Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Tej lub sijhawm uas  muaj ntau qhov teeb meem cia li tshwm sim tib txhij ua ke ua rau koj hnov lub neej no tsis muaj kev ncaj ncees, nyhav tshaj koj lub zog yuav tiv taus, thiab thaum ntawd koj nug tias “Vajtswv nyob qhov twg? Vim li cas Vajtswv ho tsis tshwm ntsej muag thiab cawm kuv?” Tiamsis peb tau hu los kom ntseeg siab rau Vajtswv, ua siab ntev tos Vajtswv lo lus teb uas zoo tshaj, vim Vajtswv yeej yuav pab peb xwb. 

Hnub no, yog hnub 12/10/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm  VAJTSWV NYOB QHOV TWG?

“Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoobloo tsis tuaj, txawm yog tej yaj tuag tas thiab tej nkuaj nyug khoob lug cia xwb los kuv tseem muaj kev zoo siab thiab txaus siab, vim muaj tus Tswv uas yog Vajtswv ua kuv tus Cawmseej.” (Hanpakus 3:17-18)

Mob siab tshaj plaws thaum uas kuv ntsib tim ntsej tim muag ntsia pom kuv tij laug raug yuam kom tawm Pawg Ntseeg, yawm yij los poob haujlwm, kuv tus txiv los yuav raug phua yog li thiaj muab cov nyiaj uas khaws cia siv tas nrho lawm, ntoo ho vau los tais tsev, thiab kuv niam tau kws tshuaj tshuaj pom tias mob ung thư nraum tawv nqaij. Tag nrho tej teeb meem no tshwmsim kiag los ua ntej uas yuav txog koob tsheej Yexus yug. Vajtswv nyob qhov twg ntawm tej teeb meem no? 

Kuv tus tijlaug nkawd ib niam txiv ua Xibhwb rau ib lub Pawg Ntseeg nyob rau Ohio. Lawv yeej tsis q paub ua ntej tias nkawd raug thawj coj Pawg Ntseeg yuam kom yuav tau tawm mus. Nkawd tsuas muaj 30 hnub los cob tej haujlwm rov rau Pawg Ntseeg thiab nrhiav dua ib txoj haujlwm tshiab, ib qhov chaw nyob tshiab. Koob tsheej tab tom los ze zuj zus thiab thaum no nkawd siv cov nyiaj tsawg tsawg ntawd coj los tshem nkawd tej khoom thiab yuav noj hnub dhau hnub, txog rau thaum kuv tus tijlaug nws nrhiav tau lwm txoj haujlwm. Muaj ntau lo lus nug thiab ntau txoj kev mob siab… Vajtswv koj nyob qhov twg? 

Kuv tus yawm yij yog ib tug siv zog tas siab ua Vajtswv haujlwm. Nws yog ib tug Xibhwb, tsim tsa Pawg Ntseeg tshiab, thiab kuj ua Vajtswv haujlwm nrog ib qhov haujlwm pab lwm tus xibhwb nyob rau hauv cheeb tsam. Ib sab ntawd yawg kuj yog ib leej txiv – muaj ob tug menyuam. Yawg tseem npaj yuav ua ib rooj tshoob zoo rau nws tus menyuam hlob. Thaum no yawg ho raug yuam kom so haujlwm thiab tej nyiaj yuav siv yim hnub yim ntau tuaj… Vajtswv nws nyob qhov twg? 

Zaum no yog zaum peb uas kuv tus txiv raug phais, tag nrho tsev neeg cov nyiaj uas khaws cia thiaj raug muab coj los siv tas nrho lawm, thiab peb yuav tau txais nyiaj coj los siv pab rau tej kev cheem tsum txhua hnub. Teeb meem tseem loj tshaj thaum uas tsob ntoo nyob nraum tshav puam cia li vau los tais tsev tom qab muaj ib nthwv cua ntsawj tuaj. Tshuav ob peb thiv thiab xwb ces txog koob tsheej Yexus yug, thiab thaum no peb nyuam qhuav pib rov muaj me ntsis xwb. Tej nyiaj uas yuav siv los kho tsev yeej tsis yog tsawg li. Vajtswv nyob qhov twg? 

Kuv niam tab tom ntsib ib txoj kev phais txaus ntshai  tshaj plaws kom kho tau nws tus mob ung thư nraum ntawv nqaij nyob ntawm lub plhu. Lawv yuav phua ua ntej 4 hnub uas yuav txog lub Koob tsheej Yexus yug. Vajtswv nyob qhov twg? 

Thaum no koj yeej nkag siab hais tias teeb meem zoo li cas lawm ntag ov. Peb tsev neeg tab tom raug sim siab mus rau qib uas nyuaj tshaj plaws. Tsuas tshuav kuv tus niam laus tib leeg lawm xwb thiaj tsis ntsib teeb meem, ua Vajtswv tsaug txog qhov no. 

