Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thawj zaug uas koj nyiam raug ib tug neeg twg yog thaum twg? Thaum ntawd koj hnov zoo li cas? Puas yog tom qab txoj kev zoo siab ces yog txoj kev txhawj ntshai tab tom los nyas nrhw? Qhov uas peb hnov zoo li ntawd los vim peb tsis paub peb tus kheej zoo ib yam li txoj kev uas Vajtswv tau paub peb. 

Hnub no, yog hnub 08/02/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer E. Jones dhau ntawm Zaj kawm THAUM NYIAM RAUG IB TUS

Thaum koj tseem tsis tau xeeb rau hauv koj niam plab, Kuv twb xaiv koj thiab thaum tsis tau yug koj, Kuv twb tsa koj ua tug cev Vajtswv lus rau txhua haivneeg lawm (Yelemis 1:5)

Kuv nyiam raug ib tug. Raws li luag tej laus pheej ib txwm hais “Kuv nyiam tus tub hluas no” lossis “kuv hlub tus tub no lawm”. Tiamsis tseeb tiag kuv ho nyiam raug ib tug menyuam yaus. Xwb tim, kuv txawm cia li hnov cuag li yus tig rov qab mus rau lub sijhawm tseem yog ib tug menyuam ntxhais kawm ntawv qib thib 2 (học cấp 2). 

Kuv hais tsis tawm lus li, tsuas saib ntsoov rau hauv plag tsev xwb, tus neeg ib ce xob tas. 

Tej zaug tus phooj ywg ntawd xav hais tias kuv ntxub nws vim thaum sawv ntawm nws xub ntiag kuv hais tsis tshaj 3 lo lus. Kuv tus cwjpwm uas ib txwm yooj yim hais lus rau sawv daws txawm cia li ploj lawm thiab kuv ua ib tug neeg tsi paub hais lus txaj muag nyho. 

Kuv nco kuv tau thov Vajtswv txog tus neeg uas kuv nyiam raug li no, “Oh, tus Tswv, thov Koj ua rau kom tus tub hluas ntawd nyiam kuv”. Ntawd yog cov lus taij thov tshwj xeeb tseg rau tej lub sijhawm uas kuv hnov txhawj xeeb ua xyem xyav thaum tuav tus tub hluas ntawd tes, nyob rau hauv kuv lub taub hau, kuv yeej tsis nres hais rau kuv tus kheej tias tsis txhob dhia ceev heev li koj, yuav tau ua pa tus tus xwb. 

Ua mus ua tuaj, kuv mus cuag Vajtswv los ntawm cov lus yws: “Tus Tswv, kom yog kev mas thaum nyiam raug ib tug twg lawm yuav tsum hnov zoo tshaj thiaj yog. Tiamsis vim li cas kuv yuav hnov txomnyem ua luaj li no?” 

Ces nyob rau hauv kuv lub siab txais tau Vajtswv lo lus teb tias, “vim nyob rau hauv koj qhov teeb meem yog muaj ob feem zoo siab ces muaj peb feem ua rau koj hnov poob siab”. “Vim li cas ho poob siab” – kuv cim civ xav. Kuv cim civ suav tias kuv yog ib tug neeg muaj lub siab tawv, yuav tsis ua neej nrog txoj kev tsis kaj siab ib zaug li. 

Tiamsis ntawd tsuas yog tej uas kuv xav xwb. Yim tshawb nrhiav mus kom tob rau hauv tus kheej, kuv daim duab thaum tseem yau yog ib tug menyuam yaus yim pib ntsia pom meej meej. 

Zoo ib yam nkaus li lwm tus menyuam nyob rau lub caijnyoog 13 xyoo, kuv ntshai, txaj muag. Kuv nco muaj ib zaug kuv nyiam ib tug metub nyob ua ke rau hauv Pawg Ntseeg. Tiamsis txhua zaug uas ntsia pom tus tub ntawd tab tom los rau ntawm kuv ces kuv ho maj nroos khiav tawm hauv tuam tsev mus. 

Yam uas ua rau kuv tsis muaj kev kaj siab yog pib los ntawm kuv txoj kev xav “Kuv zoo tsis txaus”. Kuv tsis paub tias koj puas muaj txoj kev xav zoo li ntawd tiamsis thaum loj tuaj, kuv nkag siab tias txoj kev xav ntawd nws tsis zoo li txoj kev uas Vajtswv ntsia pom peb. 

Vajluskub qhia rau peb paub tias peb yog tus uas Vajtswv tsim los zoo kawg nkaus Vajtswv tau xaiv puag thaum chivkeeb los lawm (raws li Efexaus 1:4). Peb yog Tswv Yexus tus nkauj nyab zoo nkauj kawg nkaus, tau tsim los ib leeg zoo tsis thooj ib leeg (raws li Ntawv Nkauj 139:14). 

Ntau zaug peb ntshai tias nyob tsam muaj leej twg thaum lawv ntsia rau hauv peb ob lub qhov muag lawv yuav pom peb tus neeg tseeb. Peb ntshai tsam tom qab tsim muaj txoj kev sib raug zoo nrog ib tug neeg twg ntawd, lawv yuav paub peb tsis ntse npaum li lawv tau pom, tsis muaj tswv yim li lawv tau xav, tsis zoo nkauj li thaum uas saib sab nraud muab tshuaj los pleev ua kom zoo nkauj. Peb siv zog siv peb lub sijhawm, nyiaj txiag los npog tej uas peb ua tsis tau. Peb hnov ntshai nrog txoj kev xav tias yuav muaj neeg paub txog peb tus kheej tiag tiag. 

Tiamsis peb tau yuam kev lawm. Vajtswv paub peb. Nyob hauv Yelemis 1:5, Vajtswv hais tias "Thaum koj tseem tsis tau xeeb rau hauv koj niam plab, Kuv twb xaiv koj thiab thaum tsis tau yug koj, Kuv twb tsa koj ua tug cev Vajtswv lus rau txhua haivneeg lawm”. Thaum uas tib neeg ntaus nqi thiab tshuaj sab nraud ces Vajtswv ntsia pom sab hauv. 

Vajtswv tsis yog paub koj xwb tiamsis Leej Txiv tseem hlub koj thiab. Vajtswv tsis muaj ib zaum twg yuav so uas tsis xav txog koj. Ntau tshaj tej ntawd, Vajtswv txoj kev hlub tseg rau koj yog txoj kev hlub loj, hla dhau txhua tus ciam txog qib uas Vajtswv muab kiag Nws Tib Leeg Tub txojsia los txhiv peb. 

Yog li, txawm yog kuv loj hlob los ntawm txoj kev txaj muag, ntshai los thaum uas nyiam raug leej twg lawm thiab nrhiav kev khiav nkaum, ces kuv pib xav txog Vajtswv yog tus Tswv ntawm lub ntuj thiab lub ntiajteb no tau hlub kuv thiab xaiv kuv ntawm tej tib neeg coob coob ntawd, coj kuv los cuag Nws. Thiab tsuas yuav npaum li no xwb txaus rau kuv ua lub neej zoo siab thiab muaj lub siab tawv lawm. Kuv muaj cuab kav ntsia ncaj qha mus rau ib tug twg tim ntsej tim muag thiab paub tias txawm yog lawv yuav xav li cas txog kuv los kuv paub tias kuv tau Vajtswv hlub kuv thiab txais yuav kuv.

Thov caw nrog kuv peb thov Vajtswv ua ke: Ua Vajtswv Koj tsaug vim Koj paub kuv meej meej thiab hlub kuv los ntawm Koj txoj kev hlub ib txhis txawm yog kuv no yeej tsis tsimnyog. Thov kom Koj txoj kev hlub pab kuv muaj lub siab tawv ua lub neej nyob rau hauv ntiajteb no, yuav tsis muaj kev txhawj, kev ntshai, lossis tsis kaj siab tiamsis muaj lub siab tawv txais yuav Koj txoj kev hlub los ntawm ua lub neej pehawm Vajtswv, ua Koj haujlwm. Kuv thov hauv Tswv Yexus Khetos lub npe. Amees.

Cov kwv tij txhua tus, lub siab ntshai, tsis muaj kev kaj siab thaum nyiam raug ib tug neeg twg ua rau koj khiav nkaum tus neeg ntawd. Ntseeg tias dhau ntawm zaj kawm hnub no, koj yuav tau Vajtswv ntuas koj txog txoj kev uas Vajtswv ntsia tuaj rau koj, paub koj thiab hlub koj, kom koj tiv dhau txoj kev tsis kaj siab ntawd nyob rau hauv koj txoj kev hlub thiab ua lub neej muaj yeej, tawg paj txi txiv rau Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.