah añ, mơ đơs lah: ‘Ơ Pol, bañ rngòt, mê pal lòt tus ntào di đap Sesa, mơ do, Yàng Tom Trồ neh ai mê in jơh ală cau hào ơhò bal mơ mê.’ (Broă 27:23-24)

‘Ơ Pol, bañ rngòt, mê pal lòt tus ntào di đap Sesa, mơ do, Yàng Tom Trồ neh ai mê in jơh ală cau hào ơhò bal mơ mê.’Behơ̆, ơ ală ồng, kơ̆ tĕ nùs, bơh añ dòn di Yàng Tom Trồ lah rơp gơlik gơs tòm toh be jơnau Kơnràñ neh đơs mơ añ.” (Broă 27:25-25)

Lơh mbe lơi nàng bol he rgơi ntào kơ̆ digùl ală càl-rƀùt dờng rlau jơh rài kis dê taih? Hơ̆ ò tŭ lơi la công nha bơh pràn is dê hala bơta git lam bol he dê, mơ ya jơh ală bơta tus bơh bơta nđàc mơ bơta at-bồ Yàng Tom Trồ dê. Tom bơta gơrwang crih-crài Kơnràñ dê, Yàng sền gar ală cau gơrê mơ Kơnràñ, mơ kung rgơi ngui ală bơta bòl glar nàng yal tơlik gơnap-gơnoar mơ nùs nđàc sơngit ală cau gùt dar in.

Tom tŭ sền wơl rài kis he, añ sơlo wă wờng rlau bơh jơnau song do. Têh dờng bơh dô nơm tiah gơs oă bơta kalkê mơ tơrlah-tơrlơm, neh ò dô ềt dơ̆ añ tơmùt ìs să añ tom bơta dùt gùng bơh ală bơta sac rwah tìs. Mơ ya, digùl ală công nha bơh să tòm neh lơh, añ gam đal git bơta nđàc mơ bơta at-bồ Yàng dê. Gan ală bơta lơi Kơnràñ ai gơnoar añ lòt gan, añ rgơi sền wơl nàng đal git bơta nđàc Kơnràñ dê mơ lơh cơng wơl nàng pơndòm-pơniàng oă cau ndai.

Càl-rbùt hala bơta kalkê la ală bơta ò rgơi pleh klàs tom rài kis. Hơ̆ digơlan la bơta siău-siăr, kòp-jê, roh broă lơh hala roh bơta gơtomklac bal. Tom ală tŭ hơ̆, digơlan bol he sền gŏ ò tơl pràn, mơ ò gam bơta gơn-kơnòm lơi tai. Mơ ya bơta hơ̆ ò gơs gơtha la Yàng Tom Trồ ò rang tơlik bơta nđàc mơ bơta dọ̆ng-tă Kơnràñ dê.

Kơnràñ gam lơh broă jat tơnggu Kơnràñ dê, bulah tom tŭ bol he òhềt wă wơng jơh bơta Kơnràñ lơh. Bơta hơ̆ tơngkah bol he kah tus bơta yal yau cau gơnoar bơto dơng ồng Pol bal mơ 276 nă cau gơkòl pơrdu digùl dàlêng tom Broă 27:14-44. Tŭ hơ̆, bol khai neh tìp dô nơm cal-rbùt dờng gơs sơnđan la Ơrakilôn, tiàn gơs “gơpơrdu nơu ơhò, tơmdră mơ càl ò jai” (seng 15). Ală cau hơđang ơhò gơduh tom bơta roh gơn kơnòm: oă ngai ò sền gŏ mattơngai, lòi gơpơnjat tơn mơ càl dò gơ, pal sang sơrbì jơh ală phan bal mơ phan ngui tom dàlêng, roh gơn-kơnòm tian gơs “roh jơh bơta gơn-kơnòm geh dong-klàs” (seng 20). Tŭ hơ̆, bulah gơs oă bơta git lam lòt tom dàlềng gen kung gơlik gơs ò kwơ.

Tom tŭ ơhò mòr gơkrăm, tom tŭ jơh ală cau lơh broă tom ơhò, cau lĭng mơ cau glài jam cau lơi kung kong-alah mơ ơt sa jơh bar poh, dô nă cau glài jam sơnđăn la Pol neh ñă ntào mơ đơs mơ bol khai: “Mơ tŭ do añ bơto pơndòm ală ồng kơ̆ tĕ nùs, tòm ală ồng ò gơs dô nă cau lơi roh bơta kis ò, roh mìng dô nơm ơhò lơm. Bơh tòm mang do Yàng Tom Trồ la Bơtau mơ añ gơrê bal mơ duh broă, neh ai cau gơnrơh Kơnràñ dê ntào di gah añ, mơ đơs lah: ‘Ơ Pol, bañ rngòt, mê pal lòt tus ntào di đap Sesa, mơ do, Yàng Tom Trồ neh ai mê in jơh ală cau hào ơhò bal mơ mê.’ Behơ̆, ơ ală ồng, kơ̆ tĕ nùs, bơh añ dòn di Yàng Tom Trồ lah rơp gơlik gơs tòm toh be jơnau Kơnràñ neh đơs mơ añ.” (seng 22-25)

Ồng Pol rgơi kơ̆ nùs tom tŭ càl-rbùt la tài bơh ồng git he gơrê mơ ñcau mơ dòn nền di jơnau ho Yàng Tom Trồ neh đơs. Ồng sơnđan Kơnràñ la “Bơtau añ gơrê bal mơ duh broă”. Do la mơnàng nàng ồng Pol rgơi kơ̆ nùs. Ồng git he gơrê mơ Yàng Tom Trồ mơ kis nàng duh broă Kơnràñ. Gen tang, bulah ò rgơi tơnroh càl-rbùt, mơ ya ồng git nền càl-rbùt gam ơm hơđơm gơnoar at-bồ Yàng Tom Trồ dê.

Jơnau ho Yàng dê lah Pol pal tus hơ Rôma nàng lơh cơng di đap Sesa. Mơ dilah Kơnràñ neh ơn dô tơnggu Pol in tom Rôma, gen ò gơs càl-rbùt lơi rgơi tơnkrăm ồng.

Tom bơta bòl glar, Pol gam yal tơlik: “Añ dòn di Yàng Tom Trồ”. Ngài do, tom tŭ jơh ală bơta ò gam gơlik gơs jat nùs kòñ, bol he gam khin đơs he “dòn di Yàng Tom Trồ” hala ò? Bol he dòn di bơta niam rlau jơh, dòn-song mơ bơta dong tă Kơnràñ, jat di di tŭ tơngai mơ nùs kòñ Kơnràñ dê hala ò? Digơlan ngai do oh mi kung gam ơm digùl dô “càl-rbùt” lơi hơ̆ mơ neh oă ngai, oă kơnhai, oă sơnăm ò jòi bàn gùng. Mơ ya Yàng kòñ oh mi tơnggòr tĕ di Kơnràñ rlau mơ ală càl-rbùt di đap mat.

Pol neh lòt gan oă ngan càl-rbùt mơ gơlòng bòl glar tom gơnoar broă he dê. Bơh ală bơta git lam hơ̆, song ồng rgơi đơs mơ ală cau dòn lah: “Bơh bol he cơnđòa lòt bơh bơta dòn, ò di bơh mat gŏ” (II Kôrinhtô 5:7)

Lồi dùt, bulah ơhò neh gơkòl phà tơrlah bơh càl dờng, mơ ya jơnau Yàng Tom Trồ gen gơlik gơs di ngan: jơh 276 nă cau hơđang ơhò lòt bal mơ Pol geh dong tă ò gơs cau lơi chơt (seng 44).

Yàng neh ngui ồng Pol, dô nă cau gam ơm tom sơnđan la cau glài jam mơ ò rgơi at-bồ ală bơta gơlik gơs, nàng cèng bơta pơndòm-pơniàng mơ gơn-kơnòm ală cau gam roh gơn-kơnòm. Bơta dong tă hơ̆ tơngkah bol he lah bulah tom tŭ ală bơta pal càng tom dunnia do gơkòl sòr-tơrlah jơh, bơta nđàc Yàng gam wĭl tơl ală cau mơ Kơnràñ nđàc sơngit.

Dan jà bol he dô nùs bal tòm bơta hòi dan: Khoai Yàng, digùl ală bơta gơlòng bòl glar tom rài kis, dan dong kòn ò dòn-kơnòm di bơta git lam hala bơta git wă is he dê, mơ ya git sơnđìng să he tom să-tòm Kơnràñ, la lòs kơlnĕ kơ̆-cê rài kis kòn dê. Dan gan bơh ală càl-rbùt, bơta dòn kòn geh têh dờng mơ rgơi cèng tus bơta gơn kơnòm ală cau gùt dar in. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, digùl ală bơta gơlòng bòl glar, tom tŭ git nền he gơrê bal mơ ñcau mơ gam kis nàng duh broă ñcau, song bol he rgơi ntào kơ̆ mơ gơlik gơs bơta pơndòm-pơniàng ală cau gùt dar in. Digơlan di đap mat tŭ do gam la ală càl-rbùt dờng, mơ ya bañ mìng sền di cal-rbùt, wèt tĕ gar mat sền di Bơtau At-bồ hơđang jơh ală bơta. Yal tơlik tĕ be cau gơnoar bơto dơng ồng Pol lah Kơnràñ la “Bơtau añ gơrê bal mơ duh broă”. Tài bơh tom tŭ neh dòn kơnòm di Kơnràñ, oh mi rgơi kơ̆ nùs bơh dòn lah Kơnràñ sùm dòn song mơ jơnau ho Kơnràñ dê neh đơs mơ rơp lơh wĭl tơl tơnggu niam rlau jơh Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.