Bol he gam kis tòm pah rài mơ tòm dô pah rài mơ bơta ò bat gơlik gơs bơta ò niam. Dô bơta bư tê tòm điện thoại, dô bơta pal cang rơp geh lơh sir; bư tai gen ală seng pal đơs rơp tus mơ ală cau ndai bulah ơm ngai kar lơi. Bơta pal cang rơp geh tơn tú he kỡn lơh he in mơng tus tòm bơta dòn he dê. Bol he tus tòm bơta hòi dan mơ kơp kỡn Yàng pal mhar hơ he in, pal mhar ngan. Mơya, rơp gơlik gơs mbe lơi tú bol he kơp gơn mhar gơs seng hơ mơya Yàng ò hềt hơ hê in sơl? Ẵn mơ ồng mò oh mi pal bơtê git bơta lơi tòm tú kơp gơn Yàng taih?

Ngai do, ngai 19/10/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Dayna Lovelady dê bơh tơnggume DÒN KƠNÒM YÀNG TÒM TÚ KƠP GƠN.

“Bơta kòp jê do ò gơs chơt ò, mơya la bơh bơta gơklŏ Yàng Tom Trồ dê, tồ bơh bơta hơ̆ mơ Kòn Yàng Tom Trồ in geh gơklŏ.” (Jang 11:4)

Gơs dô seng đơs chò yau bơh tòm nam 1990 mơ ẵn gơboh ngan, đơs bơh bơta roh bơta gơn kơnòm tú Yàng Tòm Trồ ò hề hơ ală jơnau hòi dan he in. Tú hòi dan, bol he pal kơp kỡn bơta he dan lơp geh Yàng hơ, mơya rơp gơlik gơs mbe lơi rơp ò gơlik gơs taih?

Tú ẵn neh geh Yàng tòm gơl, ẵn dòp git Yàng Hwềng Goh tơngkah bơh bơta kỡn gơboh ẵn jê. Ẵn git bơta sang lơi mơ cau do la dô bơta jê sồt ngan, mơya ẵn kỡn dòn bơr Yàng. Ẵn git he pal gơboh gơbài mơ dô nă cau dòn Yàng. Lôi dut, ẵn lơh nền dòn bơr Yàng, ò pơnjat tai bơta kỡn gơboh hớ mơ hòi dan Kơnràn pà ai kon in dô nă cau bau niam nùs Kơnràn dê.

Mơya, tòm jơt nam tơnớ, ẵn ơm is dô nă. Gơs ală ngai ẵn dơrcul lơnggơr, moat jrum is. Ẵn lùp is nchi bơh tài Yàng ò hềt pà ai ẵn in ală bơta ẵn dan. Mơya, bơta yal yau bơh ồng Laxarơ neh dong ẵn sên wơl ală nam kơnhai hớ dô bơta pha is.
Jang 11 cih wơl bơh ồng Laxarơ ơm tòm bơta kòp jê. Tú hớ, bàr nă cau ruh ồng dê la Mathe mơ Mari sôr cau lòt tus hòi Yàng Jesus. Bulah kỡn gơboh bol khai, mơya Kơnràn ò rê tơn hơ Bethani mơya Kơnràn ơm wơl bàr ngai tòm tiah Kơnràn ơm. Tú Yàng tus gen ồng Laxarơ neh chơt, mơ geh tơp poan ngai rau. Bulah behớ, tòm tú hớ, ồng Jang cih wơl lah: “Yàng Jesu kòñ gơboh di Mathe, bal mơ oh khai mơ Lasarơ.” (Jang 11:5). Bơta at bồ Yàng Tòm Trồ dê sum gơs bal mơ bơta kỡn gơboh Kơnràn dê. Bulah Yàng Jesus kỡn gơboh bol khai oă ngan, mơya Kơnràn ơm wơl ò di la tus mhar nàng sơm bơi Laxarơ in. Bơta dơh wơl hớ ò di la ò gam bơta kỡn gơboh tai, mơya Kơnràn gơs dô bơta lơh nền is. Kơnràn đơs lah: “Bơta kòp jê do ò gơs chơt ò, mơya la bơh bơta gơklŏ Yàng Tom Trồ dê, tồ bơh bơta hơ̆ mơ Kòn Yàng Tom Trồ in geh gơklŏ.” (seng 4). Digơlan bơh bơta do, Yàng Jesus kỡn bơto bol khai in git dòn kơnòm di Bơtau pà ai bơta kis mơ kơp gơn bơta gơkló Kơnràn dê geh ràng tơlik ò di ming jòi bàn têl krơi lơm.

