Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Teeb meem, kev txomnyem tej zaug yuav los rau raug txhua tus uas ua lub neej nyob rau tiam no. Muaj tej kev txomnyem ua rau peb pom meej meej yog tej uas peb ua peb cim civ rov raug rau peb. Txawm yog Vajtswv tso cai cia tej ntawd tshwm sim tuaj los nco qab ntsoov tias Vajtswv yeej tsis zoo siab thaum uas ntsia pom koj tiv kev txomnyem. Vajtswv xav siv txoj kev txomnyem ntawd ua kom muaj nqis rau koj. 

Hnub no, yog hnub 07/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lori Hatcher dhau ntawm zaj kawm VAJTSWV YEEJ TSIS ZOO SIAB THAUM UAS KOJ RAUG KEV TXOMNYEM

Tus TSWV yog tus muaj kev hlub thiab Nws yuav tsis tso peb tseg mus ibtxhis. Txawm yog Nws ua rau peb raug kev ntxhov siab los Nws yeej hlub peb raws li Nws txoj kev hlub uas ruaj khov. (Nkauj Quaj Ntsuag 3:31-33). 

Kuv tsis paub tias kuv tus phooj ywg thaum wb tseem kawm ntawv ua ke thaum tseem hluas tab tom yuav tuag. Ntau xyoo lawm wb tsis sib ntsib, tiamsis thaum mus dhau ntawm tsev kho kaug hniav, lub sijhawm cuag li tig rov qab hauv peb lub siab. Lena twb tau yuav album nkauj rau kuv mus txog rau 25 xyoo tom qab, kuv yeej tseem hu tej zaj nkauj nyob hauv. Wb tau koom mus pehawm Vajtswv ua ke, mus tsheb loj thoob plaws hauv nroog thiab ib leeg tham qhia ib leeg txog tej uas xav tau nyob rau lub neej tom ntej. Kuv xav kom kuv yuav muab los sau tau ua ib phau keeb kwm loj. Tshuav Lena xav caij tsheb loj mus ncig thoob plaws teb chaws Meskas ua si. 

Txawm yog koom nyob ua ke tib lub nroog los wb sib ntsib tsawg heev vim tom qab kawm ntawv tas Lena mus ua haujlwm hos kuv mus kawm ntawv qib siab. Nyob nyob kuj hnov tej phooj ywg tham txog Lena tiamsis feem ntau yog tej tsis zoo. 

“Lena mus koom kev lom zem ntau kawg”, muaj ib tug hais “txhua zaug ntsib mas pom nws nrog ib tug txiv neej txawv mus ua ke. Lena kuj hloov lawm, thaum no mas ntsia pom zeem tsis lo lawm tiag” – muaj dua ib tug hais ntxiv. 

Lawv hais yog lawm. Tus poj niam uas kuv ntsib nyob rau hauv chav tsev kho kaug hniav tsuas pom muaj ib nyuag me ntsis zoo li kuv tug phooj ywg nrog kawm ntavw ua ke puas thaum ub. Nws cov plaub hau zas liab. Ob lub plhu yav dhau los ntsia rog rog thaum no saib mas ob lub mlos tas uas rau ncov txig siab tuaj . “Saib koj mas kuv xav tsis thoob li”. Kuv hais lus noj qab nyob zoo thiab xyab tes mus puag nws xwb pwg tau ntev heev lawm tsis sis ntsib, tiamsis tsis kam qawm siv siv zog vim ntshai tsam yuav ua rau nws lub cev yuag yuag ntawd muaj kev muaj teeb mob. 

Sib tham tau ib me ntsis, wb txawm cia li sib tham hla mus rau sab ntsujplig. 

“Kuv xav rov qab kawm Vajluskub dua tiamsis tsis paub yuav pib mus li cas”, Lena tham.

“Oh, yog li ua cas wb ho tsis kawm ua ke” kuv hais. Lena thooj yim, thiab wb txiav txim txhua txhua hmo peb yuav sib ntsib thiab kawm Vajluskub ua ke nyob hauv phau 1 Petus. 

Thawj hmo uas wb pib kawm, Lena hais tias nws twb yuav tuag. Txoj kev ua neej yav dhau los coj Lena mus raug ib tug kab mob kho tsis tau. “Thaum nyuam qhuav pib kuv hnov tsis ua li cas tiamsis ntev tuaj kuv lub cev txawm cia li yuag zuj zus. Tej kws tshuaj lawv tau sim ntau txoj kev kho sib txawv tiamsis cuag li tsis zoo”, Lena hais. 

Thaum tab tom sib tham txog sab ntsujplig, tshwj xeeb yog tham txog txoj kev tuag, kuv tau nug lo lus nug uas pheej muab kuv tais rawv hauv kuv lub siab. 

“Lena, koj puas paub meej meej tias tom qab kev tuag koj yuav tau mus ntuj ceebtsheej?” 

