Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Muaj ntau zaug, muaj ntau yam tsis tshwmsim raws li yus siab xav ua rau peb tsis kam mus ntxiv nyob hauv peb txoj kev ntshaw, tshwj xeeb yog tej kev ntshaw tseg rau Vajtswv tes haujlwm. Tiamsis, Vajtswv xav kom peb ruaj siab ntseeg Vajtswv thiab ua siab ntev mus raws li Vajtswv lub suab hu. Vim thaum txog Vajtswv lub sijhawm, Vajtswv yuav pub rau peb tau txais yam uas peb lub siab ntshaw. Tos Vajtswv lub homphiaj peb yuav saj tau txoj kev hlub thaum yog Vajtswv lub sijhawm. 

Hnub no, yog hnub 03/09/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Chanel Abrams dhau ntawm Zaj kawm YOG KOJ TOS / KOJ YUAV TXAIS TAU KEV ZOO SIAB

Thaum koj tas kev cia siab, mob koj siab kawg li, tiamsis thaum tau kiag lawm ua rau koj zoo siab kawg (Pajlug 13:12) 

Kuv yog ib tug neeg muaj kev ntseeg thiab txoj kev ntseeg ntawd twb mus tob ti nkaus rau hauv kuv tej nruab txha. Kuv yog ib tug neeg txawj pleev zoo nkauj, ua haujlwm nyob rau hauv tej thaj chaw thaij duab thiab muaj ntau zaug hais tseeb tiag kuv yuav tau tswj kuv tus kheej kom tsis txhob hais ntau txog Tswv Yexus, tus uas kuv hlub, ib tsam ua rau lwm tus hnov tsis txaus siab. 

Tiamsis yuav ua li cas kuv thiaj tuav rawv Vajtswv txoj kev zoo rau kuv tus kheej tau? Kuv muaj txhais tes txawj ua li no zoo li ib qhov txujci. Kuv tsis tau kawm dhau tsev kawm kom muaj qib. Kuv txhais tes twb tau Vajtswv foom hmoov!

Txawm li los, ntawm no tsuas yog lub sijhawm xwb, vim kuv tsis hais txog Tswv Yexus. Thiab thaum kuv ua tau qhov no, kuv raug hu mus rau ib cag mloog tej lus ceeb toom hais txog txoj kevcai tswj thiab tsis pub qhia txoj kev ntseeg nyob rau ntawm chaw ua haujlwm. 

Tom qab ob peb zaug raug hais mus hais los, kuv hnov cuag li kuv qaug zog. Kuv ua xyem xyav rau kuv tus kheej. Phem tshaj qhov ntawd tseem muaj ntau tug tub txawg ua tib txoj haujlwm li kuv hais tsis zoo tom qab kuv nruab qaum vim lawv xav tias ntshe kuv tsis hnov. 

Muaj ib hmo thaum kuv tseem tab tom saib xov tooj, Vajtswv tau tshoov kuv siab nrhiav lo lus “tus kws txawj pleev zoo nkauj” thiab “CBN”. Qhov xov xwm qhia txog ib tug tub txawg ua haujlwm nyob rau hauv chaw ua dejnum CBN tau tshwm tuaj. Kuv xa ib tsab email rau nws thiab tham tej uas kuv ntsib rau nws, thiab nws hais rau kuv tias yuav pab tsis tau kuv nyob rau lub sijhawm no. Tiamsis ib lub sijhawm tom qab, nws thiaj hu tuaj rau kuv tias tes dejnum hauv CBN tab tom nrhiav ib tug neeg txawj pleev zoo nkauj ua haujlwm nyob rau hauv chaw ua dejnum ntawm Washington D.C. Kuv tau sau ntawv mus thov ncaj rau hnub ntawd. Sai heev, kuv txais tau lub sijhawm hu mus nug, xyaum ua dejnum thiab lawv yuam kom kuv ua dejnum yog tus tsab zam zoo nkauj tseg rau CBN. Wow! Xav tsis thoob li!

Vajtswv txojlus hais nyob hauv Yelemis 29:11. “Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej” 

Yog tias koj ib txoj kev ntshaw twg nres tau ib lub sijhawm ntev los lawm thiab cuag li koj yeej tseem ntsia tsis pom txoj hau kev yuav ua kom tiav txoj kev ntshaw ntawd, cia kuv txhawb koj: “Vajtswv yeej tsis hnov qab koj! Muaj tej lub sijhawm kuv xav tso tseg. Tiamsis, zoo li Tej Lus Qhia tau hais nyob hauv 9:11 “Kuv pom dua lwm yam ntxiv nyob hauv lub ntiajteb no; cov neeg uas khiav ceev tshaj los yuav khiav tsis yeej txhua zaus uas muaj kev sib tw khiav, thiab cov neeg uas siab tawv heev los yuav sib ntaus sib tua tsis yeej lawm; cov neeg txawj ntse los yuav tsis muaj noj tsis muaj haus; cov neeg muaj tswvyim los tsis npluanuj, thiab cov neeg uas ua tau tshaj plaws los tsis tau ua cov tuav lub meejmom siab. Txoj hmoov phem yeej yuav los raug txhua tus.” Yog, txoj kev sib tw khiav no tsis yog tsuas tseg rau cov neeg khiav ceev lossis muaj zog, tiamsis tseg rau cov neeg ua siab ntev mus txog thaum kawg. Nyob nruab nrab ntawm tej phab ntsa thaiv thiab tej yam ua rau qaug zog, sawv khov kho vim paub tias peb yuav tau sau thaum txog caij.

Thov caw nrog kuv peb thov Vajtswv ua ke

Leej Txiv, kuv ua Koj tsaug vim ib hnub zoo. Ua Vajtswv tsaug rau Vajtswv koj txoj kev hlub tshua txog kuv. Leej Txiv thov pab kuv kom kuv dhau los muaj zog zoo li Koj tau npaj tseg rau kuv. Koj txojlus tau hais tias: “Koj tej kev xav tsis zoo thooj li peb tib neeg, thiab nws yog kev kaj siab. (Yelemis 29:11) thov pab kom kuv ua raws li koj siab nyiam thiab koj yuav rov qab pab kuv. Peb thov hauv Tswv Yexus Khetos lub npe. Amees.

Cov kwv tij phooj ywg, lub sijhawm uas peb xav tias yog ces tej zaug tsis yog Vajtswv lub sijhawm uas Vajtswv xaiv yuav foom koob hmoov rau peb. Yuav tau muaj siab tos nyob rau ntawm Leej Txiv lub siab nyiam, vim Vajtswv paub yam zoo tshaj plaws tseg rau Vajtswv cov menyuam. Yog peb tsis tso tseg, ces txog caij peb yeej yuav tau sau tej koob hmoov uas npaj tseg rau peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj