Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Lub 12 hli yog lub caij cov ntseeg Vajtswv lub koob tsheej, ua koob tsheej nco txog Tswv Yexus los yug, tus uas los rau hauv lub ntiajteb no pub txoj kev kajsiab tiag rau tib neeg. Nyob rau lub caijnyoog xyoo 2021 muaj ntau yam teeb meem tshwm sim vim tus kab mob Covid-19, vim li ntawd Vajtswv txojkev kaj siab yuav muaj nqis heev. 

Hnub no, yog hnub 01/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm zaj kawm CAIJ KOOB TSHEEJ TWB LOS TXOG LAWM

Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug! (Lukas 2:14).

Txhua zaug uas txog lub caij ua koob tsheej Yexus yug, kuv pom yus zoo li ib tug menyuam yaus uas tab tom sawv ntawm tej tsev muag thaj lossis muag tej khoom ua si. Kuv yeej nyob tsis tau ib thaj twj ywm tos kom hnub ntawd los txog. Kuv xav yuav khoom pub rau tsev neeg thiab tej phooj ywg. Kuv xav ua kom txhua yam zoo nkauj thiab npaj homphiaj kom tej neeg txheeb ze hauv tsev neeg tuaj ua si thiab nyob ua ke thaum muaj sijhawm so li no. Kuv xav mus rau hauv tuam tsev koom kev hu nkauj qhuas Vajtswv txog hnub Tswv Yexus los yug, nrog tsev neeg thiab tej phooj ywg saib zaj yeeb yam txog Tswv Yexus los yug ua ke, v.v. Muab los hais mas muaj ntau txoj haujlwm yuav tau ua. 

Xyoo no yog ib xyoo muaj ntau yam kev sim siab. Kuv tus niam laus tau mus nrog Vajtswv nyob lawm thiab muaj qee qhov teeb meem hauv tsev neeg yuav tau ua tom qab lub koob tsheej no. Kuv yuav tau tso ib txoj kev npaj ua ntej yuav mus vim muaj teeb meem txog nyiajtxiag. Tiamsis, nyob rau ntawm kuv, tej ntawd yuav txeeb tsis tau txoj kev zoo siab ntawm lub koob tsheej no vim kuv tsis tso cai rau tej ntawd tshwmsim. 

Kuv yeej ntseeg rau tej uas Vajluskub tau cog lus tseg “Vajtswv ua rau nej muaj kev kaj siab thiab qhov uas nej nrog Yexus Khetos koom ib txojsia thiab tej uas nej xav huv tibsi” (Filipis 4:7). Kuv paub tias peb tsis tsimnyog ua lub neej raws li ntiajteb pheej ua lossis raws li peb lub siab nyiam yog peb ua li ntawd lub siab yuav tswj peb txhua hnub. Thaum ntawd, peb yuav ua lub neej raws li tib neeg sab nqaij tawv tsis yog ua lub neej raws li Vaj Ntsujplig ua tus coj kev. 

Yuav zoo heev yog tias peb paub ua tib zoo xav txog txhua yam uas zoo nyob rau hauv yus lub neej tsis yog tias niaj hnub tsau tsawv rau hauv tej uas peb ua tsis tau. 

Kuv ua Vajtswv tsaug vim kuv muaj ib lub caij ua tsaug zoo kawg nkaus. Kuv hnov tau koob hmoov tshaj plaws vim kuv tus tub twb tau npaj ib pluag mov rau kuv noj nyob rau hnub ua tsaug ntawd. Nyob ntawm kuv, tej zaub mov ntawd qab heev li. Kuv kuj muaj sijhawm zoo tseg rau tsev neeg thiab tej phooj ywg. Kuv tsab zam kom zoo nkauj rau kuv lub tsev ua ntej txog lub caij ua tsaug thiab tom qab ntawd kuv mus rau tom tuam tsev pab tu lub tuamtsev. Ntawd yog ib lub caijnyoog zoo heev rau kuv vim kuv nyiam ua kom zoo nkauj tshwj xeeb yog lub caij ua koob tsheej. 

Kuv txoj kev zoo siab rau lub caij ua koob tsheej yog xav txog tej xwm txheej qhia txog Tswv Yexus, Vajtswv Leej Tub, tau los cawm peb thiab ntawd yog qhov khoom plig loj tshaj plaws tseg rau txhua tus, yog peb txoj kev cawmdim. Qhov ntawd zoo ib yam li thaum peb nthuav ib pob khoom loj thiab muab faib rau txhua tus uas yus ntsib … qhov khoom plig ntawd yog Vajtswv txoj kev hlub. 

Kuv pom tias qhov uas nthuav qhia Vajtswv txoj kev hlub rau lub caij ua koob tsheej no yooj yim heev dua. Yog li, yog koj tab tom hnov qaug zog, kav tsij npaj yus tus kheej mus ntsib tej neeg ib ncig, faib yam uas koj muaj rau lawv. 

Lub koob tsheej Yexus yug yog txoj kev zoo siab thiab kev kaj siab. Los ntawm Tswv Yexus los yug, kuv muaj txoj kev zoo siab thiab kaj siab txhua hnub. Yog li, cia li dhau los zoo li ib tug menyuam yaus, tos ntsoov vim lub caij koob tsheej twb rov los txog lawm. 

“Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” (Lukas 2:14).

Thov caw nrog kuv peb thov Vajtswv ua ke: Ua Vajtswv Koj tsaug vim ib lub koob tsheej Tswv Yexus yug rov qab los txog, ceeb toom kuv txog Koj txoj kev hlub loj tseg rau peb tib neeg, nyob hauv ntawd muaj kuv thiab. Thov kom txoj kev zoo siab thiab kaj siab puv npo nyob hauv kuv, kom kuv qhuas Vajtswv Koj thiab nthuav qhia koj rau lwm tus ib ncig. Kuv thov hauv Tswv Yexus Khetos lub npe. Amees.

Cov kwv tij txawm yog xyoo 2021 yog ib xyoo muaj ntau txoj kev txom nyem, sim siab los raug  rau txhua tus, tiamsis ntawm no kuj yog lub caij kom ua rau lawv pom tias lawv cheem tsum Vajtswv txoj kev kaj siab thiab zoo siab npaum li cas. Yog li, thaum txog lub koob tsheej no, cia li thov Vajtswv tshwj xeeb rau cov ntseeg tshiab uas koj xav nthuav qhia Vajtswv pub rau lawv nyob rau tej hnub yuav los tom ntej no.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.