Dunnia ngai do òs ơn ală cau ur tòm ală rnoas hat hal, lơh bŏl khai ĭn tòm ală nhar bơta lơbơn lơño mơ jat nùs koñ is. Mơya digul ală bơta sền ò dờng màng pah rài do di, gơs dô jơnau sŏng găm sum sum ò tòmgơl: bơta kwơ màng cau ur ò tŭ lơi geh lơh nền bơh jơnau cahrña cau rài do di. Bơh ngai cau ur di, dơh wơl tĕ ală bơta nggôr nggac đah bơdih nàng ri wơl hơ Yang. Bơtau Crơng gơs koñ tơngkah kòp nă cau ur kah tĕ la Kơnrẵn neh crơng mòn gơs he bơh dô tơnggu, mơ Kơnrẵn kŭng ai pà he ĭn bơta koñ gơboh băl mơ gơnap gơnoăr nàng kis wil tơl bơh bơta họi sac Kơnrẵn di.

Ngai do, ngai 20/10/2026 – Ngai Cau Ur Việt Nam, bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Martha Noebel dê bơh Tơnggume ĂÑ LÀ CAU UR BƠTỌ

“Añ dòn nền ngan lah Bơtau neh sơntòm lơh broă niam tòm ală oh mi kung rơp lơh wil tơl jơl tus di ngai Yàng Krist Jesu dê.” (Philip 1:6)

Lơngap lơngai ngăn, ăñ gơs dô bơta nđàc kwơ màng ngăn: Ăñ la dô nă cau ur bơtọ. Do la bơta ăñ òs kơp koñ hur hir, mơ kŭng là dô nơm gùng dà jòng, oă bơta ơm is dô nă gen ăñ neh lòt găn. Bulah behơ̆, ăñ neh geh dờng tòm Yang mơ gơlơh hòn chò hừh hơh ngăn tŭ cơnđòa lòt tus hơđap tòm Kơnrẵn.

Bơh tŭ găm kơnòm să òs geh dờng tòm hiu pơjum, ăñ neh geh bơtọ lah bulah mpồng hiu sàng gọh geh pò gen ăñ păl gơs măt tềng hơ̆. Ò tŭ lơi gơs jơnau lùp hala koñ git bơh bơta gơlik tus.

Àng drim ngai rlô, mho măng ngai rlô, gen măng ngai poăn, hala ală tŭ rơndăp pơjum bơtào tơnguh đah hwing jŏ jọng, me ăñ òs là cau tề lăm, rcang lài mbe lơi nàng ală kon lơi kŭng geh tơl măt. Bơta bơtê rê hiu ơ? kư̆ cèng tĕ, gen nggùi cơnòng lồi dut tồ lơh mhăr sir. Broă hơ̆ ò tŭ lơi geh jơh tồ gơlik gơs ñchi nàng dô lik pồn bơh hiu pơjum. Neh cơnđòa lòt tus hiu duh khoai là lơh nền bŏl he mìng pơndut lồi pơjum gen ri wơl hiu, đơs behơ̆ gen he kŭng gơs geh kơlôi sơnơng rau. Kon lơi bŏl glăr ir ò jai kŏng gen blưp măt bic tĕ hơđăng cơnòng. Gen me ăñ ư? Ò kơno jơh bơta bơtọ sôr gen băñ nàng kơlôi mò nă ntào lik rê.

Găm kơnòm, gơs ală ngai rlô ăñ mìng koñ geh ơm tòm hìu, nggùi diđap tivi mơ sền wil tơl phim hoạt hình pa. Mơya, kơp koñ mìng la kơp koñ lơm, ăñ ò tŭ lơi geh sền dô bă hừh nùs, bulah mìng dô êt phuk lơm.

Broă òs păl tus hiu duh khoai bơh lài or he kơlôi tồn la bơklơn, mơya gơpơrlơ̆ wơl lah ai ăñ ĭn bơta kwơ màng ngăn đah hwing. Tŭ do kơlôi wơl tŭ găm kơnòm să lòt găn, gơlơh khôr nhŏ mbe lơi tŭ ală bŏl glăr ngai kơnòm dềt rọh thit, mìng lòi wơl tòm ăñ wil tơl ală bơta lơngai lơngọ ngăn tŭ geh ơm gut dăr làng bŏl Kơnrẵn di tòm hìu duh khoai sàng gọh, dô bă băl pò bơr đơs chò mơ jọng ro sơnđăn Yang. Tŭ geh dờng dô êt, dơlăm nùs ăñ òs geh git nđàc sơngit, koñ nđàc ală Hwing soàn găm lòt tìs gùng. Gen Yang ai ăñ ĭn tŭ lơmpah geh duh broă tòm ală tŭ pơjum duh khoai Yang, tề lăm ală tŭ họi dăn, bơtọ klờng Ngai rlô mơ klờng ngai rlô ală cau kơnòm di, tơ’ ai lah gơs ală tŭ lơmpah geh ntào hơđăng tiah tòm pà Jơnau Yang tòm Ngai Cau Ur di.

Ăñ găm kah gơhôr sum ală mho tŭ găm kơnòm, tŭ kơñhơl “lòt hiu jum” tòm blang jơng gung hiu me yo. Ăñ rcang dap cơnòng jat sŏng gùng, ơn Sră đơs chò sŏng hơđăng cơnòng, gen ntào diđap bơtọ be ngăn “Hiu Jum Goh “ ĭn he di – ală cơnòng gòi mơ ală cau ọh hền he di nggùi ơm iat. Ală broă kơñhơl kơnòm dềt kơlôi tồn ò gơs bơta lơi mơya rsih wơl tòm nùs ăñ dô bơta koñ gơboh gơwèt hơ Yang. Mơ jat ală kơnhai sơnăm, ăñ sơlơ bơtơl dùh rngòt ală bơta gơri hơ Yang.
Tus di năm pram jơt, ăñ neh sơmbat geh tus ală bơta gen nđợ jŏ năm ăñ hur hir kơp gơn. Ngai 2 kơnhai 5 năm 2004 là dô bơta lơh nền ăñ ò tŭ lơi hŭi: ngai ăñ geh cau kòp sơnđăn la cau ur bơtọ. Git nđợ kơnhai sơnăm, ăñ găm hur hir jòi jat muh măt Yang mơ kơp gơn ngai do. Đal git jơnau họi sac chồl bơtrut cơnđòa mut tòm gơnoăr broă, ăñ neh jơh nùs jat bơtê klờng Sră Goh nàng wă lọh rlau tai bơh Jơnau Kơnrẵn. Ăñ ò hềt sền ò dờng màng bơta nđàc do, gơplơ̆wơl, nùs ăñ gơ prơm ưnngai tài bơh Yang dòn sŏng ngăn gơwèt mơ ăñ. Bơh Kơnrẵn neh tơrjik bơta kơp koñ duh broă Yang tòm nùs ăñ, mơ tŭ do, bơta kơp koñ hơ̆ neh gơlik gơs di ngăn.

Ăñ koñ tơngkah bơta do nàng chồl bơtrut he: dilah Yang neh chu ồs l đèng tơm nùs he dô bơta kơp koñ gơkrơi, gen nđợ jŏ jòng ngai or găm òhềt gŏ bơta gơtòmgơl lơi, dăn băñ mhăr gơpơrlơ̆ nùs hala kơlôi rcang. “Añ dòn nền ngan lah Bơtau neh sơntòm lơh broă niam tòm ală oh mi kung rơp lơh wil tơl jơl tus di ngai Yàng Krist Jesu dê.” (Philip 1:6)

Kư̆ kơlôi sơnơng gen bàn, ăñ geh lơngai ngăn git nđợ tŭ geh kis wil tơl tòm gơnoăr broă gan Yang neh rcang lài ăñ ĭn. Ăñ ò kis jat ală rnoas cau dunnia rài do rơndăp ò, kŭng ò lòi cau ndai lơh nền ăñ păl gơlik cau mbe lơi. Ăñ mìng gơri hơ Kơnrẵn lơm. Ăñ là cau Yang neh lơh nền, mơ Kơnrẵn họi tòmtọh sơnđăn măt ăñ.

Dan jà bol he dô nùs bal tòm bơta hòi dan: Khoai Yang, dăn Kơnrẵn tŭh bềng bơta koñ gơboh, bơta nđàc mơ bơta lơngap lơngai Kơnrẵn hơđăng kòp nă cau ur tòm ngai cau ur Việt Nam do. Dăn Kơnrẵn koar tê kơnđu, thoa rpa mơ sơmbòi ală bơta bŏl glăr, moat jrung ji sồt băl mơ ală bơta ơnòng kơnjơ̆ pồn ndơp mơ gơs dơ̆ tŭ bŏl khai păl òs òm añ ơnòng digul ală bơta kơlôi rcang gi ga. Dăn tơngkah bŏl khai lah ală sơnđăn dunnia do ò gơs gơnoăr cahrña bŏl khai, bơh să tòm Kơnrẵn neh crơng mòn gơs bŏl khai mơ koñ gơboh bŏl khai wil tơl. Dăn ai pà bŏl khai bơta dòn kơ̆ cê, bơta lơngap lơngai tòm hwing nùs, băl bơta pràn mơ bơta jak chài bơh Kơnrẵn, tồ bŏl khai khin cha cơnđòa lòt jat bơta Yang neh họi sac, kis wil tơl bơh gơnoăr sôr Kơnrẵn gơwèt rài kis bŏl khai. Dăn Kơnrẵn ngùi rài kis bŏl khai tồ ràng tơlik bơta koñ gơboh Kơnrẵn di mơ lơh àng sơnđăn Kơnrẵn tòm ală tiah bŏl khai lòt găn. Kọn jơh nùs họi dăn, Kon ai sơnđăn Yang Jesu Krist, Amen.

Pơyoa tus ală cau ur koñ gơboh tòm Yang! Bulah dunnia gơs sền he mbe lơi, ơn he tòm ală tiah lơi hala sơnđăn he ĭn ală sơnđăn lơi, băñ hŭi he la phăn crơng mòn gơs kwơ màng tơm tê Bơtau Crơng gơs. Băñ rngòt cơnđòa lòt hơđăng gùng dà Yang neh họi sac he. Kơnrẵn ò di mìng họi sac he lơm ò, mơya Kơnrẵn găm ai pà he in ală bơta nđàc, gơnap gơnoăr mơ bơta jak chài păl càng ngăn tồ lơh sir bơta Kơnrẵn jào phi ơn. Gan behơ̆, ngai do, tơnggơr măt sền hơđăng, klọ săng ală rnoas lơh nền dunnia rài do di mơ cơnđòa lòt tòm bơta khat gơboh dô nă cau git he gơri hơ Yang, git he geh Kơnrẵn koñ gơboh mơ git lah rài kis he gơs dô tơnggu tơm Kơnrẵn. Dăn Yang ai lơngai, bơtơl pràn mơ tề lăm he tòm kòp cơnđòa jơng he lòt.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.