Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Vajtswv tejlus cog tseg yuav foom hmoov rau Anplahas tau muab cev  rau Ixaj, ces Ixaj rov muab cob rau Yakhauj, thiab Yakhauj thiaj muab cob rau 12 xeem haiv neeg Yixalayees thiab dhau ntawm Tswv Yexus txoj koob hmoov ntawd tau muab faib rau txhua haiv neeg. Koj puas nco Vajtswv tshav ntuj vim tau nyob rau hauv txoj koob hmoov ntawd? Thiab koj puas xav ua tus neeg cob Vajtswv tej koob hmoov rau lwm tus? 

Hnub no, yog hnub 22/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gordon Robertson dhau ntawm zaj kawm COB TXOJ KOOB HMOOV

Vajtswv thiaj foom koob hmoov rau lwm haivneeg uas los ntseeg Yexus Khetos raws li Vajtswv tau coglus tseg rau Anplahas, thiab Vajtswv pub Vaj Ntsujplig rau peb txhua tus uas ntseeg Yexus Khetos raws li Vajtswv tau coglus tseg lawm. (Kalatias 3:14).

Zaj xwm txheej txog Yakhauj zoo li ib zaj movies muaj ntau zaj, tiamsis Vajtswv thiaj yog tus nruab nrab nyob rau hauv zaj xwm txheej ntawd. Yakhauj thiab Exaus nkawd yog ob kwv tij ntxaib tau Ixaj yug los thiab nkawd yog Anplahas xeeb ntxwv. Ua ntej uas nkawd tau yug los, Vajtswv tau hais rau Lenpekas, 

“Muaj ob haivneeg nyob hauv koj plab; Koj yuav yug tau ob haivneeg uas yuav sib tawmtsam. Ib tug yuav muaj zog tshaj lwm tus, tus tij yuav ua tus kwv qhev.” (Chivkeeb 25:23). 

Thaum nyuam qhuav pib xwb ces Yakhauj twb siv zog ua ntej lawm, dhau ntawm qhov uas tuav Exaus ko taw, yog li yawg lub npe nyob rau hauv lus Henplais thiaj muaj lub ntsiab tias “tuav luj taw”. 

Yakhauj kuj yog ib tug neeg txawj ua zaub mov noj thiab siv ib tais kua taum los pauv Exaus lub meej mom tub hlob. 

Tom qab no, Yakhauj yuav ob tug poj niam yog cov neeg Hitis thiab ntawd yog ib qhov kev iab siab rau Ixaj thiab Lenpekas nkawd lub neej. Tom qab Lenpekas pab Yakhauj dag nws txiv Ixaj foom koob hmoov rau yus pauv qhov uas yuav foom rau Exaus. Thaum Exaus nrhiav kev yuav muab Yakhauj tua pov tseg ces Lenpekas ho ntxias Ixaj siab kom txib Yakhauj rov mus rau qub teb chaws yuav ib tug pojniam nyob rau hauv nws tsev neeg txheeb ze. 

Chivkeeb 28:10 qhia paub tias Yakhauj txawm pib sawv kev ntawm Npesenpas mus txog rau ntawm Halas. Feem ntau thaum koj pib mus thawj kaujruam hauv txoj kev ntseeg, ces Vajtswv yuav ntsib koj nyob rau qhov ntawd. Yakhauj ua npau suav pom ib tug ntaiv tuam hauv pem teb mus ti nkaus saum ntuj – thiab nyob ntawd Vajtswv tau nrog yawg sib tham. 

Txawm yog nyiam Laxees dua los Yakhauj yog ib tug neeg txawj dag lwm tus, ces ho raug nws tus dablaug Lanpas dag kom yuav tus niam laus ua ntej. Tom qab ntawd Yakhauj ob tug pojniam dhau los ua ob tug yeebncuab pheej muaj kev sib txeeb tsis paub xaus li, rub nkawd tej ntxhais qhev los koom tes rau txoj kev sib tw saib leej twg muaj menyuam ntau dua. Yog li Yakhauj thiaj muaj tag nrho yog 12 leej tub. Thaum kawg, Yakhauj txiav txim siab rov los rau nws txiv tsev, Yakhauj tsis paub tias nws tus tijlaug Exaus puas tseem muaj lub siab xav tua kom yus tuag. 

Yakhauj nrog Vajtswv sib mos ib hmo kaj ntug. Tom qab ntawd Vajtswv hais, “Tus txivneej ntawd hais tias, “Koj lub npe yuav tsis hu ua Yakhauj ntxiv lawm. Rau qhov koj muaj peevxwm nrog Vajtswv thiab nrog neeg sib qhau, thiab ua rau koj yeej lawm, yog li ntawd, yuav muab koj lub npe tis hu ua Yixalayees.” (Chivkeeb 32:28). 

Yog tias lub neej yooj yim tsis muaj ib yam dab tsi khwv, tsis paub xyov Yakhauj puas ua taus siab ntev thiab muaj yeej? 

Qhov tseem ceeb yog nyob tag nrho hauv zaj xwm txheej yog Ixaj tau foom koob hmoov rau Yakhauj. 

“Thov Vajtswv tus muaj hwjchim loj kawg nkaus foom koob hmoov rau koj thiab pub koj muaj tub ki coob, kom koj ua tau ntau haivneeg yawgkoob. Thov kom nws foom koob hmoov rau koj thiab koj tej xeebntxwv ib yam li nws foom koob hmoov rau Anplahas, thiab thov kom koj tau thaj av uas Vajtswv muab pub rau Anplahas uas koj tau los nyob no lawm ua koj tug.” (Chivkeeb 28:3-4). 

Ntawm no yog Vajtswv lub homphiaj. Txoj koob hmoov uas Vajtswv pub rau Anplahas tau muab cev rau Ixaj, thiab dhau ntawm Ixaj cev mus rau Yakhauj. Pib ntawm Yakhauj tau muaj 12 xeem neeg Yixalayees, thiab tus Mexiyas tau yug ntawd los. 

Yog li, lub caij ua tsaug yog lub caij tseg rau koj ua Vajtswv tsaug txog tej yam Vajtswv tau ua. Tom qab ntawd, cia li thov Vajtswv rau koj tsev neeg, thov Vajtswv foom koob hmoov rau sawv daws. Cia li muab tej koob hmoov zoo kawg nkaus uas Vajtswv tau pub rau koj faib rau txhua tus. 

“Vajtswv thiaj foom koob hmoov rau lwm haivneeg uas los ntseeg Yexus Khetos raws li Vajtswv tau coglus tseg rau Anplahas, thiab Vajtswv pub Vaj Ntsujplig rau peb txhua tus uas ntseeg Yexus Khetos raws li Vajtswv tau coglus tseg lawm.” (Kalatias 3:14).

Thov caw nrog kuv peb thov Vajtswv ua ke: Ua Vajtswv Koj tsaug txog tej koob hmoov loj uas Koj tau pub rau kuv, tshwj xeeb yog txoj kev cawmdim nyob hauv Tswv Yexus. Thov pab kom kuv yuav yog ib tug neeg cev Koj txoj koob hmoov rau coob tug ntxiv. Kuv thov hauv Tswv Yexus Khetos lub npe. Amees.

Cov kwv tij txhua tus, cia li cev Vajtswv tej koob hmoov rau koj tsev neeg, koj tej menyuam kom lawv kuj tau koom rau hauv Vajtswv txoj koob hmoov. Koj yuav ua tau tej no dhau ntawm qhov uas qhia tej menyuam kom lawv paub Vajtswv, hlub Vajtswv, thiab siv yus lub neej hwm Vajtswv los ua qauv zoo rau tej menyuam xyaum.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.