Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Tơdang Khua Yang Yêsu mŭt amăng plei Yêrusalem, Ñu tŭ mă tơlơi čơkă mơak hăng abih pran jua mơ̆ng ană plei pla. Khul boh pơhiăp pơpŭ bơni, hmâo ur đĭ, wơ̆t mơ̆ng amăng bah ƀing čơđai kar kaĭ mơ̆n. Sĭt, Khua Yang rai jing tơlơi mơak prŏng laih anŭn ƀu hmâo kơnuih pă djơ̆ hloh kiăng kơ bơrơđah pran juq čơkă Khua Yang amăng bruă pơpŭ bơni hơơč kơ anăn Ñu.

Hrơi anai, lơ 23/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Matt Levy tui hăng akŏ tơlơi hrăm HÔSANA! KƠKUH ČƠKĂ KHUA YANG.

“Lu mơnuih lang ao gơñu ƀơi jơlan, ƀing pơkŏn tap than kơyâo gơñu hmâo koh mơ̆ng glai. Ƀing nao hlâo hăng ƀing tui klon ur kraih: “Hôsana! Ơi Adai hơơč mơyun yơh kơ Pô rai amăng anăn Khua Yang!” (Markôs 11:8-9)

Ƀu hmâo bruă hơgĕt mơak mơai hloh tơdang ƀing ta hmâo tơlơi tŭ jum abih pran jua tơdang ƀing ta phrâo truh pơ sa boh plei. Tơdah ƀing ih jing ƀing khăp kơ čơđai tui anŭn yơh ƀing ih hluh sĭt tơlơi mưn čơkă mơak mơai anai. Tơdang ƀing ih glaĭ pơ sang tơdơi kơ sa hrơi glong tui anŭn yơh ƀing čơđai kơ ƀing ih dŏ čang tơguan ƀơi bah amăng đuaĭ nao krôp ƀing ih hăng tơlơi hơ̆k mơak. Ƀôdah hloh kơ anŭn dơ̆ng tơdang ƀơi anăp sang bă asăp klao mơak hăng asăp kơkuh bă tơlơi pơđao mơ̆ng ƀing gơyŭt gơyâo, ƀing mơnuih amăng sang anŏ ƀing ih tơdơi kơ ƀing ih nao pơ ataih lu hrơi hăng glaĭ pơ sang. Năng ai amăng mông anŭn bă tơlơi pơđao hăng tơlơi pơkuar, khul tơlơi pơhiăp mơak hăng bă blai asăp klao mơak.

Boh Pơhiăp Khua Yang amăng Mathiơ 21:8-9 čih ruai glaĭ brơi kơ ƀing ta kơ bruă Khua Yang Yêsu hmâo tơlơi čơkă abih pran jua mơ̆ng ană plei pla tơdang Ñu mŭt nao amăng plei Yêrusalem.

“Lu mơnuih lang ao gơñu ƀơi jơlan, ƀing pơkŏn tap than kơyâo gơñu hmâo koh mơ̆ng glai. Ƀing nao hlâo hăng ƀing tui klon ur kraih: “Hôsana kơ Ană Đawit! Mơyun hiam yơh kơ Pô rai amăng anăn Khua Yang! Hôsana pơ adai glong hloh kơ abih bang!”

Rup Khua Yang mŭt nao amăng plei Yêrusalem jing hiam biă mă. Boh Pơhiăp Khua Yang amăng hră Mathiơ 21:8-9 čih glaĭ kơ bruă ană plei pla ur kraih kiăng čơkă Yang Mêsi kơ ƀing gơñu: “Hôsana kơ Ană Đawit! Mơyun hiam yơh kơ Pô rai amăng anăn Khua Yang! Hôsana pơ adai glong hloh kơ abih bang!” Khua Yang ăt pơpŭ bơni mơ̆ng amăng bah kơ ƀing čơđai, ƀing čơđai hlăk dŏ mĕm kar hăng Boh Pơhiăp Ñu hmâo čih amăng Tơlơi Adoh Hơđăp 8:2.

“Samơ̆ tơ ƀing khua ngă yang prŏng hăng ƀing nai pơtô tơlơi juăt ƀuh khul tơlơi yom pơphan Khua Yang Yêsu ngă, laih anŭn hmư̆ ƀing čơđai ur kraih amăng sang kơkuh pơpŭ: “Hôsana kơ Ană Đawit” tui anŭn yơh ƀing gơñu hil laih anŭn pơhiăp hăng Ñu: “Ih hmư̆ mơ̆ tơlơi ƀing čơđai anai laĭ?” Khua Yang Yêsu laĭ glaĭ: “Ơ, ƀing gih aka lăng ôh hă hră Ơi Adai Pơhiăp hmâo čih laih tui anai: ‘Ih hmâo tơlơi bơni hơơč mơ̆ng amăng bah ƀing čơđai muai laih anŭn ƀing čơđai dŏ mĕm?’

