Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas tau muaj zaum twg koj sim xav tias cheeb tsam koj tab tom ua neej nyob muaj tej tsiaj tsiv tshwm sim ntawd lawm los tsis tau? Koj yuav ua dabtsi los tiv thaiv koj tus kheej, tsev neeg thiab tej tsiaj nyeg uas koj yug? Thiab yog tias muaj tej tus tsiaj ntsia tsis pom tab tom yuav tom koj lub neej sab ntsujplig koj yuav dab tsi? 

Hnub no, yog hnub 23/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Markins dhau ntawm zaj kawm TEJ KEV PHOMSIJ LOS NTAWM TEJ TSIAJ HEEV LOS

Thaum tubsab tuaj tsuas yog tuajnyiag, tuaj tua thiab ua kom puastsuaj xwb. (Yauhas 10:10a)

Dev qus pheej tshwm nyob ntawm txoj kev kuv taug. Nej txhob nkag siab yuam kev, kuv tsis yog tabtom ua neej nyob rau ntawm cheeb tsam tsis muaj neeg coob hauv cheeb tsam Montana, thaj chaw uas nto npe lug muaj tej roob siab thiab tej hav zoo loj kawg. Tsis yog, kuv tab tom nyob hauv nroog Phoenix, plawv nroog thiab lub nroog loj tshaj plaws ntawm cheeb tsam Arizona, yog lub nroog uas muaj tib neeg nyob coob tshaj plaws teb chaws Amelikas. Qhov teeb meem yog lub nroog ntawm kuv nyob no nws npuab kiag ib cheeb tsam tseg rau tej tsiaj qus nyob. Nyob ntawd tsis muaj ib lub phab ntsa twg xov los tiv thaiv, tsuas muaj tej ntawv ceeb toom “txwv tsis pub mus ze” yog li thiaj muaj tej tsiaj qus pheej khiav dhau kev li tej tib neeg hla kev hauv nroog. Ob peb xyoo tas los, kuv tus miv tau raug ib tug tsiaj tom noj kiag ntawm kuv lub tshav puam thiab tsis pom nws ib zaug ntxiv li lawm. 

Meej heev tej no ua rau tej pejxeem nyob rau hauv peb lub nroog no pom tias lawv tab tom ua neej nyob nrog tej kev phomsij, tshwj xeeb yog tseg rau tej tsiaj nyeg uas lawv yug. Tsis paub thaum twg, tej dev qus, dav tw liab, noog plas kub loj, kuj tom tau peb tej miv, tej dev uas peb hlub. 

Qhov teeb meem yog cov tsiaj qus no lawv tab tom nkaum nyas thiab nrhiav sijhawm zoo tom nqaij. 

Yog li peb tej tsiaj peb yug lawv tsis muaj ib zaum twg yuav tau ua lub neej tso siab lug li. 

Tej no kuj zoo ib yam li uas peb pheej raug nplig kom pw tsaug zog, hnov tso siab pluav thiab hnov qab lawm tias ib ncig ntawm peb thaum twg twb muaj kev phomsij yuav los. Tej kev phomsij ntawd tau ua dhau ntawm tej txoj kev sib txawv. Ntawd tej zaug yuav yog khwv tsis paub so ua rau peb tsis muaj sijhawm pub rau tsev neeg; tej kev txhawj ntshai tav peb kom peb tsis kam ua ib yam dab tsi tshiab; tej khoom ntiajteb ua rau peb ntsia tsis pom sab ntsujplig; lub siab ntshaw ua kev nkauj nraug ua rau peb tsis muaj kev hlub nyob rau hauv lub neej txijnkawm; khav theeb ua rau peb tso peb siab dua lwm tus; thiab kev tag kev cia siab ua rau peb poob txoj kev ntseeg siab thiab kev zoo siab nyob rau hauv lub neej. 

Tswv Yexus thiaj hais tias: “Thaum tubsab tuaj tsuas yog tuajnyiag, tuaj tua thiab ua kom puastsuaj xwb.” (Yauhas 10:10a). 

Kuj zoo ib yam li tus dev qus tsiv twg lossis tus dav tw liab twg, tej tub sab uas peb nyuam qhuav hais tas saum toj no kuj txaus ntshai kawg. Lawv txeem los rau hauv peb lub neej peb yeej ntsia tsis pom txog rau thaum tej kev phomsij pib tshwm zuj zus tuaj. 

Yog li, npaj tiv thaiv ua ntej tsis tau muaj ib zaum twg yuav yog tias tsis siv txog li. Vajluskub qhia tias, “Tiamsis peb yuav tsum muab tus Tswv Yexus Khetos tej cuabyeej los tuav; thiab tsis txhob quavntsej tej kev phem kev qias uas nej lub siab nyiam ua.” (Loos 13:14). 

Nyob rau ntawm cov neeg nyiam tej tsiaj nyeg thiab ua zoo saib xyuas, lawv cim civ xov ib ncig ntawm lawv tej tsev tiv thiav. Kuj muaj qee yam uas peb yuav tau ua kom tiv thaiv, thaiv tej yeeb ncuab tuaj tua peb lub neej. Yuav tau nco ntsoov tshuaj peb lub neej raws li tej lus nug hauv qab no: 

• Kuv puas tab tom siv kuv lub sijhawm rau tej yam tseem ceeb tshajplaws?
• Kuv tab tom ua haujlwm raws li txoj kev ntshai lossis txoj kev ntseeg?  
• Yam twg yog yam uas kuv nyiam thiab tsis xav muab tso tseg? 
• Kuv txoj kev hlub thiab kev xav txijnkawm puas yog chaw?
• Kuv puas paub Vajtswv ntau dua nyob hauv kuv lub neej txhua hnub?
• Kuv tab tom nrhiav pom tej kev zoo siab thiab cia siab ntawm tej kev sim siab zoo li cas?

Ntawd yog tej lus nug yooj yim uas koj yuav siv tau coj los tshuaj tus kheej txhua hnub zoo li daim phab ntsa thaiv koj lub siab thiab koj lub hlwb. Koj kuj muaj cuab kav ntxiv rau hauv tej lus nug ntawd ntau lo lus nug ntxiv. Nco qab ntsoov tias npaj kom txhob pub cig zoo dua li uas koj mus tua thaum twb kub nyhiab lawm. Npaj tiv thaiv koj tus kheej pauv qhov tos kom yeeb ncuab twb tua tuaj lawm koj mam lis mus kho lub qhov txhab ntawd.

Thov caw nrov kuv peb thov Vajtswv ua ke: Tus Tswv, thov Koj pab kom kuv paub ua rawsli Koj tus qauv tawm tsam tej kev sim siab los raug rau tus kheej. Thov pab kom kuv muaj yeej hauv Ntxwsnyoog tej kev sim siab txhua hnub. Kuv thov hauv Tswv Yexus Khetos lub npe. Amees.

Cov kwv tij txhua tus, tus yeeb ncuab twg tab tom tsim muaj kev phomsij rau koj lub neej? Cia li siv ob peb feeb luv luv los tshuaj tus kheej nrog tej lus nug yooj yim, kom paub tias koj tab tom tiv thaiv zoo npaum li cas. Yog tias pom koj tus kheej txoj kev tiv thaiv muaj teeb meem, tamsim no kav tsij rov qab kho dua txoj kev tiv thaiv koj lub neej ua ntej uas yeeb ncuab yuav nkag tau los rau hauv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.