Tòm gùng lòt jat Yàng, tŭ he lòt găn ală bơta ring lơngai gen he mhar ngan ừn ngài Yàng. mơya bơta lơi gơlik gơs tŭ tìp ală broă jê sồt, chơt roh, roh nùs nisơna gơ tơntus tiah? Tŭ bơta jê sồt ràng tơlik, sơndồi bơr he dê rơp ràng tơlik bơta lơi taih? Jơnau ừn ngài hala jơnau yoam joh taih? Jơnau bơta bơtào hala jơnau joh lah taih? Bơta dờn hala bơta sràt bơtang taih?

Ngai do, 21/10/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume TŬ BƠTA JÊ SỒT RÀNG TƠLIK

“Bañ gơs jơnau iơh lơi lik bơh di bơr oh mi, mơya tòm tŭ pal đơs gen đơs tĕ jơnau niam nàng gơs bơt bơtào, tồ cèng bơta niam ală cau kơno in.” (Ephesô 4:29)

‘Jop ai dô nơm nsàng mơngàn nàng kwàc să mơ nggui tòm bùh. Gen bau ùr khai đơs mơ khai lah: “Mê gam ơm kơ̆ tòm bơta wil tơl mê dê ơ? Srat sơntơm tĕ Yàng Jehôwa mơ chơt tĕ!” Mơya khai ho wơl bau ùr khai lah: “Ai đơs kung be dô nă cau ùr bơrngơl gơla. Bol he dòp bơta niam bơh tê Yàng Tom Trồ, mơ ò bài dòp bơta iơh ơ?” Tòm jơh ală bơta hơ̆, Jop ò tìs glài bơh jơnau đơs khai dê. ‘ (Jop 2:8-10)

Dờp sră đóng phạt cau cảnh sát dê, nùs an rơmsă. Bòn bol he kis gơs oă rơndap nàng lơh niam gùng lòt rê cau dê ờ gơkòl. Nàng sền gar bơta ring lơngai cau kon dềt in, ală rơndeh tú lòt gan ală klờng bơtê hala tiah kơnhơl kòn dềt dê gen pal lòt ndàr. Ờ git nđờ dớ bol hi neh lòt gan ală taih do, an sền gó mpàn ờ pà ai lòt rat, gen kung sền dê krơh jơ rơndeh mơ tơngkah bau klau an dê cau gam at ke rơndeh. Mơya tú do, tú sền dê jền pră pal roh bơh neh hào rơndeh rat rlau mơ gơnoar cau ai tòm gùng, dồ pơnah jền dờng rlau mơ bol he rcang tus, nùs an dê ờ klàs bơta sơ ềl nùs. Sền gó muh mat mơ moat jrùng bau klau an dê bơh neh đong jền pơgap dồ ngai lơh broă bòl glar, an mìng prap wơl ală jơnau yoam joh tòm nùs mờ ờ tơlik.

Bơta dong an rgơi prap wơl ală jơnau ờ niam tòm nùs hớ là jơnau yal wơl bơh bau ùr ồng Jop dê.

Pơnah sơnrờp Sră Jop sơnio bol he in gó pơnah đah hwềng, tiah mơ bol he ờ rgơi gó mơ mat poac să dê. Hớ la bơta tom lơh đah hwềng sơntờm bơh cau at bồ dunnia do, dồ nă cau khin tòmdră mơ gơnoar at bồ Yàng Tòm Trồ dê. Jơh ală bơta bòl glar mơ jê sồt mơ Satan lơh hơđang oh kòn, phan mơna mơ hơđang să jan Jop dê nàng kờn lơh dồ bơta: lơh Jop pờ bơr nàng sràt rma Yàng Tòm Trồ mơ ồng gam duh khoai. Bơh bơta do, an dờp git lah ală jơnau he đơs kung gơs gơnoar, ờ di mìng broă tòm poac să kòp ngai mơya kung bè đah hwềng sơl. Mơ do kung la bơta mơ Satan ngui nàng yă wơn kon mơnuss mơ Yàng, bè ồng Pier neh tơngkah: ‘Kơrmap gàr mơ drơng kơp tĕ. Cau sò tơm oh mi dê la cà ràk be klìu triă ơluh lòt gơrwàng gùt dar, jòi jat cau ƀà nàng sa loan.’ (I Pier 5:8)

Tơnơ bơta lòng dớ sơnrờp, ồng roh jơh phan mơna bal mơ ală oh kòn ồng dê, mơya Jong sùm kớ bơta dờn ồng dê. ‘Tòm jơh ală bơta hơ̆, Jop ò tìs glài hala đơs iơh di Yàng Tom Trồ.’ (Jop 1:22). Satan mhar ngan ngui dồ kai iơh rlau tai, hớ la lơh iơh tus dê să jan ồng Jop mờ bơta toh sa mồr, mơ ngui ală cau kiau ma, mơ bau ùr ồng dê nàng lòng bơta dòn ồng Jop dê.

Gen bau ùr khai đơs mơ khai lah: “Mê gam ơm kơ̆ tòm bơta wil tơl mê dê ơ? Srat sơntơm tĕ Yàng Jehôwa mơ chơt tĕ!” (Jop 2:9)

Sơntờm bơh bơta yoam joh, mơ cah rơnia: “Mê gam ơm kơ̆ tòm bơta wil tơl mê dê ơ?”, cau ur sràt bơtang lah pơrhơng bơta dờn ồng Jop dê. Tòm bơta jê sồt dờng, mò mìng sền gó bơta ờ song ring dê Bơtau mơ bau klau mò dê jơh nùs gơn kơnòm.

