Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Txawm yog Vajtswv nthuav qhia Nws txoj kev hlub rau txhua tus los txhua tus ho txais yuav txoj kev hlub ntawd sib txawv. Muaj tej tus txawm yog ntsia pom tej txujci uas Tswv Yexus ua los,  vim ntau yam lawv ho tsis ntseeg, tsis lees yuav Nws. Tiamsis kuj muaj qee tus thaum saj tau Vajtswv txoj kev hlub thiab Nws txoj kev pab, ho npaj siab hlo nthuav qhia lawv lub siab, thov kom tau nrog tus Tswv mus. 

Hnub no, yog hnub 02/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Katy Kauffman dhau ntawm Zaj kawm CIA KUV NROG KOJ MUS

Thaum sawvdaws hnov li ntawd, lawv txawm thov kom Yexus tawm hauv lawv cheebtsam ntawd mus. Thaum Yexus tabtom nce mus rau hauv lub nkoj, tus txivneej uas raug dab thov Yexus hais tias, “Cia kuv nrog Koj mus!” (Malakaus 5:17-18)

Thaum tseem yau, kuv pom Xibhwb Philip loj thiab siab heev. Saib Xibhwb kuv xav txog cov thawj tsav nkoj tab tom tsav tej lub nkoj loj heev nyob tom hiav txwv, lossis zoo li ib tug tub ceev xwm mus tiv thaiv thaum muaj kev kub hnyiab lossis ib tug thawj tub ceev xwm twg ntawd. Tiamsis yawg ho yog kuv tus Xibhwb. Xib hwb lub suab sov so thaum muaj ib hmo yog hnub so tsaus ntuj tau rub tau kuv nkag mus rau hauv zaj xwm txheej tham txog ib tug txiv neej heev neeg thiab khaub hlab. Tiamsis thaum ntsib Tswv Yexus tau hloov tag nrho txhua yam. 

Tus txiv neej uas raug dab mus mus los los rau saum tej toj roob uas luag siv los ua roob toj ntxas nyob rau cheeb tsam Nkelaxas. Txhua tus puav leej ntshai thiab tsis muaj ib tug neeg twg tuav tau yawg. Lawv siv zog muab xauv hlau los khi yawg tiamsis yawg puav leej muab ua tu tas. Tom qab ntawd, Tswv Yexus tuaj txog rau thaj chaw no thiab Tswv Yexus tib leeg xwb thiaj yog tus uas yuav qhib tau yawg lub siab kom dim. 

Ntsia pom Tswv Yexus, yawg hais tias, 

“Yexus uas yog Vajtswv tus uas muaj hwjchim loj kawg nkaus tus Tub! Koj tuaj thab kuv ua dabtsi? Muaj Vajtswv nyob saum ntuj pom, kuv thov Koj tsis txhob tsimtxom kuv.” (Malakaus 5:7). 

Tswv Yexus tsis yog los ua kom yawg muaj kev txom nyem, tiamsis Nws los pab. Tus txiv neej uas raug ntau tus dab khi thiab Tswv Yexus tau muab cov dab no ntiab tawm hauv yawg mus, tso cai rau lawv nkag mus rau pab npua nyob ze ntawd. “Pab npua ntawd yuav luag muaj ob txhiab tus. Thaum dab mus rau hauv pab npua lawm, ces pab npua txawm dhia mus poob tsag tsua rau hauv hiav txwv tuag tas huv tibsi lawm.” (Malakaus 5:13). 

Thaum cov pej xeem nyob rau hauv cheeb tsam ntawd khiav tuaj saib seb dab tsi tab tom tshwm sim, lawv pom tus txiv neej raug dab tab tom zaum, hnav ris tsho, thiab nco meej meej tuaj lawm. Qhov no tau ua rau cov pej xeem ntshai heev. Lawv paub tias muaj ib yam dabtsi tau tshwm sim tuaj rau pab npua lawm thiab xav kom Tswv Yexus tawm mus. 

Kuv yeej hnov qab tsis tau li txog qhov uas Xibhwb Philip tau tham txog cov pejxeem nyob ntawd tau ua rau Tswv Yexus. Xibhwb txhais tias lawv cuag li xav hais rau Tswv Yexus tias, “Peb tsis quav ntsej txog Koj yuav mus qhov twg thiab ua dab tsi, tsuav yog Koj tawm ntawm qhov no mus xwb”.