“ws”, Lena teb sib cha, tsa nws ob lug qhov muag puv npo kua muag saib kuv. “thawj zaug uas kuv mus kuaj paub tias muaj mob, kuv tau chim rau Vajtswv. Kuv paub Vajtswv muaj cuab kav tav kom kuv zoo mob. Tiamsis tomqab ntawd kuv pom tias yog tias kuv tsis muaj mob ntshe kuv yuav ua kuv lub neej tsau tsawv hauv txoj kev txhaum, khiav deb Vajtswv. Hnov cuag li ruam kawg, tiamsis los ntawm tus mob no ho yog kuv txoj koob hmoov, pab kom kuv tig rov qab los cuag Vajtswv”. 

Nqe Vajluskub nyob hauv Nkauj Quaj Ntsuag 3:33 ua rau peb pom Vajtswv txoj kev ua siab ntev rau tej tus menyuam mus loj leeb: “Tus TSWV yeej tsis muaj pluaj siab cia peb raug kev ntxhov siab lossis kev tsimtxom.” Lo lus no nkag mus ti nkaus rau hauv peb siab ntsws tau ntuas peb tias txawm yog Vajts wv cia tej kev txomnyem ntawd los raug rau peb lub neej los. Nws yeej tsis xav thiab tsis zoo siab txog tej kev txomnyem ntawd li. Nqe 32 qhia paub tias, “Txawm yog Nws ua rau peb raug kev ntxhov siab los Nws yeej hlub peb raws li Nws txojkev hlub uas ruaj khov.” 

Lena ua neej nyob tau rau hli ntxiv tom qab uas wb rov qab sib txuas tau ua ke. Wb tau luag, tau quaj thiab tau koom kawm Vajtswv txojlus ua ke. Nws lub cev sab nqaij tawv yim hnub yim tsuag zuj zus tiamsis sab ntsujplig yim hnub yim loj hlob. Lena yeej tsis ua xyem xyav rau Vajtswv lub homphiaj loj dua txog tus mob uas nws tau raug, thiab Lena txoj kev ntseeg siab rau Vajtswv txoj kev ua siab ntev tseg rau nws yeej tsis tau muaj ib zaug yuav hloov li. Lena paub tias txawm yog sab nqaij tawv no yuav tuag mus los sab ntsujplig yeej yuav nyob mus ib txhis thiab nrog Vajtswv nyob ua ke hauv ntuj ceebtsheej zoo dua li uas tau ua neej nyob uas tsis muaj Vajtswv. 

Nrog Lena mus ua ke nyob rau hauv ntu neej kawg, ib zaug ntxiv kuv nkag siab txog Vajtswv nplooj siab. Vajtswv yeej tsis zoo siab thaum uas ntsia pom peb ris tej uas peb ua vim yus tus kheej txoj kev tsis mloog lus. Tiamsis, Vajtswv nrog peb quaj ua ke. 

Puas tau muaj zaum twg koj ntsia pom ib tug neeg lawv ua lub neej mob siab txhawj ntshai los ntawm tej kev txhaum uas lawv tus kheej tau ua lawm tau? Lossis tej zaug koj ho tab tom nyob rau hauv txoj kev sib tawm tsam zoo ib yam li ntawd nyob rau tamsim no. Cia li mus cuag Vajtswv thiab nrog Vajtswv sib tham ua ke lub sijhawm no. Cia li hais tawm thiab lees txim rau Vajtswv txog tej kev txhaum uas tau tav koj txoj kev sib raug zoo nrog Vajtswv. Cia li hais qhia rau Vajtswv txog tej kev mob siab, kev iab siab, tag kev cia siab thiab koj txoj kev txhawj ntshai. Ncaj ncees nthuav koj lub siab tawm qhia pub rau Vajtswv, vim Vajtswv paub thiab nkag siab txhua yam. Cia li tuav kiag daim thaiv hauv siab uas yog koj txoj kev ntseeg tamsim no!

Thov caw nrog kuv peb thov Vajtswv ua ke: Tus Tswv txawm yog yuav muaj yam dabtsi tshwm sim los kuv yeej yuav ntseeg Koj. Kuv ntseeg tias tej uas Koj tso cai kom tshwm sim nyob hauv kuv lub neej puav leej muaj nqis rau Kuv. Thov Koj ntxiv txoj kev ntseeg thiab kev ua siab tawv kom kuv taug txoj kev uas Koj twb npaj lawm. Kuv thov hauv Tswv Yexus Khetos lub npe. Amees.

 Cov kwv tij txhua tus Vajtswv yeej tsis zoo siab thaum uas ntsia pom koj txomnyem ris tej kev txhaum uas koj cim civ ua. Tiamsis Vajtswv tso cai rau tej ntawd tshwm sim los kom rov qab rub koj txoj kev ntseeg sawv. Yog li, cia li tshuaj koj lub neej tamsim no. Tej uas tab tom tshwmsim ntuas koj li cas txog koj txoj kev sib raug zoo nrog Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.