Dô nơm phan bulah geh tơnsoh alà dà tơlir niam mbe lơi kung ò rgơi gơcrà is, dilah ò gơs bơta àng pơnđàng. Kung behơ̆ sơl, jơh ală dà tơlir rài kis dê rơp gơlik gơs siău àng gơcrà mơ ò gơs gơtha dilah siău bơta àng. Mbùr klam jơngo rgơi jrơm gòm, lơh jơh ală bơta gơkrăm tom bơta moat-jrùng, mơ ya mìng pal càng dô ròs bơta àng tơlik mat, jơh ală bơta nisơna tơmgơl. Rài kis bol he kung behơ̆ sơl. Ngai bơh Bơtau Crơng Gơs, kọ̀n mơnùs mìng rgơi sơwì kwi-kwơ digùl mƀùr klam jơngo tồi-glài dê. Mơ ya tom tŭ Yàng Dọ̆ng-Klàs Jesu – Bơta àng dunnia dê pơnđàng tom rài kis, Kơnràñ pơnđàng sòl ală tiah ndơp ndơr, cèng tus bơta kis mơ lơh jơh ală rài kis òsơp-òsọ rlau jơh kung gơlik gơs àng gơcrà dô bă crih-crài.

Ngài do, ngai 26/10/2026, Bơta Hòi-Dan Kờp Ngai dan jà jơh ală cau iat kơlôi sơnơng Jơnau Yàng dê kơnòm di bơta dong kơl Martha Noebel bơh tơnggume BƠKAO-TÒNG PƠRHE.

“Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” (Jang 8:12)

Kờp ngai òs lòt rê sùm tom tiah oă cau nggồr-nggàc, mơ ya añ ò tŭ lơi sền gŏ chi do. Mơ ya ngai do gen pha ìs- ô krơi ngan! Mattơngai pơnđàng tơmtoh di tiah niam ngan, lơh chi bơkao-tòng pơrhe ò gơs bơta lơi krơi is nisơna gơlik gơs hàng mơnĕ ryŭ-ryơm. Añ ò kơlôi bơta lơi, lòt ơdă-ơdar sền di gơ.

Añ sền gŏ bơta hàng mơnĕ bơta crơng gơs Yàng Tom Trồ dê tơlik di đap mat dòp geh bơta kis bơh kờp dà tơlir, bơh dà pơrhe jù, dà pơrhe tơlir tus di pơrhe tơrnòm plai ñọ- jơh ală geh àng gơcrà hơđơm mattơngai.

Bơta hơ̆ lơh añ kah tus jơnau Yàng Jesu đơs lah Kơnràñ la Bơta Àng dunnia dê, mơ cau lơi jat Kơnràñ rơp ò gam cơnđòa lòt tom klam jơngo mơ ya gơs bơta àng bơta kis dê.

Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” (Jang 8:12)

Di ngan kung be chi bơkao-tòng be-òs gơlik gơs ryŭ-ryơm hơđơm mattơngai, rài kis bol he kung rgơi pơnđàng bơta hàng mơnĕ Yàng dê tom tŭ cơnđoà lòt tom bơta àng Yàng Dọ̆ng-Klàs Jesu. Bơta àng bơta kis hơ̆ kung cèng tus bol he in dô bơta gơn-kơnòm nền-cê, lơh nùs bol he bơtơl bơta dòn kơ̆-cê.

“Dan Yàng Tom Trồ sòl pơnđàng tòm nùs oh mi dê, tồ oh mi in rgơi git bơta gơn kơnòm bơh bơta hòi sac Kơnràñ dê la mbe lơi, sre brê gơklŏ crih crài Kơnràñ dê tòm ală cau sàng goh la mbe lơi” (Ephesô 1:18)

“Mơ bơta gơn kơnòm ò lơh ƀàssìl, bơh bơta kòñ gơboh Yàng Tom Trồ dê neh tuh tòm nùs bol he la bơh Yàng Hwềng Goh la Bơtau mơ Yàng Tom Trồ neh ai gòi bol he in.” (Rôma 5:5)

La kòn sau Yàng Tom Trồ, bol he gơs dô bơta gơn-kơnòm kis tom Kơnràñ. Yàng Hwềng Goh mù hơđang bol he, tuh bềng-liu bơta kòñ gơboh Yàng Tom Trồ tom nùs mơ ai gơnoar pràn nàng bol he cèng bơta gơn-kơnòm hơ̆ tus mơ cau ndai. Mơ hơ̆ kung la gùng bơta àng Bơtau Krist dê geh pơnđàng gan rài kis bol he. Tom tŭ lòt jat Yàng Dọ̆ng-Klàs Jesu, rài kis bol he gơcrà àng bơta àng Kơnràñ dê digùl dô dunnia gam gơkrăm tom klam jơngo. Bol he kis mơ yal tơlik bơta kòñ gơboh, hòn-chò, lơngap-lơngai, kong-ơt, kơ̆-dơn, lơbơn-niam, dòn-song, niam-lơnhơn bal mơ git kơrhia-hơ̆ la plai Yàng Hwềng Goh dê (Galati 5:22-23). Gơpơrlơ̆ wơl, bơta iơh tom dunnia mìng cèng tus bơta boah-gơjràñ, roh gơn-kơnòm, sơlồng-sơlàng, dùh nùs, nùs nhơm iơh, ò nđàc sơngit, ò dòn-song, gơhao gơjràñ mơ roh ring-lơngai.

Bơtau Crơng Gơs ai jơh ală bơta pal cang nàng bơta àng bơh bơta kòñ gơboh bơta dọ̆ng-klàs Kơnràñ dê cèng wơl ală bơta niam rlau jơh tom bol he. Kơnòm bơh hơ̆, bol he kis pha is digùl dunnia, lơh cau gùtt dar pal ơm bơdơh wơl sền, tô bơh bol he mơ đal git Kơnràñ bal mơ bơta hàng mơnĕ tom gùng dà Kơnràñ.
“Ơ hìu Jakôp, tus tĕ, bol he cơnđòa lòt tĕ tòm bơta àng Yàng Jehôwa dê” (Esai 2:5)

Àng drim ngai tơnơ̆ tom gùng lòt lơh broă, añ sơkềng mat joi wơl chi bơkao-tòng pơrhe hơ̆. Mơ ya tŭ do, añ ò gam đal gơ tài. Trồ tiah klam jơngo lơh gơ gơkòl jrơm digùl ală mbùr chi gùt-dar. Añ ai lơh pơrlai soh mơ ya ò ai lơh krơi. Tom tŭ bơta àng gơkòl jrơm ndơp, bơta hàng mơnĕ gùng dà oă cau…mơ jơh dunnia kung rơp ò gam àng gơcrà tai.

Dan jà bol he dô nùs bal tòm bơta hòi dan: Khoai Yàng, dan dong kòn săng bơta pơnhừ să bal mơ tồi-glài gam kơryăn bơta àng Kơnràñ pơnđàng tom rài kis kòn dê. Dan ai gơnoar pràn nàng kòn kis niam nùs Kơnràñ mơ yal tơlik bơta kờñ gơboh, bơta sàng-goh bal mơ bơta nđàc Kơnràñ dê ai jơh ală cau gùt dar. Dan dong kòn pơnđàng bơta àng Kơnràñ dê kờp ngai, lơh nền ò gơròm bal mơ bơta klam jơngo dunnia dê. Bơh pràn is, kòn ò rgơi lơh, gen dan Kơnràñ lơh pa wơl mơ bềng liu bơta àng Kơnràñ tom nùs kòn. Kòn dan jơh nùs duh rngòt mơ dòn bơr Kơnràñ. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, oh mi neh kis yal tơlik bơta àng Yàng dê nàng sòl pơnđàng ală tiah klam jơngo gùt dar he hala ò? Dan Yàng ngui rài kis oh mi mơ añ nàng jòng-ro bơta hang mơnĕ Kơnràñ dê, lơh ală cau gùt dar pal ơm bơdơh wơl mơ đal git sơnđan màng ryŭ Kơnràñ dê. Kơp kòñ lah gan kờp bơta àng dềt rhền mơ bol he pơnđàng kờp ngai, Lơgar Kơnràñ rơp pơnjat geh pò-ơnàng, mơ sơlo ngai sơlo gơs bơtơl tài hwềng-soàn pa joi tus Bơtau la Bơta Àng dunnia dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.