Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơ̆ng krah tơlơi hơdip hơmâo lu tơlơi gŭn bruă, tơlơi pơdơi jing kar hăng tơlơi yom biă mă hăng ƀing ta. Tơlơi hơdip lu tơlơi gŭn găn anŭn ngă kơ ƀing ta wơr hơbit Khua Yang hơmâo pha brơi kơ ƀing ta hrơi pơdơi rơgoh hiam. Anŭn jing sa amăng Ha Pluh Tơlơi juăt Khua Yang, samơ̆ ƀiă mơnuih đôč hyơk bơngơ̆t kơ tơlơi anŭn laih anŭn ngă djơ̆ tui tơlơi pơtă. Hloh kơ anŭn dơ̆ng, tơlơi anŭn jing gơnam Khua Yang pha brơi kơ ƀing ta, sa hrơi pioh brơi kơ ƀing ta pơjưh abih bang bruă, pơdơi laih anŭn kơkuh pơpŭ kơ Khua Yang. Samơ̆ ƀing ta hơmâo tŭ mă laih gơnam anŭn hă?

Hrơi anai, lơ 03/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Linda Vulcano tui hăng akŏ tơlơi hrăm SA AMĂNG PLUH TƠLƠI JUĂT

“Brơi ih hơdơr bĕ hrơi pơdơi kiăng pioh ñu jing hrơi rơgoh hiam” (Tơlơi tơbiă 20:8)

Hơmâo sa hrơi, amăng hơdră kâo hơmư̆ tơlơi ră glai tơ̆ng krah pô atat čông hơdră hăng sa čô hlăk ai. Amăng tơlơi ră glai anŭn, pô atat gai hơdră laĭ hrơi Tơjuh hlăk rơnŭk ñu đưm hlâo adih phara hăng rơnŭk hlăk ai ră anai. Tui hăng “tơlơi juăt mơtah”, abih sang sĭ mơdro khŏm krư̆ amăng hrơi tơjuh, abih bang mơnuih leng kơ pioh hrơi mông kiăng kơ kơkuh pơpŭ kơ Khua Yang, laih anŭn hơmâo hrơi pơdơi hăng sang anŏ, hăng gơyŭt gơyâo. Hlăk ai anŭn laĭ glaĭ: “Tơlơi anai bŏ hăng tơlơi hling hlang biă mă hăng kâo”. Tơlơi pô atat čông hơdră laĭ glaĭ ngă kơ lu mơnuih dŏ kơtuă: “Aƀơih, anai jing sa amăng Ha Pluh Tơlơi juăt ih thâo”.

“Sa amăng Ha Pluh Tơlơi Juăt” – Kâo kiăng laĭ tơpă sĭt, kâo aka lăng tơlơi djă hrơi pơdơi jing yom tui hăng tơlơi juăt anăm pơdjai mơnuih ôh, anăm klĕ pyu ôh. Samơ̆ ƀing ta thâo rơđah rơđong anŭn jing tơlơi juăt Ơi Adai.

Tơlơi tơbiă 20:8 hơmâo pơklă sĭt ƀing ta khŏm hơdơr hrơi pơdơi răk brơi hrơi anŭn jing rơgoh hiam. Samơ̆ răk brơi hrơi anŭn jing rơgoh hiam hơgĕt kiăng laĭ?

Kâo ƀu ƀuh tơlơi phara hăng hrơi pơkŏn amăng hrơi kŏm. Sĭt yơh kâo nao sang kơkuh pơpŭ amăng hrơi Tơjuh, samơ̆ ƀu hơmâo tơlơi hơgĕt phara lơi. Kâo pơmĭn ră anai jing mông khŏm pơblih tơlơi anŭn yơh.
Kâo khŭt khăt lui hĭ hơdôm bruă ƀu yom ôh amăng hrơi Tơjuh kiăng kơ hơmâo mông jĕ giăm Khua Yang. Kâo ƀu lăng tơlơi pơdah rup ngui ngơr dơ̆ng tah, ră anai kâo lăng tơlơi pơdah rup ră ruai Yang Krist. Kâo ăt lui, ƀu mă bruă amăng hrơi Tơjuh dơ̆ng tah tơdah ƀu hơmâo tơlơi hơgĕt jač mač, ƀu hơmâo tơlơi khŏm ngă.

Blŭng hlâo, kâo tơnap biă mă kiăng kơ juăt hăng tơlơi anŭn, tơl kâo hơmâo hơduah ƀuh laih hơdră ră ruai Yang Krist kâo khăp. Ƀu sui ôh mơng anŭn, hrơi Tơjuh jing hrơi kâo dŏ čang tơguan biă mă amăng hrơi kŏm. Anŭn jing hrơi kâo pioh lui kiăng kơ jĕ giăm Pô hluh kâo laih anŭn khăp kâo hloh. Kâo khăp biă mă hrơi mông anŭn, tơlơi anŭn ngă kơ kâo pơmĭn nao kơ mông mơnit dua čô dăm dra bưp nao rai tơdruă. Anŭn jing hrơi mông kơnơ̆ng pioh brơi kâo hăng Khua Yang Yêsu, yom pơphăn biă mă!

Sĭt yơh, hơdơr hrơi Tơjuh ƀu djơ̆ bruă glăm ôh. Anŭn jing sa tơlơi hơk mơak sĭt.
Amăng hră Markôs črăn 3, arăng ƀuah Khua Yang yua kơ pơsuaih tơlơi ruă duăm kơ sa čô mơnuih amăng hrơi Saƀat, yua kơ tơlơi juăt ƀu brơi ôh mă bruă amăng hrơi anŭn. Ñu laĭ glaĭ hăng tơlơi pơhiăp: “Amăng hrơi saƀat ƀing ta dưi ngă tơlơi hiam ƀôdah ngă tơlơi sat, pơklaih mơnuih ƀôdah pơdjai mơnuih?” (jơlan 4)? Ñu ƀu lăng kơ tơlơi rup mă gah rơngiao kơ tơlơi juăt hrơi Saƀat ôh, ƀing ta khŏm hrăm tui Ñu. Ƀing ta khŏm hluh tơlơi tŭ yua laih anŭn bruă yom kơ hrơi anai, jing hrơi pioh brơi kơ ƀing ta tŭ mă tơlơi hơk mơak laih anŭn pơdơi amăng Khua Yang.

Amăng hơdôm hơdră ră ruai Tơlơi Pơthâo Hiam kâo hơmâo hơmư̆ laih, pô pơđŏk hơmâo tơña lu mơnuih kơ tơlơi tơña: “Ih hơdơr kơ hrơi pơdơi hiưm pă?” Ƀing gơñu hơmâo tŭ mă lu tơlơi tơña, mơng tơlơi khŏm kŭp lui phone, truh kơ tơlơi khŏm pioh lu mông kiăng kơ iâu laĭ. Ƀing ta hơmâo thâo laih, ƀu djơ̆ kơnơ̆ng hơmâo hasa hơdră jơlan kiăng kơ hơdơr kơ hrơi “Sa-bat” đôč ôh.

Tui anŭn, anai jing tơlơi tơña kâo tơña kơ ih mông anai. Ih hơdơr tơlơi juăt “Brơi ih hơdơr bĕ hrơi pơdơi kiăng pioh ñu jing hrơi rơgoh hiam” hiưm pă? Hơdôm bruă hơgĕt či dui ih jĕ giăm Khua Yang hloh? Hơdôm bruă hơgĕt či klư̆ ih đuaĭ ataih mơng Khua Yang? Mơng tơlơi tơña anai, ih či thâo bruă hơgĕt khŏm ngă, bruă hơgĕt khŏm bĕ đuaĭ kiăng kơ hrơi pơdơi rơgoh hiam anŭn jing hĭ klă tum brơi kơ Khua Yang.

Rơkâo ƀing ta pioh mông iâu laĭ hrŏm hơbĭt
Ơ Khua Yang, đơđa kâo wơr hơbit kơ hrơi pơdơi rơgoh hiam ih, jing tơlơi juăt yom pơphăn kar hăng tơlơi juăt pơkŏn mơ̆n. Rơkâo Khua Yang pap brơi laih anŭn djru kâo thâo pơkra glaĭ tơlơi hơdip kâo kiăng kơ kâo dưi tŭ mă hrơi pơdơi klă tum kar hăng gơnam Khua Yang pha brơi, laih anŭn pioh abih hrơi mông yom pơphan anŭn amăng tơlơi lir hơbit jĕ giam Ama Pô khăp hơeng kơ ƀing gơmơi. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, hlâo adih ih hơmâo hơdơr kơ hrơi pơdơi rơgoh hiam tui tơlơi Khua Yang kiăng mơ̆n? Ih khŭt khăt kiăng pơblih tơlơi hơgĕt amăng hrơi kŏm anai, kiăng kơ ih dưi hơmâo mơnit mông jĕ giăm Khua Yang, laih anŭn pơdơi amăng Ñu? Pơmĭn bĕ hơdôm bruă ih khŏm ngă amăng hrơi anai kiăng kơ hrơi pơdơi rơgoh hiam anŭn mơng hrơi anai truh pơ hrơi tơdơi jing hơmâo tơlơi tŭ yua hloh abih bang.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.