Gơs tŭ lơi di gùl àng drim lòt găn mhăr ne, bol he ni sơ na sền gŏ bơh dê mpồng sồ krơh neh ala nha tòm chi neh gơ tòm gơl màu bơh tŭ lơi mờ he ò đăl git? Rài kis bol he lòt găn dồ bă ring ngêt jat bơta lòt găn tŭ tơngai dê: gơs kơnhai bềng lìu bơta pràn kis, mờ kŭng geh kơnhai bềng gơ glòm mhwal lu li ngăn. Bol he hòn chò nàng dòp rọ tŭ tơngai niam hàng, mơya, gơs bơta wi wơ, rơngòt tŭ cơn đoà mut tom ala ngai klam jơ ngo, ơm is. Digùl dunnia sùm gơs bơta tòm gơl., bol he neh geh tŭ lơi lùp is lah: Gen, tềng lơi là lòs kơ nĕ nàng ê gàr hwềng soàn he geh kơ̆ cê, ring lơngai taih?

Ngai do, ngai 24/10/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Dayna Lovelady bơh tơnggume LÒT GĂN ALA KƠNHAI TÒM GƠL

“Bơh bơta lơi kung gơs kơnhai sơnam; mơ gơs dô tŭ lơh nền ală broă ơm tòm tiah trồ.” ‭‭(Cau Bơto‬ ‭3‬:‭1‬)

Kòp tŭ gơs bơta tòm gơl kơnhai là nùs añ hòn chò ò rgơi đơs. Añ gơboh sền bơta tòm gơl màu nha chi dê tŭ kơnhai phàng tus, ala bơkao gơlik tŭ kơnhai prang tus, tơngai gơlik tòm kơnhai duh, tus dê trồ taih bềng mhwal mrềt di gul kơnhai mrềt. Bơta tòm gơl hơ̆ tơng kah añ păl git sền dờng màng kòp tŭ, kis jơh nùs tòm ngai do bơh kòp ala bơta ờ tŭ lơi ơm dồ bă tiah. Gen kòp ala mhwal tòm kơnhai mrềt rơp roh, ala bơkào hàng tòm kơnhai prang kung ro sơl, tơngai duh àr kơnhai duh dê kung lòt găn, mờ ala nha chi kơnhai phàng kung gơ jrùh ngài bơh ala tê tờm chi.

Tòm Sră Cau Bơto 3:1 tơng kah bol he in git “Bơh bơta lơi kung gơs kơnhai sơnam. Añ sùm găm kah tòm nùs kòp tŭ sền trồ tiah sŏ ào pa kòp tŭ tòm gơl kơnhai. Gen bơta tòm gơl trồ tiah kung gơ klŏ bơta kis bol he dê, găm gơ lòt sùm mờ tòm gơl.

Gen là tŭ do, bol he găm cơn đoà mut tòm pơnah pa rài kis he dê. Lơh gơs ồng mọ mờ là dơ̆ sơn rờp geh đut kòn sau, hala sơn tờm mut tòm klờng dờng băl mờ ala kơp koñ dờng dồ nă cau bơ srăm pa dê. Gen bol he găm dòp dồ gơnoăr broă pa nàng dong kòl tòm hìu jum, mờ kung lời ala kòn lik is lơh gơs hìu nhă pa, hala dồ nă cau lơh broă găm lơh kwèng tiah he lơh broă dê. Bulah rài kis cèng he lòt tus dê pơnah gùng lơi, gen kơ̆ tĕ nùs, bơh Yàng sùm rcăng he in dồ rơndap tap sèng niam kòp nă bol he in.

Gơs ala tŭ bềng bơta càl rbut, lơh hwềng nùs he oă jơnau lùp mờ ò geh jơnau hơ. Kung gơs ala tŭ bol glăr, là tiah bol he sach rgum is să he, đơs dô êt nàng hwềng soàn geh ơm rlô oă rlau. Di gùl sơ nĕ hơ̆, lòs kơ̆ nĕ kơ̆ cê nàng añ sơn đing hơ̆ là Jơnau Yàng tòm Sră Cau Bơto 3: 7: “Gơs tŭ crè, mơ gơs tŭ jing wơl; gơs tŭ ơm mŏ mŏ, gơs tŭ đơs;”. Gen kah tĕ lah, gơs tŭ ơm mŏ mŏ ò di là lơbơn lơnho. Geh tŭ, hơ̆ là tŭ pah gòi nàng bol he in sề sơ wì nùs nhơm mờ đăl git Yàng găm tê lăm he lòt tus dồ pơnah pa.

Bulah gùng dà tŭ do cèng bol he in bơta hòn chò hala dà mat jê sồt moat jrùng, gen kư̆ kơ̆ tĕ nùs dòn Yàng sùm ơm sùm mờ bol he tòm kòp cơnđoà, lòt găn ala bơta gơ tòm gơl. Di gùl dunnia sùm oă bơta tòm gơl, Kơnràñ sùm ờ gơs tòm gơl lài kung bè tơ nơ̆, dồ nus song ring mờ ala kòn klau kòn ùr Kơnràñ dê, Jơnau Yàng Tòm Trồ đơs tòm sră Malachi 3: 6 “Bơh Añ la Yàng Jehôwa ò tŭ lơi tòmgơl; behơ̆, ơ bol mê la kòn sau Jakôp dê, bol mê ò gơkòl roh rui.” Gen jơnùs tĕ kơ lôi sơnơng bơh bơta song ring ò tòm gơl hơ̆, hwềng soàn bol he rơp geh jơm gòm ring lơngai digul càl rbut tòm rài kis do. Mờ tòm tŭ bềng bơta hòn chò, bơta kơ̆ cê Kơnràñ sùm là tiah sơnđing, là cơng tàng kơ̆ cê rài kis bol he dê.

Dan jà bol he dô nùs bal tòm bơta hòi dan: Khoai Yàng, kòn dăn ơn jơnau ưn ngài bơh Kơnràñ sùm lòt mờ kòn, Kơnràñ sùm gŏ mat mơ kòn tòm kờp gùng rài kis kòn dê. Dăn dong kòn sùm kơ̆ nùs gơn kơnờm mờ sền gơboh bơta niam hàng tòm kờp tŭ Yàng pà ai. Kòn ưn nhài Kơnràñ bơh bơta song ring ò tòm gơl, bulah ala phăn gut dăr kòl sùm tòm gơl. Ơ Yàng, Kơnràñ là lòs kơ nĕ kơ cê hwềng soàn kòn, bơh dê ala ngai ring lơngai tus dê tŭ càl rbut dờng tus. Kòn jơh nùs hòi dăn tòm sơn đăn Yàng Je-su Krist, A-men.

Ơ ồng mọ oh mi koñ gơboh, rài kis sùm ò tŭ lơi gơ ơm dồ tŭ; ngai do là dô ngai tơngai ram, mơya ngai hìng ni sơ na càl rbut tus. Rngòt hala pleh ala tŭ tơngai kal ke là bơta mờng òs kòn mơ nùs lơh, mơya bol he sùm rgơi bơ srăm đăl git bơta gŏ măt song ring Yàng dê tòm rài kis bol he. Dăn bơta koñ gơbog Kơnràñ sùm yò đơ ala bơta kal ke tòm hwềng nùs he ngai do, nàng bulah cơnđoà tòm gùng dà bè lơi, bol he sùm geh ring lơngai, sùm hòn chò bơh git lah Yàng sùm ơm bal.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.