Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing ta hlăk hơdip tơ̆ng krah lŏn tơnah bŏ hăng tơlơi rŭng răng, tơlơi pơkơdơ̆ng nao rai tơdruă. Tơlơi hơdip rơnuk anai ngă kơ ƀing ta bưp lu tơlơi kơtraŏ, tơlơi lông lăng laih anŭn tơlơi pơklah pơsua jai kơtang rĭm hrơi. Lu mơnuih ƀu thâo pơpă jơlan či rơbat, rơngiă tơlơi đaŏ laih anŭn jrok jơlan amăng tơlơi kơnăm mơmŏt. Ƀing ta kiăng hơmâo tơlơi bơngač pơčrang, kiăng kơ atat čông ƀing ta laih anŭn pha brơi ƀing ta tơlơi tŭ yua, tơlơi kơñăm kơ tơlơi hơdip. Tơlơi bơngač yom mơyang anŭn ƀu tơbiă rai mơng pơpă gah rơngiao kơ Khua Yang ƀing ta ôh.

Hrơi anai, lơ 02/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Michael Plemmons tui hăng akŏ tơlơi hrăm TƠLƠI BƠNGAČ YOM MƠYANG

Anai nê, Kâo dŏ dơ̆ng ƀơi bah amăng laih anŭn khŏk, tơdah hlơi pô hơmư̆ asăp Kâo laih anŭn pŏk bah amăng, Kâo či mŭt amăng sang ñu, ƀơ̆ng huă hrŏm hơbĭt hăng ñu, laih anŭn ñu hrŏm hơbĭt hăng Kâo. (Bơrơđah 3:20)

Ƀing ta hlăk hơdip amăng tơlơi hơdip phara hăng tơlơi hơdip hlâo adih biă mă. Tơlơi rŭng răng, tơlơi ƀu hơđơ̆ng hơmâo truh nanao amăng djŏp lŏn čar rĭm hrơi. Ƀu thâo pơhiăp hiưm pă dơ̆ng tah kơ hơdôm tơlơi ƀing ta hơmâo hơmư̆ amăng rĭm hrơi mông. Tơlơi dŏ kơtuă, tơlơi huĭ hyưt, tơlơi ƀu hơđơ̆ng kơ tơlơi hơdip pơ anăp ngă kơ tơlơi pơmĭn ƀing ta laih anŭn pran jua ƀing ta jing hĭ kơnăm mơmŏt.

Tui anŭn yơh hrơi anai, kâo kiăng mơit asăp alum pơđur kơ hlơi hlăk ruă rơngot: hơmâo sa čô Pô nanao hyơk bơngơ̆t brơi kơ ih laih anŭn nanao prap pre pơklaih ih, wơt dah ih bưp tơlơi hơgĕt. Rơbâo rơbâo čô mơnuih amăng lŏn tơnah anai leng kơ hơmâo nam rơka amăng pran jua, rĭm čô hơmâo tơlơi ruă phara. Pran jua kâo pơkơčah, tơlơi pơmĭn kâo rơngot tơdang lăng ƀuh hơdôm tơlơi hơdip tơnap tap kơ rĭm čô mơnuih hlăk găn amăng lŏn tơnah anai.

Ha glăk ha glai mơnuih rơnuk anai hlăk bưp tơlơi rŭng răng kơ prăk kăk. Ƀing gơñu jing ƀing mă bruă hăng pran jua tơpă. Ƀing gơñu triăng mă bruă, čem rong sang anŏ, gưt tui tơlơi juăt kơnuk kơna. Samơ̆ yua kơ rơngiă bruă ngă, rơngiă adơi ayŏng, ƀôdah bưp tơlơi ruă duăm, ƀing gơñu khŏm glăm tơlơi kơtraŏ gah prak kak laih anŭn ƀu thâo ngă hiưm pă kiăng kơ dưi pơklaih ôh. Rĭm hrơi leng kơ bŏ blai tơlơi ƀlơ̆ng bơngơ̆t kơ tơlơi hơdip ƀu hơđơ̆ng pơ anăp, ƀing gơñu ƀu thâo ngă hiưm pă dơ̆ng tah kŏn thâo lơi jơlan pơpă kiăng kơ tơbiă đuaĭ mơng anŭn.