Roh jơh ală oh kon tòm dồ dớ, hwềng nùs bau ùr Jop mìng gam wơl bơta jê sồt. Bồ tơngoh ờ rgơi kơlôi jai tai, mơ bơta kơlôi sơnơng tú do mìng gơkòl bơta jê sồt tề lăm. Mơ do la tù mơ Satan rgơi ngui sơn dồi bơr bau ur Jop dê. Bơh ală jơnau sràt bơtang, yoam joh, bau ur Jop neh lòt ngài ngan, mò neh sồr bau klau mò dê lơh iơh dê bơta kis he dê: “Srat sơntơm tĕ Yàng Jehôwa mơ chơt tĕ!”do la ală jơnau lồi dut bau ur Jop dê mơ Sră Goh cih lòi wơl. Mơ kung la jơnau đơs mơ jat bè ồng Jop, bè dồ nă cau ur bơngơl gơla, neh gơkòl sa lơoan bơh cà rak Satan dê.

Dồ jơnau jồt ờ niam nàng tơn roh să tờm, neh gơlik bơh nùs nhơm cau ur roh gơn kơnòm tòm bơta jê sồt dờng, ờ mìng gơs tòm rài ùr klau ồng Jop dê, mơya tus dê ngai do, kung la pơnah mơ Satan ngui. Mơ bè Yàng Jêsus neh tơngkah: “’Cau kơñau mìng tus nàng kơñau, hàl mơ tơnroh” (Jang 10:10a). Bơta jê sồt cèng tus bơta tơn chơt is să tờm, mơ lơh iơh dê să jăn he do la broă mơ gơnoar klam jơngo kờn lơh dê kon mơnus, mơ ngai do oă ngăn ală broă bè do.

Broă lơh bau ùr ồng Jop dê lơh an in pal sền wơl nggu tờm bơh sơn rờp tú Yàng Tòm Trồ crơng gơs cau ùr. Sơn Rơp 2:18-23 đơs nền lah, rềp mơ ồng Adam, Yàng ơn cau ur lơh gơs cau dong kòl. Dờp git do lơh an in git kơrhia, tài bơh rlau mơ cau dong kòl, bol he kung rgơi gơlik gơs phan ngui tòm tê cà Satan dê, ngui jơnau đơs tơn roh cau he kờn gơboh.

Ngan bơta gơjran an dê ờ rgơi pơndrờm bơh ală broă neh gơlik gơs mơ bau ur ồng Jop dê. Mơya hớ kung là dồ bơta tomlơh đah bồ tơngoh an dê, mơ dilah an sền ờ sơp, ờ tom dră, gơ rơp gơlik gơs dờng mơ rgơi gơlik gơs phan tơnroh dờng tus dê ală cau ndai. Bè ồng Jakơ neh tơngkah: ‘mơya ò gơs cau lơi rgơi at bồ lơmpiat, hơ̆ la dô nơm phan iơh sùm ò dơh, bềng lìu phan bih khih tơnchơt cau. ‘ (Jakơ 3:8)

Ơm mo mó nàng ờ đơs jơnau iơh, bơh ală bơta jê sồt he dê mơ ală cau ndai dê là dồ bơta tom lơh dềt kòp ngai an dê. Ơm mo mó tòm bơta jê sồt, gơn kơnòm Yàng Hwềng Goh nàng dờp git tú lơi là pal đơs, gơn kơnòm Yàng nàng git ngui jơnau đơs niam dong kờl tus ală cau kơno mơ gơlik cồng nha, la bơta mơ an ơn Yàng in tòm jơnau hơ kơp tú an hòi dăn mơ Yàng.

Dan jà bol he dô nùs bal tòm bơta hòi dan: Khoai Yàng kờn gơboh kon dê, kon ừn ngài Yàng tài bơh neh crơng gơs kon jat bè rùp să Yàng dê. Ừn ngài Yàng bơh Jơnau Yàng neh pờ mat đah hwềng nàng kon dờp git ală kai gơrmới cà rak dê. Khoai Bèp, dan pà ai gơnoar Yàng dê, dong kon pơng poac să, nàng ală jơnau kon đơs ờ gơlik phan cèng bơta tơnroh, mơya gơlik gơs bơta niam tus dê ală cau kơno tus. Dan jơnau đơs kon dê ràng tơlik nùs nhơm Yàng dê, cèng bơta gơklo Yàng in. kon jơh nùs hòi dăn ai sơnđan Yàng Jêsus Krist, Amen.

Ơ ală ồng mọ oh mi kờn gơboh, Yàng Tòm Trồ neh pà ai bol he in Sră Goh, bal mơ jơnau yal yau jê sồt tòm hìu nhă ồng Jop, bè dồ pơnah nàng bol he in kis git kơrmap gàr. Ală ngai ring lơngai, lơngap lơngai ờ ơm sùm. Bè hớ ngui ală phan Yàng pà he in: bơta pràn, tú jơ tơngai, jền priă, lơm pah bơtê nàng bơtê mơ dờn bơr Yàng Hwềng Goh tòm broă at bồ sơndồi bơr he dê. Do ờ di là broă he rgơi lơh bơh bơta pràn is he dê, mơya bơh gơnap gơnoar Yàng Hwềng Goh. he pal bơtê git kis gơn kơnòm Yàng Jêsus Krist, bơtê ơn phan duh khoai bơh sơndồi bơr mơ jơnau jòng rơ Yàng Tòm Trồ. nàng tòm tú jê sồt, roh nùs, mơ moat jrùng, tú pal càng ràng tơlik, he rơp đơs ală jơnau niam, jơnau bơt bơtào, mơ jơnau dong kờl ală cau kơno iat.

Do la bơta pha lin kas màng ngan rài kis gam geh Yàng Hwềng Goh at bồ mơ tomgơl kòp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.