Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Tej cim ceeb toom pab kom peb paub ua ntej txog tej yam yuav tshwm sim los, tshwj xeeb yog tej teeb meem nyuaj uas yus yuav ntsib kom tsis raug kev puas tshuaj. Nyob hauv lub neej nrog tus Tswv mus, Vajtswv kuj muaj tej cim ceeb toom kom peb tsis mus deb ntawm Nws thiab thiaj tsis raug ris lub nra hnyav dhau ntawm qhov uas peb tsis mloog lus ntawd. 

Hnub no, yog hnub 18/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Scott Ross dhau ntawm zaj kawm LUB CIM CEEB TOOM

Pov-lauj ceeb toom cov ntseeg nyob hauv pawg ntseeg Philipis tias,“muaj ntau leej tsis ua lawv lub neej zoo, lawv thiaj saib tsis taus qhov uas Yexus Khetos tuag saum tus ntoo khaublig. Kuv twb qhia lawv zaj rau nej ntau zaus lawm. Nimno kuv rov qab qhia li no rau nej los kuv kua muag kawg li (Filipis 3:18)

Thaum tseem hluas, thaum nyuam qhuav yuav pojniam, kuv thiab kuv poj niam wb yuav kiag ib lub tsev nyob tom qab niam tais yawm txiv nkawd lub. Kuv niam tais nws ua nws lub neej nrog lub caij uas muaj kev txomnyem Loj, thiab xyoo twg los niam tais yeej cog qoobloo ntau hauv nws daim teb dav heev. Nws xav npaj txhua yam kom txhij nyob tsam ho rov  muaj yam dabtsi rov qab tshwm sim tuaj dua ib zaug ntxiv. Niam tais paub tias tshaib plab zoo li cas. 

Niam tais lub vaj zoo heev. Nws muab tej nyuag nyom rho pov tseg tib si thiab ywg dej txhua hmo. Kuv xav kawm txoj kev ua vaj, thiab niam tais zoo siab hlo qhia rau kuv. 

Muaj ib hmo tsaus ntuj yog lub caij ntuj kub, thaum uas peb ua ntsiag to rho nroj, niam tais ua tib zoo saib kuv. Niam tais pib nrog kuv sib tham zoo li ib tug neeg laus tsis yog xws li nws ib tug menyuam tub xeeb zoo li txhua zaug. Niam tais hais tias Vajtswv tau ua rau nws muaj ib zaj npau suav txog kuv. Kuv hnov cuag li kuv raug nqus rau hauv thiab muaj ntsis ntshai. Niam tais thaum twg twb hais txog Vajtswv tiamsis tsis tau muaj ib zaum twg hais txog npau suav. Niam tais hais rau kuv tias nws pom muaj ib nthwv cua loj heev tab tom ntsawj tuaj thiab tshuab kuv mus lawm. Kuv raug coj tawm hauv kuv tsev neeg mus, thiab tsis muaj ib zaum twg yuav rov ntsib lawv dua lawm. Txoj kev npau suav ntawd ua rau kuv ntshai vim kuv tab tom nyob rau hauv ib nthwv cua loj heev! Ntxws nyoog tab tom tsom ntsoov rau kuv thiab tab tom tua tuaj rau kuv tsev neeg. Tseeb tiag niam tais yeej tsis tau paub txog tej xwm txheej tshwm sim nyob rau hauv kuv tsev neeg thiab kuv hnov ntshai, tsis xav qhia rau niam tais paub thiab lwm tus paub li, tshwj xeeb yog lwm tus ntseeg Vajtswv. Kuv paub tias lawv yuav hais tsis zoo rau kuv. 

Txoj kev npau suav ntawd txawm cia li dhau los muaj tseeb. Ob hli xwb, kuv tsev neeg tau tso kuv tseg, vaj tsev poob tas, haujlwm los poob thiab kuv txojsia los yuav luag tuag. Kuv dhau los ua neeg npau taws thiab cim civ nrhuav tshem tus kheej. Kuv ntxub Vajtswv. Kuv tau maj mam ntxub Vajtswv, tsis yog nyob hauv txoj kev xav xwb. Kuv tau hais rau Vajtswv tias cia kuv nyob ib leeg ntsiag to. Kuv tsis xav ua neej pub rau Vajtswv ntxiv lawm. Kuv nkag siab tsis tau tias vim li cas ib tug Vajtswv, tus uas twb ceeb toom rau kuv ua ntej txog qhov xwm txheej yuav tshwm sim los, tiamsis ua cas ho cia tej kev ntxhov nyho no tshwm sim kiag thaum pib. 

Puas yog Vajtswv lub siab nyiam yog xav coj tag nrho tej uas kuv hlub tshaj plaws mus? Puas yog Vajtswv lub siab nyiam yog xav cia kom kuv ua neej tsheej hli nrog txoj kev npau taws thiab iab siab? Puas yog Vajtswv lub siab nyiam yog cia kom kuv ua ib tug neeg xav ua pauj, chim siab thiab ntau zaug tseem xav muab neeg tua pov tseg? Paub tias yeej tsis yog li ntawd! Thaum nyuam qhuav pib xwb kuv twb xaiv yuam kev lawm, tsis tsom ntsoov mus rau tej teeb meem ntawm sab ntsujplig thiab cim civ ua rau kuv txoj kev sib raug zoo nrog Vajtswv txias. Kuv pib ntsia txhua yam dhau ntawm kuv ob lub qhov muag tiag tiag pauv qhov uas muab kuv ob lub qhov muag sab ntsujplig los saib. Kuv tsis nyeem Vajluskub txhua hnub lawm. Pauv qhov uas siv zog thov Vajtswv tsis so, kuv pib tsis thov Vajtswv lawm thiab tom qab ntawd txawm cia li tso txoj kev thov Vajtswv tseg. 

Thaum no kuv paub tias Vajtswv tab tom ceeb toom kuv, xav kom kuv rov qab tshuaj xyuas txog kuv txoj kev ntawm sab ntsujplig thiab kho txhua yam uas yuam kev ntawd. kuv pom tias Vajtswv tab tom hu kom kuv yuav tau lees txim. 

Peb txoj kev sib raug zoo nrog Vajtswv zoo li lub vaj tau tu zoo zoo. Peb yuav tau mus dob nroj kom du lug, ywg dej txhua hnub rau lub vaj. Vajluskub hais txog tib neeg lub siab yog xav tawm tsam Vajtswv txog peb tej kev txhaum. Yog li, yog ib tug ntseeg Vajtswv, peb yuav ua tib zoo xyuas peb txoj kev sib raug zoo nrog Vajtswv txhua hnub. Peb txhob cia tus cag iab hlav tuaj – txoj kev iab siab rau Vajtswv los txhob pub muaj. Peb yuav tau muaj sijhawm nrog Vajtswv tham txhua lub sijhawm, maj nroos lees peb tej kev txhaum, yam ua tsis yog. Vajtswv ntsia pom tag nrho tej uas peb ua, yog li txhob ua zoo li tus tsis paub yog peb tsi quav ntsej ces qhov kev txhaum ntawd yuav ploj mus. 

Paulus tau ceeb toom cov ntseeg Filipis tias, “Muaj ntau leej tsis ua lawv lub neej zoo, lawv thiaj saib tsis taus qhov uas Yexus Khetos tuag saum tus ntoo khaublig. Kuv twb qhia lawv zaj rau nej ntau zaus lawm. Nimno kuv rov qab qhia li no rau nej los kuv kuag muag kawg li” (Filipis 3:18). 

Kuv paub muaj qee tus ntseeg Vajtswv yeej tseem muaj lub siab chim rau lwm tus ntseeg txog tej qhov teeb meem tiag hauv lub neej nrog rau tej kev xav tib si. Peb tsis xav kom raug lwm tus teem txim rau peb raws li tej uas peb tau teem txim rau lwm tus. Zam txim yog yam uas tau muab pub thiab txais los tsis yuav them nyiaj. Thaum peb tsis muab qhov khoom plig zam txim no rau lwm tus ces qhov khoom no hais li cas txog peb, yuav qhia rau peb paub tias peb yog leej twg, thiab peb zoo li cas? Peb tau Vajtswv zamtxim tsis yuav ib yam dabtsi, yog li peb thiaj tsis tau cai tso ib tug nqi rau lwm tus. Peb tsis muaj cai ua li ntawd. Tseeb tiag, thaum ua li ntawd, tej uas Tswv Yexus ua rau peb kuj tsis muaj nqis lawm thiab. Vim li cas? Los ntawm tej haujlwm uas peb ua, peb tab tom nthuav tawm tias Vajtswv txojlus tsis yog tseg rau peb ua. Peb txiav txim thiab suav tias peb lub siab nyiam tseem siab tshaj Vajtswv lub lawm thiab. Vajluskub sam hwm kom peb yuav tsum tau sib hlub thiab tib txhij ntawd kuj qhia paub tias: 

“Tus uas muaj kev hlub, nws ua taus siab ntev, nws muaj lub siab dawb siab zoo; nws tsis khib, tsis khavtheeb thiab tsis muab hlob; tus uas muaj kev hlub, nws tsis ua nruj ua tsiv, tsis qia dub, tsis chim sai; tsis cim ntsoov luag tej kev txhaum rau nruab siab; tus uas muaj kuv hlub, nws tsis nyiam kev phem kev qias, tiamsis nws nyiam kev ncaj kev ncees.  Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li” (1 Kauleethaus 13:4-7). 

Nyob hauv kuv lub neej, kuv tau ntsib dhau ntau lub vaj thiab ib yam uas ua rau kuv kawm tau yog, yog tsis ywg dej, tu kom zoo yus lub vaj ces yus lub vaj yuav tuag. Vajtswv xav kom peb yuav tau rov qab tshuaj xyuas peb txoj kev hlub pub rau Nws. Peb yuav tau tshuaj thiab xyuas saib peb txoj kev sib raug zoo nrog Nws puas cia siab thiab ruaj khov. 

Muaj ntau hnub kuv hnov khwv heev kom sawv tsees thiab txhais ruam mus nrog Vajtswv txoj kev tshwm ntsej tshwm muag, tiamsis kuv nco txog lub sijhawm muaj kev ntxhov siab, txhawj xeeb ntawd ua rau kuv tsis xav rov qab zoo li ntawd dua ib zaug ntxiv. Txhob cia tus kheej ntsib dhau nthwv cua txaus ntshai hauv lub neej. Cia li ceev faj txog tej lus ceeb toom. Cia li tshuaj koj sab ntsujplig. Txhob cia tej nyuag “nroj tsuag” hauv lub neej fab tuaj laum tej uas Vajtswv tseg rau Koj!

Thov caw nrog kuv peb thov Vajtswv ua ke: Tus Tswv, thov Koj zam txim rau kuv tej kev txhaum thiab kev qaug zog. Thov pab kom kuv paub txog Koj tej cim ceeb toom kom kuv maj nroos lees txim thiab rov qab ua kom txoj kev sib raug zoo nrog Koj rov tshiab tuaj thiab nrog rau txhua tus ib ncig kuv. Kuv thov hauv Tswv Yexus Khetos lub npe. Amees.

Cov kwv tij txhua tus, zaj kawm hnub no, koj puas txais tau lub cim ceeb toom twg los ntawm Vajtswv los? Koj txoj kev sib raug zoo nrog Vajtswv tamsim no tab tom zoo li cas? Koj puas xav siv ib mentsis sijhawm los ntaus nqi txog koj sab ntsujplig, lees koj tej kev txhaum rau Vajtswv thiab thov kom Vajtswv zam txim?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj