Ngai wèr Halloween kùng neh tus. Đah mattơngai mùt, cau kơnòm òs pơnjềng mơ lòt bơh hiu do tus hơ hiu nè nàng dăn kẹo, toh mpồng ndăng driau ndang “Ai kẹo hala kol tonhiăl!” Jat òs mòng, hiu lơi pờ dèng bơdih hiu la cau tòm hiu rcăng nàng wă rò ală konòm, ai hiu lơi ò pờ đèng òs la til sơñio ai tơnggit bol khai ò dô nus bal. Digùl dô măng òs gơ tòm klĕ bal mơ rùp càrak mơ bơta klăm jơngo, cau dòn Yang dipal rngòt rngơt hala joi gùng nàng pleh jơh ală bơta sơl? Bol he pal càng sền đal wơl mơ lơh lòt mƀe lơi di đap ală tŭ lơmpah be hơ̆?

Ngai do, ngai 30/10/2026, tơnggu Hoi Dan Kòp Ngai dan ja ông mò oh mi kơlôi sơnơng bal jơnau Yang kơnòm bơta dong kờl Cathy Irvin bơh tơnggu me ɃÀÑ RNGÒT BƠTA KLĂM JƠNGO

“Behơ̆, bơta àng bol mê dê pơnđàng tĕ di đăp ală cau, nàng bol khai in gŏ ală broă niam bol mê dê, mơ jòng rờ Bèp bol mê ơm hơđăng trồ.” (Mathiơ 5:16)

Ngkơi bơta chò hòp ngai Halloween dê, gơs ò êt bơta lơh bol he in pal kơrhia. Bulah ală kơnòm dềt gơboh gơbai kòp gơn măng do, mơya ngăn lah ngai wèr do gơs bơta ring lơngai hala ò? Mơ Cau Dòn Yàng di pal dô nus bal chò hòp kơnhơl tòm ngai do sơl?

Gơwèt is mơ añ, añ ai lah ală Hiu Jum Goh rgơi rơndap dô nơm tơnggu pơjum gơtòm klac di gùl ală cau kơnòm in nàng pơrdòn bơh ală bơta kơnhơl dah bơdih dê. Tòm hiu jum, ală oh kơnòm kùng rgơi kơnhơl ală bơta kơnhơl, dòp geh ƀàñ keo, ñô dà plai mơ chò hòp bal tòm tŭ pah niam, gơròm rlau.

Behơ̆ ală cau ò gơs kòn dềt gèn tàng lơh mbe lơi tòm tŭ lơmpah do? Bol he rgơi sền do la dô tŭ lơmpah dô bă bal mơ ală tơnggu rơndap ală cau kơnòm tòm hiu Jum Goh, hala joi dô gùng di gơròm nàng yal tơlik bơta kờñ gơboh mơ gơlik gơs bơta àng Yàng dê digùl ală bơta lơh lòt gơlik gơs gut dàr he?

Yàng Jesu hoi ja bol he pơnđàng bơta àng Kơnràñ dê đap ală cau, nàng bol khai gŏ ală broă niam bol he dê. Ală oh kơnòm dềt, òhềt dòp git joh ală bơta he gam ƀừ, gèn tàngò càng geh cau dòng kờñ gơboh, tề lam mơ sền gàr.

Àñ neh pơjìng mờ tus hiu sơnơm kơnòm dềt nàng tompà ală kẹo gơròm mơ ală oh kơnòm gơtip bơta kòp tiểu đường. Añ kùng neh tus Hiu Jum Goh nàng dòng kơl ală tơnggu rơndap ơn ală cau kơnòm in. Mơya kùng gơs ală năm àñ mìng kal đèng, ơm mŏ mọ̆ tòm hiu. Di gơlăn añ neh lòt tơl jơh ală gùng dà rau.

Năm neh rlau, kòn ùr mơ kòn đah mè deh jà añ lòt bal mơ ală kơnòm tòm măng Haloween. Jơh dô mhồ, bol he sùm wèt mat tus hơ ală kòn, sền lăng ală phan sa ƀàñ kẹo mơ ală kòn dòp geh, mơ tơngkah ală kòn bàñ lòt is mùt tòm hiu mơ cau crih măt.

Gơs dô dơ̆, dô nă bàp kra pờ mpông mơ hoi ja nđờ nă ală kơnòm dềt mùt tòm dơlăm nàng ai kẹo. Añ đờs mơ: “Ông niam nus yơ, bol kòn gam bơtăn ală kon bàñ mùt is tòm hiu cau crih măt, gèn tàng ală kon dăn ơm bơdih lơm”. Ồng kơno behơ̆ kùng dô nus mơ lik bơdih mơ tòmpà kẹo ală kòn in. Tòm tŭ dô lik, añ òm kòp kờñ ông kùng wơng ñchi bơh tai bol he pal kơrhia behơ̆.

Añ kùng tơngkah ală kơnòm lah gùt dàr drà găm oă hiu tòmpà kẹo, gèn tàng ò càng pal phi să ming nàng ai bơntơl ală phăn.

