Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tej teeb meem thiab kev simsiab tshwmsim los rau hauv peb lub neej yog zaj yuav tseg los tshuaj peb txoj kev ntseeg saib nyob rau qib twg. Txoj kev uas peb ntsib kev sim siab yuav nthuav tawm rau sawv daws paub tias peb puas yog Vajtswv tus menyuam tiag. Vim thaum uas peb paub tias peb yog leej twg, paub Vajtswv yog leej twg, ces qhov ntawd yuav txiav txim siab txoj kev uas peb yuav ntsib. Koj yuav teb li cas thaum tus Tswv nug, “Nyob ntawm koj, Kuv yog leejtwg?”

Hnub no, yog hnub 17/11/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm NYOB NTAWM NEJ KUV YOG LEEJTWG?

“Yexus nug lawv hais tias, "Nej ne, nej ho hais tias kuv yog leejtwg? " Ximoos Petus teb hais tias, "Koj yog tus Mexiyas uas yog Vajtswv tus uas muaj sia nyob tus Tub” (Mathais 16:15-16)

Niaj hnub nim no, peb tab tom ua neej nyob rau lub caij uas mus txog qhov twg peb puav leej hnov hais txog kev tsov rog lossis tej xov xwm hais txog kev tsov rog. Xyoo 2022 nyob rau Châu u muaj tsheej triệu tus tib neeg nyob tebchaws Ukraine khiav kev tsov rog vim kev ua rog tab tom tshwmsim nyhav heev. Nyob rau lub sijhawm muaj kev puas tsuaj zoo li no qhov tseem ceeb peb yuav tsum tau paub tias peb yog leej twg, peb txoj kev ntseeg yog dabtsi thiab peb tau tsim los ua tus dabtsi.
Nyob hauv Malakaus 14 hais txog qhov uas cov thwjtim lawv tau ntsib thaum lawv ntsia pom Tswv Yexus, uas yog tus Mexiyas, Vajtswv tus tub raug tua tuag thiab muab ntsia saum Ntoo Khaub Lig.

Feem qhib thawj ntawm tshooj no yog (nqe 1-9) sau txog lub sijhawm uas Tswv Yexus nyob hauv lub zos Npethanis, hauv Ximoos uas yog tus neeg mob ruas lub tsev. Thaum Tswv Yexus tab tom zaum ntawm rooj noj mov muaj ib tug pojniam nws nqa nws hwjtshuaj tsw qab kim nyiaj heev tuaj. Nws muab hliv rau saum Tswv Yexus lub taub hau. Pog muab yam uas muaj nqis tshaj plaws uas pog muaj pub rau Vajtswv. Pog tsis quav ntsej txog tej lus thuam, tej lus hais tsis zoo nyob rau lub ntiajteb thaum ntawd thaum uas pog muab tshuaj tsw qab hliv rau Tswv Yexus. Pog xav nthuav tawm pog lub siab hwm Vajtswv, nco Vajtswv tshav ntuj thiab pog txoj kev hlub rau Vajtswv.

Feem nruab nrab ntawm nqe (43-50) hais txog lub sijhawm Tswv Yexus nyob hauv lub vaj Khexemanes thiab Tswv Yexus cov thwjtim kuj nyob ntawd. Tswv Yexus coj Petus, Yakaunpaus thiab Yauhas nrog Tswv Yexus mus thov Vajtswv. Tom qab peb zaug Tswv Yexus thov kom Vajtswv tshem lub khob txomnyem tawm mus ces Tswv Yexus los cuag cov thwjtim thiab hais rau lawv tias tus uas ntxeev siab rau Tswv Yexus twb los lawm. Tus ntawd yog Yudas Ixakali-us. Ua ntej ntawd yawg muag Tswv Yexus los ntawm peb caug lub nyiaj. Vim qhov muaj nqis ntawm yawg xub ntiag, yawg txaus siab hlo muab yawg tus xibhwb muag ua nyiaj thiab ntxeev siab rau Tswv Yexus los ntawm nwj Tswv Yexus ib pas. Yudas Ixakali-us nrog Tswv Yexus mus, sib tham, ua tib zoo mloog Tswv Yexus qhia, thov Vajtswv, nrog Tswv Yexus noj mov ua ke thiab mus txhua qhov. Txawm yog yawg ntsia pom Tswv Yexus ua ntau qhov txujci, pub mov rau tsheej txhiab tus noj tsau npo, ua rau hiav txwv tiaj tus yees, tsa neeg tuag sawv rov qab los, los yawg yeej tsis ntseeg tias Neeg Leej Tub tab tom nyob ntawm yawg ib sab. Vim lub siab hlob yawg txaus siab muab Tswv Yexus muag txawm yog twb nrog Tswv Yexus mus ua ke peb xyoo. Tomqab Tswv Yexus raug ntes ces yawg tsis lees txim tiamsis ho mus dai dab tuag lawm. Ntawm no yog ib zaj xwm txheej txaus nyuaj siab.

Thaum kawg, feem kawg ntawm tshooj no (nqe 66-72) ua rau peb pom txog lub sijhawm Petus nyob nraum cov pov thawj hlob lub tshav puam thiab nrog lawv zaum nte taws. Yawg nyob deb deb saib Tswv Yexus vim ntshai ib tsam muaj neeg paub yawg yog tus nrog Tswv Yexus mus. Ua ntej ntawd Petus yeej hais khov kho tias txawm yog lawv tso Tswv Yexus tseg los yawg yuav tsis tso. Tsis tas li xwb, ua ntej ntawd yawg tseem lees hais tias Tswv Yexus yog tus Mexiyas, Vajtswv tus tub uas muaj sia nyob (Mathais 16:16). Vajtswv yog tus uas qhia rau Petus paub tias Tswv Yexus yog Yexus Khetos. Tiamsis nyob ntawm tus pov thawj hlob lub tshav puam. Thaum tab tom zaum nte taws, xwb tim tus pov thawj hlob ib tug ntxhais qhev saib ntsoov rau Petus thiab hais tias nws nrog Yexus Khetos nyob ua ke. Yawg tsis kam lees: “kuv tsis paub, thiab kuj tsis nkag siab yam uas koj tab tom hais yog tus dabtsi”. Yawg tsis lees Tswv Yexus ob zaug ntxiv. Thaum hnov qaib qua zaum ob, ces yawg nco dheev txog Tswv Yexus tej lus yawg thiaj quaj tu siab heev.

Thaum Tswv Yexus sawv hauv qhov tuag rov qab los, Tswv Yexus nug Petus peb zaug tias yawg puas hlub Tswv Yexus, tomqab yawg teb tias hlub ces Tswv Yexus hais kom Petus tu yawg pab yaj. Tswv Yexus twb zam yawg tej kev txhaum thiab nrog yawg nyob hauv tej dejnum uas Vajtswv muab cob rau yawg.

Peb txhua tus ib leeg nyias yeej muaj nyias ib ntsus kev tsov rog tsis sib thooj txawm yog koj yuav ntsib dab tsi los yuav tau vam khom Vajtswv pab kom koj tiv dhau tej kev qaug zog, kev ntshai thiab tuav yus txoj kev ntseeg kom ruaj. Yuav tau lees paub tias Vajtswv yog tus Vajtswv uas muaj hwjchim, Nws yog tus Tswv ntawm txhua tus tswv, tus Vajntxwv ntawm txhua tus vajntxwv, yog tus pub txojsia ib txhis. Koj puas paub “Nws” thiab koj paub Tswv Yexus zoo li cas

Thov caw nrog kuv peb thov Vajtswv ua ke

Tswv Yexus tus uas kuv hlub, yog tus cawm kuv los ntawm Tswv Yexus cov ntshav nyob saum Ntoo Khaub Lig, ua Koj tsaug rau txhua yam uas koj tau ua pub rau kuv. Kuv nkag siab hais tias lub neej no puv npo teeb meem, thiab kuv yuav tau txiav txim siab rau kuv txoj kev ntseeg nyob rau tej teeb meem ntawd. Thov Vajtswv pab kom kuv paub vam khom Vajtswv, hlub koj thiab ncaj ncees rau koj nyob hauv txhua lub caijnyoog. Kuv thov hauv Tswv Yexus Khetos lub npe. Amees.

Cov kwv tij txhua tus, peb yuav tsum tau nthuav tawm hais tias peb yog Tswv Yexus tug tsis yog tsuas dhau los ntawm peb tej lus hais xwb tiamsis tseem dhau los ntawm txoj kev uas peb ntsib tej teeb meem nyob rau hauv lub neej no thiab. Nyob rau lub sijhawm ntsib teeb meem, thaum uas ntsib tej haujlwm yuav tau tso yam muaj nqis ntawm tus kheej tseg thaum nthuav tawm txoj kev ntseeg, thov Vajtswv ntxiv zog pub rau koj kom koj ruaj khov, tuav txoj kev ntseeg kom ruaj txhob yoj yees, kom tej neeg ib ncig lawv paub tias Vajtswv yog tus Tswv nyob hauv koj lub neej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj