Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi.

Bruă jê̆ pla jing sui, kiăng lu hrơi mông hăng pran bruă, mơ̆ng čoh lŏn truh hơpuă. Mơnuih jê̆ hmua khŏm hmâo tơlơi gir run čang tơguan ia hơjan rơơ̆ hmua pơdai, mơ̆ng anŭn mơ̆n phŭn kơyâo čăt bluh dŭ, pơnga mơboh laih anŭn jing hĭ boh troh yom. Ăt kar hăng tui anŭn, ană bă Khua Yang khŏm đup gưt laih anŭn čơkă Khua Yang dŏ hrŏm hơbĭt, kiăng kơ Ñu pơblih ƀing ta mơ̆ng tơlơi kro krañ jing hĭ mơtah hiam laih anŭn yom brơi kơ Sang Ñu. 

Hrơi anai, lơ 10/11/2022, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Ken Barnes tui hăng akŏ tơlơi hrăm BOH TROH YOM MƠ̆NG LŎN TƠNAH.

“Yua kơ anŭn yơh, Ơ adơi ayŏng, brơi ƀing gih gir run bĕ tơl hrơi Khua Yang rai dơ̆ng. Lăng bĕ mơnuih ngă hmua dŏ tơguan boh troh yom mơ̆ng lŏn tơnah, gir run dŏ tơguan tơl hmâo ia hơjan lĕ rah laih anŭn ia hơjan tơkuh thŭn” (Yakơ 5:7)

Kâo ƀu djơ̆ ôh mơnuih jê̆ hmua, ăt sang anŏ kâo ƀu jê̆ hmua mơ̆n. Samơ̆ kâo hmâo ƀơ̆ng laih boh troh aka să laih anŭn ƀơ̆ng boh tơda- dua ñu leng phĭ laih anŭn khăng. Anŭn ăt krĕp djơ̆ tơlơi Yakơ kiăng pơhiăp, tơdang ñu laĭ kơ bruă čang tơguan boh troh yom mơ̆ng lŏn tơnah; rơngiao kơ “boh troh” ñu laĭ amăng anai ƀu djơ̆ ôh jing boh troh, samơ̆ jing ană mơnuih.

“Yua kơ anŭn yơh, Ơ adơi ayŏng, brơi ƀing gih gir run bĕ tơl hrơi Khua Yang rai dơ̆ng. Lăng bĕ mơnuih ngă hmua dŏ tơguan boh troh yom mơ̆ng lŏn tơnah, gir run dŏ tơguan tơl hmâo ia hơjan lĕ rah laih anŭn ia hơjan tơkuh thŭn” (Yakơ 5:7)

Hơjan akŏ thŭn djru pơjeh čăt. Khul asar pơjeh hiam akhăng hăng hrip ia lu. Ăt kar hăng anŭn, hlâo kơ Khua Yang Yêsu rai, ană mơnuih ăt hmâo pran jua akhăng, kiăng biă mă tơlơi pơblih jing hĭ tơdu rơun. 

Tơdơi kơ čăt đĭ, pơjeh khŏm hmâo tum ia kiăng tŏ tui prŏng đĭ kơyar. Ăt tui hăng anai mơ̆n, ƀing mơnuih pŏk pran jua đaŏ tŭ jum Khua Yang Yêsu jing Pô Pơklaih kơ tơlơi hơdip či tŏ tui prŏng đĭ tui. Hơjan tơkuh thŭn jing hmâo ƀŏ mơta Khua Yang.

“Ơ ană bă Siôn, brơi hơ̆k kơdơ̆k mơak mơai bĕ amăng Yêhôwa Ơi Adai ƀing gih! Yua kơ Ñu brơi ia hơjan akŏ thŭn kơ ƀing gih tui hăng tơlơi tơpă hơnơ̆ng; Tuh trŭn ia hơjan akŏ thŭn laih anŭn hơjan tơkuh thŭn” (Yôel 2:23)

Yua kơ anŭn, Khua Yang pơtrŭt pơđur ƀing ta gir run laih anŭn mă tŭ tơlơ Ñu dŏ hrŏm hơbĭt, yua kơ Ñu hơnơ̆ng ten pha brơi tơlơi anŭn kơ ƀing ta.

Tal tuč ƀing gih mưn mơak mơai hmâo Ơi Adai dŏ hrŏm hơbĭt jing mông pă? Nang ai ñu phrâo anai đôč, ƀôdah sui laih yơh, kar hăng tal tuč hrŏm hăng gơyut mơnơi ia hơjan hlăk čơđai. Ơi Adai hơnơ̆ng ten pha trŭn ia hơjan, ăt kar hăng hmâo ƀŏ mơta Ñu, amăng djơ̆p mông. Ƀu kar hăng mơnuih ngă hmua khŏm lăng tơlơi pơthâo adai khong ha ƀôdah hơjan laih anŭn čang kiăng biă mă hơjan rơơ̆ hmua pơdai, ƀing ih hăng kâo kơnơ̆ng dơ̆ng glaĭ laih anŭn iâu laĭ đôč.

“Ơ Yêhôwa, ƀing mơnuih thâo anăn Ih či đaŏ kơ Ih, yua kơ Ih ƀu hơngah lui ôh hlơi pô tui hơduah sem Ih” (Tơlơi adoh hơđăp 9:10)

“Wơ̆t dah rơmông dŭl tơdăm ăt bưp mơ̆n tơlơi kơƀah laih anŭn tơlơi rơpa mơhao, samơ̆ hlơi pô hơduah sem Yêhôwa ƀu či kơƀah sa mơta tơlơi hiam ôh” (Tơlơi adoh hơđăp 34:10)

Ơi Adai jing tơlơi khăp, pha brơi kơ ƀing ta tơlơi dưi hơduah ƀŏ mơta Ñu. Yua mơ̆ng anŭn mơ̆n, Ñu tañ laĭ glaĭ. Samơ̆ rĭm mông ƀu djơ̆ ƀing ta leng thâo hơdră mă tŭ. Bơhmutu, sa čô mơnuih kro krañ sĭt kiăng biă ia hơjan gah bơngăt, samơ̆ ƀing gơñu dŏ nanao kro krañ laih anŭn ƀu hmâo ôh pruih rơơ̆. Yua hơgĕt? Ƀu djơ̆ ôh Khua Yang ƀu laĭ glaĭ tơlơi ƀing gơñu rơkâo; samơ̆ yua kơ ƀing gơñu, kiăng dưi mă tŭ khŏm ngă djơ̆ tui tơlơi Khua Yang kiăng. Laih anŭn bruă ngă blung hlâo: brơi glưh krư̆ glaĭ bĕ hla du!

Tơlơi soh laih anŭn tơlơi ƀu pap brơi hrup hăng hla du bring ia hơjan. Anai jing tơlơi hluh tơl wơl tơ̆ng krah ƀing đaŏ. Tơdang hmâo tơlơi ruă amăng pran jua, ƀing gơñu tui hơduah Khua Yang kiăng hmâo tơlơi pơsuaih laih anŭn tơlơi pơblih kơphrâo, samơ̆ ƀu ƀuh glaĭ ôh bruă gơñu pơgang pô hlăk pơgăn hĭ khul tơlơi gơñu hơduah. Lu mơnuih pơmĭn tơlơi pap brơi jing sa tơlơi mưn jang jai, samơ̆ ƀu djơ̆ tui anŭn ôh. Amăng Hră Ơi Adai Pơhiăp, tơlơi pap brơi jing sa tơlơi ruah mă. Ƀôdah pơhiăp djơ̆ hloh, pap brơi jing sa bruă ngă tui hăng tơlơi pơmĭn rĭm čô ƀing ta kiăng. Ƀu hmâo hlơi ôh “mưn ƀuh” kiăng kơ pap brơi. Anŭn jing tơlơi pơgang mơ̆ng yang đar - pŏk glưh hla du kiăng kơ wai lăng pran jua ƀing ta. Samơ̆ tơdang pap brơi ƀing mơnuih ngă soh hăng ƀing ta, yua kơ Khua Yang Yêsu iâu pơthưr ƀing ta ngă kar hăng anŭn, tui anŭn yơh hla du či đup trŭn laih anŭn ia hơjan Ơi Adai či pơsuaih, lir pơgop glaĭ tơlơi pơčah amăng ƀing ta.

Ƀu đup gưt jing sa tơlơi pơgăn pơkŏn pơgăn hĭ hmâo ƀŏ mơta Ơi Adai dŏ hrŏm hơbĭt. Hiư̆m Khua Yang dưi pha brơi kơ ƀing ih tơlơi atăt mrô dua, tơdang ƀing ih nanao weh wer đuaĭ ƀôdah ƀu gưt tui ôh tơlơi atăt mrô sa? Khua Yang ƀu kơ̆ng glaĭ ia hơjan Ñu - tơlơi pơkơdơ̆ng glaĭ laih anŭn tơlơi pơgao ang ƀing ta jing phŭn tơhnal ngă ƀing kro krañ.

“Tơdah ƀing gih mơak pran jua gưt asăp, tui anŭn ƀing gih či ƀơ̆ng boh troh hiam mơ̆ng lŏn” (Êsai 1:19)

Ƀing ta dưi laĭ: “Tơdah mơak pran jua gưt asăp mơtam, ƀing ih či mă tŭ ia hơjan tơkuh bơyan ngă brơi kơ lŏn rơơ̆ kơmơ̆k”. Samơ̆ brơi hơdơr ƀing ta khŏm hmâo dua mơta kơnuih: mơak pran jua laih anŭn gưt asăp! Ană bă gưt asăp amĭ ama jing sa bruă, samơ̆ ƀing ta mơak pran jua ngă tơlơi anŭn mơ̆, ha ƀôdah ngă tui hăng kơnuih ƀu bơmơak, anŭn jing sa bruă pơkŏn!

Ơi Adai hrup hăng pô jê̆ hmua hmâo abih bang tơlơi dưi, Ñu wai lăng gơnam Ñu amăng lŏn tơnah, pha brơi ia hơjan akŏ bơyan laih anŭn ia hơjan tơkuh bơyan, ba rai ană mơnuih tơlơi čang rơmang kơ bơyan boh troh mơboh. Samơ̆ Ñu ăt iâu brơi wai hmua tơlơi hơdip ƀing ta.

“Sai bĕ kơ ih pô tơlơi tơpă hơnơ̆ng, laih anŭn hơpuă mă tơlơi hiam klă; brơi jah bĕ lŏn phrâo! yua kơ ră anai jing rơnŭk tui hơduah Yêhôwa tơl truh hrơi Ñu rai laih anŭn tuh trŭn ia hơjan tơlơi tơpă hơnơ̆ng ƀơi ƀing gih” (Ôsê 10:12)

Rơkâo ƀing ta pioh mông iâu laĭ hrŏm hơbĭt

Ơ Khua Yang, rơkâo Ih djru kâo krư̆ abih bang hla du hlăk ngă pơgăn kâo trăm pô kâo amăng ia hơjan mơyun hiam Ih. Rơkâo Ih mă lui abih bang tơlơi ƀu bơmơak, tơlơi khăng akŏ amăng kâo, kiăng kâo hmâo pran jua rơun tơdu hăng mơak pran jua gưt asăp, laih anŭn tuč nuč kâo či jing hĭ boh troh yom mơ̆ng lŏn tơnah dŏ amăng tơngan Ih wai lăng. Kâo iâu laĭ hăng anăn Khua Yang Yêsu Krist, Amen.

Ơ abih bang ayŏng amai adơi khăp hơeng, ƀing ih laih anŭn kâo jing boh troh yom kơ lŏn tơnah. Čang rơmang biă mă ƀing ta nanao mơak laih anŭn gưt asăp, khĭn yak tui Khua Yang atăt, kiăng ƀu lui ôh wơ̆t dah sa djoh ia hơjan hram bă hmâo ƀŏ mơta Ñu dŏ hrŏm hơbĭt. Kiăng yua mơ̆ng anŭn mơ̆ng anŭn mơ̆n, ƀing ta dưi jing hĭ boh troh mơmih pơyơr đĭ Ama Amăng Adai Adih.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.