Amăng lŏn tơnah jai hrơi jai rơngiă tơlơi hơđơ̆ng, ƀing ta kiăng hơduah kơsem tơlơi tŭ yua sĭt kơ tơlơi hơdip ƀing ta. Kâo pap kơ hơdôm bơngăt hlăk jrok jơlan amăng tơlơi hơdip, hlăk kơsem ep jơlan tơbiă đuaĭ. Hrơi anai, tơlơi kơtraŏ amăng tơlơi pơmĭn, tơlơi rŭng răng kơtang jing hĭ tơlơi khŏm truh amăng rĭm hrơi – tơlơi anai ƀing rơnuk hlâo adih aka bưp ôh. Rĭm gah jum dar ƀing ta leng kơ hơmâo ayăt kơsung rai hăng tơlơi pơhiăp, kiăng ƀing ta hơduah kơsem tơlơi laĭ glaĭ kơ tơlơi kơñăm tơlơi hơdip ƀing ta, kơ tơlơi tŭ yua tơlơi hơdip ƀing ta.

Kơnơ̆ng nao pơ Khua Yang Yêsu ƀing ta či hơduah ƀuh tơlơi tŭ yua sĭt kơ tơlơi hơdip. Amăng mlăm hlâo kơ Khua Yang tŭ tơlơi tơnap tap, Khua Yang laĭ hăng ƀing ding kơna Ñu Ơi Adai hơmâo sa tơlơi kơñăm laih anŭn hơdră mơng adai adih. Khua Yang Yêsu jing Ơi Adai Pô hăng drơi jăn mơnuih. Ñu trŭn rai amăng lŏn tơnah anai kiăng kơ pơrơđah brơi kơ lŏn tơnah anai ƀuh tơlơi khăp laih anŭn pran jua hơnơ̆ng ten Ơi Adai Ama. Plă tơngan Ñu či pơhlao tơlơi ruă duăm, djru hơdôm bơngăt hlăk rơngiă tơlơi čang rơmang. Boh Pơhiăp Ñu anŭn jing pran jua ruă rơngot laih anŭn pran jua thâo pap prŏng prĭn.
Lŏn tơnah hlăk anŭn hơmâo hơdôm tơlơi hluh hual kơ Ơi Adai. Ƀing ta rup mă pô hơmâo ngă soh hĭ tơlơi hluh ană mơnuih, pơrup mă hơdôm tơlơi pơkơdơ̆ng glaĭ hăng tơlơi khăp laih anŭn pran jua pap drap Ama hăng adai adih. Samơ̆ Khua Yang Yêsu hơmâo sa tơlơi kơñăm laih anŭn sa hơdră jơlan. Ñu hlăk ngă sa bruă yom mơyang. Kiăng kơ dưi ngă pơgiơ̆ng hĭ bruă anai, Ñu khŏm pơsăn drơi jăn Ñu pô. Yua kơ bruă Ñu khŏm ngă anŭn jing ba rai tơlơi kơñăm kơ tơlơi hơdip, ba rai tơlơi tŭ yua kơ ană mơnuih, sa wơ̆t djŏp laih.

Ƀơi kơyâo bơrơkal, Ñu tŭ mă tơlơi mlâo heñ, tŭ mă tơlơi soh laih anŭn tơlơi phak kơhmal brơi kơ abih bang mơnuih nam amăng rĭm rơnuk. Samơ̆ Ñu ăt hơmâo sa tơlơi kơñăm glong hloh abih bang. Ñu thâo găn mơng tơlơi djai pơsăn drơi jăn anŭn, Ñu či pŏk jơlan kiăng kơ ană mơnuih tŭ mă tơlơi bơngač yom mơyang kơ tơlơi hơdip mơng Ơi Adai. Wơt dah tơlơi hơdip gleh glan hiưm pă, Khua Yang Yêsu hơmâo djai laih kiăng kơ hlơi pô đaŏ kơ Ñu či tŭ mă tơlơi hơdip hlong hlar amăng Ơi Adai.

Anŭn jing hơdră jơlan yom pơphăn Ơi Adai, kiăng kơ pơblih pran jua ană mơnuih. Khua Yang Yêsu laĭ jeh añăm bơi anĕt aneo samơ̆ či tañ mơtăm prŏng đĭ hiam klă. Tơdang ƀing ta pơyơr tơlơi hơdip ƀing ta brơi kơ Ñu, ƀu djơ̆ kơnơ̆ng Ñu pap brơi tơlơi soh ƀing ta đôč ôh, samơ̆ ăt pha brơi kơ pran jua ƀing ta tơlơi bơngač yom mơyang tơlơi hơdip laih anŭn kơnuih Ñu dơ̆ng. Ñu či tuh bŏ blai tơlơi khăp laih anŭn tơlơi juh alum Ñu brơi kơ rĭm čô ƀing ta.

Tui anŭn, ơ ƀing hơmâo pran jua gleh tơnap laih anŭn rơngiă tơlơi čang rơmang, hơmư̆ bĕ Boh Pơhiăp Khua Yang hlăk iâu ih mông anai. Hơmư̆ bĕ boh pơhiăp rơnang tơdu rơun Khua Yang hlăk iâu tơ̆ng krah tơlơi rơông rơang, tơlơi rŭng răng jum dar ƀing ta. Ñu či pơhrŏ hĭ tơlơi ruă rơngot laih anŭn pha brơi ih tơlơi čang rơmang. Ñu či sŭt lui hĭ tơlơi huĭ hyưt amăng pran jua ih, pha brơi kơ ih tơlơi rơnuk rơnua, tơlơi khăp laih anŭn pran jua pap drap kơ bơngăt ih. Ñu či pơblih tơlơi ruă rơngot ih jing hĭ tơlơi mơak, pơblih tơlơi gleh tơnap ih hăng tơlơi rơnuk rơnua, laih anŭn pơčrang tơlơi hơdip ih hăng tơlơi tŭ yua laih anŭn tơlơi kơñăm yom mơyang Ñu.

Anăm dŏ tơguan dơ̆ng tah, tŭ mă bĕ boh pơhiăp Khua Yang Yêsu jak iâu: Anai nê, Kâo dŏ dơ̆ng ƀơi bah amăng laih anŭn khŏk, tơdah hlơi pô hơmư̆ asăp Kâo laih anŭn pŏk bah amăng, Kâo či mŭt amăng sang ñu, ƀơ̆ng huă hrŏm hơbĭt hăng ñu, laih anŭn ñu hrŏm hơbĭt hăng Kâo. (Bơrơđah 3:20)

Rơkâo ƀing ta pioh mông iâu laĭ hrŏm hơbĭt
Ơ Khua Yang, tơng krah lŏn tơnah bŏ hăng tơlơi rŭng răng anai, ƀing gơmơi kiăng Ih biă mă. Rơkâo ih pơčrăng rơđah tơlơi bơngač tơlơi sĭt Ih ƀơi kâo, pha brơi kơ kâo pran phrâo amăng Ih kiăng kơ kâo dưi pơkơdơ̆ng glaĭ kơ hơdôm tơlơi lông lăng amăng tơlơi hơdip. Rơkâo Ih djru kâo thâo anăp nao kơ tơlơi kơñăm yom mơyang Ih pha brơi kiăng kơ kâo dưi rơbat amăng tơlơi rơnuk rơnua. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, kơnơ̆ng Khua Yang jing Pô dưi pha brơi kơ ƀing ta tơlơi tŭ yua kơ tơlơi hơdip laih anŭn tơlơi kơñăm kơ tơlơi hơdip amăng rơnuk tơnap tap anai. Ñu nanao khăp kơ ƀing ta laih anŭn thâo rơđah rĭm tơlơi pơmĭn kiăng ƀing ta, tơlơi kơƀah kiăng ƀing ta laih anŭn tơlơi tơnap tap ƀing ta. Ñu nanao hyơk bơngơ̆t, čem rong laih anŭn pha brơi kơ ƀing ta tơlơi rơnuk rơnua rĭm mơnit mông. Rơbat tui bĕ tơlơi Khua Yang jak iâu, laih anŭn Ñu či pơblih tơlơi hơdip ƀing ta tui hơdră jơlan hiam hloh.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.