Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Peb cov ntseeg Vajtswv ntau zaug hais ntau txog txoj kev ntseeg thiab tej kablig kevcai hauv  txoj kev ntseeg ua rau peb hnov qab lawm hais tias lub ntsiab lus ntawm txojmoo zoo tiag yog ci qhov kaj uas yog txojsia mus rau cov tib neeg uas yuam kev thiab puas tshuaj. Lub caij ua koob tsheej Yexus los yug no rov qab ntuas kom peb nco txog tes haujlwm no thiab txhawb txhua tus vam khom Vajtswv txoj kev hlub ua kom tiav cov lus samhwm no. 

Hnub no, yog hnub 04/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Michael Plemmons dhau ntawm zaj kawm QHOV KAJ NTAWM TXOJ SIA

Rau qhov Vajtswv hlub neeg ntiajteb kawg li, Nws thiaj txib Nws tib Leeg Tub los rau hauv ntiajteb. Tus uas ntseeg Nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis. Qhov uas Vajtswv txib Nws Leej Tub los rau hauv ntiajteb no tsis yog los txiav txim rau neeg ntiajteb tiamsis yog los cawm neeg ntiajteb kom lawv dim lawv lub txim. (Yauhas 3:16-17)

Yog li ib xyoo twb yuav dhau mus lawm tiag. Tsis tau muaj ib zaum twg uas kuv yuav hnov tej xov xwm tsis zoo li tamsim no. Cov tib neeg Maya lawv hais tias lub ntiajteb no yuav puas tshuaj mus. Cov tib neeg sab kev ua lag luam lawv txhawj tias yuav muaj ib txoj kev puas tshuaj txog kev ua lag luam thoob plaws lub ntiajteb no. Cov kws tshuaj los lawv txhawj tias tsis paub txog thaum twg thiab kab mob mam xaus. Tej cim nthuav qhia txog kev puas tshuaj yooj yim ntsia pom nyob rau ib ncig ntawm peb tamsim no. 

Kuv kuj ntseeg tias peb tab tom ua neej nyob rau tej hnub uas tab tom ceeb toom vim kev txhawj ntshai yeej tseem tsis tau muaj ib zaum twg uas yuav ntshai thoob ntiajteb teb li no. Tiamsis nco qab ntsoov tias peb nyob rau hauv Vajtswv Pawg Ntseeg, thiab Vajtswv nqua hu kom peb yuav tau txo hwjchim, ua siab mos siab muag nrhiav Vajtswv lub sijhawm zoo li no. 

Vajtswv Pawg Ntseeg thiab tag nrho lub ntiajteb tamsim no tab tom nyob rau lub sijhawm uas tseem ceeb tshajplaws. Tej teeb meem tab tom tshwm sim no nthuav qhia rau peb pom tias cov thawj coj tswj lub tebchaws no mus txog rau lwm lub tebchaws lawv yeej nrhiav tsis tau lo lus teb li. Lub sijhawm no, thaum uas coob tug tab tom ua lub neej txhawj, thiab ntshai, puas yuav muaj leej twg uas peb ntseeg siab tau thiab vam khom rau lossis tsis muaj? 

Ob txhiab xyoos dhau los, tau muaj ib tug los rau hauv peb lub ntiajteb no nrog rau ib teg haujlwm tseem ceeb. Nws los coj txoj kev ywj pheej thiab lub neej muaj nqis los rau tib neeg. Thaum Nws muaj peb caug xyoo, Nws pib nqes tes ua Nws tes haujlwm. Nyob rau hauv peb xyoo txuas ntxiv ntawd, Tswv Yexus tau siv Nws tej lus hais thiab tes haujlwm ua los nthuav qhia txoj kev hlub thiab kev tshua rau txhua tus, coj txoj kev hloov pauv loj los rau lub ntiajteb. 

Tes haujlwm uas Tswv Yexus ua coj txoj kev cia siab los rau tsheej txhiab txhiab tus tib neeg. Nws muab Nws txhais tes tso rau saum tej tib neeg muaj mob, tej tib neeg raug ua saib tsis taus thiab pub txoj sia tshiab rau lawv. Thiab thaum kawg, Nws mloog thiab ua raws li Vajtswv lub homphiaj, npaj siab hlo muab Nws txoj sia los tuag theej tib neeg, cawm cov tib neeg uas lawv tab tom ua neej nrog txoj kev ua qhev hauv qhov tsaus ntuj, nyob rau txhua tiam. 

Qhov uas zoo kawg nkaus yog Tswv Yexus twb sawv hauv qhov tuag rov qab los lawm. Thiab nyob rau ob txhiab xyoo dhau los, Nws lub siab yeej tseem nyob li qub. Nws yeej tseem caw txhua tus uas tab tom muaj kev tu siab nyob rau hauv lub ntiajteb no. Caw cov neeg uas tab tom mus nrhiav qhov tseeb, Nws hais tias Nws yog kiag qhov tseeb. Nws kuj hais tias Nws yog txoj kev coj mus txais tau txojsia thiab Nws tib leeg xwb thiaj yuav yog tus pub rau txoj sia tshiab rau leej twg uas ntseeg Nws. 

Ntau zaug peb cov ntseeg mus raws li txoj kev ib txwm mus thiab hnov qab Tswv Yexus lub luag haujlwm tseeb tiag kuj yooj yim xwb. Peb tab tom ua haujlwm rau ib tug Vajtswv thiab tus cawm seej muaj txoj sia nyob ib txhis. Tswv Yexus Khetos Pawg Ntseeg tau hu kom yuav tau puv npo txoj kev hlub thiab kev hlub tshua rau leej twg uas tab tom muaj kev iab siab, txomnyem nyob ib ncig peb. Peb yuav tau tsa peb ob txhais tes dawbhuv kom siab, tsis yog tsuas tseg rau txoj kev qhuas Vajtswv, Pehawm tiamsis tseem yog txhais tes ntawm txoj sia thiab qhov kaj kom xyab mus txog rau lub ntiajteb uas tab tom muaj kev tu siab thiab puas tshuaj ntawd. 

Peb yuav tsum tau muaj Vajtswv lub siab hlub tshua ntawd. Nws txoj lus yeej ib txwm tsis tau hloov thiab tag nrho txhua tus uas xav nrog Nws mus yuav tau muab lwm tus tso ua ntej ntawm Nws tus kheej. 

Yog li, lub sijhawm no, peb tau hu los kom coj txoj kev cia siab thiab kev hlub mus rau tus uas tab tom muaj kev tu siab thiab tag kev cia siab. Tswv Yexus twb hais tias Pawg Ntseeg yog qhov kaj rau lub ntiajteb. Tsis tau muaj ib zaum twg uas qhov kaj ntawd yuav cheem tsum  heev npaum li lub sijhawm no. 

“Rau qhov Vajtswv hlub neeg ntiajteb kawg li, Nws thiaj txib Nws tib Leeg Tub los rau hauv ntiajteb. Tus uas ntseeg Nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis. Qhov uas Vajtswv txib Nws Leej Tub los rau hauv ntiajteb no tsis yog los txiav txim rau neeg ntiajteb tiamsis yog los cawm neeg ntiajteb kom lawv dim lawv lub txim.” (Yauhas 3:16-17).

Thov caw nrog kuv peb thov Vajtswv ua ke: Ua Tswv Yexus Koj tsaug vim Koj tau los rau hauv lub ntiajteb no kom nthuav qhia Vajtswv lub siab tseg rau tib neeg ntiajteb. Thov pub kom kuv nkag siab thiab hnav Koj lub siab ncav mus kom txog tej tib neeg uas lawv tab tom muaj kev tu siab thiab yuam kev ntawd. Kuv thov hauv Tswv Yexus Khetos lub npe. Amees.

Cov kwv tij txhua tus, lub caij ua koob tsheej no yog ib lub caij zoo tseg rau koj nthuav qhia txog Vajtswv nplooj siab rau cov tib neeg uas tab tom muaj kev tu siab thiab tab tom puas tshuaj nyob ib ncig koj. Kav tsij npaj kom txhij thiab thov Vajtswv pub kom koj muaj lub siab tawv tsis ua poob lub sijhawm muaj nqis no.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.