Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Peb yuav nov khwv thiab mob taub hau tshaj plaws thaum ua neej tshuav nuj nqi ntau txij taub hau, tshwj xeeb yog thaum tej nuj nqi ntawd txog sijhawm pauj thiab tus neeg muab rau koj qiv yuav tuaj xauj koj tsev. Vajtswv txojlus taw rau peb qee txoj kev kom peb daws tau teeb meem thiab khiav dhau tsis raug txais nuj nqis thiab tseem tau lub neej muaj txaus siv. 

Hnub no, yog hnub 17/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sharon Norris Elliott dhau ntawm zaj kawm YUAV UA LI CAS RAU TEJ NUJ NQIS NTAU NTAWD?

Muaj ib tug pojntsuam uas nws tug txiv yog ib tug cev Vajtswv lus tuaj cuag Elisas thiab hais tias, “Tus tswv, kuv tus txiv tuag lawm. Koj yeej paub hais tias nws hwm Vajtswv heev, tiamsis tus uas peb tshuav nqi yuav tuaj coj kuv ob tug tub mus ua nws qhev. (2 Vajntxwv 4:1)

Feem Vajluskub hauv 2 Vajntxwv 4:1-7 tham txog ib zaj xwm txheej phim rau coob tug hauv peb cov no thaum uas tab tom ua lub neej nyob rau ntu kev ua lag luam khwv heev rau tamsim no. Ib tug poj ntsuam tab tom ua lub neej nrog tej nuj nqi ntau. Nws nthuav nws tej teeb meem qhia rau tus cev lus Elisas thiab tus cevlus thiaj nug pog tias “Thov qhia rau kuv paub seb, hauv koj lub tsev puas tseem tshuav yam dabtsi?” tag nrho tej uas tus pog no muaj tamsim no yog tshuav ib mentsis roj ntim rau hauv lub hub me. Tus cevlus Elisas hais rau pog: “Koj mus qiv tej neeg zejzog tej hub uas khoom ntau lub los, tsis txhob qiv lub puav xwb, ces koj thiab koj ob tug tub cia li mus rau hauv tsev, kaw qhovrooj rau thiab hliv roj rau hauv cov hub ntawd txhua lub. Thaum lub hub twg puv lawm muab txawb rau ib cag”. (nqe 3-4). Tomqab uas ua lawv li tej uas tus cevlus qhia, nws rov mus cuag tus cev lus Elisas . Elisas hais rau nws hais tias, “Koj rov mus tsev, muab cov roj ntawd muag, muab cov nyiaj ntawd them nej tej nuj nqi, thiab cov uas seem yeej yuav txaus nej cov niamtub siv mus yav tom ntej” (Nqe 7) 

Yog tias koj pom tamsim no koj kuj zoo li tug poj ntsuam ntawd, tab tom tshuav nuj nqis ntau, tej zaug koj yuav tau ua raws li rau kuajruam uas tus pojntsuam ntawd tau ua kom koj tau lub neej ywjpheej tsis tshuav nuj nqi. 

• Kaujruam 1: nthuav koj tej kev cheem tsum qhia pub rau Vajtswv. Lub caijnyoog txomnyem tsis yog lub caij uas koj so tsis mus hauv pe hawm, tsis yog yuav so tsis thov Vajtswv thiab so tsis ua Vajtswv haujlwm. Tus poj ntsuam hauv zaj xwm txheej no nws tau tham nws tej kev cheem tsum qhia rau Vajtswv tus cev lus. Nws tsis mus nrhiav lub hauv paus uas tsis ntseeg Vajtswv lossis tej lub tswv yim uas “ua kom nplua nuj sai”. Nws cheem tsum kev pab thiab nws khiav mus cuag Vajtswv. Yog li, yog tias koj cheem tsum kev pab, cia li khiav mus cuag Vajtswv. 
• Kaujruam 2: Tshuaj txog tej uas koj tseem muaj. Tus poj ntsuam no tseem tshuav ib me ntsis roj – yam uas txhua tus puavleej cheem tsum. Koj puas muaj yam twg uas txhua tus puav leej cheem tsum? Tej zaug yog ib yam uas tsis muaj nqis rau sab nqaij tawv li roj; tej zaug ho yog lub peev xwm, lub zog, uas koj muaj. Piv txwv li, kuv sau tau, qhia tau Vajluskub thiab ua tau ntau txoj haujlwm. 
• Kaujruam 3: Thov kev pab ntawm tsev neeg. Tus poj niam no muaj ob tug tub yuav pab nws. Nkawd tau pab nkawd niam mus qiv tej neeg zejzog cov hub. Cia lwm tus koom tes nrog koj, pab koj nrhiav tej uas koj cheem tsum kom coj tau koj mus txog rau qhov uas koj khiav tawm tsis raug tiv nuj nqi lawm. Cia li siv tsev neeg lub zog thiab tej peev xwm lossis cov neeg txheeb ze kom lawv pab koj. 
• Kaujruam 4: Tshuaj lwm tus tej kev cheem tsum: Saib seb koj tej peev puas pab tau lwm tus tej kev cheem tsum li cas? Tus poj ntsuam no thiab nws ob tug tub tau nrhiav pom cov neeg uas lawv muaj tej lub hub tseg cia siv tsis txog. Lawv yog cov neeg cheem tsum siv roj. Saib ib ncig seb leej twg yog tus cheem tsum tej uas koj muaj, txawm yog thaum uas koj tsuas muaj ib nyuag mentsis? Piv txwv li, kuv ntaus nqi tau tias leej twg yog tus uas yuav kawm tau lub peev xwm txawj sau ntaub ntawv, leej twg cheem tsum kom paub Vajluskub dua lossis xav kom muaj peev xwm txog kev ua thawj coj? 
• Kaujruam 5: Xyaum ua lag luam. Siv tej uas yus muaj ua haujlwm pab rau tej neeg uas lawv muaj kev cheem tsum. Tus poj ntsuam no nws muab nws cov roj nchuav rau cov hub txog rau thaum tsis muaj ib lub seem lawm. Tus poj ntsuam no cov roj tsis tas txog rau thaum tej hub tau laub kom puv nkaus. Thiab tus pog no cov roj muaj nqis heev. Koj tsis txhob muab yus lub peev xwm, koob hmoov muag pheej yig. Yuav tau muab ib tug nqi kom tsimnyog thiab tsis txhob txaj muag. Lawv yuav them nyiaj rau tej uas lawv xav thiab lawv cheem tsum. Tsuav yog muaj kev cheem tsum xwb ces koj yuav muaj cuab kav ua lag luam tau. 
• Kaujruam 6: Siv tej paj lim los ua yus lub neej. Tus poj ntsuam no tau muab nws cov roj muag coj mus them nuj nqi. Tshuav nws thiab nws cov tub siv cov uas tseem tshuav ntawd los pab rau nws lub cuab yig. Nws tsis yog tsuas muaj txaus los them nuj nqi xwb tiamsis tseem muaj txaus los pab rau tsev neeg. Tej uas nws muaj txaus  ua kom nws ua lag luam rau lub neej tom ntej. Yuav tau ua tib zoo siv tej paaj lim kom tsis rov qab luab nuj luab nqi dua.

Thov caw nrog kuv peb thov Vajtswv ua ke: Ua Vajtswv Koj tsaug vim Koj niaj hnub muab ntxiv, thiab foom hmoov kom kuv muaj lub neej puv npo thiab nplua nuj hauv Koj. Kuv thov hauv Tswv Yexus Khetos lub npe. Amees. 

Cov kwv tij txhua tus, koj puas tau npaj txhij kom tsis tshuav nuj tshuav nqi lawm tau? Sim siv 6 kaujruam kawm ntawm tus poj ntsuam no los ua ntej uas cov tswv qiv nyiaj lawv yuav tuaj xauj koj tsev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.