Dô it tŭ tơnơ̆, àñ lup is: “He lik lòt bơdih mang do nàng lơh ñcgi lơi taih?” gèn añ dòp git lah he rgơi ngui tŭ lơmpah hơ̆ nàng lòt ndang hoi dăn ală cau kơnòm găm kơnhơl bơdih drà ndang. Añ hoi dăn ală kơnòm in, ai ală hiu nhă tòm ală drà, mơ ai jơh ală cau găm pờ mpông wă rò ală kơnòm.

Tòm gùng lòt, añ kùng git dô êt hiu nhă gơs bơta dòn bal mơ he. Bol khai pờ mpông bơdih hiu nàng tòmpà kẹo, mơya ò mòn bơka ală rùp càràk hala lơh gơs bơta lơh rngòt rngơt. Añ wềt sền gŏ bol khai lơbòñ niam đơs mơ ală kơnòm dềt lah: “Yàng ai lơngai ală kòn in!” mơ tơngkah ală oh kơnòm kơrhia lòt mơ kah tî tề bal.

Bol he ò tŭ lơi lòi ală kòn pơnjing gơlik gơs ală cau gơđềt mơ càràk, mơ să tòm ală kòn kùng ò kờñ tus rềp mơ ală hiu geh bơka ală rùp lơh rngòt hehơ̆. Bơta lơh ală kơnòm in gơboh gơbài mìng là sềm ală phăn soh pha is, dòp geh bàñ kẹo mơ chờ hòp ri hiu.

Behơ̆ añ dô nus tòm broă sa chò hòp Haloween hala dônus hơ wơl ală bơta pal càng gơđềt bal mơ bơta klăm jơngo mơ bơta iơh bơk sơl? Wil tơl la ò. Mơya añ kờñ sơl ngui tŭ lơmpah do be dô tŭ lơmpah nàng ràng tơlik bơta kờñ gơboh Yàng Jesu dê ai ală cau gùt dàr in hala ò? Nền cề la gơs.

Añ kờn lơh bơta niam digùl dunnia găm oă bơta klăm jơngo, mơ sac lik nàng bơta àng Yàng Jesu dê geh pơnđang găn di rai kis he. Di gơlan añ ming ai ală oh kơnòm in dô nơm phăn pà gòi dềt rwoat bơh di hiu Sră Cau don Yàng, dô nơm sră lơh cơng bơh bơta kờñ gơboh Yàng, hala dô êt jơnau dong ală oh kơnòm wờng bơh Haloween pơnjat bal mơ dô êt ƀàn kẹo di đap mpông hiu. Mơya bulah sac gùng dà lơi, añ kung ò kờñ ming tềl mpông mơ ntao bơdih jơh ală broă.

Bơh Yàng Jesu hoi ja bol he kis mbe lơi tồ cau ndai in rgoi sền gŏ bơta ang Kơnràñ dê găn di ală broă lơh niam he di. Kơnràñ đơs: “Behơ̆, bơta ang bol mê dê pơnđàng tĕ di đap ală cau, nàng bol khai in gơ̆ ală broă niam bol mê dê, mơ jòng rò Bèp bol mê ơm hơnđăng trồ.” (Mathiơ 5: 16)

Jang 3:21 kung tơngkah lah cau lơh jat jơnau song gèn “lòt tus hơ bơta àng”. Behơ̆ gèn, ala bơh lòi bơta rngòt rngơt lơh bol he rùc wơl să, añ kờñ sàc kis tom bơta àng mơ nàng lòi bơta àng hơ̆ geh ràng tơlik digùl dunnia găm oă klăm jơngo.

Dan jà bol he dô nùs bal tòm bơta hòi dan: Khoai Yàng Jesu, ưnngai Yàng bơh bơta kờñ gơboh mơ bơta sền gàr Kơnràñ dê hơđăng rai kis kòn kòp ngai. Dan ai kon in bơta jak chai nàng git sac rwah bơta niam nus Kơnràñ digul ală bơta kòn gam pin mơ ò hêt nĭ nơn. Bulah kòn găm kis digùl dunnia klam jơngo, dan Yàng dong kòn ò hŭi lah kòn gơri mơ bơta àng. Dan ngui jơnau đơs, broă lơh mơ gùng dà kòn gơwèt mơ ală cau gùt dàr nàng ràng tơlik bơta kơñ gơboh Kơnràñ dê, tồ bơta àng Kơnràñ dê kừ pơnđàng sol găn di rài kis kòn. Kòn jơh nus hoi dăn tòm sơnđăn Yàng Jesu Krist, Amen.

Ơ ală ông mò oh mi kỡn gơboh, kòp hiu nhă rgơi sac rwah pha is ai măng do in: ơm tòm hiu, cèng ală kòn lik bơdih, hala dô nus bal tòm bơta pơjum taom Hiu Jum Goh. kơrhia mơ lơh lòt mơ dô nơm hwêng nus song ngan di đap mat Yàng. Di gơlăn năm do ông mò oh mi sac rwah gùng do, năm pơnjat wơl sền gŏ dô nơm gùng ndai di gơrờm rlau. Mơya bulah la bơta sac rwah lơi, lời tĕ bơta kờñ gơboh, bơta jak chài mơ bơta àng Yàng dê geh ràng tơlik găn di gùng dà kis ông oh mi dê. Tồ digùl dô măng bềng bơta klăm jơngo, bơta àng Kơnràñ dê găm geh sòl pơnđàng găn di rai kis bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.