Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej txhua hnub uas lawv tau ntsib dhau los, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas muaj zaug twg koj tag siab, rau siab ntso thov Vajtswv pab rau ib yam dabtsi twg thiab cuag li Vajtswv twb yuav teb koj lo lus thov ces koj pom tias yam koob moov ntawd cia li mus rau lwm tus kiag ntawm koj qhov muag? Hloov qhov uas npau taws, sib khib, yuav tsum paub tias Tus Tswv yeej tsi nov qab koj thiab Nws tseem npaj ua txhua yam uas koj xav tias twb tuag lawm ciaj sia tuaj.

Hnub no, yog hnub 09/04/2021, kev Thov Vajtswv Txhua Hnub thov caw nej sawv daws nrog kawm Vajstwv txojlus ua ke nrog tug qhia Jennifer E. Jones dhau zaj kawm muaj lub npe: TSIS TXHOB NTSHAI CIA LI NTSEEG XWB

Tsis txhob ntshai, cia li ntseeg xwb. Tus mentxhais yeej yuav zoo. (Luka 8:50)

Luka tshooj 8 hais zaj xwm txog tug poj niam uas muaj mob nchuav cev. Zaj no ntau tus yeej paub, tau qhia ntau rau hauv cov rooj Kawm Hnub So yog li feem coob peb txhua tus yeej paub.

Luka 8:43 sib pib txog qhov uas Tswv Yexus raug pab neeg coob coob vij nkaus.

“Muaj ib tug pojniam uas muaj mob nchuav cev tau kaum ob xyoos lawm, tsis muaj leejtwg kho tau nws tus mob zoo, nws txawm los raws Yexus qab kov Yexus qab tsho. Tamsim ntawd nws ntshav txawm tu nrho lawm.”

Tus pog kov Tswv Yexus qab tsho ib zaug xwb nws twb tau kho zoo mob lawm! Tib qhov Vajluskub no xwb twb muaj txhiab pua zaj lus qhuab qhia thiab nkauj qhuas txog Vajtswv lub hwjchim uas kho tau mob zoo. Niaj hnub no, txhua zaus uas nyeem txog zaj no, peb twb tseem xav tsi thoob txog yam uas tus pog ua thiab nws txoj kev ntseeg twb hloov tau nws lub neej mus ib txhis.

Tabsis, ntawm no kuv tsi yog hais txog tus poj niam uas mob nchuav cev. Kuv xav hais txog ib tus npe hu ua Yaila.
Rov saib dua Luka 8:41-42.

“Muaj ib tug npe hu ua Yaila, yog tus thawj uas saib xyuas lub tsev sablaj txawm tuaj khwb nkaus ntawm Yexus kotaw, thov kom Yexus mus tom nws tsev, 42rau qhov nws muaj tib tug ntxhais hnub nyoog kwvlam kaum ob xyoos, mob heev twb yuav tuag. Thaum Yexus mus, muaj neeg coob coob nrog nws mus sib txiv qev.”

Hauv zaj no, tseeb tias Yaila yog ib tus nyob sab nrau xwb. Nws tso nws lub hwjchim uas yog ib tus neeg muaj meej mom, yawg txhos caug kiag rau ntawm ib tus ua kws ntoo tug tub vim tag kev cia siab rau nws tus ntxhais yam mob.Thaum kawg, yawg twb tau tus Tswv txhua txog thiab twb yuav coj tau tus Tswv los hauv nws tsev. Tiamsis tom qab…

Tus poj niam ntawd nyob qhov twg cia li tshwm tuaj. Tswv Yexus ntseg thiab nrog pog sib tham. Nkawd ob tug sib tham tiamsis Yaila hauv siab zoo li raug hluav taws kub. Thaum Yaila tseem tog tus Tswv ces muaj ib tus tub qhe tuaj hais,

“Koj tus ntxhais twb tuag lawm. Tsis txhob tab kaum xibhwb dua li lawm.”

Tseeb tiag Yaila nyob rau hauv ib lub sijhawm cheem tsum heev. Nws tog ib zaj txujci los rau nws tsev neeg thiab twb yuav tau yam koob moov ntawd. Tiamsis, muaj lwm tus mus tav dhau, tsis yog nyiag Tswv Yexus lub sijhawm xwb, tseem kaw nkaus lub qhov rooj sijhawm rau yawg tsev neeg. 

Kuv ntseeg tias twb muaj ib zaug koj pom koj zoo li Yaila. Peb txhua tus twb sawv ua zaj tog tus Tswv koob moov tiamsis ho pom lwm tus txiav dhau thiab mus sawv tom hauv ntej. Peb pom cuag li koob moov mus dhau ntawm peb thiab Tus Tswv ces tseem muaj Nws haujlwm.

Kuv twb tau ntsib ib zaug li ntawd ob peb xyoo ntej ntawd. Thaum ntawd kuv twb thov Vajtswv, yoo mov, thov Vajtswv pab kom kuv nrhiav tau tus hlub tiag, thov kom tau ib tus txiv paub ntshai Vajtswv thiab hlub kuv.

Tom qab ntau lub hli uas kuv tos, kuv lub neej tseem zoo li qub tiamsis kuv cov phoojywg nrog kuv nyob ua ke lawv nyias mus yuav nyias txiv tag. Kuv yeej nov qab tsi tau kuv lub siab to ntsho thaum uas kuv pom tus no tag tus tom mus ntsib tau lawv tug tav hauv lawv siab thiab lawv mus nyob rau lwm qhov lawm.

Kuv tsis paub Yaila xav li cas tiamsis kuv mas xav yws rau tus Tswv heev, “Aub tus Tswv kuv zoo siab nrog kuv cov phoojywg tiamsis li no mas tsis ncaj ncees li. Kuv twb nyob ntawm no thov Koj thiab tos ntev lawm. Puas yog Koj twb nov qab kuv lawm?”

Hmoov zoo rau peb txhua tus vim Tus Tswv paub peb lub siab. Txawm Nws ntseg thiab foom koob moov rau lwm tus, los Nws tsis nov qab Yaila.

Thaum nov tej lus uas tus tub qhe hais, Tswv Yexus tig los hais rau Yaila,

“Tsis txhob ntshai, cia li ntseeg xwb. Tus mentxhais yeej yuav zoo.” (Luka 8:50) 

Kuv ntseeg tias ntawd kuj yog tej yam uas Tus Tswv xav hais rau peb thaum peb ntsib tej yam zoo li Yaila, ntawm kuv tus kheej, “Tsis txhob ntshai”.

Thaum uas peb xav tias yug twb tso dhau lub sijhawm, peb ntshai, quaj losis ywg npau taws. Tiamsis ntawd tsi yog yam uas thaum twg twb zoo cheem tsum.

Tswv Yexus hais, “Tsis txhob ntshai, cia li ntseeg xwb koj yeej yuav tau yam uas koj thov.”

Thaum kawg Tswv Yexus kuj tuaj txog hauv Yaila tsev. Muaj ntau lub suab quaj, Tus Tswv tseem ua tau lub siab tug.

“Tsis txhob quaj. Nws tsis tuag, nws tsaug zog xwb.” (Luka 8:52).

Kuv nyiam lo lus ntawd. Tseem muaj yam dabtsi zoo dua li thaum paub tias yus txoj kev npau suav tsuas tsaug zog xwb tsi yog tuag lawm zoo li yus kev xav. Tswv Yexus hais ib lo xwb, yam ntawd cia li ciaj sia tuaj.

Kuv tsi paub koj tabtom ntsib yam dabtsi hnub no, tiamsis muaj qee zaug peb txhua tus yeej pom yus tabtom zoo li Yaila. Txawm koj pom tias cuag li koj raug tsi quav ntsej losis raug muab tso tseg, kuv txhawb koj tsis txhob tso tseg.

Tus Tswv paub tag nrho txhua yam, thiab Nws pom tag txhua yam. Nws pom koj kev txom nyem thiab paub tias koj ntxhov siab li cas thaum uas tseem tos. Tabsis, Nws tseem tab tom taug kev tuaj ntawm koj tsev thiab ua kom txhua yam uas koj xav tias twb tuag lawm ciaj sia tuaj.

“Tsis txhob ntshai, cia li ntseeg”

Thov caw peb sawv daws nrog thov Vajtswv: Vajtswv, kuv ntseeg tias Koj tsis nov qab kuv. Kuv ntseeg tias koj tseem npaj ua tej yam haujlwm loj hauv kuv lub neej yog li kuv yuav tsis ntshai. Thov kom koj lub hwjchim tau qhia tawm dhau ntawm kuv lub neej. Ntawm Tswv Yexus Khetos lub npe kuv thov. Amen!

Cov kwv tij sawv daws, thaum uas pom txhua tus uas nyob ib ncig ntawm yus txais tau Vajtswv koob moov, tsis txhob ntshai, txhob poob siab, cia li ua ib siab ntseeg Tus Tswv thiab thov Vajtswv ntxiv mus txhob tso tseg. Nco ntsoov tias Vajstwv yuav tsi nov qab koj yog li koj txhob tag kev cia siab losis sib thaub los ntawm kev thov Vajtswv.

Nyob zoo sawv daws, thov kom ib hnub tshiab txhua tus tau txais koob moov zoo thiab mam sib ntsib rau tagkig.
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev txhawj xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawv rau tug email: [email protected]. Tswv Yexus hlub koj thiab peb xav kom txuas tau nrog koj.