Bol he sùm kơlôi sơ nơng là rài kis he di geh sơn tơm bơh bơta nìm tú lik bơh kơdul mè, bơh di tú sơn rợp he rgơi nàng lọt găn tơm rài kis he di. Mơya gơs dô bơta drô dơp rlau jơh: bơh di tú he ò rgơi geh gơs tơm kơdul mè, gen Yang Tơm Trồ neh git loh kơp nă bol he rau. Gen tàng lot găn ală ngai gơlong bol glar, moat jrum, càl rơbut dơng, jơl jơh di tú he lot lêng làng tơm bơta klăm jơngo, Yang găm jơh nus kơp gơn mơ ai mpàng tê kờn gơboh Yang di nàng cèng bol he rê wơl.

Ngai do, ngai 25/10/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng kơnòm dê Maria Schleicher bơh tơnggume: BƠH BƠTA NĐÀC KRƠI IS

“Mơya dơ̆ Yàng Tom Trồ, la Bơtau neh ơn is añ bơh tòm kơndul mè, mơ ai bơta nđàc hòi sac añ nàng duh broă Kơnràñ,”(Galati 1:15)

Lài mơ tú geh Yang Jesu tơm gơl rài kis an di, an găm geh kis tơm ală ngai mìng kis dô nă lơm tian gơs an ơm tơm bơta moat jrum ò rgơi kợp. Sền bơh di đah bơh dih, gơ lơh be an rgơi geh jơh ală bơta an kơp kờn dô ba wil tơl. Mơya tơm nus nhờm drô dơp, an be cau găm kis mơ neh chơt. Mơya ală bơta rơp tơm gơl. Kung be ông Pol mơ jơh tơl nă cau dòn Yang Jesu lơh gơs Yang he mơ Yang dong klas he di, an neh dợp git bơta gơnoar pran deh wơl pa bơh Bơtau Krist. Bơh di tú jơ hớ, rài kis an di geh tơm gơl wil tơl mơ ò tú lơi rê wơl be yau.

“Mơya dơ̆ Yàng Tom Trồ, la Bơtau neh ơn is añ bơh tòm kơndul mè, mơ ai bơta nđàc hòi sac añ nàng duh broă Kơnràñ,mơ niam nùs yal tơlik Kòn Kơnràñ dê tòm añ, tồ añ in bơto yal bơh Kòn hơ̆ digùl làng bol bơdìh, gen añ ò càng bơyai mơ cau lơi.”(Galati 1:15-16)

Ngăn la dô bơta lơngai dờng tú dợp git Yang neh sak rwah an lài mơ tú crơng mòn an tơm kơdul mè! Jơnau Yang di la tiah an joi jat mơ kơlôi sơ nơng mơ git ưn ngai Yang dô bă jơh nus, tài bơh lài mơ tú an gơs mat tơm ù do, yang neh rơn dap tap sèng rài tơ nớ an in rau. Tú he sền wơl să tờm he be ông Pol ngai or, an git loh bơta ò dipal mơ tồi glai is he di ( sền Ga-la-ti 1: 13-14), tian gơs dợp git nền he kơp kờn bơta dong klas Yang di kar lơi. Ô, lơngai ngan tú neh prap kớ jơnau song krơi is hớ: bulah să tờm he di lơbơn siau mơ poăc să kư pơryoai an, Yang la Bơtau neh tơm gơl rài kis yau an di mơ ai an in rài kis pa wil tơl gơrê mơ Yang!

Ur klau an di găm chờ nus wă rò kon tơnhoa tus mơ hìu nhă. Tú tơngai an găm bun lot găn dô bă bơtoah, mơ bar nă bol he geh chơ hợp dờng tơm tú lot băl tơm bơta do. Mơya, bơta gơlòng bol glar gơtơn tus dô bă nisơna tú cau gơnoar sơ nơm yaltơnggit an gơs dô nơm klac mham-dô nơm klac mham rngot ngăn gơ ơm digul rơsòn kon mơ màng đệm. Bulah klac mham hớ dệt, mơya hớ kung là tú bol he ơm tơm bơta rngot rngớt ngan. Gơwet mơ dô êt nă cau, bơta do rgơi lik gơs bơta roh kon, mơya gơwet mơ bol he , să jan rgơi sa mút hala săng tơlik klac mham do mơ ò cèng tus bơta bol glar lơi.

