Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Cog qoob loo yog ib lub caijnyoog poob sijhawm, cheem tsum ntau lub sijhawm thiab poob dag zog, txij li thaum pib ncaws av mus txog rau thaum sau los. Tus neeg ua teb yuav tau ua siab ntev tos kom txais tau tej kob nag los ywg tej qoob loo, thiaj yuav tuaj taus kaus thiab tawg paj txi txiv dhau los ua cov khoom muaj nqis. Ib yam li ntawd, Vajtswv cov menyuam kuj yuav tau mloog lus thiab txais yuav Vajtswv kev tshwm ntsej muag, kom Vajtswv hloov pauv peb ntawm thaj chaw qhuav qhawv dhau los zoo mos nyoos thiab muaj nqis pub rau Vajtswv lub tsev. 

Hnub no, yog hnub 10/11/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ken Barnes dhau ntawm Zaj kawm TEJ KHOOM MUAJ NQIS HAUV NTIAJTEB

“Cov kwvtij, nej yuav tsum ua siab ntev tos hnub uas peb tus Tswv Yexus los. Nej sim saib tus neeg uas ua liaj ua teb saib, nws ua siab ntev li cas tos lub caij cog qoobloo. Nws ua siab ntev tos nag ntuj tshiab thiab nag ntuj tsaug” (Yakaunpaus 5:7).

Kuv tsis yog ib tug neeg ua liaj ua teb, kuj tsis yog yug los ntawm ib tsev neeg ua liaj ua teb. Tiamsis kuv twb tau saj tej txiv ntoo uas tseem tsis tau siav thiab noj tej txiv uas tseem mos mos – tag nrho ob yam no puav leej iab thiab tawv kawg. Ntawd yog tej uas Yakaunpaus tau hais txog thaum tos tej khoom muaj nqis hauv daim av; “tej khoom” uas Yakaunpaus hais txog ntawm no tsis yog tej txiv hmab txiv ntoo, tiamsis yog hais txog tib neeg. 

“Cov kwvtij, nej yuav tsum ua siab ntev tos hnub uas peb tus Tswv Yexus los. Nej sim saib tus neeg uas ua liaj ua teb saib, nws ua siab ntev li cas tos lub caij cog qoobloo. Nws ua siab ntev tos nag ntuj tshiab thiab nag ntuj tsaug” (Yakaunpaus 5:7). 

Kob nag ntuj tshiab ua rau kom cov noob tuaj kaus. Tej noob zoo mas feem ntau tawv heev thiab cheem tsum nqus ib co dej ntau heev. Ib yam li ntawd. Thaum Tswv Yexus los, tib neeg kuj muaj lub siab tawv heev, yuav tau hloov pauv kom thiaj yuav muaj lub siab mos siab muag. 

Tom qab tuaj kaus, cov noob ntawd yuav tau ywg dej kom txaus thiaj yuav loj hlob zoo. Kuj raws li txoj kev no, cov neeg uas qhib siab ntseeg Tswv Yexus yog tus Cawm Seej hauv Nws lub neej ces yuav loj hlob ntxiv. Kob nag ntuj tsaug ces yog Vajtswv txoj kev tshwm ntsej muag. 

“Cov neeg hauv Xi-oos, cia li zoo siab; zoo siab rau tej uas tus Tswv uas yog nej tus Vajtswv twb pab nej lawm. Nws tso nag los kom txaus rau lub caij ntuj nag;  nws tso nag ntuj tsaug thiab nag ntuj tshiab los rau nej ib yam li yav thaum ub” (Yau-ees 2:23). 

Yog li, Vajtswv txhawb peb zog kom yuav tau ua siab ntev thiab saj Vajtswv txoj kev tshwm ntsej muag zoo kawg nkaus, vim Vajtswv yog tus ncaj ncees yuav pub yam ntawd rau peb. 

Zaum kawg uas koj hnov zoo siab nyob rau hauv Vajtswv kev tshwm ntsej muag yog thaum twg? Tej zaug nyuam qhuav tsis ntev no, tiamsis tej zaug kuj ntev heev lawm, ib yam li zaum kawg uas koj da dej nag thaum tseem yau. Vajtswv yog tus ncaj ncees yuav tso nag los, kuj ib yam li Vajtswv kev tshwm ntsej muag, txhua lub sijhawm. Tsis zoo li tus pejxeem yuav tau saib xov xwm tshaj xo txog txoj kev yuav los nag thiab thov kom kob nag los ywg tej qoob loo. Koj thiab kuv wb tsuas yog thov Vajtswv xwb. 

“Tus Tswv, txhua tus uas paub koj, lawv yeej cia siab rau koj; koj yeej tsis muab ib tug twg uas los cuag koj tso tseg li.” (Ntawv Nkauj 9:10). 

“Txawm yog tsov ntxhuav los tseem tshaib plab thiab tu pluas tsis muaj noj, tiamsis cov neeg uas hwm tus Tswv yuav muaj txhua yam zoo uas lawv xav tau” (Ntawv Nkauj 34:10). 

Vajtswv tus uas muaj kev hlub tso cai rau peb nrhiav Vajtswv txoj kev tshwm ntsej muag. Yog li, Vajtswv kuj yuav maj nroos teb. Qhov teeb meem ces yog peb tib neeg tsis yog thaum twg twb paub tcoj kev txais yuav. Piv txwv, muaj ib tug neeg qhuav qhawv sab ntsujplig ces ntseeg tias nws yuav cheem tsum kob nag ntawm sab ntsujplig heev, tiamsis nws yeej tsis tau ywg li. Vim li cas? Tsis yog vim Vajtswv tsis teb lawv tej lus thov; tiamsis lawv yuav tau ua raws li txoj kev sib cog lus ces lawv thiaj yuav tau txais. Thiab yam xub thawj yog: Muab lub kaus kaw cia!

Kev txhaum thiab kev tsis zam txim zoo li lub kaus nraim nag. Ntawm no yog qhov teeb meem ua rau nkag siab yuam kev ntau heev nyob rau hauv cov ntseeg. Thaum muaj kev tu siab, lawv nrhiav Vajtswv kom tau txais kev kho zoo thiab hloov dua tshiab, tiamsis lawv ho tsis pom tias qhov uas lawv nyob twj ywm tiv thaiv tus kheej li ntawd ho yog yam uas yuav tav tej uas lawv nrhiav ntag. Coob tug xav hais tias zam txim yog ib txojkev xav, tiamsis tsis yog li ntawd. Hauv Vajluskub, zam txim yog ib txoj kev xaiv. Lossis hais kom yog dua mas, zam txim yog ib tes haujlwm nyob txij ntawm txhua tus lub siab nyiam. Tsis muaj leej twg “xav” zam txim li. Ntawm no yog tib neeg txoj kev tiv thaiv ib txwm muaj – qhib lub kaus tiv thaiv yus lub siab. Tiamsis thaum uas zam txim rau cov neeg uas ua txhaum rau yus, vim Tswv Yexus hais kom peb ua li ntawd, ces lub kaus yuav kaw thiab Vajtswv kob nag kho zoo yuav los, ua rau kom nqawm txhua lub qhov txhab nyob rau hauv peb lub siab. 

Tsis mloog lus yog ib txoj kev tav ntxiv yuav tav Vajtswv kev tshwm ntsej muag. Yuav ua li cas kom Vajtswv thiaj yuav muab txoj kev taw kev zaum ob los, thaum uas koj pheej nrhiav kev zam lossis tsis ua raws txoj kev taw ib? Vajtswv tsis muab Nws kob nag khaws cia – peb txoj kev tawm tsam thiab kev khav theeb thiaj yog qhov uas ua rau peb raug qhuav qhawv. 

“Yog nej mloog kuv Ius, nej yuav tau noj txhua yam zoo uas cog hauv lub tebchaws no” (Yaxayas 1:19)

Peb yuav hais tau hais tias: “Yog zoo siab hlo mloog lus koj yuav txais tau kob nag ntuj tsaug los ywg ua rau tej av rog tuaj”. Tiamsis nco qab ntsoov tias peb yuav tau muaj tag nrho ob yam: Npaj siab thiab mloog lus! Menyuam mloog niam txiv tej lus qhia yog ib yam, tiamsis qhov uas lawv puas zoo siab hlo ua li ntawd, lossis ua nrog tus cwjpwm tsis txaus siab, ho yog lwm yam ntxiv!

Vajtswv zoo li tus pej xeem ua liaj ua teb muaj tag nrho txoj cai, Vajtswv saib xyuas tej qoob loo hauv ntiajteb, pub kob nag ntuj tshiab thiab nag ntuj tsaug, coj txoj kev cia siab yuav tau sau qoob loo ntau rau tib neeg. Tiamsis Vajtswv kuj hu kom peb yuav tau cim civ saib xyuas peb lub neej. 

“Kuv hais tias, 'Nej cia li mus laij dua daim teb tshiab rau nej cog kev ncaj ncees thiab sau tej koob hmoov uas kuv muab rau txhua tus uas muab siab npuab kuv. Twb txog lub sijhawm uas nej los cuag kuv uas yog nej tus Tswv lawm, kuv yuav los thiab nchuav koob hmoov rau nej.” (Hauxeyas 10:12).

Thov caw nrog kuv peb thov Vajtswv ua ke

Tus Tswv thov Koj pab kom kuv kaw txhua lub kaus uas tab tom tav kom kuv txais tsis tau Koj txoj koob hmoov. Thov Vajtswv Koj tshem txhua txoj kev iab siab, siab tawv hauv kuv mus, kom kuv muaj lub siab mos muag thiab npaj txhij mloog lus, kom thaum kawg kuv dhau los ua cov khoom uas muaj nqis nyob hauv av tau Vajtswv Koj txhais tes saib xyuas. Kuv thov hauv Tswv Yexus Khetos lub npe. Amees.

Cov kwv tij, koj thiab kuv yog cov khoom uas muaj nqis nyob rau hauv ntiajteb. Ntseeg tias peb yuav zoo siab hlo mloog lus, muaj lub siab tawv mus raws li Vajtswv ua tus coj kev, kom tsis muaj lub sijhawm twg kuv yuav ua poob teev nag uas yog Koj kev tshwm ntsej muag los. kom peb dhau los ua cov khoom qab fij pub rau Leej Txiv Koj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.