Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Peb lub neej no muaj ntau yam zoo nkauj heev, los ntawm ib puas tsav yam uas Vajtswv tsim, tej tsiaj txhu, nrog tej lub npuas kheej kheej thaum peb tshuab cov tshuaj ntxhua ris tsho. Tag nrho tej yam zoo nkauj ntawd tig peb mus rau ntawm Tus Tswv tsim ib puas tsav yam, uas yog Leej Txiv saum ntuj ceebtsheej, tus uas hlub peb tib neeg tshaj plaws.

Hnub no, yog hnub 24/09/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Virginia dhau ntawm zaj kawm TEJ YAM UAS ZOO NKAUJ

Rau qhov Koj yog tus tsim ib puas tsav yam huv tibsi; koj pom zoo tsim tej ntawd thiab pub tej ntawd muaj sia nyob. (Tshwm sim 4:11b).

Thaum uas zaum tos cov tub pab ntxuav ntsheb, kuv lub hlwb tig rov qab mus rau lub sijhawm puag thaum ub nrog tej lub sijhawm zoo tau muab khaws cia uas yuav tsis hnov qab tau li. Kuv nco thaum ntawd txhua zaug uas mus ntxuav tsheb, tag nrho tsev neeg muaj 4 tug, wb ib niam txiv thiab 2 tug menyuam puav leej ua haujlwm. Hais tias ua haujlwm xwb tseeb tiag tagnrho peb tab tom sib tawb ua si nrog npuas thaum tshuab cov tshuaj ntxhua ris tsho ua npuas tuaj.

 “Txiv, koj saib seb kuv lub npuas ya siab dua koj lub lawm os” – kuv tus tub zoo siab heev qw nrov nrov.

“Tshuav kuv tus kwv li nws lub tab tom ya kiv yoj yeeg saum ntuj” – wb tus ntxhais los koom rau hauv.

Xav txog qhov ntawd xwb, kuv cev tes mus plhws kuv cov plaub hau uas twb dawb zuj zus thiab nrog Vajtswv sib tham, “Vajtswv kuv tsis nkag siab tias vim li cas kuv kuj tseem xav saib tej npuas tshuaj ntxhua ris tsho ntawd.” thaum ntawd muaj ib nqe Vajluskub tau tshwm nyob rau hauv kuv lub hlwb:

“Rau qhov Koj yog tus tsim ib puas tsav yam huv tibsi; koj pom zoo tsim tej ntawd thiab pub tej ntawd muaj sia nyob.” (Tshwm sim 4:11b).

Yog lawm ntawd yog lo lus teb rau qhov uas vim li cas kuv ho xav saib cov npuas tshuaj ntxhua ris tsho ntawd ya. Vim Vajtswv tau tsim muaj tej ntawd kom ua rau kuv zoo siab. Tiamsis tej uas Vajtswv tsim los tsis yog tsuas tas li no xwb. Nws tsim tau tej lub qwj lub plhaub muaj ntau cov xim sib xyaw daws zoo kawg nkaus li. Nws ua rau kom tus noog yaj yuam tus tw nthuav dav tuaj saib zoo nkauj kawg li. Thiab tseem tshuav ntau yam ntxiv. Tseeb tiag, Vajtswv yog tus tsim ib puas tsav yam uas zoo kawg nkaus. Nws tsim muaj txhua yam rau peb tib neeg tau txais los siv. Tiamsis, tseem tshuav ntau tshaj tej ntawd thiab…

Vajleej txiv saum ntuj hlub peb tibneeg heev mus txog qib uas pub rau peb muaj peev xwm tsim tau ntau yam zoo nkauj rau qhov peb tibneeg tau tsim los muaj tus yam ntxwv zoo li Vajtswv. Vajluskub nthuav qhia tias tom qab uas tsim tau txhua yam lawm, “Vajtswv pom tej ntawd zoo kawg nkaus” (Saib Chivkeeb 1:4,10,12,18,21,25). Tiamsis, thaum uas tsim tau tib neeg, Vajluskub sau ntxiv tias “Vajtswv saib ib puas tsav yam uas nws tsim ntawd, thiab ua rau nws txaus siab heev” (Chivkeeb 1:31).

Paulus hais txog yam no li no: “Peb yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo uas Vajtswv twb xub npaj tseg cia rau peb ua lawm.” (Efexaus 2:10).

Yam uas zoo kawg nkaus yeej tseem tsis tau xaus ntawm no…

Leej Txiv saum ntuj hlub tibneeg txog ntua qib uas los nyob ua ke nrog tib neeg zoo siab hlo thiab thiaj hu zaj nkauj kev hlub tau sau cia nyob hauv Xefaniyas 3:17

“tus Tswv uas yog nej tus Vajtswv yeej nrog nraim nej nyob; Nws lub hwjchim ua rau nej kovyeej lawm! Tus Tswv yuav txaus siab kawg rau nej vim Nws txoj kev hlub, Nws yuav pub nej muaj lub neej tshiab. Nws yuav hu nkauj thiab zoo siab heev rau nej.”

Txawm yog los ntawm lub qhov ntsej sab nqaij tawv no peb mloog tsis tau los Vajluskub yeej hais meej meej tias Vajtswv yuav hu nkauj. Thiab ntau zaug thaum uas muaj ib tug neeg pehawm qhuas Nws tus Vajtswv tsim ib puas tsav yam Vajtswv tso cai rau lub suab nkauj no nrov hauv peb lub siab.

Tus phooj ywg, Vajtswv hlub koj mus txog ntua qib uas Nws hu nkauj vim koj. Yog li, cia li txaus siab txais yuav lub ntiajteb uas Nws tau tsim muaj. Cia li qhuas Nws txog lub peev xwm uas Nws tau muab pub rau koj kom ua tiav Nws txoj haujlwm tau hu koj los ua. Ua ntej tshaj plaws, cia li qhuas Nws vim Nws yog Leej Txiv saum ntuj uas zoo kawg nkaus, yog tus uas tsim peb los.

Thov caw nrog kuv peb thov Vajtswv ua ke: Leej Txiv saum ntuj, ua Koj tsaug vim tau tsim muaj ib puas tsav yam pub rau kuv tau siv nyob hauv lub ntiajteb no. Ua Leej Txiv Koj tsaug vim txhua yam zoo kawg nkaus uas Koj tau ua nyob rau hauv kuv lub neej. Thov pab kom kuv lub neej yuav yog ib zaj nkauj hu qhuas Koj lub npe. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tsis yog tsuas yog tus Tswv uas tsim muaj ib puas tsav yam zoo kawg nkaus xwb tiamsis Nws tseem yog tus hlub koj thiab xav kom muaj txoj kev sib raug zoo ua ke nrog koj tus kheej. Cia li zoo siab txais yuav tej yam uas Vajtswv tau muab pub thiab cog lus yuav siv koj lub neej los qhuas txog Leej Txiv saum ntuj txoj kev zoo kawg nkaus.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.