Tú Yàng Jesus tus Bethani, Mathe mơ Mari rngoh rngac mơ đơs lah: “Ơ Yàng, dilah gơs Yàng tềng do, gen bi añ ò chơt” (seng 21). Gơs tú tòm rai kis, bol he kung rgơi đơs behớ sơl, “dilah Yàng tềng do” hala dilah Kơnràn lơh mhar gen ală bơta gơlik gơs pha is. Mơya Yànf Tòm Trồ ò di lơh nàng dòp ală bơta pal cang he dê lơm, mơya nàng geh rang tơlik bơta gơkló Kơnràn dê.

Gơs tú, tòm ală bơta bol glar kal ke, bol he òs sên di ală bơta bol glar mơ húi nàng jòi lùp Yàng. Bol he buôn ngan duh tòm bơta ơniai lòi ală seng hòi dan he dê gơlik gơs ală bơta he pal cang, jòi ală têl krơi mơ húi lah Yàng gam kỡn gơboh he mơ kỡn bơto he tòm bơta kơp gơn. Mơ tú hòi dan Yàng ò hềt ho he in, ală bơta bol glar sơ lơ bol glar tai, Kơnràn kung bơto bol he lah bơta hừ nùs tòm bơta wil tơl Kơnràn dê.

Tơnớ mơ jơt nam, bơh bơta nđàc dơng ơnang, Yàng neh ai ẵn in dô nă bau duh rngòt Yàng. Mơ tú do, hiu nhă dềt he dê mor gơs dô nă kon dềt lik rài tai. Bol he dòn lah hớ la bơta lơngai tus tơnớ mơ bơta hòi dan. Bulah ală jơnau hòi dan geh hơ hala ò, mơya bơta kỡn gơboh gam sum sum mơ bơta at bồ Kơnràn dê gam behớ. Ngan, bơta gơkló gơrê mơ Yàng !

Dan jà bol he dô nùs bal tòm bơta hòi dan: Khoai Bèp kỡn gơboh, digul ală jơnau hòi dan neh hơ hala ò, dan dong kon git kừ dòn nền lah Kơnràn gam kỡn gơboh kon mơ kỡn ai bơta niam rlau jơh kon in. Tú nùs kơlôi kon ò hềt git wă nùs kỡn Kơnràn dê, dan Jơnau Song bơh Sră Goh pơndom pơniang kon mơ dong kon kừ pơnjat dòn kơnòm Kơnràn. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, gơs oă tú hòi dan ò hềt Yàng hơ hớ la tú nàng bol he in sền swì is rai kis he dê: bol he tơnggơr sên di bơta nđàc Yàng dê hala ji gloh tơhir Kơnràn? Yàng Jesus ò di neh sơm bòi ồng Laxarơ in lơm tú ồng kòp kơnjớ, mơya neh hòi ồng kis wơl bơh bơtô bồc tơnớ 4 ngai nàng bơta gơkló Yàng Bèp dê geh rang tơlik. Digul ală tú tơngai ngềt ngơt tòm rai kis, bulah ò hềt gó dô nơm tơl sơnio lơi, dan kah té lah Yàng sum lơh jat nùs kỡn niam Kơnràn dê. Bẵn lòi bơta roh gơn kơnòm di Bơtau dòn song mơ kỡn gơboh he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.