Peb cheem tsum lo lus teb, tiamsis xav kom ntau tshaj qhov no thiab, peb cheem tsum kev pab! Vajtswv nyob qhov twg? Kuv thov kom Vajtswv teb kuv thiab Vajtswv coj kuv mus rau ntawm Hanpakus 2:2-3: 

“Tus Tswv teb li no rau kuv: "Koj cia li muab zaj uas kuv qhia rau koj hauv nruab npau suav, sau kom meej rau ntawm tej txiag zeb kom tus neeg uas khiav ceev los thiaj nyeem tau. Koj cia li muab tej lus no sau tseg cia, rau qhov tej xwm uas kuv qhia rau koj no tseem tsis tau txog caij tshwm los. Tiamsis lub sijhawm ntawd yuav los txog sai sai, thiab tej uas kuv qhia rau koj yuav tshwm raws li ntawd. Yuav pom tej ntawd majmam tshwm los, tiamsis koj ua siab ntev tos; tej ntawd yuav muaj los tiag thiab yuav tsis ncua sijhawm ntxiv li lawm”.  Thiab nqe 4 sau ntxiv tias: “tiamsis cov neeg uas ncaj ncees yuav muaj sia nyob, rau qhov lawv muab siab npuab Vajtswv.” 

Ntseeg tias Vajtswv tab tom pub ib lub zeem muag rau kuv tsev neeg. Peb yeej ntsia tsis pom qhov zeem muag no kiag tamsim ntawd. Yuav ua li cas Vajtswv thiaj yuav tshem tas nrho tej kev txhov siab thiab kev sib tawm tsam no mus? Tom qab ntawd, Hanpakus 3:17-18 coj lo lus teb los rau kuv: 

“Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoobloo tsis tuaj, txawm yog tej yaj tuag tas thiab tej nkuaj nyug khoob lug cia xwb los kuv tseem muaj kev zoo siab thiab txaus siab, vim muaj tus Tswv uas yog Vajtswv ua kuv tus Cawmseej.” 

Peb txoj kev ntseeg tab tom raug kev sim siab. Tiamsis Vajtswv kuj ua tib zoo qhia kuv paub tias Vajtswv yeej tsis hnov qab peb. Peb tsev neeg tsis nyob ib leeg. Yog peb tuav rawv tej zeem muag uas Vajtswv muab tso rau hauv peb lub siab: ntseeg Nws thiab zoo siab nyob hauv Nws, ces lo lus teb yuav los. 

“Tus Tswv uas kav ib puas tsav yam pub rau kuv muaj zog. Nws ua rau kuv ob txhais kotaw mus kev nplaum ib yam li tus sai, thiab nws tsomkwm kuv kaj siab lug saum tej laj roob” (Hanpakus 3:19) 

Txawm yog thaum uas kuv sau tej lus no los, kuv txoj kev ntseeg kuj tau txhawb zog. Peb yuav muaj yeej ntawm peb tej teeb meem. Peb yog lub taub hau tsis yog qhov xaus. Vajtswv tuaj peb tog, yog li leej twg thiaj yuav tawm tsam tau peb? 

Yog li Vajtswv nyob qhov twg? Qhov deb ntawm Vajtswv thiab koj tsuas yog ib lo lus thov Vajtswv xwb. Kav tsij sim saib!

Thov caw nrog kuv peb thov Vajtswv ua ke

Tus Tswv es, thov Koj zam txim pub rau kuv txhua zaum uas kuv tsis muaj kev ntseeg thaum raug kev sim siab, muab los ua lub siab ceev dhau lawm tsis tos Koj lo lus teb. Thov Vajtswv Koj pab kom kuv ua tau lub siab ntev thiab ntseeg siab rau Koj, txawm yog lub caijnyoog yuav tsis zoo los txog thaum kawg kuv yeej yuav txais tau koob hmoov ntau npaug tshaj tej uas Koj tau cog lus yuav pub. Kuv thov hauv Tswv Yexus Khetos lub npe. Amees.

Cov kwv tij uas hlub thiab tshua, thaum teeb meem tshwm puas ncig ua rau koj tsis paub ua cas, cia li ruaj siab thiab ua siab ntev tos Leej Txiv lo lus teb. Vajtswv yuav tsis muaj hnub tso Koj tseg thaum muaj tej kev sim siab ntawd tshwm sim hauv koj lub neej. Vajtswv tuaj koj tog, thiab Vajtswv cog lus yuav pub rau Vajtswv cov  menyuam tej koob hmoov uas peb xav tsis txog thaum uas koj paub cia siab rau ntawm Nws.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj