Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Yuav ua li cas kom peb thiaj txais tau Vajtswv txoj kev hlub? Nco ntsoov tias Vajtswv saib peb raws li Vajtswv tus tshim ntsuas. Vajtswv hlub peb tsis yog vim peb txoj kev siv zog tiamsis vim Vajtswv txoj kev hlub loj kawg nkaus xwb. Nyob hauv Vajtswv lub qhov muag, koj yuav txais tau txoj kev ncaj ncees vim koj ntseeg Tswv Yexus cov ntshav uas muaj nqis. Vajtswv hlub thiab zam txim rau tus neeg uas los cuag Vajtswv los ntawm txoj kev ntseeg tseeb.

Hnub no, yog hnub 13/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Larry Cox, Jr. dhau ntawm Zaj kawm KEV HLUB THIAB KEV ZAM TXIM.

Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus” (I Yauhas 1:9).

Vajluskub sau ntau txog vajntxwv Daviv vim yawg lub neej yuav tau ua qauv tseg rau ntau tus. Txawm yog yawg hlub Vajtswv tag siab, pehawm Vajtswv los yawg yeej tseem poob kev txhaum. Ntawm no yog zaj kawm tseg rau peb txhua tus thaum hais txog Daviv lub neej.

Thaum ntawd Daviv tseem ua neej nyob rau tiam txoj kevcai tswj tsis yog tiam kev hlub li no. Ua ntej yawg ua txhaum kev nkauj nraug nrog Npexenpas ces yawg yog tus ntaus yeej ntau ntsus kev tsov rog uas muaj Vajtswv ua tus pab yawg.

Tsis tas li ntawd, Daviv tseem yog vajntxwv thiab, yog ib tug thawj ntawm ib lub tebchaws, yog tus kav tag nrho ib lub tebchaws thiab yog tus thawj tub rog. Yawg tuav ntau lub meej mom tseem ceeb heev. Dhau ntawd, yawg tseem tau ntau tus hwm. Muaj ntau tus nyho hau ntawm yawg xub ntiag. Tsis tas li ntawd xwb yawg tseem muaj lub cev ntaj ntsug zoo nraug. Yawg muaj txhua yam uas zoo tshaj plaws.

Ua ntej uas Npexenpas tshwm los nyob ntawm tshooj 11-12 nyob hauv 2 Xamuyees ces Daviv tseem nrhiav kev foom koob hmoov rau Yanathas caj ces vim Yaunathas tau cawm yawg. Vajntxwv Daviv nrhiav tau Yaunathas tus tub hu ua Mefinpauses, nws ob txhais ceg sav lawm yog li vajntxwv thiaj hlub tshua txog. Raws li 2 Xamuyees 9, peb pom vajntxwv lub siab ua pub rau Yaunathas caj ces. Tsis tas li ntawd xwb Daviv tseem muaj lub siab txo hwjchim yog li thiaj tsis kom Mefinpauses kim caug ntawm yawg xub ntiag. Daviv nws saib taus txoj kev ua phooj ywg ua ke nrog Yaunathas yog li Daviv thiaj ua zoo rau Yaunathas caj ces zoo li tsev neeg sib txheeb.

Sijhawm dhau mus txog rau lub caij ntuj tshiab yog lub caij uas tej vajntxwv lawv pheej tawm mus ua rog. Vajntxwv Daviv txib Yau-am nrog nws tej tub txib thiab tag nrho cov neeg Yixalayees tawm mus ua rog. Thaum ntawd vajntxwv Daviv nyob hauv lub nroog Yeluxalees. Muaj ib hnub thaum tav su, nws sawv saum nws lub txaj nce mus rau saum ru tsev qhov uas tiaj tiaj Daviv ncig mus ncig los saud, nws pom ib tug pojniam tabtom da dej hauv tus pojniam ntawd lub tsev. Tus pojniam ntawd zoo nkauj heev. Yog li ntawd, Daviv thiaj txib neeg mus ntes pog tuaj, thaum pog tuaj txog, vajntxwv nrog pog pw ua ke. Tas pog rov qab mus tsev.

Tomqab pog muaj menyuam. Ib tug neeg ua lub neej haum Vajtswv siab zoo li vajntxwv Daviv tau ua rau ib tug pojniam twb muaj txiv lawm muaj menyuam. Yog vajntxwv nyob rau tiam niaj hnub nim no ces tej zaug yawg yuav raug cov ntseeg Vajtswv tso tseg txawm yog yawg yuav mloog Vajtswv lus npaum li cas.

Tomqab uas txhua yam tshwm tuaj, vajntxwv thiaj txib neeg mus hu Ulis uas yog Npexenpas tus txiv tom tshav rog los ntsib nws. Vajntxwv kom Ulis nyob hauv nroog Yeluxalees thiab caw yawg noj hmo, hnub tom qab, kom Yau-am muab yawg tso rau tom hauv ntej thaj chaw ntaus rog uas phomsij tshaj plaws, tas tso tes khiav cia yeebncuab tua Ulis pov tseg. Kom npog tau nws qhov kev txhaum Daviv thiaj tau muab pog Npexenpas tus txiv tua pov tseg. Daviv tsis yog ua txhaum kev nkauj nraug xwb tiamsis tseem tua neeg thiab.

Tomqab Npexenpas lub ntees dhau mus ces Daviv tos pog los thiab yuav pog ua pojniam. Daviv tau raws li nws siab ntshaw.

Txawm yog ua txhaum npaum li ntawd, los Vajtswv yeej tseem hlub yawg thiab zam txim rau yawg thaum yawg tso kev txhaum tseg.

Nyob rau lub sijhawm ntev loo, thaum nyeem zaj xwm txheej no kuv tsuas suav tias yog ib zaj xwm txheej tsis muaj dabtsi tseem ceeb vim nws tsis muaj nqis rau kuv. Tiamsis thaum no kuv pom tias qhov xwm txheej no nws muaj nqis rau kuv heev. Txawm yog Daviv ua txhaum los Vajtswv yeej tseem hlub thiab zam txim rau yawg.

Vajtswv yog tus uas tau hlub peb yog li peb thiaj tsis tas yuav nrhiav txhua txoj kev los pab kom txais tau Vajtswv txoj kev hlub. Txawm yog kuv yuav pw tas hnub saum txaj saib tivi los Vajtswv yeej tsis hloov pauv Vajtswv txoj kev ntsia pom kuv. Txawm yog kuv muaj tus cwjpwm phem los Vajtswv yeej tseem hlub kuv thiab hloov pauv kuv txhua hnub kom dhau los zoo li Vajtswv. Txawm yog kuv yog ib tug neeg ua ntau txoj kev txhaum los Vajtswv yeej txais yuav kuv.

Nco ntsoov tias Vajtswv saib ntsoov koj raws li Vajtswv tus tshim ntsuas. Nyob hauv Vajtswv lub qhov muag koj tau Vajtswv suav tias ncaj ncees vim koj ntseeg Tswv Yexus cov ntshav uas muaj nqis. Twb yog qhov tseeb no ua rau peb ntseeg tias Vajtswv yog tus hlub peb thiab peb tau nyob hauv nws mus ib txhis thaum peb rhau cag hauv Nws.

Hais li no tsis tau muaj lub ntsiab tias peb pheej ua txhaum, ua lub neej nrog txoj kev txhaum vim Vajtswv kuj yuav hlub peb xwb. Qhov uas kuv xav hais ntawm no yog tias txawm yog peb yuav siv zog npaum cas los peb kuj yuav daws tsis tau qhov teeb meem ntawm tej kev txhaum. Vajtswv txais yuav peb vim peb txoj kev ntseeg tso rau ntawm Tswv Yexus tsis yog vim peb zoo. Thiab pub rau cov neeg uas ntseeg Vajtswv tag siab tag ntsws: “Peb tsis txhob ua li ntawd! Peb twb tuag rau txojkev txhaum lawm, peb tseem yuav ua kev txhaum ntxiv dua thiab los?” (Loos 6:2).

Thov caw nrog kuv peb thov Vajtswv ua ke
Kuv ua koj tsaug Vajtswv vim koj yog tus uas hlub kuv los ntawm txoj kev hlub ib txhis thiab tsis yuav ib yam dabtsi. Ua Vajtswv tsaug txawm yog kuv yog ib tug neeg yuav zoo li cas los koj yeej txais yuav kuv thaum kuv lees txim thiab tig rov qab los rau ntawm koj. Thov kom Vajtswv koj tej lus coj kuv kev hauv txhua txoj kev xav, tes haujlwm ua thiab lo lus hais kom ua lub neej haum koj siab. Kuv thov hauv Tswv Yexus Khetos lub npe. Amees.

Cov kwv tij txhua tus, los ntawm Tswv Yexus txoj kev hlub peb tej kev txhaum thiaj tau muab npog cia thiab tau suav tias ncaj ncees ntawm Vajtswv xub ntiag. Vajtswv zam txim rau tej kev txhaum uas peb tau ua thaum peb lees tiag tiag ntawm Vajtswv xub ntiag. Yog li txhob cia kev txhaum yav dhau los tav koj los cuag Vajtswv. Tiamsis cia li qhib siab los txais yuav txoj kev cawmdim uas Vajtswv pub rau dawb peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj