Kơlôi wơl tĕ rềp rlau jơh he nggùi hơđăng rơndeh kơp gơn đèng brồng, hala ntào nă hơđơm mìu gơn sum dô chuyến rơndeh buýt òhềt tus. Mìng dô êt phuk liah lơm gen kŭng rơp jòng ngăn be òhềt jơh. Kơp gơn òs sum là dô tơm ală bơta buơn nàng lơh siar rọh bơta kơp gơn bŏl he di rlau jơh. Mơ gơs tŭ lơi he kơlôi is là ñchi bơh tai Yang lòi bŏl he ĭn kơp gơn jŏ jọng behơ̆ taih? Ñchi bơh tai gơs ală jơnau họi dăn sum ò bàn Kơnrẵn ho wơl, tòm tŭ bŏl he ngai mơ măng kơp gơn sơl?

Ngai do, ngai 27/10/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Jennifer E. Jones dê bơh Tơnggume JƠNAU YĂL GĂM ÒHỀT JƠH

“Añ dòn nền ngan lah Bơtau neh sơntòm lơh broă niam tòm ală oh mi kung rơp lơh wil tơl jơl tus di ngai Yàng Krist Jesu dê.” (Philip 1:6)

Gơs tŭ lơi he kơp gơn ală bơta niăm rlau rơp tus tòm rài kis he di sơl ơ? Digơlan he găm koar dô bơta kơp koñ, neh kơp gơn lah rơp gơs tŭ ală broă tòmgơl jat bơta he òs kơlôi kơp koñ. Băñ basil dơñ dòp. Digơlan ñcau lơi tơm bŏl he kŭng neh gơs êt dơ̆ dô jơnau họi dăn òm tơm nùs behơ̆, kơp koñ Yang ho wơl mơ ai pà bơta nùs he găm òs kơp koñ.

He neh họi dăn, neh kơp gơn, dilah kŭng gơs ơt sa. Mơya gen ală broă lơi neh gơlik gơs taih? Kơp koñ ăñ rơp ai he ĭn dô jơnau hơ lọh lang. Mơya ăñ mìng rơp đơs bedo: dilah jơnau yăl he di găm òhềt pơndut jơh, gen nền cê găm ală bơta hơđap gen he òhềt sền gŏ.

Lòi ăñ ràng tơlik bơtơl. Tòm tọh ngăn la tơm Sră Goh gơs oă ngăn broă gơlik tus mhăr, gơlơh be nisơna. E-li guh rê hơđăng trồ tom dô ròs càl wàl bồng (II Ală cau Bơtau 2: 11). Tơnơ̆ mơ tŭ kis wơl, Yang Jesu kŭng nisơna tơlik măt ală cau bơtê (Mathiơ 28:9). Tơ’ai lah broă crơng gơs jơh trồ mơ tiah , Yang Tom Trồ kung mìng lơh sir tòm prau ngai (Sơnrờp 2:2).

Ală broă rơp gơlik tus mhăr, mơya jat ală bơta ăñ dòp git, oă jơnau hơ pơgon Yang Tom Trồ geh gơlik gơs di ngăn bơh bơta kơp gơn jŏ jọng. Tŭ pò ală blah Hơ Bal Yau, ăñ tìp jơh jơnau yăl do tus di jơnau yăl ndai bơh ală cau neh gơn kơnòm kơp gơn. Kơlôi tus tĕ Apbraham hala Dabit. Bŏl khai neh kơp gơn jơh năm do tus di năm ne tồ geh gŏ jơnau ho pơgon Yang di geh gơlik gơs di ngăn. Gơs cau kơp gơn dô nă kọn digul bơta kơnền, gơs cau păl dô pồn tòm trồm lŭ, mìng kơp gơn cau sò tơm ò geh jòi bàn mơ tơnrọh he. Bŏl khai kung rngòt rngơt, neh găm prơm, mơya găm ò săng lòi bơta dòn di Yang.

Kơlôi tus bơta lik ling Yang Jesu di. Bơta rơp tus Bơtau Mesia neh geh yăl lài nđợ jŏ rài. Oă cau gơs krơh niăm bơh bơta dòn neh săng rài mơya òhềt găm gơs măt tòmtọh măt sền gŏ jơnau hơ̆ gơlik gơs di ngăn.

Ngai do, bŏl he git lah Bơtau Krist neh tus ngăn. Mơya dilah rơp lùp be ală cau gơnoăr hwơr be Esai la bơta kơp gơn tŭ dơ̆ jòng kar lơi, ăñ kơlôi lah ồng rơp đơs : “Păl gơn jŏ, jŏ ngăn gen Bơtau Krist rơp tus.”

Yang Tom Trồ òs tề lăm jơnau yăl rài kis bŏl he bơh ală gùng dà jŏ jòng, ò di pơndut jơnau yăl mìng nđợ phuk lơm be dô nơm tap phim liah. Bơta rơndăp Kơnrẵn òs păl càng gơs oă tŭ jơ nàng gơlik gơs di ngăn. Kơnrẵn ò mhăr pơndut jơnau yăl rài kis bŏl he mìng digul jơ bơh bơta crap wơl mhăr. Kơnrẵn ơn tŭ jơ nàng rơndăp ală bơta, rcang lòng cau mơ lòi ală broă rhòi rhòi geh pò tơlik, jơl tus di tŭ jơnau yăl geh sir jat bơta lơh nền Kơnrẵn di.

Ngai do, ăñ kŭng găm cih dô dap tiểu thuyết, mơ ăñ rơp đơs lah dô là dô nơm broă lơh càng oă ngăn tŭ jơ nàng cih. Ăñ păl bơt rơndăp bơta gơlik gos jơnau yăl ĭn, gơlik gơs ală bơta gơtòmklĕ mơ hồ nyờr, gen ală cau tòm jơnau yăl lòt găn ală broă lài mơ tŭ lăm bŏl khai tus bơta crap wơl mơ ăñ neh kơlôi sơnơng bơh sơnrờp. Gơs ală tŭ ăñ kung gơplơ̆ nùs tài bơh ală broă lòt ofbat ngăn, mơya gen ăñ kư̆ pơnjat, tài bơh kah la Yang Tom Trồ kung la cau cih wơl jơnau yăl rài kis ăñ ji. Kơnrẵn cih rài kis ăñ ji, mơ Kơnrẵn kung cih jơnau yăl rài kis he di. Digơlan tŭ do he gơlơh ală broă gơ dŏ jŏ jòng ir, mơya dòn tĕ là tŭ jơnau yăl hơ̆ lòt tus lồi dut, he rơp gŏ bơta kơp gơn he di gơlik ò kwơ ò.

Dan jà bol he dô nùs bal tòm bơta hòi dan: Khoai Yang Jesu koñ gơboh, kọn ưnngai Kơnrẵn tài bơh Kơnrẵn là Cau Crơng mòn rài kis kọn di. Gơs ală tŭ kọn bŏl glăr tài bơh kơp gơn, tòm tŭ jơnau họi dăn gơlơh be òhềt geh dòp. Dăn tọh glài kọn ĭn tài bơh ală tŭ pin wil wơl, siơ̆u bơta gơn kơnòm mơ koñ is să tòm he lơh nền ală broă ala wơl dòn kơnòm Kơnrẵn. Dăn ai pà kọn ĭn bơta dòn tồ tĭng jat Kơnrẵn, bulah tơm ală tŭ kọn òhềt git lọh broă Kơnrẵn găm lơh. Dăn dŏng kọn sum kah lah Kơnrẵn găm lơh broă, găm dòn sŏng mơ ò dô bơta lơi gơlik gơs tòm rài kis kọn ơm bơdih bơta at bồ Kơnrẵn di. Dăn ai kon ĭn git jào phi wil tơl rài kis he tòm tê Yang mơ kơ̆ nùs kơp gơn nùs koñ niăm Kơnrẵn di gơlik gơs di ngăn. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, dô nơm păng sră rơp rọh dô pơnah lơi bơta gơboh gơbài niam dilah bơh tap sơnrờp, bŏl he neh git jơh ală bơta rơp gơlik gơs ơm tơm blah lồi dut. Rài kis kŭng behơ̆ sơl. Gơs ală tŭ Yang lòi bŏl he lòt găn ală gùng dà jòng ngăn, ală tŭ rĭng ngit ngăn tồn gơlơh be ò gơs bơta lơi tòmgơl, là mơ tŭ ràng tơlik bŏl he ĭn wă lọh bơta niăm Kơnrẵn găm lơh. Gen behơ̆, dilah ngai do bơta he họi dăn găm òhềt geh ho, dăn băñ gơplơ̆ nùs hala săng lòi bơta dòn. Kư̆ tĭng jat tĕ bơta dòn kơnòm Yang mơ jào phi kòp ngai he di Kơnrẵn ĭn. Bơh jơnau yăl găm òhềt jơh, mơ Bơtau găm sơmbat kơ̆ blah pơnjat tơm rài kis bŏl he găm sum òs dòn sŏng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.