Koj lub siab puas xav nrog Tswv Yexus nyob, txawm yog yuav muaj yam dabtsi tshwm sim? Koj tau los cuag Tswv Yexus los ntawm txoj kev hlub thiab lub siab ntseeg kom koj muaj cuab kav hais tau li tus neeg uas raug dab tau kho zoo hais tias, “Kuv yuav tsis xav txog koj yuav mus qhov twg lossis ua dab tsi, tshuav yog kuv tau nrog Koj mus xwb”? 

Nyob rau hauv phau Luv, peb nrhiav pom ib tug qauv txhawb zog kom peb tag siab pehawm Vajtswv. Luv xav nrog Luv niam pog nyob yog pog Naomis txawm yog Luv tus txiv twb tuag lawm. Ntawm no yog tej uas Luv tau hais thaum Naomis yuav npaj siab yuav tawm hauv tebchaws Mau-as rov los rau Yudas: 

“Tsis txhob txwv kuv! Cia kuv nrog koj mus. Koj mus qhov twg, kuv yeej yuav nrog koj mus qhov ntawd; koj nyob qhov twg, kuv yuav nrog koj nyob qhov ntawd. Koj haivneeg yuav yog kuv haivneeg thiab koj tus Vajtswv yuav yog kuv tus Vajtswv. Koj tuag rau qhov twg, kuv yuav tuag qhov ntawd, thiab cia luag muab kuv faus nrog koj rau qhov ntawd. Tsuas yog txojkev tuag thiaj yuav ua rau kuv ncaim ntawm koj xwb, yog kuv cia ib yam dabtsi ua rau kuv ncaim koj mus, thov kom tus TSWV rau txim rau kuv!” (Luv 1:16-17). 

Koj puas tau muaj ib zaum twg hlub ib tug neeg uas koj tau hais tawm cov lus no rau tus neeg ntawd zoo li no lawm los tsis tau? Koj puas tau muaj ib zaum twg hlub Vajtswv txog qib uas koj tau hais rau Vajtswv zoo ib yam li Luv tau hais rau Luv niam pog lawm tau? “Koj mus qhov twg, kuv yuav nrog Koj mus qhov ntawd. Koj nyob qhov twg, kuv yuav nrog Koj nyob qhov ntawd. Kuv yog Koj li, thiab Koj yog kuv li. Kuv yuav tsis ncaim ntawm Koj mus”. 

Peb puas txaus siab hlo muab txhua yam tso tseg rau Vajtswv? Peb puas txaus siab hlo muab txhua yam uas ua rau peb lub siab yij fab yij fwj  tso rau tom qab kom peb nrog tus Tswv mus? Yim paub Vajtswv ntau, peb yim tau tab pov tias peb yuav ntseeg siab tau rau Vajtswv lub siab nyiam thiab so hauv Vajtswv txoj kev zoo kawg nkaus thiab Nws txoj kev txawj ntse. Peb pom Vajtswv ua rau peb muaj kev txaus siab thiab muab yam zoo tshaj plaws pub rau peb. Nws yog Leej Txiv uas hlub peb thiab yog peb tus phooj ywg zoo tshaj plaws, nrog peb mus ua ke hauv peb txoj kev taug hauv lub neej. Koj lub siab puas xav thov kom “tau nrog tus Tswv mus” lossis tsis xav?

Thov caw nrog kuv peb thov Vajtswv ua ke: Tswv Yexus tus uas kuv hlub, kuv lub siab thov kom tau nrog Koj mus. Koj mus qhov twg, kuv yuav nrog Koj mus qhov ntawd. Koj nyob qhov twg, kuv thov nrog Koj nyob qhov ntawd. Thov kom tag nrho kuv lub neej yuav tsis khiav deb ntawm Koj. Kuv thov hauv Tswv Yexus Khetos lub npe. Amees.

Cov kwv tij txhua tus, zaj kawm hnub no kos tau daim duab txog ob pawg neeg, ib pab yog cov pej xeem ntsia pom tej txujci uas Tswv Yexus ua tiamsis vim tej nuj nqis ntawm lawv tus kheej lawv tau ntiab Tswv Yexus tawm mus, thiab ib pab yog tus neeg uas saj tau Vajtswv txojkev hlub tseg rau nws tus kheej thiab txiav txim siab nrog Tswv Yexus mus. Koj pom yus tab tom nyob rau pawg neeg twg? Hnub no koj puas yuav xaiv txiav txim siab nrog tus Tswv mus tag koj tiam neej? Yog tias mus, cia li mus cuag Vajtswv los ntawm tej lus uas tawm hauv koj lub siab tuaj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.