Tú hớ, bol he ò git bơta lơi lik gơs mơ kon. Bol he mìng git kơnờm di jơnau song kran cê tơm Jơnau Yang di: rài kis kon di bulah liah hala jong, mơ tơnggume tus di lồi kung nàng jong rơ Yang mơ ceng bơta gơklo gơ rê mơ Yang Tơm Trồ. Bol he păl ơn wil tơl bơta kis dệt rhền hớ tơm tê Yang, dô nus ơn jơh mơ dơn kớ bulah he ò git cồng nha lik gơs be lơi, Yang găm wil tơl mơ don song tus di jơh lồi.

Bơh ală jơnau hơ niam lơhơn hớ, bal mơ sèng Sră Goh ndai (be Jêremi 29:1; Rôma :28, Đơs Crih 46:1-3, Đơs Crih 127:3-4), lik gơs lọ̀s kơl-nĕ kớ cê nàng an gơn kơnờm, jơh nus hoi dăn dăn Yang sền gar bơta kis dệt rhền hớ. Bol he jơh nus rac dăn bơta ớm bời wil tơl bơh Yang, kơp kờn kon lik dơng lik gơs dô na ưcau klau pran kơldăng, jơh nus duh rngot di Yang mơ bơtô yal Jơnau Niam Dong klas Bơtau Krist di lam jơh plai ù. Bol he neh ơn jơh rài kis kon di Yang in lài mơ tú sền mát kon.

Ur klau an di mìng git gơn kơnờm di ală jơnau hơ pơgon niam lơhơn tus bơh Yang, Bơtau neh sac mơ hòi ja bol he tus bơta nđac kroi is lài mơ tú bol he lik gơs tơm dunnia ! Bulah tú hớ he ò rgơi git ngai tơ nớ lik gơs be lơi hala bơta lơi gơ tus mơ kon, bol he jơh nus hoi dăn nàng jơnau hơ pơgon hớ kung tuh bìng lìu hơ đăng kon dệt do, nàng rài kis kon di git cèng bơta gơklo mơ jong rơ gơ rê mơ Yang.

Yang dợp bơta he hoi dăn dô bă gơnap gơnoar mơ kroi is ò git đợ! Tú do, tú he mút tơm bơta lồi dut di, he chờ nus kơp gơn ngai kon dệt do tus tơm dunnia. Bol he ưn ngai Yang bơh bơta pạ ai mơ dong kơl don song Yang di, bal mơ hớ jơh nus rac dăn nàng dăn Yang ai bơta nđac kon klau in tú lik dơng geh gơs pran kơldăng tơm bơta dòn, gơs nus khin cha bơtô yal Jơnau Niam Yang Jesu in làm bạ tiah bơh rài kis kon di.

Dan jà bol he dô nùs bal tòm bơta hòi dan: Khoai Bep Dơng Hơ Đăng Trồ, Ynag git kon loh làng lài mơ tú kon lik gơs tơm kơdul mè kon di. Bơh bơta nđac krơi is ò git đợ, Yang neh hòi kon lik gơs cau gơ rê mơ Yang, la kon kờn gơboh Yang di. Dăn rài kis kon di lơh cơng bơta niam lơhơn mơ don song sùm sùm Yang di. Dăn tề lam kon lot tơm bơta git don bơr mơ gơs nus duh hul duh broă Yang, nàng lời jơh ală bơta gơklo, bơta jong rơ gơ rê mơ Yang. Kon jơh nus hoi dăn tơm Sơn Đăn Yang Jesu Krist, A-men.

Ơ ală ồng mò oh mi kơn gơboh, bulah tu jơ do oh mi găm ơm tơm bơta lơi, oh mi găm tú lơmpah nàng rê wơl, jao jơh rài kis he Yang in dô ba wil tơl tơm tú jơ do. Pợ té nus nàng wă rò bơta nđac Yang Tơm Trồ ai kợp nă bol he in là kon kờn gơboh Yang di. Nàng bơh nus git ưn ngai, bol he rơp ơn jơh Yang in rài kis mơ hìu nhă dệt rhền he di nàng duh broă lơgar gơklo Yang di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.