Dunnia òs ràng tơlik bơta pha lin gan dê ală huy chương màng ryŭ, ală bơta tap tê jong rơ hala ală tŭ jơ ơm hơđang jơnhoa bơta lơh broă dê. Nàng cơn đoà tus bơta hơ̆, oă cau jơh nùs tuh dà pơ hal, dà mat tian gơs tòm gơl oă bơta kwơ màng ndai. Mơya, la cau don Yang, bơta pha lin ngan ò ơm tòm ală cúp tềng dunnia, mơya tŭ bol he rcang sir sang sơrbi să tòm mơ jào rài kis Bơtau Crơng Gơs in tài bơh dô nơm tơnggu dờng ơnang rlau.

Ngai do, ngai 17/10/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê bơh tơnggume: PHAN ƠN DUH KHOAI KIS MƠ SÀNG GOH

‘Behơ̆, ơ oh mi, añ ai ală bơta kòñ nđàc Yàng Tom Trồ dê nàng bơto tơngkah oh mi ơn tĕ să jan he lơh gơs phan ơn duh khoai kis mơ sàng goh, niam nùs Yàng Tom Trồ, hơ̆ la bơta duh khoai di ngan oh mi dê. ‘ (Rôma 12:1)

Nam 1924, Thế vận hội kơnhai prang tềng thủ đô Paris, Pháp. Jơh dà lơ gar Anh tŭ hơ̆ lòi jơh bơta don nin mơ bơta kơp gơn dê dô nă cau pơnu mòm să sơn đan la Eric Liddell. Khai geh sơn đan la “Người Scotland bay”, Liddell la dô nă cau ntoat pơ lòng jak chài, kung la cau geh kòp la cau rgơi geh Huy chương Vàng tòm bơta ntoat 100 mét cau klau dê. Gơ wet mơ dô nă cau ntoat pơ lòng, do la tu lơm pah krơi is nàng cih sơn đan mat tòm lịch sử thể thao thế giới dê. Mơya, gơs dô bơta gơlik gơs tŭ tŭ jơ geh yal tơnggit, hơ̆ la bơta ntoat cự ly 100 mét rơp gơlik gơs tòm ngai poh.

La dô nă cau duh rngòt Yang Tom Trồ, Liddell don lah ngai Sang Goh pal geh ơn is nàng duh khoai Yang ò dê nàng nting jat bơta gơklŏ sa tòm dê. Gen tàng ồng lơh nền rơp lik bơh bơta ntoat 100 mét, bulah hơ̆ la bơta jak chai rlau jơh khai dê.
Oă cau gơlơh gơjrañ gơuing, đơs iơh mơ tòm pơn dang nang khai tòm gơl bơta lơh nền, mơya Liddell kư̆ kơ̆ nùs mơ bơta don mơ dòn bơr Yang Tom Trồ. Tòm ngai gơlik gơs bơta ntoat 100 mét, pal cang ơm tòm vạch xuất phát tòm Paris, ồng lòi tŭ jơ duh khoai Yang tòm hiu jum goh tòm ƀòn.

Tài bơh ò rgơi ntoat 100 mét, gen Liddell neh cih mat nàng ntoat 400 mét, la bơta ntoat pal cang bơta jak chài mơ bơta pran kơldang pa is, tềng hơ̆ ồng òhoan geh yò tơngguh. Mơya, Liddell neh tus tơnggu sơn ròp, geh huy chương vàng Olympic mơ phà tơrlah kỷ lục thế giới dê đap bơta krơi is jơh ală cau sền.

Bơta gơ klŏ hơ̆ bềng tơl nàng cèng tus ồng in bơta passơm, tiang pơnrơ mơ rài kis hưh hơh jơh rài tềng châu Âu tơn. Mơya, gơ wèt mơ ồng, cúp tềng dunnia do ò tŭ lơi la tơnggu lồi dut. Tơnơ̆ mơ dul nam geh jong rơ hơ̆, lòi wơl đah bơh ngkòi ală bơta gơ klŏ tòm Anh, nàng lòt tus Thiên Tân, Trung Quốc lơh gơs dô nă cau bơtô yal Jơ nau Yang, bơtê, mơ sền gar ală cau rbah di gùl bơta tòm lơh gơ lìn gơ toa.

Tŭ Thế chiến II gơlik gơs, Liddell geh kong jàm tòm tiah tơrgùm tòm Sơn Đông mơ ală cau ơm tòm đah mat tơngai mut ndai. Tòm bă tiah klam jơ ngo, ji gloh mơ bềng bơta kòp ji hơ̆, cau ò bàn dô nă cau pha lin Olympic jòng să, mơ mìng sền gŏ “cau pơrgru Eric” kơ̆ wền, la cau guh bic nhar bơh àng drim nàng chu ồs đèng bơtê Sră Goh, sền gar cau să kra kòp ji, rơn dap ală bơta kơnhơl cau kơ nòm in tòm hiu jàm mơ niam nus pà phan sa dô êt cau ndai.

Bồ sơ nam 1945, lài mơ tŭ tiah jam tơrgòm geh khat gơboh, Eric Liddell roh tài bơh khối u tòm bồ tŭ 43 sơ năm. Lài mơ tŭ roh, ồng đơs : “It’s complete surrender” (Hơ̆ la bơta dòn duh wil tơl.”

Bơh mpàng jơng pran kơldang hơđang gùng ntoat Paris tus dê tŭ tă nhơm lồi dut tòm tiah kong jam bềng tơl kalke, jơh rài kis ồng Eric Liddell òhềt kis tài bơh huy chương vàng ìng tòm dunnia do. Ồng ơn joh bơta pran kơldang, bơta jak chài mơ nhơm tă be phan ơn kis mơ sàng goh ơn Yang Tom Trồ in.

Bơta do cèng he tus jơ nau Yang cau bơtê Pol dê tòm Rôma 12:1: ‘Behơ̆, ơ oh mi, añ ai ală bơta kòñ nđàc Yàng Tom Trồ dê nàng bơto tơngkah oh mi ơn tĕ să jan he lơh gơs phan ơn duh khoai kis mơ sàng goh, niam nùs Yàng Tom Trồ, hơ̆ la bơta duh khoai di ngan oh mi dê. ‘

Lài mơ tŭ hòi jà, cau bơtê Pol đơs bơh bơta tồi glai kòn mơ nus dê, bơta song ring bơh bơta dòn mơ bơta dong klas Yang Tom Trồ dê tòm Bơtau Krist. nàng lồi tap 11, ồng jong rơ Yang: ‘Bơh jơh ală phan la bơh Kơnràñ, tài bơh Kơnràñ, mơ gơrê hơ Kơnràñ. Àng gơklŏ Kơnràñ in gam sùm sùm. Amen.’ (Rôma 11:36). Gan dê ală jơ nau hơ̆ , bol he đal git jơh plai ù do, jơh bơta kis, nhơm tă bol he dê la bơh Yang mơ tus. Jơnau ‘behơ̆” tòm tap 12 pơndut bơta bol he ơn jào rài kis he Yang in la dô bơta pal cang ngan dê đap bơta kòñ nđàc Yàng Tom Trồ dê. Ồng Pol ai bơta kòñ nđàc Yàng Tom Trồ dê nàng bơtô tơngkah digơlan tài bơh ồng wờng lah kòn mơ nus geh dong klas ò dê bơh broă lơh hala bơta jak chai is, mơya mìng bơh bơta nđàc mơ nùs kòñ nđàc Yàng dê. Bol he ơn rài kis he dê ò dê nang rwat bơta dong klass hala bơta lơngai, mơya nàng ràng tơlik bơta kòñ gơboh mơ Bơtau neh crơng gơs he. Pa is mơ phan ơn duh khoai hơ đang cơ nơng tòm rài yau, kòp nă bol he geh hoi sac gơlik gơs “ phan ơn duh khoai kis mơ sàng goh”. “Kis” gơs gơtha la ơn bơta kis, nhơm tă, tŭ jơ, să jan, bơta jak chai, broă lơh mơ ală bơta lơh nền he dê Yang in, ò dê mìng dô dơ̆, mơya jơh rài kis.

Mơ “sàng goh” gơs gơ tha la geh sac is. Tòm rài yau, phan poan jơng lơi kòn ơn Yang in pal jat rnoas: ò gơs tềl sồt, ò jơngo mat, pă jơng, gơkòl gơcrè poac hala sồt jê (Lebi 22:20-22). Ngai do, Yang kung kòn bol he kis sàng goh gan dê bơta kơrmap gar muh mat, bơta kơ lôi sơ nơng mơ broă lơh he dê lik bơh bơta bơ̆ bơl tồi glài dê. Ală pơnah tòm să jan do ò dê lơh phan ngùi tồi glài tai mơya bơta song ring mơ bơta kòñ gơ boh. Mơ lồi dut, cau bơtô Pol hòi bơta ơn să jan hơ̆ la “bơta duh khoai di pal”. bơta duh khoai ò dê mìng la bơta ntas, bơta duh khoai bềng tơl bơta rngoh rngac hala dô êt jơ mơ Hiu Jum, mơya bơta duh khoai la jơh rài kis mơ pơnah bol he kis tŭ lik bơh hiu jum.

Eric Liddell neh ntoat di đap rbô nă cau, neh gơs oă phan bàn. Mơya, ồng ràng tơlik rài kis duh khoai Yang tòm blang bơtô yal Jơnau Niam, tòm tiah ơm jam, kung be tòm lồi dut rài.

Ală phan bàn rơp roh. Ală bơta tap tê jong rơ rơp ò găm. Tiang pơn rơ rơp roh. Mơya rài kis ơn Yang in gơs gơtha sum sum, tài bơh rài kis hơ gơ wèt mơ Bơtau neh crơng gơs, dong klass mơ hoi sac he. Bơta pha lin rlau jơh cau don Yang dê ò bơta lơi rlau mơ dô rài kis gơrê jơh mơ Yang mìng tŭ ơm tòm dunnia do .
Dan jà bol he dô nùs bal tòm bơta hòi dan:

Khoai Yang, ưn ngai Yang tài bơh bơta nđàc dờng ơnàng Yang neh pà ai kòn in. Tòm bơta nđàc hơ̆, dan Yang dong kòn git ơn sa jan lơh gơs phan ơn duh khoai kis mơ sang goh niam nus Yang. Kòp àng drim guh bic, dan Yang tơngkah kòn tŭ jơ, bơta pran kơldang, bơta jak chai mơ ală bơta kòn gơs tus bơh Yang, nàng kòn git ngui jơh nang duh broă Yang mơ oh mi gùt dar. Dan rài kis do la bơta dòn duh Yang wil tơl, geh sac rwah tơnggu dờng màng Yang dê. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bơta ntoat pơ lòng hơđang tiah do rơp gơs ngai dơh wơl. Dô ngai ne, ală phan bàn, tiang pơn rơ hala jơ nau jong rơ kon mơ nus dê rơp ò dờng màng tai. Bơta găm wơl bol he dê là kis be lơi di đap mat Yang mơ ngùi ală bơta Yang pà ai he in be lơi. Ngai do, sền sơwì wơl ală pơnah tòm rài kis mơ ồng mò oh mi găm sơm bat is he in, hơ̆ la broă lơh, tŭ jơ, bơta rơn dap hala dô bơta lơh nền lơi. Cèng jơh Yang in, dan Yang dong kòn git ơn ală bơta he gơs Yang in, nang bơta ntoat pơ lòng đah hwềng he dê là gùng lòt bềng tơl bơta gơs gơtha mơ ring lơ ngai ò tŭ lơi joh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.