Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Nyob hauv lub ntiajteb no muaj tib neeg coob heev tiamsis ib tug yeej zoo tsis thooj ib tug. Txhua txhia tus tau Vajtswv tsim los zoo kawg nkaus thiab puav leej muaj nqis ntawm Vajtswv xub ntiag. Vajtswv muaj homphiaj thiab muaj kev npaj zoo tseg rau txhua txhia tus lub neej. Txawm yog peb tsis nkag siab txog tag nrho txhua yam tshwmsim nyob rau hauv lub neej no los peb paub tias Vajtswv tab tom siv peb lub neej kom ua tiav Vajtswv lub homphiaj uas zoo kawg nkaus. 

Hnub no, yog hnub 10/07/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Emmanuel de la Fuente Monforte dhau ntawm Zaj kawm TUS  KAV KOJ LUB NEEJ

“rau qhov Vajtswv yog tus uas niaj hnub ua haujlwm hauv nej lub siab kom nej xav ua Vajtswv tes haujlwm, thiab ua tau raws li Vajtswv lub siab nyiam”. (Filipis 2:13). 

Puas tau muaj zaum twg koj nug txog Vajtswv lub homphiaj thiab Vajtswv txoj kev npaj tseg rau koj lub neej yog tus dabtsi? 

Thaum hais txog cov neeg ua Vajtswv haujlwm nyob rau hauv Vajluskub, kuv xav txog kuv tus kheej thiab cim civ nug tias Vajtswv lub homphiaj npaj tseg rau kuv lub neej yog dabtsi. Vajtswv txojlus ua rau kuv nco txog Koj, txog Vajtswv lub tshwjchim ci ntsa iab, txog Vajtswv lub homphiaj zoo thiab Vajtswv lub siab nyiam tau ua nyob rau hauv peb lub neej. 

Thaum rov qab nyeem phau Vajluskub Tshiab ces Paulus lub neej ua tau ib tug qauv zoo heev pub rau kuv. Vajtswv siv Paulus lub neej zoo ib yam li tej cuab yeej nyob rau hauv Vajtswv txhais tes kom txhua haiv neeg nyob rau hauv txhua lub tebchaws puav leej paub txog Tswv Yexus lub npe. Vajtswv tau hloov pauv yawg lub neej thiab yawg tau ua raws li Vajtswv lub siab nyiam nyob rau hauv yawg lub neej. 

Thaum uas nyeem tshooj 27 thiab 28 ntawm phau ntawv Tes Haujlwm ces peb pom tias Vajtswv siv qhov xwm txheej uas nkoj tog los ua kom tiav Vajtswv lub homphiaj nyob rau hauv Paulus lub neej. Txawm yog yuav ntsib cua daj cua dub thiab nkoj tog los Vajtswv yeej tuav rawv yawg txojsia thiab tag nrho cov neeg uas nyob rau saum nkoj. Thaum kawg yawg thiab tag nrho cov qhua thiaj mus txog rau ntawm koog pov txwv tsis raug li cas. Txawm yog raug nab tom los yawg tsis tuag vim Vajtswv lub homphiaj tseem ua tsis tau tiav nyob rau hauv yawg lub neej. Paulus qhia txog Tswv Yexus lub npe rau sawv daws thaum taug kev ntawm koog pov txwv Malatas mus rau tim nroog Loos. Thaum mus txog tej thaj chaw no, Paulus tau qhia txog Tswv Yexus lub npe pub rau cov neeg uas tsis tau paub txog Vajtswv. Vajtswv tau ua Vajtswv lub homphiaj kom tiav dhau ntawm Paulus lub neej thiab cov neeg uas tau hnov Txojmoo Zoo dhau ntawm yawg. 

Paulus mus rau tim lub nroog Loos qhia Txojmoo Zoo rau cov neeg Yudais nyob hauv. Tseeb tiag, Vajtswv ua tiav Vajtswv lub homphiaj nyob rau hauv yawg lub neej dhau ntawm tej yam uas Paulus ua. Paulus siv tag nrho txhua lub sijhawm los sau ntawv rau cov ntseeg nyob hauv txhua lub Pawg Ntseeg uas Paulus tau tsim muaj. Paulus qhia txog tej lus taw kev, lus txhawb zog kom cov ntseeg txhua qhov ua lub neej ntseeg Vajtswv. 

Dhau ntawm tej haujlwm uas Paulus ua, Paulus lees yuav tias nws yog tus neeg qaug zog cia Vajtswv ua tej haujlwm lwm loj nyob rau hauv yawg lub neej. Tshuav peb, Vajtswv kuj xav kom peb muab peb lub neej fij cia rau Vajtswv siv raws li Vajtswv lub siab nyiam. Vajtswv pub rau peb muaj haujlwm ua thiab muaj zoo caijnyoog ua haujlwm pab lwm tus thiab ua Vajtswv dejnum. Yog li, peb ua txhua yam kom Vajtswv tau koob meej. 

Vajtswv xav kom peb nthuav tawm lub siab nco Vajtswv tshav ntuj thiab muab peb lub neej fij ua Nws haujlwm. Peb yuav tau muab peb lub neej fij ua Vajtswv haujlwm thiab ntseeg tias Vajtswv yuav ua yam uas zoo nyob rau hauv peb lub neej. Peb yuav tau xyaum raws li Paulus tus qauv nyob rau hauv txoj kev uas muab lub neej fij ua Vajtswv haujlwm thiab ua raws li yam uas Vajtswv nyiam. Paulus tsuas xav ua raws li Vajtswv txojlus xwb thiab yawg sau cia nyob rau hauv Vajluskub tias: “Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus.” (Loos 12:2). 

Peb paub thiab nkag siab tias Vajtswv ua raws li Vajtswv lub siab nyiam nyob rau hauv peb lub neej. Paulus tau hais txog qhov no nyob rau hauv phau ntawv Filipis tshooj 2 nqe 13: “rau qhov Vajtswv yog tus uas niaj hnub ua haujlwm hauv nej lub siab kom nej xav ua Vajtswv tes haujlwm, thiab ua tau raws li Vajtswv lub siab nyiam”. 

Vim li no peb thiaj yuav tau npaj kom txhij thiab mloog Vajtswv lus thiab hais rau Vajtswv tias: “Muaj kuv nyob ntawm no thov Koj txib kuv” (Yaxayas 6:8). Peb thov kom Vajtswv siv peb lub neej thiab ua raws li Vajtswv lub siab nyiam nyob rau hauv peb lub neej. 

Peb muaj cuab kav thov Vajtswv ua raws li Vajtswv lub siab nyiam nyob rau hauv peb lub neej kom ua rau Vajtswv tau koob meej. Thov Vajtswv pab kom peb tuav ruaj txoj kev ntseeg ntawd ib yam li Paulus hais nyob hauv 2 Timautes 4:7 tias: “Kuv twb siv zog khiav kawg kuv lub zog lawm, kuv twb khiav mus txog qhov kawg lawm. Kuv muab siab npuab Vajtswv”. 

Thov caw nrog kuv peb thov Vajtswv ua ke

Vajtswv tus uas muaj hwjchim loj, peb ua koj tsaug vim Koj tau tsim peb los thiab pub rau peb tau ua raws li Koj tej menyuam. Thov pab kom peb paub txog Koj lub homphiaj thiab Koj txoj kev npaj tseg rau peb lub neej. Thov Vajtswv Koj siv peb ua yam khoom muaj nqis nyob rau hauv Koj txhais tes kom ua tiav tes haujlwm uas koj tau muab pub rau peb nyob hauv lub ntiajteb no. Peb thov hauv Tswv Yexus Khetos lub npe. Amees.
Cov kwv tij txhua tus, ua Vajtswv tsaug vim Koj tau siv cov tib neeg qaug zog zoo li peb los ua tej haujlwm loj nyob rau hauv Vajtswv lub tsev. Yuav tau npaj kom txhij thiab mloog Vajtswv lus los teb Vajtswv tej lus txib. Thov pab kom peb ncaj ncees rau txhua tes haujlwm uas koj tau muab cob rau peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj