Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Tiam tom qab cheem tsum tiam tas los ua tus coj kev kom lawv loj hlob hauv txoj kev ntseeg thiab kev ua Vajtswv dejnum. Zoo kawg nkaus li, Vajtswv pub rau peb txhua tus ib leeg muaj ib lub siab ua tus coj, dhau los ua tus taw kev rau lwm tus los ntawm Vaj Ntsujplig lub hwjchim, kom lawv kub siab lug rau tes haujlwm pab rau tiam ua qab thiab tseem ntau tiam ntxiv. 

Hnub no, yog hnub 22/10/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Boyd Bailey dhau ntawm Zaj kawm LUB SIAB COJ KEV

“Kuv tus tub, koj yuav tsum cia siab rau Vajtswv txoj koob hmoov uas Vajtswv pub rau peb cov uas nrog Yexus Khetos sib raug zoo.  Koj yuav tsum muab tej lus uas koj thiab muaj ntau leej hnov kuv qhia lawm qhia rau cov neeg uas koj cia siab tau hais tias lawv yuav txawj qhia tej ntawd rau lwm tus.  Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees.” (2 Timautes 2:1-3)

Vajtswv pub rau tus neeg uas hwm Vajtswv muaj lub siab ua tus coj lwm tus kev nyob hauv txoj kev ntseeg kom lawv sab ntsujplig loj hlob. Lub siab ntawd tau txhawb zog los ntawm txoj kev hlub, txoj kev hlub pub rau Vajtswv thiab pub rau neeg, xav kom lawv loj hlob nyob rau hauv Vajtswv thiab yim hnub yim hlub Vajtswv. Ntau xyoo dhau los, kuv tau txais koob hmoov ntau vim muaj ntau tus pab kuv sab ntsujplig. Lawv hlub kuv, thiab vim lawv hlub kuv heev lawv thiaj tsis cia kuv nyob twj ywm ib qho hauv txoj kev sib raug zoo nrog Yexus Khetos,  nrog pojniam menyuam, nrog tsev neeg thiab kuv tej phooj ywg. Vim cov no lawv yeej hlub tshua txog kuv yog li lawv thiaj nrhiav sijhawm los pab kuv- yog li kuv nrhiav kev siv kuv li sijhawm, lub zog thiab nyiaj txiag mus pub rau lwm tus. Kuv yeej yog ib tug neeg tsis zoo tas nrho siv zog pab cov neeg uas kuj tsis zoo kom lawv loj hlob nyob rau hauv Tswv Yexus txoj kev hlub uas zoo kawg nkaus. Vajtswv pub rau peb txhua txhua tus muaj lub siab ua tus coj kev. 

Paulus ua tib zoo hais txog Timautes zoo li ib tug tub ntawm sab kev ntseeg. Yim muaj hnub nyoog yuav yim pom tus hluas no muaj peev xwm. Timautes txoj kev txo hwjchim pab rau yawg muaj peev xwm kawm, thiab tsim nyog yog tus loj hlob zoo nyob rau hauv Tswv Yexus txoj kev hlub. Tab meeg ntawm sawv daws, Paulus hais kom Timautes xaiv cov neeg uas muaj txaus lub peev xwm los cob qhia kom lawv dhau los ua cov coj lwm tus. 

Zoo ib yam li cob qhia ib tug tub rog zoo, tes haujlwm tawm tswv yim zoo yuam kom peb yuav tau paub tswj yus tus kheej, tso taug txhua yam thiab tiv taug txhua yam. Hloov pauv ib tug neeg lub neej yuam kom peb yuav tau muaj kev cog lus, yog li tus neeg taw kev yuav tau txuas ua ke nrog tus neeg uas lawv xav kom tau lub neej zoo dua qub. Cia li nqes peev rau cov neeg uas ntseeg siab tau – thiab lawv cov ntawd yuav mus nqes peev rau lwm tus uas txaus ntseeg ntxiv. 

“Koj yuav tsum qhia Vajtswv txoj kevcai rau lawv, thiab qhia rau lawv ua lawv lub neej kom raws li kevcai. Tiamsis koj yuav tsum xaiv ib co txivneej uas muaj peevxwm hauv cov Yixalayees thiab tsa lawv ua cov thawj kav cov pejxeem: tsa thawjcoj kav ib txhiab leej, kav ib puas leej, kav tsib caug leej thiab kav kaum leej. Lawv cov no yuav tsum yog cov uas hwm Vajtswv, yog cov uas sawvdaws cia siab tau rau thiab yog cov uas tsis yuav luag tej nyiaj xiab” (Khiavdim 18:20-21)

Yog koj tos txog rau thaum muaj txaus, txhais tau tias zoo txaus lawm mam coj lwm tus, koj yuav tsis muaj ib hnub twg ua tau. Cov neeg uas ua tau qauv zoo rau lwm tus feem ntau lawv yuav pom tias lawv yog cov uas tsis paub ntau. Lawv kuj qaug zog nrog tej kev sib tawm tsam nrog tej kev ntxeev ntxias thiab tej yam uas tus kheej muaj tsis txaus. Tus laus thiab tus hluas lawv puav leej muaj txoj kev ntshai, tsis tso siab thiab ntshai tus kheej ua tsis tiav. 

Tiamsis zoo li Paulus, koj muaj cai caw cov neeg uas ncaj ncees xav koom tes ua ke nrog koj nyob rau hauv txoj kev uas nrog Tswv Yexus mus tag yus lub neej. Txoj kev mus deb tshaj plaws ntawm txoj kev ntseeg tsis yog kev sim siab thiab kev txomnyem. Tiamsis yog koom ua ke – tus hluas thiab tus laus – peb yuav tau ua siab ntev tiv. Cia li pib ua ke nrog ib tug neeg muaj lub siab ntshaw kom loj hlob, tom qab ntawd nthuav dav mus ua ib lub zej zos me. 

Koj muaj cuab kav tsim muaj ib pab txij li 6 txog 8 tus tib neeg muaj lub siab hlub Vajtswv thiab ntshaw kom loj hlob sib ntsib txhua zaug. Koom kawm Vajtswv txojlus ua ke, kawm cim nco Vajluskub thiab ib leeg thov Vajtswv pab rau ib leeg. Ntau zaug, kuj yuav tau npaj kom muaj lub sijhawm tseg rau sawv daws mus so ua si nyob rau hauv xyoo. Ntawd yog lub sijhawm cia rau sawv daws los nyob ze ua ke, ib leeg nkag siab ib leeg thiab muaj lub sijhawm thov Vajtswv ua ke. Kav tsij siv txoj kev uas phim rau koj xwb ntag. 

Tej zaug koj yuav cim civ nug tias: “Kuv yuav pib los ntawm qhov twg?” Cia li pib los ntawm txoj kev thov Vajtswv. Cia li thov Vajtswv coj koj txoj hau kev mus ntsib cov neeg uas lawv muaj lub siab ntshaw kom loj hlob hauv kev ntseeg, tus cwjpwm thiab lawv txoj kev sib raug zoo. Tshaj qhov ntawd, yuav tau vam khom Vaj Ntsujplig cia Vaj Ntsujplig ua tus qhia rau koj lub hlwb thiab lub siab. Vajtswv hlub cov tib neeg uas muaj lub siab xav ua tus tawm tswv yim thiab coj lwm tus kev.

Thov caw nrog kuv peb thov Vajtswv ua ke

Leej Txiv saum ntuj tus uas hlub kuv! Thov pub rau kom kuv muaj lub siab hlub thiab muaj lub siab xav coj lwm tus kev, pab kom lawv loj hlob hauv txoj kev hlub Koj, kom tiam txuas ntxiv lawv yuav los txais tes haujlwm ua tus tawm tswv yim thiab txhim tsa muaj lub zej zog ntseeg Vajtswv yim hnub yim loj hlob. Kuv thov hauv Tswv Yexus Khetos lub npe. Amees.

Cov kwv tij uas hlub thiab tshua, tamsim no peb muaj cuab kav pib kiag tes haujlwm coj lwm tus kev hauv kev ntseeg. Koj muaj cuab kav caw leej twg los koom rau hauv pawg tawm tswv yim nrog koj? Nqua hu sawv daws thiab pib koom tes ua kiag, koj yuav ntsia pom tej paj txiv uas tes haujlwm ntawd zoo kawg nkaus li.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj