Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Lub neej no yeej puv npo tej yam ua rau peb xav tsis thoob thiab ntau zaug tej ntawd yog tej yam uas tsis muaj leej twg xav ntsib. Ua li peb yuav ua li cas thaum uas peb muaj ib txoj kev tu siab los raug kiag, piv li koj ib tug txheeb ze uas koj hlub tau tag sim neej lawm?

Hnub no, yog hnub 11/08/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marilyn Nutter dhau zaj kawm THAUM MUAJ KEV TU SIAB LOS RAUG

Tus TSWV yuav tsis tso Nws haiv neeg tseg; Nws yuav tsis ncaim Nws cov neeg hlo li. (Ntawv Nkauj 94:14)

Lub suab ncia quaj tu siab nyho nyob rau ntawm lub chav tos neeg uas nyob rau hauv tsev kho mob . Lo lus thov ua twj ywm raug tu ncua tab kaum vim tej suab xov tooj luag hu tuaj thiab tej xov luag xa tuaj, nrog tej lus txhawb zog thiab cov lus nug moo. Kwv yees li ib teev tomqab, peb tug kws tshuaj tawm tuaj ua ntsej muag chim heev qhia tawm tej yam uas lawv yuav hais tom qab yog yam uas tsis muaj leej twg xav mloog, “thov txim, peb twb siv tag tug dag zog peev xwm lawm”. Kuv tus ntxhais ob txhais ko taw pib ntshee, thiab kuv tus vauv yuav tau pab tuav nws kom thiaj tsis ntog hauv pem teb. Tagnrho peb txhua tus puav leej xav tsis thoob thiab txhawj heev.

Tom qab uas peb tsev neeg rov muaj lub siab tiaj tus lawd, peb mam qhia txog kuv tus txiv rau tej phooj ywg thiab neeg txheeb ze. Xa Email, sau ntawv hauv xov tooj, thiab sau tso rau saum fuab cua tau xa rau txhua qhov. Muaj ib tug phooj ywg tau xa rau kuv ib nqe Vajluskub nyob hauv Ntawv Nkauj 94:19, “Thaum kuv ntxhov siab thiab ua ywjfab ywjfwj, Koj nplig kuv lub siab kom kuv rov muaj kev zoo siab.”

Tus neeg txheeb ze uas yus hlub tau tso peb tseg ua rau peb nyuaj siab thiab txhawj xeeb. Yog tias txoj kev tuag los thaum peb npaj tsis txhij ces cov neeg muaj sia ua neej nyob yim ntshai dua thiab. Kua muag poob nthav, xav yij fab yij fwj. Thaum no yog thaum yuav tau txiav txim siab rau ntau yam tseem ceeb tiamsis nyob rau hauv peb lub taub hau thaum no puav leej yog cov lus nug xwb tsis yog cov lus teb li. Thiab thaj chaw khoob lug nyob hauv peb lub siab uas tus neeg peb hlub tau tseg cia ntawd yim hnub yim loj tuaj tsis muaj ib yam dabtsi yuav los ntxiv tau rau kom puv. Yog li nyob rau lub sijhawm zoo li ntawd, nqe Vajluskub uas tus phooj ywg xa tuaj muaj nqis heev rau peb.

Ib tsev neeg uas tab tom muaj kev tu siab ces peb yuav tau txhawb zog li cas? Maj mam npuaj xwb pwg, sib qawm, tham txog tej caijnyoog zoo uas yus muaj nrog tus neeg tau tag simneej, cov lus thov Vajtswv pab ntxiv zog. Tiamsis Vajtswv txoj kev txhawb zog tsis yog tas li no xwb tiamsis tseem hla mus rau ib txoj kev tshiab ntxiv: lo lus cog tseg tab pov tias Nws yuav tshwm ntsej muag txhua lub sijhawm, txog Nws txoj kev hlub puv npo thiab lub zog kom peb tiv taus dhau tej yam uas peb xav tsis txog.

Tej yam uas peb xav tsis thoob thiab tej kev tu siab ua rau peb hnov nyiaj tsis taus thiab pom nyob ntsuag nog, tiamsis Vajtswv txojlus nyob hauv Ntawv Nkauj 94:14 ntuas peb tias:

“Tus TSWV yuav tsis tso Nws haiv neeg tseg; Nws yuav tsis ncaim Nws cov neeg hlo li.”

Thaum ntsib ib txoj xov phem uas peb yuav hloov tsis tau lawm, peb yuav tau pheeb rau Vajtswvyog Tus uas tshwm ntsej muag nyob ruaj khov. Vajtswv yeej tsis tau ncaim Nws cov neeg mus li. Thaum peb yuav ntog tus sau Ntawv Nkauj hais qhia rau peb paub nyob hauv nqe 18:

“Kuv hais tias, “Kuv ntog lawm lauj”; tiamsis Tus TSWV, Koj txojkev hlub uas tsis paub kawg pab kuv sawv rov los.”

Txoj kev txhawb zog ntawd tsis paub yuav tham li cas li.

Tiamsis nyob hauv nqe Vajluskub uas kuv tus phooj ywg xa tuaj kuj hais txog kev zoo siab. Kev zoo siab lov? Yuav ua li cas zoo siab tau thaum tabtom ntsib tej kev nyuaj siab thiab tej kev sib ncaim tu siab?

Kev zoo siab ntawm tej kev txhawb zog muaj los ntawm ntau yam sib txawv. Thaum peb rov nco txog thiab tham txog lub sijhawm tshwm sim uas peb npaj tsis txhij, kuv paub tias Vajtswv yeej nyob ntawd nrog peb ua ke; Nws txoj kev hlub loj thiab txoj kev tshua uas tsis muaj nrim nyob nrog peb ua ke. Ntawd yog Vajtswv tej lus cog tseg:

“Kuv pom zoo hlub koj ces txaus lawm. Kuv yuav pub Kuv lub hwjchim rau tus uas qaug zog.” Vajtswv hais li no, yog li ntawd qhov uas kuv qaug zog ua rau kuv zoo siab kawg li, rau qhov Yexus Khetos lub hwjchim yuav tsomkwm kuv.” (2 Kauleethaus 12:9).

Vajtswv txojkev hlub pub dag zog rau kuv rau qhov kuv yeej tsis muaj zog sawv rau txhua taig kis sawv ntxov thiab tawm tsam txhua hnub.

Yog koj muaj kev tu siab, cia li nrhiav Vajtswv txojkev txhawb zog. Cia Vajtswv ua tus nyob puv npo hauv koj lub siab uas tabtom khoob lug. Muab koj tej kev tu siab cob rau Vajtswv kom Nws txoj kev hlub uas tsis muaj hnub tag vij nkaus koj thiab nplij koj lub siab. Nws ntsia pom peb txhua lub kua muag thiab Nws xyab tes tuaj pab los ntawm lub siab mos siab muag.

“Koj yeej paub kuv raug kev txomnyem npaum li cas, Koj yeej teev kuv tej kua muag tseg huv tibsi lawm. Kuv tej kua muag Koj puas tau muab sau tseg rau hauv Koj phau ntawv?” (Ntawv Nkauj 56:8).

Nyob rau tej thiv txuas ntxiv, thaum tej yam uas kuv tshua txog, tej kua muag thiab tej kev txhawj xeeb pib ntau zuj zus tuaj thaum uas kuv yuav rov tau ntsib ib “yam tshiab” uas tus kheej tsis muaj cai xaiv, Vajtswv txoj kev txhawb zog thiab kev hlub yog lub pob zeb ruaj khov rau kuv vam khom thiab pheeb rau.

“Tiamsis tus TSWV tiv thaiv kuv; kuv tus Vajtswv tsomkwm kuv.” (Ntawv Nkauj 94:22).

Thov caw nrog kuv peb thov Vajtswv ua ke: Ua Vajtswv Koj tsaug vim Koj cog lus rau kuv tias Koj yuav tsis tso kuv tseg ib zaug li thiab yuav tsa kuv sawv thaum kuv ntog. Thaum kuv ntsib tej kev tu siab, thaum tej yam kuv hlub tau poob mus lawd, thov Koj tshwm ntsej tshwm muag thiab thov Koj txoj kev hlub tiv thaiv kuv, ntxiv zog rau kuv kom kuv thiaj yuav tawm tsam yeej txhua hnub. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug nyob rau lub sijhawm dhau los koj tau ntsib ntau yam koj tau poob mus lawm ntau heev thaum uas koj tus phooj ywg tau ncaim mus deb. Cia siab tias dhau ntawm Vajtswv txojlus hnub no yuav coj tau kev txhawb zog los rau koj, txhaws puv koj lub siab uas tabtom khoob lug thiab nplhw kom koj tej kev mob siab loog mus zuj zus. Tib txoj kev uas pab tau kom koj sawv taus thiab mus ntxiv rau tom ntej yog vam khom Vajtswv txoj kev hlub txhua hnub.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.