Sĭt biă mă hmâo tơlơi pơtrŭt tơdang ƀing ta đơ̆k Hră Ơi Adai Pơhiăp laih anŭn hơduah ƀuh khul jơlan hmâo tơlơi kar kaĭ hmâo čih amăng Hră Tơlơi Pơgop Hơđăp hăng Hră Tơlơi Pơgop Phrâo. Khul tơlơi adoh bơni laih anŭn tơlơi pơpŭ kơ Khua Yang rai hmâo čih amăng Tơlơi Adoh Hơđăp laih anŭn amăng hră Mathiơ:

“Ơ Yêhôwa! Pơklaih ƀing gơmơi đa; Ơ Yêhôwa! Brơi ƀing gơmơi dưi jing bĕ amăng bruă. Năng lăp kơ pơpŭ bơni đơi yơh kơ pô hmâo rai laih amăng anăn Yêhôwa! Mơ̆ng sang Yêhôwa, ƀing gơmơi pơpŭ bơni kơ Ih.” (Tơlơi Adoh Hơđăp 118:25-26)

“Ơ Yêrusalem, Yêrusalem, ih pơdjai ƀing pô laĭ lui hlâo laih anŭn glŏm boh pơtâo ƀing Ơi Adai hmaoa pơkiaŏ nao pơ ih! Lu wơ̆t Kâo kiăng pơƀŭt glaĭ ƀing ană ih kar hăng sa drơi mơnŭ ania kruk pơƀŭt glaĭ ană ñu ƀơi gah yŭ čăng ñu, samơ̆ ih ƀu kiăng ôh! Lăng bĕ, sang ƀing gih Ơi Adai lui laih jing hĭ rơngol. Yua kơ Kâo laĭ kơ ƀing gih, ƀing gih ƀu či ƀuh Kâo dơ̆ng ôh, tơl ƀing gih laĭ: ‘Mơyun hiam yơh kơ Pô rai amăng anăn Khua Yang!” (Mathiơ 23:37-39).

Hră Ơi Adai Pơhiăp čih Khua Yang Yêsu či wơ̆t glaĭ sa wơ̆t dơ̆ng, ƀu djơ̆ amăng rup kơ sa čô čơđai samơ̆ jing pơtao drưh kơang. Ƀing ih hmâo pơmĭn nao mơ̆ kơ hrơi čơkă Khua Yang mơ̆ng adai wơ̆t glaĭ? Hnŭn năng ai jing sa hrơi guh kơang hăng yom pơphan. Khul adai, ƀing ling jang hrŏm hơbĭt hăng ană plei pla Khua Yang či ur kraih pơpŭ bơni kơ anăn Rơgoh Hiam Ñu. Ƀing ih hmâo tơlơi prăp pre hăng hmâo tơlơi čang tơguan kơ hrơi anŭn mơ̆?

Rơkâo ƀing ta pioh mông iâu laĭ hrŏm hơbĭt
Bơni kơ Khua Yang Yêsu yua kơ Ih hmâo rai ƀơi lŏn tơnah anai. Ih jing Yang Mêsi hmâo ƀuăn pha brơi, rai kiăng kơ pơklaih ană mơnuih mơnam mơ̆ng tơlơi răm rai. Sĭt, kâo kơ kơnơ̆ng ur kraih bơni hơơč kơ Ih, pơpŭ bơni kơ Ih jing Pô hmâo rai laih hăn anăn Khua Yang. Rơkâo kơ Ih djru kơ kâo nanao pơpŭ hăng bơni kơ Ih hăng jơlah bah laih anŭn hăng pran jua kâo. Rơkâo kơ anăn Ih nanao pơpŭ bơni găn mơ̆ng tơlơi hơdip kâo. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, brơi prăp rơmĕt bĕ kơ pran jua hơ̆k mơak laih anŭn nanao prăp rơmĕt kiăng čơkă Khua Yang Yêsu trŭn rai bă tơlơi ang yang. Anăm pơhrưĭ ôh kơ mông gal kiăng kơ mă bruă Khua Yang yua kơ ƀing ih ƀu thâo ôh hrơi hăng mông Khua Yang rai. Yua kơ anŭn, brơi mă yua bĕ hrơi mông ƀing ta hlăk dŏ hơdip amăng lŏn tơnah anai kiăng kơ pơpŭ kơ Ñu hăng abih pran jua kơ ƀing ih. Čang rơmang rĭm hrơi găn gao ƀing ta nanao leng hơdip amăng tơlơi mơak ur kraih: “Hôsana! Bơni hơơč kơ Pô hmâo rai laih amăng anăn Khua Yang!”

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.