Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Peb ua neej nyob nrog zej zog thiab yeej muab neeg saib ntsoov peb. Ua li luag yuav ntsia pom yam dabtsi dhau ntawm peb lub neej ua qauv txhua hnub? Lawv puas ntsia pom Vajtswv ua haujlwm, pom muaj ib lub neej hwm Vajtswv lossis tsis pom? 

Hnub no, yog hnub 10/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Messecar dhau ntawm Zaj kawm POM MEEJ LOS NTAWM TEJ QAUV

Nimno peb paubhais tias muaj tus TSWV nrog nraim koj nyob, thiab peb xav hais tias tsimnyog peb yuav tsum  tau los sib hais kom haum thiab cog lus rau koj. Peb xav kom koj cog lus rau peb (Chivkeeb 26:28)

“Tus neeg uas xav kom lwm tus qhuas nws, nws lam tau lam hais. Tiamsis tus uas xav ua kom luag qhuas tus uas txib nws los, nws yeej hais lus tseeb xwb, nws tsis hais dag (Yauhas 7:18).

Anpimelej thiab Ixaj nkawd yog ob tug thawj ntawm ob pab tib neeg. Muaj ib hnub, lawv sib sau los ua ke sib tham txog txoj kev sib txeeb cov qhov dej, yog yam uas muaj nqis thiab cheem tsum heev nyob rau lub teb chaws ntawd. Thaum Anpimelej  tuaj cuag Ixaj kom nkawd sib cog lus ua ke kom muaj kev ywj pheej, Anpimelej pawg tau hais rau Ixaj zoo li no: “Nimno peb paubhais tias muaj tus TSWV nrog nraim koj nyob, thiab peb xav hais tias tsimnyog peb yuav tsum  tau los sib hais kom haum thiab cog lus rau koj. Peb xav kom koj cog lus rau peb” (Chivkeeb 26:28). 

Anpimelej thiab cov neeg pab yawg ua haujlwm tau ntsia pom Vajtswv foom koob hmoov rau Ixaj ntau npaum li cas, ib tug poj niam, ob tug tub ntxaib, coob tug tub mab tub qhe, tsiaj txhu thiab ntau yam heev. 

Anpimelej cov lus ua rau kuv nco txog kuv ib tug phooj ywg kuj yog tus uas tawm tswv yim rau kuv ntau xyoo dhau los. Pog yog ib tug poj ntsuam plaub hau twb dawb lawm. Thaum nyuam qhuav sib yuav, kuv thiab kuv tus txiv thawj zaug ntsib pog yog thaum uas tab tom nrhiav ib lub tuam tsev pehawm Vajtswv. Pog dhau los ua kuv tus phooj ywg, thiab pog tus qauv ua haujlwm zoo tau pab rau kuv ntau heev. Muaj  ob zaj kawm tseem ceeb uas kuv kawm tau hauv lub neej dhau ntawm pog tus qauv. 

Thaum pog tham qhia rau pab niam tsev txog lub sijhawm thaum nws tus txiv tuag, peb coob tug niam tsev hluas pom meej meej tias Vajtswv nrog pog nyob ua ke. Thaum uas pog nkawd ob niam txiv tab tom mus ua si nyob rau ntawm Hawaii ces yawg txawm cia li tuag twjywm thaum pw tsaug zaug. Ua ntej uas tsa suab hu txhua tus, pog tau txhos caug rau ntawm ib cag lub txaj pw thiab ua Vajtswv tsaug rau nkawd lub neej txij nkawm. Nyob deb qub zej qub zos thiab tej neeg txheeb ze, pog thov Vajtswv ua ntej nws mam li mus nrhiav lwm tus kev txhawb zog. 

Qhov zoo thib ob txog pog lub siab tau muab fij rau Vajtswv yog cov lus uas pog tau siv los taij thov Vajtswv nyob rau lub sijhawm noj mov tav su tseg rau cov niam tsev. Nyob hauv pog cov lus taij thov kuv pom pog nthuav qhia Nws txoj kev ntseeg li no: “Tus Tswv, kuv lees rau Koj hais tias kuv ntseeg Yexus yog tus cawm seej, Vajtswv Leej Tub”. Tej haujlwm tshiab yog cov lus nthuav tawm txoj kev ntseeg ntuas kuv nco txog lub siab hwm Yexus Khetos dhau ntawm tej lus hais thiab peb tes haujlwm ua tib si. 

Cov lus uas Anpimelej hais rau Ixaj, “Peb pom meej meej” kuj ua rau kuv xav txog tej neeg tshaj tawm xov xwm txog lub ntuj kev ntshav ntuj thiab los nag. Thaum kuv cov menyuam nyob hauv tsev ua tib zoo saib pom lawv niam tsis zoo siab, ces qhov ntawd txhais tau tias lawv paub ua ntej tias muaj ib yam dab tsi tsis zoo lawm tamsim ntawd lawv tshaj xov qhia rau kom sib paub ceev faj nrhiav qhov chaw nkaum kom tsis raug cua daj cua dub. Yog ib tug ntseeg Tswv Yexus peb yuav tau hloov thaum uas pom muaj yam tsis zoo tshwm sim. Thaum muaj tej tauv fuab dub ntawm tej kev chim, sib ceg tab tom sau los ua ke, peb yuav tau paub thiab hloov. Cia peb tsev neeg nyob rau ntawm qhov chaw dav thiab puv npo tshav kub,yog thaj chaw uas cov neeg saib lawv ntsia pom tias peb yog cov neeg uas mloog Vaj Ntsujplig lus. 

Thaum hnub nyoog laus zuj zus raws lub caij nyoog, kuv cim civ nug tias cov neeg ib ncig thiab tsev neeg lawv tab tom ntsia pom dab tsi nyob rau hauv kuv lub neej. Lawv puas ntsia pom kuv qhuas Vajtswv? Kuv tej phooj ywg lawv puas npaj tos tau mloog tej zaj xwm txheej txog Vajtswv tau ua haujlwm nyob rau hauv kuv lub neej? Lossis lawv tsuas hnov tej lus nroo thiab yws xwb?

Thov caw nrog kuv peb thov Vajtswv ua ke: Tus Tswv thov pab kom kuv ua lub neej hwm Koj, kom tej neeg ib ncig ntsia pom meej meej tias Koj tab tom nyob thiab ua haujlwm hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, tej neeg ib ncig lawv ntsia pom koj lub neej zoo li cas? Lawv puas ntsia pom koj tsis yog tsuas ntseeg Vajtswv xwb tiamsis tseem ua lub neej nrog txoj kev ntseeg ntawd dhau ntawm koj tej lus hais, koj kev ua haujlwm txhua hnub? Cia li thov Vajtswv pab thiab cog lus ua lub neej hwm Nws txhua lub sijhawm.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.